1-3. (a) Tanbasá mak ita tenke inklui moris-hiʼas nuʼudar hanorin importante ida husi ita-nia fiar? (b) Tanbasá mak moris-hiʼas importante tebes? (Haree dezeñu iha leten.)

SE EMA ruma husu Ita, ‘Hanorin importante saida deʼit mak imi-nia relijiaun hanorin’, Ita sei hatán saida? Karik Ita sei hatán katak Ita fiar Jeová mak Kriadór no nia mak moris nia Hun. Karik Ita mós sei dehan katak Ita fiar ba Jesus Kristu, ida-neʼebé fó ninia moris ba ema. Karik Ita mós sei koʼalia tan kona-ba mundu paraízu iha futuru neʼebé Maromak nia povu sei moris ba nafatin. Maibé Ita sei temi kona-ba moris-hiʼas nuʼudar fiar ida neʼebé Ita hafolin tebes ka lae?

² Ita iha razaun barak atu inklui moris-hiʼas nuʼudar hanorin importante ida iha ita-nia fiar, maski ita-nia hakarak mak atu moris liu terus boot hodi moris ba nafatin iha rai. Apóstolu Paulo esplika tanbasá mak moris-hiʼas importante tebes. Nia dehan: “Tuir loloos, se la iha moris-hiʼas husi mate, entaun Kristu mós la hetan moris-hiʼas.” Se Jesus mak nunka hetan moris-hiʼas, nia la bele ukun nuʼudar Liurai iha lalehan, no ita-nia haklaken sei sai saugati deʼit. (Lee 1 Korinto 15:12-19.) Maibé ita hatene katak Jesus hetan ona moris-hiʼas. Tanba ita-nia fiar ba moris-hiʼas mak halo ita la hanesan ho ema saduseu neʼebé nega katak ema mate sei moris-hiʼas fali. Maski ema balu goza ita, ita iha fiar neʼebé metin nafatin katak Maromak bele fó moris-hiʼas ba ema neʼebé mate  ona.—Marcos 12:18; Apóstolu 4:2, 3; 17:32; 23:6-8.

³ Paulo hatete katak hanorin kona-ba “moris-hiʼas husi mate” mak hanorin neʼebé simples kona-ba Kristu”. (Ebreu 6:1, 2) Nia dehan katak nia tau duni fiar ba moris-hiʼas. (Apóstolu 24:10, 15, 24, 25) Maski neʼe mak hanorin simples neʼebé ita aprende husi Maromak nia Liafuan, ita presiza estuda nafatin ho didiʼak kona-ba moris-hiʼas. (Ebreu 5:12) Tanbasá?

4. Ema bele husu pergunta saida deʼit kona-ba moris-hiʼas?

⁴ Bainhira ema komesa estuda Bíblia, baibain sira lee kona-ba moris-hiʼas sira neʼebé akontese iha tempu uluk, hanesan Lázaro nia moris-hiʼas. Sira mós aprende kona-ba Abraão, Job, no Daniel neʼebé fiar metin katak, iha futuru ema mate sei moris fali. Maibé, oinsá se ema ruma husu Ita atu hatudu husi Bíblia tanbasá mak ita bele tau fiar ba moris-hiʼas neʼebé promete husi tinan rihun ba rihun liubá? No Bíblia hatete duni ka lae bainhira loos mak moris-hiʼas sei akontese? Hatene resposta ba pergunta sira-neʼe bele hametin liután ita-nia fiar.

5. Ita sei koʼalia uluk kona-ba saida?

⁵ Karik fasil ba ita atu simu se ema ida neʼebé foin mate, lakleur hetan fali moris-hiʼas. (João 11:11; Apóstolu 20:9, 10) Maibé oinsá ho ema neʼebé mate ona tinan atus ba atus, nia bele hetan fali moris-hiʼas ka lae? Ita bele tau fiar ba promesa neʼe ka lae? Ita bele fiar katak maski ema neʼebé mate kleur ona, ka foin mate mós sei hetan moris-hiʼas ka lae? Tuir loloos Ita tau ona fiar ba moris-hiʼas ida neʼebé akontese tinan atus ba atus liutiha tempu neʼebé fó sai profesia kona-ba moris-hiʼas neʼe. Neʼe mak sé? No neʼe iha ligasaun saida kona-ba Ita-nia fiar ba moris-hiʼas iha futuru?

