1. Jeová bele halo saida deʼit atu kumpre ninia hakarak?

JEOVÁ bele sai buat naran deʼit neʼebé nia presiza atu kumpre ninia hakarak. Porezemplu, Jeová sai Mestre, Maromak neʼebé fó kmaan, no Maromak neʼebé fó sai liafuan diʼak. Neʼe mak knaar balu deʼit neʼebé nia halo. (Isa 48:17; 2 Kor 7:6; Gal 3:8) Maski nuneʼe, dala barak nia uza ema atu kumpre ninia hakarak. (Mt 24:14; 28:19, 20; 2 Kor 1:3, 4) Jeová mós bele fó ita matenek no forsa atu bele sai buat naran deʼit hodi kumpre ninia hakarak. Neʼe mak signifikadu husi Jeová nia naran neʼebé matenek-naʼin barak esplika.

2. (a) Tanbasá dala ruma ita duvida katak Jeová bele uza ita? (b) Ita sei aprende kona-ba saida iha lisaun neʼe?

² Ita hotu hakarak Jeová uza ita, maibé irmaun-irmán balu karik duvida katak Jeová bele uza sira. Tanbasá? Karik sira sente katak sira labele halo buat barak tanba sira-nia idade, situasaun, ka abilidade. Irmaun-irmán seluk karik sente katak buat neʼebé sira halo daudaun mak toʼo ona no la presiza aumenta tan. Iha lisaun neʼe, ita sei aprende kona-ba oinsá Jeová bele fó buat neʼebé ita presiza atu kumpre ninia hakarak. Tuirmai, ita mós sei aprende kona-ba oinsá Jeová ajuda ninia atan-mane no atan-feto balu iha Bíblia hodi fó sira hakarak no kbiit atu kumpre ninia hakarak. Ikusliu, ita sei aprende oinsá ita bele husik Jeová uza ita.

3. Hanesan promesa iha Filipe 2:13, oinsá mak Jeová bele fó ita hakarak atu halo buat ruma?

³ Lee Filipe 2:13. * Jeová bele fó ita hakarak atu halo buat neʼebé nia hakarak. Oinsá? Karik ita haree katak ema ruma iha kongregasaun presiza ajuda ka iha kongregasaun iha serbisu balu neʼebé presiza halo. Ka karik katuas sira lee karta husi sukursál katak presiza liután haklaken-naʼin iha fatin ruma. Karik neʼe book ita atu husu ba ita-nia an: ‘Oinsá mak haʼu bele ajuda?’ Ka karik ita simu knaar neʼebé susar, maibé ita la hatene se ita bele halo knaar neʼe ho didiʼak. Ka bainhira ita lee tiha eskritura balu, karik ita hanoin: ‘Oinsá mak haʼu bele uza eskritura sira-neʼe atu ajuda ema seluk?’ Jeová la obriga ita atu halo buat ruma. Maibé bainhira nia haree katak ita hanoin daudaun kona-ba buat neʼebé ita bele halo, Jeová bele fó ita hakarak atu halo ida-neʼe.

4. Oinsá mak Jeová bele fó ita kbiit atu halo buat neʼebé nia hakarak?

⁴ Jeová mós bele fó ita kbiit atu halo buat neʼebé nia hakarak. (Isa 40:29) Nia bele fó espíritu santu atu aumenta abilidade neʼebé ita iha ona. (Éx 35:30-35) Jeová uza ninia organizasaun atu hanorin ita oinsá halo knaar ruma. Se ita ladún hatene oinsá atu halo knaar ruma, diʼak atu husu ajuda. No mós ita bele husu ajuda ba ita-nia Aman iha lalehan neʼebé laran-luak atu fó ita “kbiit neʼebé la hanesan baibain”. (2 Kor 4:7; Lc 11:13) Bíblia fó ezemplu barak kona-ba oinsá Jeová ajuda mane no feto sira hodi fó sira hakarak no kbiit atu halo buat neʼebé nia hakarak. Bainhira ita aprende kona-ba ema sira-neʼe balu, hanoin kona-ba oinsá Jeová mós bele uza ita atu halo buat neʼebé hanesan.

