1, 2. Tanbasá mak Roma kapítulu 8 importante ba ema kose-mina sira?

BAINHIRA atu komemora Jesus nia mate, karik ita lee Roma 8:15-17. Eskritura sira-neʼe esplika oinsá mak ema kose-mina hatene katak sira iha esperansa atu moris iha lalehan. Maromak nia espíritu santu mak fó sasin iha sira-nia laran. Roma 8:1 hatete katak sira mak ema neʼebé “ida deʼit ho Kristu Jesus”. Maibé Roma kapítulu 8 koʼalia deʼit kona-ba ema kose-mina ka koʼalia mós kona-ba ema sira neʼebé iha esperansa atu moris ba nafatin iha rai?

² Roma kapítulu 8 koʼalia liuliu kona-ba ema kose-mina sira. Sira simu “espíritu santu” nuʼudar oan-hakiak no hein namanas atu “sai livre husi [sira-nia] isin”. (Roma 8:23) Iha futuru, sira sei sai Maromak nia oan sira iha lalehan. Liuhusi Jesus nia sakrifísiu, Jeová fó ona perdua ba sira-nia sala. Jeová haree sira nuʼudar ema loos hodi sira bele sai ninia oan.—Roma 3:23-26; 4:25; 8:30.

3. Tanbasá mak Roma kapítulu 8 mós importante ba ema neʼebé iha esperansa atu moris iha rai?

³ Maibé Roma kapítulu 8 mós importante ba ema neʼebé iha esperansa atu moris iha rai, tanba Maromak mós bele haree sira nuʼudar ema loos. Iha Roma kapítulu 4 apóstolu  Paulo koʼalia kona-ba ema ida neʼebé laʼós ema kose-mina, no Jeová haree nia nuʼudar ema loos, ema neʼe mak Abraão. Nia moris ho laran-metin iha tempu antigu antes Jesus fó ninia moris nuʼudar sakrifísiu. (Lee Roma 4:20-22.) Ohin loron mós hanesan, Jeová bele haree ema kristaun laran-metin neʼebé iha esperansa atu moris ba nafatin iha rai nuʼudar ema loos. Sira mós bele aprende buat barak husi Roma kapítulu 8.

4. Bainhira lee Roma 8:21, ita tenke husu pergunta saida ba ita-nia an?

⁴ Iha Roma 8:21, Jeová fó garantia katak ninia mundu foun sei mai no ema sei sai livre husi sala no mate. Eskritura neʼe hatete katak ema sira-neʼe sei “hetan liberdade neʼebé furak nuʼudar Maromak nia oan sira”. Ita fiar katak Ita sei moris iha mundu foun ka lae? Mai ita haree toʼok ita presiza halo saida deʼit atu moris iha Maromak nia mundu foun.

5. Iha Roma 8:4-13, apóstolu Paulo koʼalia kona-ba saida?

⁵ Lee Roma 8:4-13. Iha Roma kapítulu 8, apóstolu Paulo koʼalia kona-ba ema oin rua, ida “halo tuir buat isin nian” no ida seluk “halo tuir espíritu”. Ema balu hanoin katak Paulo halo komparasaun kona-ba ema kristaun no ema neʼebé laʼós kristaun. Maibé Paulo nia karta hakerek atu fó ba ema kristaun, sira neʼebé “bolu nuʼudar santu”. (Roma 1:7) Tan neʼe mak ema neʼebé “halo tuir buat isin nian” no ema neʼebé “halo tuir espíritu” refere ba ema kristaun sira. Tanbasá mak grupu rua neʼe nia moris la hanesan?

6, 7. (a) Liafuan “isin” iha Bíblia bele refere ba saida deʼit? (b) Iha Roma 8:4-13, apóstolu Paulo uza liafuan “isin” hodi koʼalia kona-ba saida?

⁶ Liafuan orijinál husi Bíblia neʼebé tradús iha eskritura neʼe nuʼudar “isin”, bele refere ba buat barak. Dala ruma neʼe koʼalia kona-ba ema nia isin. (Roma 2:28; 1 Korinto 15:39, 50) Liafuan orijinál neʼe mós bele refere nuʼudar relasaun família nian. Porezemplu, Bíblia dehan katak Jesus mak “David nia bei-oan”, no apóstolu Paulo haree ema judeu nuʼudar ninia “maun-alin”. Liafuan orijinál neʼebé uza iha eskritura  sira-neʼe bele tradús nuʼudar “isin”.—Roma 1:3; 9:3.

⁷ Se nuneʼe, Paulo koʼalia saida bainhira nia temi kona-ba ema neʼebé “halo tuir buat isin nian” iha Roma 8:4-13? Ita bele lee Roma 7:5 hodi buka-hatene resposta. Paulo dehan: “Basá kuandu ita moris tuir isin nia hakarak, Ukun-Fuan hatudu sai sala iha ita-nia isin.” Husi eskritura neʼe, Paulo esplika katak ema neʼebé “moris tuir isin nia hakarak” mak sira neʼebé hanoin deʼit no halo tuir deʼit ‘sala neʼebé iha sira-nia isin’, no sira halo buat naran deʼit tuir sira-nia hakarak.