6. Oinsá profesia iha Salmo 118 iha ligasaun ho Jesus?

⁶ Mai ita koʼalia kona-ba moris-hiʼas ida neʼebé akontese tinan barak liutiha tempu neʼebé fó sai profesia neʼe. Iha Salmo 118 neʼebé karik David mak hakerek, nia dehan: “Oh Jeová, ami husu, favór ida, salva ami!” no “Bensaun ba ida neʼebé mai ho Jeová nia naran”. Loron balu antes Jesus mate, nia saʼe kuda-burru tama ba Jeruzalein iha loron 9 Nisan, no povu sira temi fali profesia neʼe kona-ba Mesias. (Salmo [Mazmur] 118:25, 26; Mateus 21:7-9) Maibé oinsá mak Salmo 118 iha ligasaun ho moris-hiʼas ida neʼebé akontese tinan barak liutiha profesia neʼe? Haree toʼok salmu neʼe hatete tan saida: “Fatuk neʼebé badain sira la simu sai ona fatuk neʼebé importante liu.”—Salmo (Mazmur) 118:22.

7. Oinsá mak ema judeu sira hatudu katak sira lakohi simu Jesus?

⁷ “Badain sira” mak ulun-naʼin judeu sira neʼebé lakohi simu Mesias. Sira laʼós deʼit la rona Jesus ka la simu nia nuʼudar Kristu, maibé sira ho ema judeu barak hakribi tebes Jesus toʼo husu Pilatos hodi oho Jesus. (Lucas 23:18-23) Sin, sira mós iha responsabilidade ba Jesus nia mate.

8. Oinsá mak Jesus bele sai “fatuk neʼebé importante liu”?

⁸ Se ema lakohi simu no oho Jesus, oinsá mak nia bele sai “fatuk neʼebé importante liu”? Jesus tenkesér moris fali husi mate atu kumpre liafuan neʼe. Neʼe mak buat neʼebé Jesus konta iha ninia ai-knanoik ida kona-ba toʼos nia naʼin neʼebé haruka ema balu ba toʼos-atan sira neʼebé serbisu ba nia. Maibé toʼos-atan sira trata aat ema sira-neʼe. Ikusliu, toʼos nia naʼin haruka fali ninia oan-mane mak bá, nia hein katak toʼos-atan sira sei rona ba ninia oan-mane. Maibé sira oho tiha oan-mane neʼe. Bainhira Jesus konta tiha ai-knanoik neʼe, nia temi kona-ba profesia  neʼebé hakerek iha Salmo 118:22. (Lucas 20:9-17) Apóstolu Pedro mós uza versíkulu neʼe bainhira koʼalia ba ema judeu nia “ukun-naʼin sira, katuas povu nian no eskriba sira halibur an hamutuk iha Jeruzalein”. Nia koʼalia kona-ba “Jesus Kristu husi Nazaré . . . neʼebé imi hedi ona maibé Maromak halo nia moris fali husi mate”. Tuirmai nia dehan: “Nia mak ‘fatuk neʼebé imi badain sira la simu, maibé sai ona fatuk neʼebé importante liu.’”—Apóstolu 3:15; 4:5-11; 1 Pedro 2:5-7.

9. Akontesimentu importante saida mak temi iha Salmo 118:22?

⁹ Sin, profesia iha Salmo 118:22 fó sai duni moris-hiʼas ida neʼebé, liutiha tinan atus ba atus mak foin akontese. Profesia neʼe hatete katak ema sei la simu Mesias no oho nia. Maibé nia sei hetan fali moris-hiʼas no sai fatuk neʼebé importante liu. Bainhira Jesus hetan ona moris-hiʼas, nia mesak deʼit mak simu pozisaun neʼebé “la iha naran seluk iha lalehan nia okos neʼebé Maromak hili tiha ona atu salva ita”.—Apóstolu 4:12; Éfeso 1:20.

