1, 2. Kail tiha ba kalan tomak, Pedro aprende lisaun saida?

JESUS nia dixípulu naʼin-hitu kail hela ikan iha Tasi Galileia ba kalan tomak, maibé sira la hetan ikan ida. Toʼo fali dadeer-saan, Jesus neʼebé hetan ona moris-hiʼas, hamriik hela iha tasi-ibun hodi haree sira. Tuirmai nia dehan ba sira: “‘Soe imi-nia rede iha ró nia sorin loos no imi sei hetan ikan.’ Ho ida-neʼe sira soe sira-nia rede, no sira la bele dada sai tanba ikan barak tebes.”—João 21:1-6.

² Jesus fó matabixu ikan ho paun ba ninia dixípulu sira atu han. Hotu tiha, nia husu ba Simão Pedro: “Simão, João nia oan, ó hadomi haʼu liu fali sira-neʼe ka lae?” Jesus hatene katak Pedro gosta tebes kail ikan. Karik Jesus husu pergunta hanesan neʼe ba Pedro atu haree toʼok se Pedro hadomi Jesus ho Jesus nia hanorin, ka nia hadomi liu kail ikan. Pedro hatán ba Jesus: “Ita hatene katak haʼu hadomi Ita.” (João 21:15) Iha loron neʼe, Pedro aprende buat ruma. Nia aprende katak ninia domin ba Kristu tenkesér importante liu fali buat seluk. Husi tempu neʼebá, Pedro hatudu ho hahalok katak nia hadomi  duni Kristu. Nia badinas hodi haklaken, no kaer knaar importante iha apóstolu sira-nia tempu.

3. Ema kristaun tenke kuidadu kona-ba saida?

³ Saida mak ita bele aprende husi Jesus nia liafuan neʼebé nia koʼalia ba Pedro? Ita presiza kuidadu atu la husik ita-nia domin ba Kristu sai fraku. Jesus hatene katak moris iha mundu aat neʼe sei lori estrese, laran-taridu, no susar seluk tan. Iha Jesus nia ai-knanoik ida kona-ba toʼos-naʼin, nia hatete katak ema balu sei simu “liafuan kona-ba Maromak nia Ukun” no foufoun sira sai badinas. Maibé ikusmai, “hanoin resin kona-ba moris iha mundu neʼe, no rikusoin nia lasu” sei “hanehan liafuan” hodi ema sira-neʼe la badinas tan hanesan uluk. (Mateus 13:19-22; Marcos 4:19) Se ita mak la kuidadu, hanoin barak kona-ba moris bele hanetik ita-nia serbisu ba Jeová. Tan neʼe Jesus fó avizu ba ninia dixípulu sira: “Kuidadu didiʼak imi-nia an bá, atu nuneʼe imi-nia laran la todan tanba han demais no hemu barak, no hanoin resin kona-ba moris neʼe.”—Lucas 21:34.

4. Saida mak bele ajuda ita atu hatene katak ita-nia domin ba Kristu metin ka lae? (Haree foto iha pájina 22.)

⁴ Ita bele halo tuir apóstolu Pedro liuhusi tau uluk haklaken iha ita-nia moris hodi hatudu katak ita hadomi Kristu. Saida mak bele ajuda ita atu kontinua halo nuneʼe? Husu ba ita-nia an: ‘Haʼu hadomi liu saida iha haʼu-nia moris? Haʼu-nia ksolok mai husi serbí Jeová ka husi atividade seluk?’ Agora mai ita koʼalia kona-ba buat tolu neʼebé bele halo fraku ita-nia domin ba Kristu. Buat sira-neʼe mak, serbisu, atividade halimar nian, no materializmu.

5. Família nia ulun iha responsabilidade saida?

⁵ Ba apóstolu Pedro, sai peskadór laʼós deʼit buat neʼebé nia gosta halo, maibé neʼe mak ninia serbisu atu tau matan ba ninia família. Ohin loron, Jeová hakarak família nia ulun atu tau matan ba família, no sira tenke hakaʼas an atu kaer didiʼak sira-nia responsabilidade neʼe. (1 Timóteo 5:8) Maibé, tanba moris iha loron ikus sira-neʼe, serbisu bele halo ita hanoin resin.

6. Tanbasá mak serbisu bele lori estrese?

⁶ Baibain, ema mak barak liu fali serbisu. Tan neʼe, ema sempre hadau malu atu hetan serbisu. Ema barak sente katak sira presiza serbisu tan ba oras barak, maski baibain saláriu uitoan deʼit. Kompañia sira koko atu halo sasán barak, maibé uza serbisu-naʼin uitoan deʼit. Tan neʼe serbisu-naʼin bele sai estrese, kole, no moras. Ema barak halo tuir deʼit patraun nia hakarak tanba taʼuk atu lakon sira-nia serbisu.