5. Ita aprende saida kona-ba bainhira Jeová uza Moisés atu salva ninia povu?

⁵ Jeová halo Moisés sai salvadór ba Izraél. Maibé bainhira loos mak Jeová uza nia? Jeová la uza Moisés iha tempu neʼebé Moisés hanoin katak nia kumpre ona kritéria tanba simu ona “hanorin tuir ema Ejitu nia matenek hotu”. (Após 7:22-25) Maibé Jeová uza Moisés bainhira nia ajuda ona Moisés sai ema haraik an no laran-maus. (Após 7:30, 34-36) Jeová fó aten-brani ba Moisés atu koʼalia ba ukun-naʼin kbiit boot iha Ejitu. (Éx 9:13-19) Ita aprende saida kona-ba bainhira Jeová uza Moisés? Jeová uza ema neʼebé hakaʼas an atu banati-tuir ninia hahalok no sadere ba nia atu hetan kbiit.​—Flp 4:13.

6. Ita aprende saida kona-ba oinsá Jeová uza Barzilai atu ajuda Liurai David?

⁶ Tinan barak depois neʼe, Jeová uza Barzilai atu ajuda Liurai David. David no ninia ema sira “hamlaha, kole no hamrook” tanba halai husi ninia oan-mane Absalão. Barzilai neʼebé katuas ona, hamutuk ho ema seluk tau sira-nia moris iha perigu laran atu ajuda David no mós ema neʼebé hamutuk ho David. Barzilai la hanoin katak tanba nia katuas ona, Jeová labele tan atu uza nia. Maibé, nia ho laran-luak uza buat neʼebé nia iha atu ajuda Maromak nia atan sira neʼebé presiza. (2 Sam 17:27-29) Ita bele aprende saida? Maski ita idade ona ka lae, Jeová bele uza ita iha rai neʼebé ita hela bá ka iha rai seluk atu ajuda ita-nia maluk fiar-naʼin  neʼebé presiza ajuda. (Prov 3:27, 28; 19:17) Karik ita rasik labele bá atu ajuda sira, maibé ita bele fó kontribuisaun ba serbisu iha mundu tomak no osan neʼe bele uza hodi fó ajuda bainhira presiza.​—2 Kor 8:14, 15; 9:11.

7. Oinsá Jeová uza Simeão? Oinsá ida-neʼe anima ita?

⁷ Jeová promete ba ninia atan ida iha Jeruzalein neʼebé katuas ona naran Simeão katak nia sei la mate toʼo nia haree Mesias. Promesa neʼe karik anima duni Simeão tanba nia hein Mesias durante tinan barak ona. Jeová fó kolen ba Simeão tanba ninia fiar no tahan nafatin. Loron ida, “Maromak nia espíritu dirije nia” atu bá templu no iha neʼebá nia haree bebé Jesus. No Jeová uza Simeão atu fó sai profesia ida katak bebé neʼe sei sai Kristu. (Lc 2:25-35) Maski karik Simeão mate antes Jesus hahú ninia serbisu haklaken, maibé Simeão agradese tebes ho priviléjiu neʼebé nia simu, no nia sei hetan buat diʼak barak iha futuru. Iha mundu foun, mane laran-metin neʼe sei haree oinsá Jesus nia ukun lori bensaun ba ema hotu iha rai. (Gén 22:18) Ita mós bele sente agradese tanba priviléjiu neʼebé Jeová fó ba ita atu halo ninia serbisu.

8. Oinsá mak Jeová bele uza ita hanesan nia uza Barnabé?

⁸ Iha apóstolu sira-nia tempu, mane laran-luak ida naran José husik Jeová atu uza nia. (Após 4:36, 37) Karik tanba José matenek atu fó kmaan ba ema seluk, apóstolu sira hanaran nia Barnabé, katak “Ida neʼebé fó kmaan ba ema seluk”. Porezemplu, bainhira Saul sai ona fiar-naʼin, irmaun-irmán barak taʼuk atu hakbesik nia tanba uluk nia kontra ema sira neʼebé fiar Jesus. Maibé, Barnabé ajuda Saul, no klaru katak Saul hafolin tebes ninia laran-diʼak neʼe. (Após 9:21, 26-28) Liutiha tempu balu, katuas sira iha Jeruzalein sente katak presiza haruka ema atu anima irmaun-irmán sira neʼebé hela dook iha Antiokia iha Síria. Sira haruka sé? Barnabé. Sira halo desizaun diʼak. Bíblia konta katak Barnabé “hahú fó aten-brani ba sira hotu atu kontinua laran-metin ba Naʼi”. (Após 11:22-24) Nuneʼe mós ohin loron, Jeová bele uza ita atu fó kmaan ba irmaun-irmán sira. Porezemplu, nia bele uza ita atu fó kmaan ba ema sira neʼebé família foin mate. Ka nia bele book ita atu vizita ka telefone ema neʼebé moras ka iha depresaun atu bele fahe liafuan balu neʼebé fó kmaan. Ita sei husik Jeová uza ita hanesan Barnabé ka lae?​—1 Tes 5:14.

