1-2. (a) Tanbasá ita bele fiar katak Jesus hakarak ita atu komemora ninia mate iha dalan neʼebé simples? (b) Ita sei koʼalia kona-ba Jesus nia hahalok saida deʼit?

ITA bele esplika buat neʼebé akontese durante Naʼi nia Han-Kalan ka lae? Klaru katak ita barak bele hanoin-hetan buat neʼebé halaʼo durante Naʼi nia Han-Kalan. Tanbasá? Tanba Naʼi nia Han-Kalan mak serimónia neʼebé simples. Maibé, serimónia neʼe importante tebes. Entaun, karik ita husu: ‘Tanbasá arranju kona-ba Naʼi nia Han-Kalan mak simples?’

² Durante Jesus haklaken iha rai, Jesus koñesidu tanba nia hanorin lia-loos iha dalan neʼebé simples, klaru, no fasil atu komprende. (Mt 7:28, 29) Nuneʼe mós, nia hatudu ba ita dalan simples atu komemora * ninia mate. Mai ita hanoin didiʼak kona-ba Naʼi nia Han-Kalan no buat balu neʼebé Jesus hatete no halo. Neʼe sei ajuda ita komprende liután oinsá Jesus hatudu haraik an, aten-brani, no domin, no ita sei aprende oinsá ita bele banati-tuir nia ho didiʼak.

3. Hanesan temi iha Mateus 26:26-28, oinsá dalan neʼebé Jesus hahú Memoriál mak simples? Buat rua neʼebé Jesus uza reprezenta saida?

³ Jesus hamutuk ho ninia apóstolu naʼin-11 bainhira nia hahú Memoriál hodi komemora ninia mate. Nia uza ai-han resin husi festa Páskua no halo komemorasaun simples. (Lee Mateus 26:26-28.) Nia uza paun neʼebé la iha fermentu no tua-uvas neʼebé iha ona. Jesus hatete ba ninia  apóstolu sira katak buat simples rua neʼe mak reprezenta ninia isin no raan neʼebé perfeitu, neʼebé sei hasaʼe nuʼudar sakrifísiu ba sira-nia diʼak. Apóstolu sira-neʼe karik la hakfodak ho arranju simples husi komemorasaun importante neʼe. Tanbasá?

4. Oinsá mak konsellu neʼebé Jesus fó ba Marta ajuda ita atu komprende tansá Jesus halo Naʼi nia Han-Kalan neʼebé simples?

⁴ Hanoin toʼok kona-ba buat neʼebé akontese fulan balu antes neʼe. Jesus haklaken ba tinan tolu ona bainhira nia vizita ninia belun diʼak Lázaro, Marta, no Maria. Iha tempu neʼe mak Jesus hanorin sira. Marta iha neʼebá, maibé nia okupadu hodi prepara ai-han barak ba bainaka importante neʼe. Bainhira Jesus haree ida-neʼe, nia ho laran-diʼak korrije Marta hodi ajuda nia atu haree katak la presiza ai-han barak. (Lc 10:40-42) Bainhira hela oras balu deʼit atu Jesus fó nia moris nuʼudar sakrifísiu, nia aplika ninia konsellu rasik hodi halo Naʼi nia Han-Kalan neʼebé simples. Neʼe hanorin ita saida kona-ba Jesus?

5. Memoriál simples neʼe hatudu saida kona-ba Jesus? Oinsá mak ida-neʼe liga ho buat neʼebé hakerek iha Filipe 2:5-8?

⁵ Jesus hatudu haraik an liuhusi ninia liafuan no hahalok hotu. Tan neʼe ita la hakfodak katak nia hatudu haraik an iha ninia kalan ikus iha rai. (Mt 11:29) Nia hatene katak lakleur tan nia sei hasaʼe sakrifísiu neʼebé boot liu no Jeová sei halo nia moris-hiʼas hodi sai liurai iha lalehan. Maski nuneʼe, nia la dada atensaun ba nia an rasik hodi haruka ninia dixípulu sira atu komemora ninia mate iha dalan neʼebé komplikadu. Duké halo nuneʼe, Jesus hatete ba sira katak tinan ida dala ida sira tenke hanoin-hetan nia liuhusi Memoriál neʼebé simples. (João 13:15; 1 Kor 11:23-25) Memoriál simples neʼe hatudu katak Jesus laʼós ema neʼebé foti an. Ita kontente tanba hahalok haraik an mak ita-nia Liurai iha lalehan nia hahalok furak ida.​—Lee Filipe 2:5-8.