8. Tanbasá mak apóstolu Paulo presiza fó avizu ba ema kristaun kose-mina sira atu labele “halo tuir buat isin nian”?

⁸ Tanbasá mak apóstolu Paulo fó avizu ba ema kose-mina atu labele “halo tuir buat isin nian”? No tanbasá mak avizu neʼe mós importante ba ema kristaun hotu ohin loron, maski ita-nia esperansa mak atu hela iha lalehan ka iha rai? Tanba se ita la kuidadu, ita-nia hakarak isin nian bele sai buat neʼebé importante liu iha ita-nia moris. Porezemplu, bainhira apóstolu Paulo hakerek karta ba fiar-naʼin sira iha Roma, nia dehan katak sira sai ona “atan ba sira-nia hakarak rasik”. Paulo nia liafuan neʼe karik koʼalia kona-ba hakarak seksuál nian, ka kona-ba han, hemu, ka buat seluk neʼebé sai fali buat importante liu ba sira-nia moris. (Roma 16:17, 18; Filipe 3:18, 19; Judas 4, 8, 12) No iha mós irmaun ida iha kongregasaun Korinto neʼebé “moris hamutuk fali ho ninia aman nia feen”. (1 Korinto 5:1) Ema kristaun sira iha neʼebá, presiza duni rona ba Paulo nia avizu atu labele “hanoin buat isin nian”.—Roma 8:5, 6.

9. Roma 8:6 la bandu ita atu halo saida?

⁹ Ohin loron, importante atu halo tuir Paulo nia avizu. Maski ema neʼebé serbí Jeová ba tempu kleur ona mós bele hanoin tuir buat isin nian. Maibé Paulo nia liafuan la dehan katak ita la bele hanoin kona-ba hahán, serbisu, halo atividade halimar nian, ka buat romántiku. Tanbasá? Tanba buat sira-neʼe mak parte ida husi ita-nia moris. Jesus mós gosta han ai-han no fó han ba ema seluk. Nia mós rekoñese katak  nia presiza tempu atu deskansa. No apóstolu Paulo hatete katak relasaun seksuál mak parte importante ida iha moris kaben nian.

10. Liafuan “tau sira-nia hanoin” katak sá?

¹⁰ Apóstolu Paulo nia liafuan, “tau sira-nia hanoin ba buat isin nian” katak sá? Lia-gregu neʼebé Paulo uza signifika katak ema fó ninia atensaun tomak no halo planu hotu ba buat ida deʼit. Matenek-naʼin ida esplika katak Paulo nia liafuan koʼalia kona-ba ema neʼebé iha interese deʼit no koʼalia la para kona-ba sira-nia hakarak isin nian. Sira husik hakarak isin nian mak kontrola sira-nia moris tomak.

11. Saida deʼit mak bele sai buat importante liu iha ita-nia moris?

¹¹ Ema kristaun sira iha Roma presiza duni atu buka-hatene kona-ba sira rasik nia moris. Sira presiza hatene sira-nia moris fokus deʼit kona-ba “buat isin nian” ka lae. Ohin loron, ita mós presiza buka-hatene saida mak importante liu iha ita-nia moris. Husu ba Ita-nia an: ‘Haʼu gosta liu atu koʼalia kona-ba saida? Haʼu gosta liu atu halo saida? Karik ema balu gosta hanoin beibeik atu koko tua oioin, halo furak sira-nia uma, hola roupa neʼebé karun, buka osan liután, ka planu atu pasiar ba fatin oioin. Tuir loloos halo buat sira-neʼe la sala. Porezemplu, iha festa kazamentu ida, Jesus halo bee nakfila ba tua-uvas, no apóstolu Paulo fó-hatene Timóteo atu “hemu mós tua-uvas uitoan” ba ninia saúde. (1 Timóteo 5:23; João 2:3-11) Maibé Jesus no apóstolu Paulo nunka hanoin katak tua mak buat neʼebé importante liu iha sira-nia moris. Oinsá ho ita? Saida mak importante liu iha ita-nia moris?

12, 13. Tanbasá mak tenke kuidadu kona-ba ita-nia hanoin?

¹² Importante tebes atu buka-hatene didiʼak kona-ba ita-nia moris. Tanbasá? Tanba apóstolu Paulo dehan: “Hanoin buat isin nian lori ba mate.” (Roma 8:6) Ninia liafuan neʼe katak sá? Neʼe katak se ita mak “halo tuir buat isin nian”, neʼe bele estraga ita-nia relasaun diʼak ho Jeová no ita mós bele lakon ita-nia moris iha futuru. Maibé ita bele troka dalan neʼebé ita moris. Hanoin-hetan mane iha tempu uluk neʼebé kongregasaun Korinto hasai tanba nia halo hahalok la morál? Bainhira nia hetan tiha dixiplina, nia mós troka ninia moris. Nia la moris tan atu halo tuir hakarak isin nian no ikusmai nia serbí Jeová iha dalan neʼebé moos.—2 Korinto 2:6-8.