7, 8. (a) Ita tenke hatudu laran-metin liu ba sé? (b) Irmaun ida husi rai-Tailándia aprende lisaun importante saida kona-ba ninia serbisu?

⁷ Nuʼudar ema kristaun, ita tenkesér hatudu laran-metin liu ba Jeová, duké buat seluk, inklui mós ita-nia patraun. (Lucas 10:27) Serbisu mak dalan atu tau matan ba ita-nia presiza no atu apoia serbisu haklaken. Maibé se ita la kuidadu, serbisu bele hanetik ita-nia adorasaun. Porezemplu, irmaun ida husi rai-Tailándia hatete: “Haʼu-nia serbisu mak hadiʼa komputadór no serbisu neʼe jeitu. Maibé serbisu neʼe presiza oras barak, dala ruma toʼo haʼu la iha tempu atu halaʼo haʼu-nia adorasaun. Ikusmai mak haʼu foin komprende katak, atu tau uluk Maromak nia Ukun iha haʼu-nia moris, haʼu presiza troka haʼu-nia serbisu.” Irmaun neʼe halo saida?

⁸ Nia dehan: “Halo tiha planu ba tinan  ida, haʼu deside atu faʼan sorvete iha dalan. Foufoun susar atu hetan osan no neʼe halo haʼu laran-tun. Bainhira haʼu hasoru haʼu-nia kolega serbisu uluk nian, sira hamnasa haʼu hodi husu tanbasá mak haʼu hanoin katak faʼan sorvete diʼak liu fali serbisu hadiʼa komputadór iha AC laran. Haʼu halo orasaun ba Jeová husu nia ajuda haʼu atu tahan no kumpre haʼu-nia planu hodi bele iha tempu barak liután ba atividade adorasaun nian. Lakleur, buat hotu komesa laʼo ho diʼak. Haʼu komesa aprende ema gosta han sorvete saida no haʼu sai matenek atu halo sorvete. Lakleur, haʼu-nia sorvete sempre faʼan hotu loroloron. Tuir loloos, haʼu-nia situasaun ekonomia diʼak liu fali bainhira hadiʼa komputadór. Haʼu kontente liu tanba haʼu la presiza estrese no hanoin barak hanesan serbisu uluk nian. Importante liu mak agora haʼu sente besik liután ba Jeová.”—Lee Mateus 5:3, 6.

9. Oinsá mak ita bele iha hanoin neʼebé loos kona-ba serbisu?

⁹ Jeová gosta ita serbisu ho badinas, no ita sei hetan kolen husi ita-nia serbisu makaʼas. (Provérbios [Amsal] 12:14) Maibé ita tenke kuidadu atu la husik serbisu sai buat neʼebé importante liu fali serbí Jeová. Jesus dehan: “Neʼe duni, kontinua buka uluknanain Maromak nia Ukun no ninia hakarak, no buat sira seluk nia sei fó mós ba imi.” (Mateus 6:33) Maibé, oinsá mak ita bele hatene katak ita iha hanoin neʼebé loos kona-ba serbisu? Husu ba ita-nia an: ‘Haʼu sente laran-manas no kontente kona-ba serbisu manán osan maibé sente ladún hafolin ka sente baruk kona-ba serbí Jeová ka lae?’ Hanoin didiʼak kona-ba pergunta hanesan neʼe bele ajuda ita haree fali saida mak ita gosta liu atu halo.

10. Jesus hanorin lisaun importante saida?

¹⁰ Jesus hanorin ita kona-ba saida mak tenkesér importante liu iha ita-nia moris. Loron ida, nia bá vizita biin-alin naʼin-rua, Maria no Marta. Marta prepara kedas hahán ba Jesus, maibé Maria tuur besik Jesus hodi rona ba Jesus nia hanorin. Tan neʼe, Marta ibun-ibun tansá Maria la ajuda nia. Jesus hatete ba Marta: “Maria hili buat neʼebé diʼak, no ema ida sei la foti ida-neʼe husi nia.” (Lucas 10:38-42) Husi neʼe ita bele aprende lisaun importante ida husi Jesus. Se ita lakohi husik serbisu ruma atu hanetik ita hodi hatudu domin ba Kristu, ita tenkesér “hili buat neʼebé diʼak”. Neʼe katak ita sei tau uluk ita-nia relasaun ho Jeová iha ita-nia moris.