10. (a) Salmo 16:10 fó-hatene nanis kona-ba saida? (b) Tanbasá mak ita hatene katak Salmo 16:10 laʼós koʼalia kona-ba David?

¹⁰ Mai ita koʼalia kona-ba eskritura ida tan neʼebé fó sai profesia kona-ba moris-hiʼas neʼe. Profesia neʼe liutiha tinan rihun ida resin mak foin akontese. Neʼe sei hametin ita-nia fiar katak, ema bele moris-hiʼas duni maski tinan barak liutiha husi tempu neʼebé Maromak halo promesa ka profesia kona-ba moris-hiʼas. Iha Salmo 16 David dehan: “Ita sei la husik hela haʼu iha rate laran. Ita sei la husik ema neʼebé laran-metin ba Ita atu haree rai-kuak.” (Salmo [Mazmur] 16:10) Iha eskritura neʼe David laʼós koʼalia kona-ba ninia an katak nia sei nunka mate ka nia sei nunka tama ba Rate. Tanba Maromak nia Liafuan hatete ho momoos katak David sai katuas no ikusmai mate no “ema hakoi nia iha David nia Sidade”. (1 Reis [Raja-Raja] 2:1, 10) Se nuneʼe, eskritura neʼe koʼalia kona-ba sé?

11. Bainhira mak Pedro esplika kona-ba Salmo 16:10?

¹¹ Liutiha tinan rihun ida resin husi tempu neʼebé David hakerek liafuan sira-neʼe, Pedro esplika kona-ba sé mak kumpre Salmo 16:10. Liutiha semana balu husi tempu neʼebé Jesus mate no hetan fali moris-hiʼas, Pedro koʼalia ba ema rihun ba rihun husi ema judeu no ema husi nasaun seluk neʼebé simu ema judeu nia hanorin. (Lee Apóstolu 2:29-32.) Pedro fó-hanoin ba sira katak David mate no hakoi tiha ona. No nia hatutan katak David “haree nanis ona no koʼalia kona-ba Kristu nia moris-hiʼas”. Bíblia la hatete katak iha ema kontra buat neʼebé Pedro koʼalia.

12. Iha dalan saida mak Salmo 16:10 sai loos, no oinsá mak neʼe hatudu katak promesa kona-ba moris-hiʼas iha futuru mós sei sai loos?

¹² Pedro temi fali David nia liafuan neʼebé hakerek iha Salmo 110:1 hodi apoia ninia liafuan sira. (Lee Apóstolu 2:33-36.) Dalan neʼebé Pedro esplika didiʼak eskritura sira ajuda duni ema-lubun neʼe hodi tau fiar katak Jesus mak “Naʼi no Kristu”. Ema barak rekoñese katak Salmo 16:10 kumpre duni ba Jesus bainhira nia moris fali husi mate. Ikusmai apóstolu Paulo mós uza evidénsia neʼebé hanesan hodi koʼalia ba ema judeu sira iha sidade Antiokia iha Pisídia. Ema sira gosta tebes rona kona-ba buat neʼebé Paulo koʼalia, no sira hakarak buka-hatene liután. (Lee Apóstolu 13:32-37, 42.) Profesia iha Salmo 16:10 ajuda ita tau fiar katak Bíblia nia promesa oioin neʼebé fó-hatene nanis kona-ba moris-hiʼas neʼe sai loos duni, maski tinan barak liutiha mak profesia neʼe foin sai loos.

13. Ema bele husu pergunta saida deʼit kona-ba moris-hiʼas?

¹³ Ita sente kmaan hodi hatene katak ema bele moris hiʼas duni maski tinan atus ba  atus liu tiha ona husi tempu neʼebé profesia neʼe fó sai. Maski nuneʼe, ema balu bele husu: ‘Entaun, neʼe dehan katak haʼu tenke hein ba tempu kleur mak foin bele haree ema neʼebé haʼu hadomi ka lae? Bainhira loos mak moris-hiʼas sei akontese?’ Jesus hatete ba ninia apóstolu sira katak iha buat balu mak sira la hatene. Ohin loron, iha duni buat balu neʼebé ita la bele hatene, neʼe mak kona-ba “oras no tempu, tanba Aman deʼit mak iha direitu atu deside”. (Apóstolu 1:6, 7; João 16:12) Maski ita la hatene buat hotu, maibé ita hatene informasaun balu kona-ba bainhira loos mak moris-hiʼas sei akontese.