9. Saida mak ita aprende kona-ba oinsá Jeová ajuda irmaun Vasily atu sai katuas neʼebé diʼak?

⁹ Jeová ajuda irmaun ida naran Vasily atu sai katuas kongregasaun neʼebé diʼak. Vasily simu knaar nuʼudar katuas bainhira nia idade 26. Nia taʼuk katak nia la iha matenek atu ajuda kongregasaun iha dalan espirituál, liuliu irmaun-irmán sira neʼebé hasoru susar. Maibé, nia simu treinu diʼak husi katuas sira neʼebé iha esperiénsia no mós liuhusi Eskola ba Katuas no Atan ba Kongregasaun. Vasily hakaʼas an atu kumpre didiʼak ninia knaar. Porezemplu, nia halo lista kona-ba planu kiʼik-kiʼik sira. Bainhira nia kumpre planu ida-idak, nia sai fiar an liután. Agora nia dehan: “Buat neʼebé uluk halo haʼu taʼuk, agora lori ksolok boot mai haʼu. Bainhira Jeová ajuda haʼu atu hetan eskritura neʼebé fó kmaan ba irmaun ka irmán iha kongregasaun, neʼe lori ksolok boot mai haʼu.” Irmaun sira, se ita husik Jeová uza ita hanesan  irmaun Vasily, Jeová bele fó ita kbiit atu kaer tan responsabilidade iha kongregasaun.

10. Abigail halo saida? Ita aprende saida husi ninia ezemplu?

¹⁰ Liurai Saul duni tuir David no ema hotu neʼebé laran-metin ba David, no sira presiza ajuda. David nia ema sira bá husu ai-han uitoan husi mane Izraél ida naran Nabal. Sira iha razaun atu husu ajuda tanba sira proteje Nabal nia bibi-lubun iha rai-fuik. Maibé Nabal neʼebé hanoin an deʼit lakohi fó buat ida ba sira. David sai hirus no hakarak atu oho Nabal no mane hotu iha ninia umakain. (1 Sam 25:3-13, 22) Nabal nia feen Abigail mak bonita no matenek tebes. Abigail hatudu aten-brani, nia hakneʼak iha David nia oin no husu David atu labele halo sala hodi oho Nabal no mane hotu iha ninia umakain. Abigail fó sujestaun ba David atu sadere ba Jeová. Abigail nia liafuan neʼebé hatudu haraik an no hahalok matenek book tebes David nia laran. Tan neʼe David rekoñese katak Jeová mak haruka Abigail. (1 Sam 25:23-28, 32-34) Jeová bele uza Abigail tanba nia haburas ona hahalok neʼebé diʼak. Nuneʼe mós Jeová bele uza irmán Kristaun sira neʼebé haburas hahalok respeitu no matenek atu bele hametin sira-nia família no ema seluk iha kongregasaun.—Prov 24:3; Tito 2:3-5.

11. Salum nia oan-feto sira halo saida? Ohin loron, sé mak banati-tuir sira?

¹¹ Tinan barak depois neʼe, Jeová uza mós Salum nia oan-feto sira atu ajuda harii fali moru Jeruzalein. (Neem 2:20; 3:12) Maski sira-nia aman Salum mak ulun-naʼin, maibé sira prontu atu halo serbisu neʼebé susar no perigozu. (Neem 4:15-18) Sira la hanesan duni ho ema-boot sira husi Tekoa, neʼebé “lakohi haraik an hodi hola parte” iha serbisu neʼe. (Neem 3:5) Imajina toʼok ksolok neʼebé Salum nia oan-feto sira sente bainhira projetu neʼe remata iha loron 52 deʼit. (Neem 6:15) Ohin loron, irmán barak kontente atu halo serbisu sagradu. Sira halo serbisu konstrusaun no tau matan ba fatin sira neʼebé dedika ona ba Jeová. Ita presiza irmán sira-neʼe nia matenek, laran-manas, no laran-metin atu bele halo serbisu sira-neʼe.