11. Bíblia dehan saida kona-ba deskansa no tuur halimar?

¹¹ Ita-nia moris preokupa tebes, tan neʼe dala ruma ita presiza tempu atu deskansa no tuur halimar. Bíblia dehan: “Diʼak liu ba ema ida atu han, hemu no hetan ksolok husi ninia serbisu makaʼas.” (Eclesiastes [Pengkhotbah] 2:24) Jesus hatene katak importante tebes ba ninia dixípulu sira atu deskansa. Porezemplu, bainhira sira haklaken tiha ho badinas, Jesus hatete ba sira: “Mai ita laʼo mesamesak ba fatin fuik ida atu deskansa uitoan.”—Marcos 6:31, 32.

12. Tanbasá mak ita tenke kuidadu kona-ba halo atividade halimar nian? Konta toʼok ezemplu ida.

¹² Halo atividade halimar nian mós dalan ida atu deskansa. Maibé ita tenke kuidadu atu la husik atividade sira-neʼe sai buat neʼebé importante liu iha ita-nia moris. Iha apóstolu sira-nia tempu, ema barak iha hanoin hanesan neʼe: “Mai ita han no hemu, tanba aban ita sei mate”. (1 Korinto  15:32) Ema barak ohin loron mós iha hanoin hanesan neʼe. Porezemplu, mane joven ida husi Europa Oeste tuir ita-nia reuniaun sira. Maibé nia gosta liu atu halimar toʼo nia la ransu tan ho Jeová nia povu. Ikusmai mak nia foin hatene katak tau uluk atividade halimar nian lori susar barak ba ninia moris. Nia komesa estuda fali Bíblia no lakleur hola parte iha serbisu haklaken nian. Bainhira nia hetan tiha batizmu nia hatete: “Haʼu arrepende ba buat ida deʼit, neʼe mak haʼu estraga tiha ona tempu barak mak haʼu foin hatene katak serbí Jeová sei lori ksolok boot liu fali halo atividade halimar nian husi mundu aat neʼe.”

13. (a) Fó toʼok ezemplu ida neʼebé hatudu katak uza tempu barak liu ba atividade halimar nian ladiʼak ba ita. (b) Saida mak bele ajuda ita atu iha hanoin neʼebé loos kona-ba atividade halimar nian?

¹³ Atividade halimar nian bele ajuda ita atu sente fresku no hetan fali forsa. Se nuneʼe, ita bele uza oras hira ba atividade sira-neʼe? Mai ita halo komparasaun ida atu hatán ba pergunta neʼe. Ema barak gosta han dose no buat neʼebé midar. Maibé ita hatene katak han beibeik buat sira-neʼe sei estraga ita-nia saúde. Se ita hakarak atu iha saúde neʼebé diʼak, ita tenke han hahán neʼebé diʼak. Hanesan neʼe mós se ita mak uza tempu barak liu atu halo atividade halimar nian, neʼe sei estraga ita-nia relasaun ho Jeová. Saida mak bele ajuda ita atu iha hanoin neʼebé loos kona-ba atividade sira-neʼe? Karik ita bele hakerek, semana ida ita uza oras hira atu halaʼo atividade adorasaun nian hanesan reuniaun, haklaken, no estuda Bíblia mesak. Tuirmai hakerek fali oras hira mak ita uza iha semana neʼe ba atividade halimar nian hanesan desportu, haree televizaun, ka halimar vídeo games. Bainhira ita halo komparasaun ba atividade sira-neʼe, haree toʼok ita presiza halo mudansa ka lae?—Lee Éfeso 5:15, 16.

14. Saida mak bele ajuda ita atu hili atividade halimar neʼebé diʼak?

¹⁴ Jeová husik ita rasik mak hili atividade halimar nian, no família nia ulun mós bele hili atividade halimar nian ba ninia família. Kona-ba neʼe, Jeová fó prinsípiu balu husi Bíblia hodi ajuda ita hatene kona-ba ninia hanoin hodi ita bele halo desizaun neʼebé matenek. * Atividade halimar nian neʼebé diʼak mak “prezente husi Maromak”. (Eclesiastes [Pengkhotbah] 3:12, 13) Ema ida-idak gosta hili atividade halimar neʼebé la hanesan. (Galásia 6:4, 5) Maibé, maski ita bele hili atividade halimar nian tuir ita-nia hakarak, ita presiza kuidadu nafatin, tanba Jesus hatete: “Iha fatin neʼebé ó tau ó-nia rikusoin, iha fatin neʼe mós ó-nia fuan sei hela bá.” (Mateus 6:21) Loos duni, tanba ita-nia domin ba Jesus mak book ita atu hanoin, koʼalia, no iha hahalok neʼebé hatudu katak Maromak nia Ukun mak importante liu buat hotu iha ita-nia moris.—Filipe 1:9, 10.

