ANTES neʼe haʼu iha ona hakarak atu hatene kona-ba lia-loos husi Bíblia. Uluk amá hetan livru barak no haʼu gosta tebes lee livru sira-neʼe, liuliu kona-ba dezeñu sira. Apá lakohi amá atu koʼalia ba haʼu kona-ba buat neʼebé nia aprende. Maibé tanba haʼu hakarak hatene, haʼu husu pergunta barak no amá estuda ho haʼu iha tempu neʼebé apá la iha uma. Tan neʼe haʼu mós deside atu dedika haʼu-nia moris ba Jeová. Haʼu hetan batizmu iha Blackpool, Inglaterra, iha tinan 1943 ho idade sanulu.

Komesa husi tempu neʼebá haʼu ho haʼu-nia amá bá haklaken beibeik. Ami uza fonógrafu hodi haklaken. Mákina neʼe boot no todan kilograma 4,5. Hanoin toʼok labarik kiʼik hanesan haʼu mak lori mákina neʼe!

Bainhira haʼu tinan 14, haʼu hakarak foti pioneiru. Haʼu-nia amá hatete ba haʼu katak presiza koʼalia uluk ho katuas área nian. Irmaun neʼe fó sujestaun ba haʼu atu buka uluk serbisu ruma hodi apoia serbisu  pioneiru, no haʼu halo tuir. Serbisu tiha ba tinan rua, haʼu husu fali katuas área foun kona-ba foti pioneiru. Nia dehan katak agora mak tempu diʼak atu foti pioneiru.

Tan neʼe, iha fulan-Abríl 1949, haʼu ho amá faʼan tiha sasán balu husi uma neʼebé ami aluga no balu ami fó ba ema hodi muda ba Middleton, besik sidade Manchester no hahú pioneiru. Fulan haat liutiha, haʼu buka irmaun ida hodi sai haʼu-nia pár pioneiru nian. Sukursál husu ami atu muda ba kongregasaun foun ida iha sidade Irlam. No amá serbí hamutuk ho irmán ida iha kongregasaun seluk.

Maski haʼu foin tinan 17, haʼu no irmaun neʼe simu knaar atu halaʼo reuniaun sira iha kongregasaun foun neʼe, tanba irmaun neʼebé kumpre kritériu ladún barak. Ikusmai haʼu hetan fali konvite atu muda ba kongregasaun ida iha Buxton, kongregasaun neʼe haklaken-naʼin uitoan deʼit no presiza ajuda. Haʼu sempre haree esperiénsia sira-neʼe hanesan treinu ida ba futuru.

Iha 1951 haʼu hatama formuláriu atu tuir Eskola Gilead. Maibé iha Dezembru 1952 governu bolu haʼu atu tuir obrigatóriu militár nian. Haʼu fó razaun katak haʼu mak mestre Bíblia tempu-tomak no husu atu la tuir, maibé tribunál lakohi simu haʼu-nia razaun neʼe no hatama haʼu iha komarka ba fulan neen. Bainhira iha komarka laran, haʼu simu konvite atu tuir Eskola Gilead  klase 22. Tan neʼe, iha fulan-Jullu 1953 haʼu saʼe ró ida naran Georgic bá tuir eskola iha Novaiorke.

Toʼo tiha iha Novaiorke, haʼu konsege tuir reuniaun boot ho tema New World Society iha 1953. Tuirmai haʼu saʼe komboiu bá Lansing Súl, Novaiorke, fatin neʼebé haʼu atu tuir Eskola Gilead. Tanba haʼu foin sai husi komarka, haʼu-nia osan ladún barak. Bainhira tun husi komboiu, haʼu saʼe fali bís atu bá Lansing Súl, no haʼu presiza empresta osan sentavus 25 husi pasajeiru ida mak hodi selu bís neʼe.