14. Oinsá mak Jesus nia moris-hiʼas la hanesan ho ema sira neʼebé hetan moris-hiʼas antes nia?

¹⁴ Moris-hiʼas importante liu hotu neʼebé temi iha Bíblia mak kona-ba Jesus. Se Jesus mak nunka hetan moris-hiʼas, ita mós la iha esperansa atu hasoru fali ema neʼebé ita hadomi. Ema sira neʼebé hetan moris-hiʼas antes Jesus, hanesan liuhusi Elias no Eliseu nia milagre, ema sira-neʼe la moris ba nafatin. Ikusmai sira mate fali no sai rai uut iha rate laran. Maibé Jesus “moris fali ona husi mate” no “nia sei la mate tan; mate la iha tan kbiit atu ukun nia”. Nia “moris ba nafatin” iha lalehan.—Roma 6:9; Apokalipse 1:5, 18; Koloso 1:18; 1 Pedro 3:18.

15. Tanbasá dehan katak Jesus mak “ai-fuan primeiru”?

¹⁵ Jesus mak ema primeiru neʼebé hetan moris-hiʼas ba lalehan nuʼudar espíritu no ninia moris-hiʼas importante liu hotu. (Apóstolu 26:23) Maibé laʼós Jesus mesak deʼit mak hetan moris-hiʼas hanesan neʼe. Nia halo promete ba ninia apóstolu laran-metin sira katak sira mós sei ukun hamutuk ho nia iha lalehan. (Lucas 22:28-30) Maibé sira tenkesér mate uluk depois mak bele hetan kolen neʼe. Tuirmai sira sei hetan moris-hiʼas nuʼudar espíritu hanesan Jesus. Paulo hatete katak “Kristu moris hiʼas ona husi mate, nia mak hanesan ai-fuan primeiru husi ema hotu neʼebé mate”. Nia dehan tan katak sira seluk sei hetan moris-hiʼas atu saʼe ba lalehan. Nia dehan: “Ida-idak tuituir malu: Kristu mak hanesan ai-fuan primeiru, depois neʼe mak sira neʼebé Kristu nian durante tempu neʼebé nia toʼo ona mai.”—1 Korinto 15:20, 23.

16. Informasaun saida mak hatudu sai bainhira loos mak moris-hiʼas ba lalehan nian sei akontese?

¹⁶ Paulo nia liafuan sira hatudu sai informasaun balu kona-ba bainhira mak moris-hiʼas ba lalehan nian sei akontese. Neʼe sei akontese ‘durante tempu neʼebé Kristu toʼo ona mai’. Ba tinan barak ona Testemuña ba Jeová fó prova husi Bíblia katak tempu neʼebé Kristu “toʼo ona mai” komesa husi 1914.  Ita sei moris hela iha tempu neʼe, no mundu aat nia rohan besik loos ona.

17, 18. Saida mak sei akontese ba Kristu nia alin balu durante tempu neʼebé Kristu toʼo ona mai?

¹⁷ Bíblia esplika liután kona-ba moris-hiʼas lalehan nian: “Ami hakarak atu imi hatene ho loloos kona-ba sira neʼebé mate ona . . . Se ita iha fiar katak Jesus mate no moris fali, entaun, ita mós fiar katak Maromak sei halibur sira neʼebé mate ona . . . Ita neʼebé moris hela iha loron neʼebé Naʼi toʼo ona mai, ita sei la saʼe ba lalehan ulukliu fali sira neʼebé mate ona; tanba Naʼi rasik sei tun husi lalehan no nia sei bolu makaʼas . . . no ninia dixípulu sira neʼebé mate ona sei moris hiʼas uluk. Depois neʼe, ita neʼebé moris hela, sei lori saʼe tiha iha kalohan laran hodi hamutuk ho sira atu hasoru Naʼi iha leten; nuneʼe ita sei hamutuk ho Naʼi ba nafatin.”—1 Tesalónika 4:13-17.