15, 16. (a) Tanbasá mak domin ba osan no sasán bele sai lasu ida ba ita? (b) Jesus dehan saida kona-ba hadomi sasán?

¹⁵ Ohin loron, ema barak sente katak sira tenkesér iha roupa, telefone, komputadór ka sasán seluk neʼebé modernu liu hotu. Dalan neʼebé sira moris mak sempre buka kona-ba sasán ho osan deʼit. Tan neʼe, ita ida-idak tenke buka-hatene didiʼak ita mós iha hakarak hanesan neʼe ka lae. Husu ba Ita-nia an: ‘Haʼu uza tempu  barak atu hanoin kona-ba karreta ka roupa modernu duké atu prepara ba reuniaun sira ka lae? Haʼu preokupa liu ho moris loroloron nian toʼo ladún iha tempu atu halo orasaun ka lee Bíblia ka lae?’ Se ita mak la kuidadu, domin ba sasán bele sai importante liu fali domin ba Kristu. Diʼak atu hanoin-hetan Jesus nia liafuan neʼe: “Hasees an husi hahalok kaan-teen oioin.” (Lucas 12:15) Tanbasá mak Jesus koʼalia nuneʼe?

¹⁶ Jesus hatete katak “ema ida la bele sai atan ba naʼi-ulun rua”. Tuirmai nia dehan tan: “Imi la bele sai atan ba Maromak no ba Rikusoin.” Ita la bele fó ba Jeová buat neʼebé diʼak liu hotu no iha tempu neʼebé hanesan buka mós sasán. Tanba Jesus dehan katak, selae ita “sei odi ida no hadomi ida seluk, ka sei apoia ida no hakribi ida seluk”. (Mateus 6:24) Ita hotu la perfeitu, tan neʼe ita tenke luta beibeik hasoru isin nia hakarak, inklui mós domin ba osan no sasán.—Éfeso 2:3.

17. (a) Tanbasá mak ema balu sente susar atu iha hanoin neʼebé loos kona-ba sasán? (b) Saida mak bele ajuda ita atu luta hasoru hakarak ba sasán?

¹⁷ Ema barak hanoin demais kona-ba sira-nia hakarak no saida mak sira gosta toʼo sira sente kusta atu iha hanoin neʼebé loos kona-ba sasán. (Lee 1 Korinto 2:14.) Tanba sira la iha hanoin neʼebé loos, karik neʼe halo susar ba sira atu hatene saida mak loos no saida mak sala. (Ebreu 5:11-14) Tan neʼe, sira-nia hakarak atu buka sasán sai makaʼas liután. No se sira hetan ona sasán balu, sira sei hakarak sasán barak liután. (Eclesiastes [Pengkhotbah] 5:10) Maibé ita bele halo buat ida atu luta hasoru hakarak neʼe. Lee beibeik Maromak nia Liafuan bele hametin ita-nia hakarak atu halakon domin ba sasán. (1 Pedro 2:2) Jesus hanoin kleʼan kona-ba Jeová nia matenek mak ajuda nia hodi hakribi Diabu nia tentasaun sira. (Mateus 4:8-10) Hanesan neʼe mós ohin loron, se ita lakohi monu ba materializmu nia lasu, ita presiza uza Jeová nia matenek iha ita-nia moris. Halo nuneʼe bele hatudu ba Jesus katak ita hadomi nia liu fali sasán hotu.

18. Ita hakarak hakaʼas an atu halo saida?

¹⁸ Bainhira Jesus husu Pedro: “Ó hadomi haʼu liu fali sira-neʼe ka lae?” tuir loloos nia atu hanorin Pedro katak serbí Jeová mak tenkesér uluk iha ninia moris. Pedro nia naran signifika katak “Fatuk”. Nia iha duni hahalok neʼebé metin hanesan fatuk. (Apóstolu 4:5-20) Ohin loron, ita mós hakarak hatudu domin neʼebé metin ba Kristu. Tan neʼe mak ita tenkesér iha hanoin neʼebé loos kona-ba serbisu, atividade halimar nian, no sasán. Hodi nuneʼe, ita mós bele hatete hanesan apóstolu Pedro: “Naʼi, Ita hatene katak haʼu hadomi Ita.”