6. Oinsá mak ita bele banati-tuir Jesus nia haraik an bainhira ita hasoru susar?

⁶ Oinsá mak ita bele banati-tuir Jesus nia hahalok haraik an? Ita hatudu haraik an hodi tau uluk ema seluk nia diʼak duké ita-nian rasik. (Flp 2:3, 4) Hanoin fali kona-ba Jesus nia kalan ikus iha rai. Jesus hatene katak lakleur tan nia sei mate, maibé nia hanoin liu kona-ba ninia apóstolu sira neʼebé laran-metin, tanba lakleur sira sei triste kona-ba ninia  mate. Entaun, nia uza ninia kalan ikus hodi hanorin, anima, no hametin sira. (João 14:25-31) Jesus ho haraik an hatudu katak nia hanoin ema seluk nia diʼak duké ninia an rasik. Jesus hatudu duni ezemplu kapás ba ita!

7. Oinsá mak Jesus hatudu aten-brani neʼebé boot bainhira nia halo tiha Naʼi nia Han-Kalan?

⁷ Jesus hatudu aten-brani neʼebé boot bainhira nia halo tiha Naʼi nia Han-Kalan. Oinsá? Jesus prontu atu halo tuir ninia Aman nia hakarak, maski nia hatene katak ema sei fó kastigu-mate ba nia tanba duun nia koʼalia aat Maromak. (Mt 26:65, 66; Lc 22:41, 42) Jesus nafatin hatudu laran-metin neʼebé perfeitu. Nia kontinua fó glória ba ninia Aman nia naran, tane aas Maromak nia direitu atu ukun, no loke dalan ba ema sira neʼebé arrepende an atu hetan moris rohan-laek. Iha tempu hanesan, Jesus prepara ninia dixípulu sira ba buat neʼebé lakleur tan sira sei hasoru.

8. (a) Jesus fó sai saida ba ninia apóstolu sira? (b) Tinan barak depois ninia mate, oinsá mak Jesus nia dixípulu sira banati-tuir ninia ezemplu kona-ba aten-brani?

⁸ Jesus mós hatudu aten-brani hodi la tau fokus ba ninia laran-susar, maibé tau fokus atu ajuda ninia apóstolu sira neʼebé laran-metin. Han-kalan simples neʼebé nia halo depois nia haruka tiha Judas sai, fó-hanoin ba ema sira neʼebé sei sai ninia dixípulu neʼebé hetan kose-mina kona-ba benefísiu husi Jesus nia sakrifísiu no mós husi hola parte iha aliansa foun. (1 Kor 10:16, 17) Atu ajuda ninia dixípulu sira laran-metin nafatin no bele hamutuk ho Jesus iha lalehan, nia fó sai ba sira kona-ba buat neʼebé nia no ninia Aman hakarak sira atu halo. (João 15:12-15) Jesus mós fó sai ba apóstolu sira-neʼe kona-ba terus neʼebé sira sei hasoru. Tuirmai, nia  anima sira atu halo tuir ninia ezemplu, nia haruka sira atu “aten-brani bá!” (João 16:1-4a, 33) Tinan barak liutiha, Jesus nia dixípulu sira nafatin banati-tuir ninia ezemplu kona-ba la hanoin an deʼit no hatudu aten-brani. Sira prontu atu apoia malu iha susar laran, maski neʼe lori terus ba sira.​—Ebr 10:33, 34.

9. Oinsá mak ita bele banati-tuir Jesus kona-ba hatudu aten-brani?

⁹ Ohin loron ita mós banati-tuir Jesus nia ezemplu hodi hatudu aten-brani. Porezemplu, ita presiza aten-brani atu ajuda ita-nia irmaun-irmán sira neʼebé ema fó-terus tanba sira-nia fiar. Dala ruma, ema hatama ita-nia irmaun-irmán sira ba komarka maski sira la sala. Bainhira ida-neʼe akontese, ita tenke hakaʼas an hodi ajuda sira, inklui koʼalia hodi defende sira. (Flp 1:14; Ebr 13:19) Dalan seluk atu hatudu aten-brani mak hodi kontinua “haklaken ho aten-brani”. (Após 14:3) Hanesan Jesus, ita hakaʼas an atu haklaken mensajen kona-ba Maromak nia Ukun maski ema kontra no fó-terus ba ita. Maibé dala ruma, ita sente taʼuk. Saida mak ita bele halo?