¹⁸ Liutiha tempu balu husi tempu neʼebé Kristu “toʼo ona mai” mak moris-hiʼas ba lalehan komesa hahú. Kristu nia alin sira neʼebé sei moris hela iha rai iha tempu terus boot nian sei “lori saʼe tiha iha kalohan laran”. Neʼe katak sá? Neʼe katak sira neʼebé “lori saʼe tiha” sei mate maibé sei la hein ba tempu kleur. Bainhira sira mate, sira “hotu sei nakfila an kedas, no neʼe lalais liu fali ho piska matan. Ida-neʼe sei mosu durante trombeta ikus nia lian”.—1 Korinto 15:51, 52; Mateus 24:31.

19. Saida mak “moris-hiʼas neʼebé diʼak liu”?

¹⁹ Ohin loron, ema kristaun barak neʼebé laran-metin la iha esperansa atu ukun hamutuk ho Kristu iha lalehan. Sira hein namanas atu haree “Jeová nia loron” toʼo mai bainhira Jeová halakon mundu aat neʼe. La iha ema ida mak hatene ho loloos bainhira mak loron neʼe toʼo mai, maibé iha evidénsia barak neʼebé hatudu katak loron neʼe besik ona. (1 Tesalónika 5:1-3) Bainhira Maromak nia mundu foun toʼo mai, sei akontese moris-hiʼas oin ida tan. Iha tempu neʼebá, ema mate sei hetan fali moris-hiʼas atu moris iha rai no sira-nia esperansa mak atu sai perfeitu fali no nunka haree tan mate. Neʼe mak “moris-hiʼas neʼebé diʼak liu” fali tempu antigu nian neʼebé ema hetan moris-hiʼas maibé ikusmai mate fali.—Ebreu 11:35.

20. Tanbasá mak ita bele fiar katak moris-hiʼas sei organiza iha dalan neʼebé diʼak?

²⁰ Kona-ba sira neʼebé moris-hiʼas ba lalehan, Bíblia hatete: “Ida-idak tuituir malu.” (1 Korinto 15:23) Tan neʼe ita bele fiar katak moris-hiʼas iha rai mós sei tuituir malu ka organiza iha dalan neʼebé diʼak. Maibé karik ita bele husu: Sira neʼebé foin mate mak sei hetan moris-hiʼas uluk bainhira Kristu nia Ukun ba Tinan Rihun Ida foin hahú, no ema neʼebé koñese sira mak sei simu fali sira ka lae? Ka Maromak nia atan sira neʼebé laran-metin husi tempu antigu mak sei moris-hiʼas uluk, tanba sira iha matenek atu ajuda organiza Maromak nia povu iha mundu foun? Saida mak sei akontese ba ema sira neʼebé nunka serbí Jeová? Bainhira mak sira atu hetan moris-hiʼas no iha neʼebé? Pergunta barak bele mosu. Maibé ita la presiza hanoin barak kona-ba buat sira-neʼe. Diʼak liu hein deʼit. Ita bele fiar katak ita sei hakfodak atu haree dalan neʼebé Jeová kumpre buat sira-neʼe.

21. Ita iha esperansa saida?

²¹ Antes loron neʼe toʼo mai, ita tenke hametin ita-nia fiar ba Jeová. Liuhusi Jesus, Jeová promete katak ema mate sira iha hela ninia memória no sei moris fila fali. (João 5:28, 29; 11:23) Jesus hatudu tan evidénsia katak Jeová sei fó duni moris-hiʼas ba ema. Nia dehan katak, tuir Jeová nia haree, Abraão, Isaac, no Jacob, “sira hotu sei moris hela”. (Lucas 20:37, 38) Sin, ita iha duni razaun barak atu koʼalia sai buat neʼebé apóstolu Paulo hatete: “Haʼu iha esperansa . . . katak Maromak sei fó moris-hiʼas ba ema.”—Apóstolu 24:15.