¹³ Se mane neʼe bele troka ninia moris, ita mós bele troka, liuliu se ita seidauk halo buat neʼebé aat hanesan mane neʼe halo. Paulo nia avizu kona-ba saida mak bele akontese ba ema neʼebé “hanoin buat isin nian”, book duni ema kristaun sira ohin loron atu halo mudansa ba sira-nia moris.

14, 15. (a) Apóstolu Paulo hakarak ita atu hanoin kona-ba saida? (b) “Hanoin buat espíritu nian” la dehan katak sá?

¹⁴ Bainhira Paulo fó tiha avizu kona-ba perigu atu “hanoin buat isin nian”, tuirmai nia dehan: “Hanoin buat espíritu nian lori ba moris no dame.” Atu hetan moris no dame mak buat neʼebé folin-boot tebes! Maibé oinsá mak ita bele hetan moris no dame?

¹⁵ “Hanoin buat espíritu nian” la dehan katak ita-nia hanoin loroloron  nian tenkesér kona-ba Bíblia deʼit, ka ita tenkesér koʼalia deʼit kona-ba Jeová no ita-nia esperansa ba futuru. Hanoin toʼok kona-ba apóstolu Paulo no ema kristaun iha apóstolu sira-nia tempu, sira mós halaʼo moris hanesan ema baibain. Sira han hahán gostu, hemu, kaben, harii umakain, no serbisu atu tau matan ba sira-nia an.—Marcos 6:3; 1 Tesalónika 2:9.

16. Buat saida mak importante liu hotu iha Paulo nia moris?

¹⁶ Maski nuneʼe, apóstolu Paulo no ema kristaun seluk iha ninia tempu la husik atividade sira-neʼe atu domina sira-nia moris. Bainhira eskritura temi tiha katak Paulo serbisu atu halo tenda, tuirmai eskritura sira hatete katak nia tau uluk haklaken no hanorin ema kona-ba Maromak nia Liafuan iha ninia moris tomak. (Lee Apóstolu 18:2-4; 20:20, 21, 34, 35.) Paulo fó laran-manas ba ema kristaun iha Roma atu moris tuir nia, no ita mós presiza banati-tuir ninia ezemplu diʼak neʼe.—Roma 15:15, 16.

17. Tanbasá mak diʼak atu “hanoin buat espíritu nian”?

¹⁷ Se ita mak tau uluk Maromak Jeová iha ita-nia moris, neʼe sei lori bensaun saida? Roma 8:6 esplika ho klaru katak: “Hanoin buat espíritu nian lori ba moris no dame.” Loos duni, bainhira ita husik Jeová nia espíritu santu book ita-nia neon hodi halo tuir Jeová nia hanoin, neʼe sei lori ksolok no kontente ba ita-nia moris agora, no ita mós sei hetan moris rohan-laek iha futuru.

18. Oinsá mak “hanoin buat espíritu nian” bele lori dame?

¹⁸ Tanbasá mak apóstolu Paulo hatete katak “hanoin buat espíritu nian” bele lori dame? Ita hotu hakarak atu iha dame, liuliu dame iha ita-nia laran, maibé la fasil atu hetan dame neʼe. Ita agradese tebes ba Jeová tanba nia fó dame neʼe ba ita. Hodi nuneʼe mak ita bele iha dame ho ita-nia família no irmaun-irmán sira iha kongregasaun. Maibé tanba ita ema sala-naʼin, dala ruma problema bele mosu entre ita ho irmaun-irmán sira. Se ida-neʼe mak akontese, diʼak atu halo tuir Jesus nia konsellu, nia dehan: “Halo dame . . . ho ó-nia maun-alin.” (Mateus 5:24) Fasil liu atu halo dame ho ita-nia irmaun ka irmán se ita hanoin-hetan katak sira mós adora Maromak Jeová, “ida neʼebé fó dame”.—Roma 15:33; 16:20.

19. Ita bele iha dame ho sé bainhira ita “hanoin buat espíritu nian”?

¹⁹ “Hanoin buat espíritu nian” mós bele halo ita iha dame ho Jeová. Profeta Isaías dehan: “Ita [Jeová] sei proteje sira neʼebé sadere ba Ita ho laran tomak; Ita sei fó dame nafatin ba sira, tanba sira tau fiar ba Ita deʼit.”—Isaías (Yesaya) 26:3; lee Roma 5:1.

20. Tanbasá mak Ita agradese ba konsellu husi Roma kapítulu 8?

²⁰ Maski ita-nia esperansa mak atu moris iha lalehan ka iha rai, ita hotu bele halo tuir konsellu husi Roma kapítulu 8. Ita agradese tebes tanba Bíblia fó laran-manas ba ita atu tau ita-nia hanoin hodi serbí Jeová duké halo tuir hakarak isin nian. Bíblia hatete katak se ita mak “hanoin buat espíritu nian”, ita sei hetan kolen neʼebé la iha rohan, tanba Paulo dehan: “Prezente neʼebé Maromak fó mak moris rohan-laek liuhusi Kristu Jesus ita Naʼi.”—Roma 6:23.