10. Ita tenke halo saida durante semana balu antes Naʼi nia Han-Kalan? Tanbasá?

¹⁰ Ita bele sai aten-brani liután hodi hanoin kona-ba esperansa neʼebé ita hetan tanba Kristu nia sakrifísiu. (João 3:16; Éf 1:7) Durante semana balu antes Memoriál, ita iha oportunidade espesiál atu aumenta ita-nia agradese ba Jesus nia sakrifísiu. Durante tempu neʼe, tuir programa atu lee Bíblia ba Memoriál no medita kona-ba akontesimentu sira antes Jesus nia mate. Hodi halo ida-neʼe, kuandu ita halibur hamutuk hodi komemora Naʼi nia Han-Kalan, ita sei hafolin liután tanbasá tua-uvas no paun neʼebé uza iha Memoriál no Jesus nia sakrifísiu mak importante. Bainhira ita hafolin buat neʼebé Jesus no  Jeová halo ona ba ita no komprende oinsá ida-neʼe lori benefísiu mai ita no ita-nia família, ita-nia esperansa sai metin liután, no neʼe motiva ita atu tahan toʼo rohan ho aten-brani.​—Ebr 12:3.

11-12. Saida mak ita aprende ona iha lisaun neʼe?

¹¹ Iha lisaun neʼe ita aprende ona katak Naʼi nia Han-Kalan fó-hanoin ita kona-ba sakrifísiu folin-boot no mós kona-ba Jesus nia hahalok furak sira hanesan haraik an no aten-brani. Ita agradese tebes tanba Jesus kontinua hatudu hahalok sira-neʼe nuʼudar ita-nia Amlulik Boot iha lalehan, neʼebé harohan ba ita-nia diʼak! (Ebr 7:24, 25) Ita tenke laran-metin hodi komemora Jesus nia mate tuir ninia mandamentu hodi hatudu katak ita hafolin ida-neʼe. (Lc 22:19, 20) Ita halo neʼe iha loron 14 fulan-Nisan, loron importante liu hotu iha tinan ida nia laran.

¹² Ita bele aprende husi komemorasaun simples neʼe kona-ba Jesus nia hahalok seluk neʼebé book nia atu mate ba ita. Bainhira Jesus moris nuʼudar ema iha rai, nia koñesidu ho hahalok neʼe. Hahalok neʼe mak saida?

13. Oinsá mak João 15:9 no 1 João 4:8-10 esplika kona-ba domin neʼebé Jeová no Jesus hatudu ona? Sé-sé deʼit mak hetan benefísiu husi sira-nia domin?

¹³ Jesus haleno ho perfeitu Jeová nia domin ba ita iha buat hotu neʼebé nia halo. (Lee João 15:9; 1 João 4:8-10.) Tuir loloos, Jesus nia domin mak book nia atu fó ninia moris ba ita. Maski ita mak ema kose-mina ka “bibi-malae seluk”, ita hetan benefísiu husi domin neʼebé Jeová no ninia Oan-Mane hatudu ona mai ita liuhusi Jesus nia sakrifísiu. (João 10:16; 1 João 2:2) Hanoin mós kona-ba buat neʼebé uza iha Naʼi nia Han-Kalan. Neʼe hatudu Jesus nia domin no hanoin ninia dixípulu sira. Tanbasá?

14. Oinsá mak Jesus hatudu domin ba ninia dixípulu sira?

¹⁴ Jesus hatudu domin ba ninia dixípulu kose-mina sira liuhusi hahú komemorasaun neʼebé simples atu sira halo tuir, laʼós serimónia neʼebé komplikadu. Husi tempu neʼebá, Jesus nia dixípulu kose-mina sira presiza komemora Memoriál tinan-tinan maski hasoru situasaun oioin, inklui tama komarka. (Apok 2:10) Sira bele halo tuir Jesus nia mandamentu neʼe ka lae? Sin, bele duni!