Treinu husi Eskola Gilead ajuda tebes ami atu “sai . . . buat hotu ba ema oioin” nuʼudar misionáriu. (1 Korinto 9:22) Haʼu, Paul Bruun, no Raymond Leach simu knaar hodi bá rai-Filipinas. Ami presiza hein ba fulan balu atu hetan ami-nia vistu, maibé ikusmai ami bá duni ho ró liuhusi Rotterdam, Tasi Mediterráneu, Suez Canal, Oseanu Índiku, Malázia, no Honkóng. Ami-nia viajen iha tasi durante loron 47! Ikusmai ami toʼo duni iha Manila iha 19 Novembru 1954.

Ami presiza halo mudansa atu bele toman ho ema foun, rai foun, no língua foun. Ami naʼin-tolu hetan knaar atu serbí iha kongregasaun ida iha sidade Quezon. Ema barak koʼalia inglés iha sidade neʼe. Tan neʼe mak fulan neen ami hatene koʼalia lia-tagalog uitoan deʼit. Maibé ami-nia knaar tuirmai ajuda tebes ami.

Loron ida ami fila husi haklaken, neʼe iha fulan-Maiu 1955, irmaun Leach no haʼu hetan karta balu iha ami-nia kuartu. Afinál ami hetan knaar atu serbí nuʼudar katuas área nian. Haʼu foin tinan 22 deʼit iha tempu neʼebá, maibé knaar foun neʼe fó oportunidade ba haʼu atu “sai . . . buat hotu ba ema oioin”.

Porezemplu, bainhira haʼu hatoʼo haʼu-nia diskursu públiku primeiru nuʼudar katuas área nian, haʼu hatoʼo iha loja ida nia oin. Ikusmai mak haʼu foin hatene katak iha rai-Filipinas iha tempu neʼebá, sira-nia toman mak atu hatoʼo diskursu públiku tenke hatoʼo iha fatin públiku duni! Haʼu vizita kongregasaun oioin no hatoʼo diskursu sira iha uma públiku nian, iha merkadu, iha salaun nia liʼur, iha kampu basket, iha jardín sira, no dala barak iha estrada nia sikun sira. Loron ida udan tun makaʼas iha sidade San Pablo, no haʼu la bele hatoʼo diskursu iha merkadu, tan neʼe haʼu fó sujestaun ba irmaun sira atu haʼu hatoʼo haʼu-nia diskursu iha Reuniaun-Fatin deʼit. Diskursu hotu tiha irmaun sira husu haʼu katak diskursu hanesan neʼe bele sura diskursu públiku ka lae, tanba neʼe laʼós hatoʼo iha fatin públiku nian!

Haʼu sempre hela iha irmaun sira-nia uma. Maski sira iha deʼit uma neʼebé simples, maibé uma sira-neʼe moos. Baibain haʼu-nia toba-fatin mak biti. Fatin atu hariis, ema bele haree ita, tan neʼe haʼu aprende hariis ho roupa. Haʼu bá-mai ho karreta públiku no bís, maibé dala ruma atu bá illa sira, haʼu saʼe ró. Haʼu serbí ba tinan barak, maibé haʼu nunka hola karreta ida.

Haklaken no vizita kongregasaun sira ajuda haʼu atu aprende koʼalia lia-tagalog. Haʼu nunka tuir kursu língua nian, maibé aprende deʼit liuhusi rona beibeik irmaun-irmán sira koʼalia. Sira hakarak tebes atu hanorin haʼu, no haʼu mós agradese tebes ba sira-nia pasiénsia no dalan neʼebé sira koʼalia nakloke ba haʼu.