12. Iha dalan saida mak Jeová bele uza ita hanesan nia uza Tabita?

¹² Jeová motiva fiar-naʼin ida naran Tabita atu halo ‘hahalok diʼak barak no fó ajuda’, liuliu ba feto-faluk sira. (Após 9:36) Tanba ninia laran-luak no laran-diʼak neʼebé boot, ema barak triste bainhira nia mate. Maibé sira sente haksolok tebes bainhira apóstolu Pedro halo Tabita moris-hiʼas fali. (Após 9:39-41) Saida mak ita aprende husi Tabita? Maski ita mak joven ka idade ona, mane ka feto, ita hotu bele halo buat oioin atu ajuda ita-nia irmaun-irmán sira.​—Ebr 13:16.

13. Oinsá mak Jeová uza irmán Ruth neʼebé moedór? Ruth dehan saida?

¹³ Irmán moedór ida naran Ruth hakarak sai misionáriu. Bainhira sei labarik, nia haklaken ho badinas husi uma ba uma hodi fahe panfletu. Nia hatete: “Haʼu gosta tebes serbisu neʼe.” Maibé, nia sente susar tebes atu koʼalia ba uma-naʼin no haklaken kona-ba Maromak nia Ukun. Maski moedór, Ruth sai pioneiru regulár bainhira nia idade 18. Iha tinan 1946, nia tuir Eskola Gilead no tuirmai serbí iha Havai no Japaun. Jeová  uza nia atu halo serbisu haklaken barak iha rai sira-neʼe. Ruth haklaken durante tinan 80 no dehan: “Jeová sempre hametin haʼu. Nia ajuda haʼu atu la sente moe. Haʼu fiar metin katak Jeová bele uza ema naran deʼit neʼebé tau fiar ba nia.”

14. Tuir Koloso 1:29, ita tenke halo saida atu Jeová bele uza ita?

¹⁴ Husi uluk kedas, Jeová sempre uza ninia atan sira iha dalan oioin. Nia sei uza Ita iha dalan saida? Neʼe depende ba Ita-nia hakaʼas an. (Lee Koloso 1:29.) Se Ita husik Jeová atu uza Ita, nia bele halo Ita sai haklaken-naʼin neʼebé laran-manas, mestre neʼebé diʼak, ema neʼebé fó kmaan, serbisu-naʼin neʼebé matenek, belun neʼebé sempre fó apoia, ka sai buat naran deʼit neʼebé nia presiza atu kumpre ninia hakarak.

15. Tuir 1 Timóteo 4:12, 15, irmaun joven sira presiza husu Jeová atu ajuda sira halo saida?

¹⁵ Oinsá ho irmaun joven sira neʼebé atu sai boot ona? Presiza duni mane sira neʼebé forsa atu halaʼo responsabilidade sira hanesan atan ba kongregasaun. Iha kongregasaun barak, katuas sira mak barak liu fali atan ba kongregasaun. Irmaun joven sira, imi bele haburas hakarak atu simu responsabilidade tan iha kongregasaun ka lae? Dala ruma irmaun balu dehan: “Haʼu kontente atu sai deʼit haklaken-naʼin baibain.” Se Ita sente hanesan neʼe, husu Jeová atu ajuda Ita haburas hakarak atu kumpre kritéria hodi sai atan ba kongregasaun no fó Ita kbiit atu hakaʼas an hodi serbí nia. (Ecle 12:1) Ami presiza Ita-nia ajuda.​—Lee 1 Timóteo 4:12, 15.

16. Ita presiza husu Jeová kona-ba saida? Tanbasá?

¹⁶ Jeová bele halo Ita sai buat naran deʼit neʼebé nia presiza atu kumpre ninia hakarak. Tan neʼe husu nia atu fó Ita hakarak atu halo ninia serbisu, no tuirmai husu nia atu fó Ita kbiit neʼebé Ita presiza. Maski Ita mak joven ka idade ona, uza Ita-nia tempu, forsa, no buat seluk hanesan rikusoin no matenek atu fó glória ba Jeová agora. (Ecle 9:10) Bainhira Ita hetan oportunidade atu halo serbisu barak liután ba Jeová, keta ansi atu la simu ida-neʼe tanba Ita hanoin katak Ita labele halo serbisu neʼe. Ita hotu iha priviléjiu atu hola parte hodi fó glória ba ita-nia Aman domin nian.