15-16. Oinsá mak ema balu bele komemora Naʼi nia Han-Kalan maski hasoru situasaun susar?

¹⁵ Husi apóstolu sira-nia tempu toʼo ohin loron, ema Kristaun loos hakaʼas an atu komemora Jesus nia mate. Sira halo tuir arranju kona-ba Naʼi nia Han-Kalan tuir sira-nia situasaun, maski dala ruma hasoru situasaun neʼebé susar. Hanoin toʼok ezemplu balu tuirmai. Bainhira ema hatama irmaun Harold King iha kadeia kloot iha rai-Xina, nia tenke buka dalan atu komemora Naʼi nia Han-Kalan. Nia prepara paun no tua-uvas subasubar hodi uza buat neʼebé nia iha. Nia mós hakaʼas an atu kalkula data ba Memoriál. Bainhira tempu toʼo ona atu halo komemorasaun neʼe, nia mesak kanta, halo orasaun, no hatoʼo diskursu.

¹⁶ Ezemplu ida tan mak irmán grupu ida neʼebé ema hatama iha kadeia durante Funu Mundiál Segundu. Sira tau sira-nia moris iha perigu laran hodi komemora Naʼi nia Han-Kalan. Maibé, tanba buat neʼebé uza iha Naʼi nia Han-Kalan mak simples, sira bele komemora ida-neʼe subasubar. Sira hatete: “Ami hamriik besik malu haleʼu meza kiʼik neʼebé nahe ho hena mutin no paun ho tua-uvas iha leten. Lilin ida  mak fó naroman ba kuartu neʼe, tanba lampu eletrisidade bele hatudu sai saida mak ami halo. . . . Ami fó sai fali ami-nia promesa ba ami-nia Aman atu uza ami-nia forsa tomak hodi defende ninia naran neʼebé santu.” Sira hatudu duni fiar neʼebé metin! Jesus hatudu duni domin bainhira nia hahú komemorasaun neʼebé simples hodi ita bele komemora Naʼi nia Han-Kalan maski hasoru situasaun neʼebé susar!

17. Pergunta saida deʼit mak ita bele husu ba ita-nia an?

¹⁷ Nuʼudar tempu Memoriál besik daudaun, diʼak atu husu ita-nia an pergunta sira tuirmai: ‘Oinsá mak haʼu bele banati-tuir Jesus kona-ba hatudu domin? Haʼu hanoin uluk kona-ba haʼu-nia maluk fiar-naʼin sira-nia diʼak ka haʼu-nian rasik? Haʼu hakarak irmaun-irmán sira atu halo buat barak liu fali sira-nia kbiit ka haʼu komprende sira-nia situasaun?’ Diʼak atu ita sempre banati-tuir Jesus no “hanoin malu”.​—1 Ped 3:8.

18-19. (a) Maski iha futuru ita la komemora tan Memoriál, maibé ita bele fiar saida? (b) Ita hakarak hakaʼas an atu halo saida?

¹⁸ Lakleur tan ita la presiza komemora Memoriál kona-ba Jesus nia mate. Bainhira Jesus “mai fali” durante terus boot, nia sei halibur restu husi “ema neʼebé Maromak hili ona” ba lalehan, no ita sei la komemora tan Memoriál.​—1 Kor 11:26; Mt 24:31.

¹⁹ Maski iha futuru ita la komemora tan Memoriál, maibé ita bele fiar katak Jeová nia povu sei hanoin-hetan komemorasaun simples neʼe nuʼudar símbolu kona-ba hahalok haraik an, aten-brani no domin boot husi Jesus. Iha tempu neʼebá, ema sira neʼebé uluk komemora Naʼi nia Han-Kalan sei konta kona-ba neʼe atu ajuda ema seluk neʼebé moris iha neʼebá. Maibé, atu hetan benefísiu husi komemorasaun neʼe agora, ita tenke hakaʼas an atu banati-tuir Jesus nia hahalok haraik an, aten-brani, no domin. Se ita halo nuneʼe, ita bele fiar katak ita sei simu kolen husi Jeová.​—2 Ped 1:10, 11.