Nuʼudar tempu liu daudauk, haʼu mós presiza halo mudansa balu tanba haʼu simu knaar foun oioin. Iha tinan 1956 bainhira irmaun Nathan Knorr vizita, haʼu hetan knaar ida atu tau matan ba  departamentu notísias nian iha reuniaun boot ba loron tolu. Haʼu seidauk iha esperiénsia, maibé irmaun barak ajuda haʼu oinsá atu tau matan ba knaar neʼe. Latoʼo tinan ida, ami halaʼo tan reuniaun boot ba loron tolu no irmaun Frederick Franz husi sede-jerál ba vizita ami. Haʼu hetan knaar atu tau matan ba reuniaun boot neʼe, no haʼu mós aprende buat barak husi irmaun Franz, nia haraik an tebes. Irmaun rai-naʼin sira kontente tebes hodi haree katak irmaun Franz mós hatais ema filipinu nia roupa tradisionál naran barong Tagalog bainhira nia hatoʼo diskursu públiku nian.

Haʼu presiza halo mudansa balu tan iha tempu neʼebé haʼu simu knaar hodi serbí nuʼudar katuas vizitante nian. Iha tempu neʼebá ami sempre hatudu filme The Happiness of the New World Society iha fatin públiku sira. Dala ruma ular barak tebes. Sira gosta semo ba projetór nia ahi no mate nakonu iha ahi neʼe. Serbisu boot tebes hodi hamoos projetór neʼe! La fasil mós atu arranja hodi hatudu filme neʼe, maibé bainhira ita haree ema simu no hatene didiʼak kona-ba Jeová nia organizasaun iha mundu tomak, neʼe halo ita sente haksolok.

Padre sira husi igreja katólika sempre dudu ema-boot sira hodi la fó lisensa ba ami atu halaʼo reuniaun boot sira. Se ami  hatoʼo diskursu besik sira-nia igreja, dala ruma sira dere igreja nia sinu hodi ema la bele rona diskursu sira. Maski nuneʼe, serbisu haklaken laʼo ba oin nafatin, no ema barak husi fatin sira-neʼe sai Jeová nia atan.

Iha 1959, haʼu simu karta ida neʼebé hatete katak haʼu hetan fali knaar atu serbí iha sukursál. Haʼu aprende tan buat barak husi neʼe. Lakleur, haʼu hetan tan knaar atu vizita nasaun seluk nuʼudar katuas zona. Loron ida haʼu hasoru Janet Dumond, irmán misionária ida husi Tailándia. Ami hakerek karta ba malu ba tempu uitoan no ikusmai ami kaben. Ami serbí hamutuk ho haksolok nuʼudar kaben-naʼin ba tinan 51.

Haʼu iha priviléjiu hodi vizita Jeová nia povu iha nasaun hamutuk 33. Haʼu agradese tebes ba knaar sira neʼebé uluk haʼu halo, tanba knaar sira-neʼe ajuda haʼu hatene oinsá atu hasoru ema husi rai oioin. Vizita sira-neʼe loke luan tan haʼu-nia neon hodi haree katak Jeová hadomi ema oioin.—Apóstolu 10:34, 35.

Haʼu kontente tebes hodi bele serbí hamutuk ho irmaun-irmán sira iha rai-Filipinas! Ohin loron haklaken-naʼin aumenta toʼo dala sanulu se kompara ho tempu neʼebé haʼu foin toʼo iha rai neʼe. Haʼu ho Janet serbí nafatin iha sukursál Filipinas iha sidade Quezon. Maski haʼu serbí ona iha rai seluk ba tinan 60 resin, maibé haʼu presiza prontu nafatin atu halo mudansa se Jeová husu haʼu atu halo fali buat seluk. Mudansa sira neʼebé Maromak nia organizasaun halo foin lalais neʼe hatudu duni katak, ita tenke prontu atu halo tuir mudansa sira hodi serbí Jeová no serbí irmaun-irmán sira.

Ami hakaʼas an hodi halo tuir Jeová nia hakarak hotu, no neʼe lori duni ksolok neʼebé boot liu hotu ba ami-nia moris. Ami mós hakaʼas an atu halo mudansa sira hodi bele serbí irmaun-irmán sira ho didiʼak. Ami-nia hakarak mak atu “sai . . . buat hotu ba ema oioin”.