Sara * esplika: “Haʼu moedór no ladún fiar an. Tan neʼe haʼu sente la diʼak bainhira hamutuk ho ema neʼebé fiar an no obriga ita atu halo tuir deʼit sira. Maibé haʼu sente kalma bainhira hamutuk ho ema laran-maus no haraik an. Haʼu bele fó sai haʼu-nia sentimentu no problema ba sira. Haʼu-nia belun sira mak ema laran-maus no haraik an.”

Sara nia liafuan hatudu katak se ita laran-maus, ema seluk hakarak habelun ho ita. Jeová mós gosta ema neʼebé laran-maus. Ninia Liafuan anima ita: “Tau hahalok . . . laran-maus . . . nuʼudar imi-nia roupa.” (Kol 3:12) Saida mak laran-maus? Oinsá mak Jesus hatudu laran-maus? Oinsá mak laran-maus bele halo ita kontente liu?

Laran-maus mosu tanba ita kalma. Ema neʼebé laran-maus sempre hatudu laran-diʼak, kalma nafatin no kontrola an maski ema halo nia hirus.

Liafuan Gregu neʼebé tradús nuʼudar “laran-maus” bele refere ba kuda fuik neʼebé ema treinu no sai maus ona. Maski kuda neʼe maus ona, maibé la dehan katak nia sai fraku. Nia forsa nafatin. Nuneʼe mós, ema neʼebé laran-maus, la dehan katak nia fraku. Nia forsa nafatin. Tanbasá? Tanba nia bele kontrola ninia fraku sira no nafatin buka dame.

Karik ita hanoin: ‘Haʼu laʼós ema neʼebé laran-maus.’ Ohin loron, ema barak hirus no la hatudu pasiénsia, tan neʼe karik ita sente susar atu hatudu laran-maus. (Rom 7:19) Klaru katak, atu haburas laran-maus ita presiza hakaʼas an, maibé Jeová nia espíritu santu sei ajuda ita atu kontinua hatudu laran-maus. (Gal 5:22, 23) Tanbasá ita presiza hakaʼas an atu hatudu laran-maus?

Ema gosta habelun ho ema laran-maus. Hanesan Sara, ita sente kalma bainhira hamutuk ho ema laran-maus. Jesus hatudu ezemplu kapás kona-ba laran-maus no laran-diʼak. (2 Kor 10:1) Labarik sira gosta hakbesik Jesus maski sira la koñese nia.—Mc 10:13-16.

Laran-maus diʼak ba ita no mós ba ema seluk. Se ita laran-maus, ita la sai hirus lalais. (Prov 16:32) Laran-maus sei ajuda ita atu la  hakanek ema nia laran, liuliu sira neʼebé ita hadomi, atu nuneʼe ita la iha razaun atu fó sala ba ita-nia an. Laran-maus sei lori diʼak ba ema seluk tanba ita sei kontrola ita-nia sentimentu no hahalok no sei la hakanek sira-nia laran.

Maski Jesus iha responsabilidade barak no okupadu, maibé nia sempre hatudu laran-maus ba ema hotu. Ema barak iha ninia tempu, serbisu makaʼas no hasoru susar oioin, no sira presiza hetan kmaan. Ita bele fiar katak sira sente kmaan bainhira Jesus hatete ba sira: “Mai besik haʼu, . . . tanba haʼu laran-maus no haraik an.”—Mt 11:28, 29.

Oinsá atu hatudu laran-maus hanesan Jesus? Hodi estuda Bíblia, ita aprende oinsá Jesus hatudu laran-maus ba ema no buat neʼebé nia halo iha situasaun susar. No bainhira ita hasoru situasaun neʼebé koko ita-nia laran-maus, ita sei hakaʼas an atu banati-tuir Jesus. (1 Ped 2:21) Mai ita hanoin kona-ba buat tolu neʼebé ajuda Jesus atu hatudu laran-maus.

Jesus haraik an. Jesus hatete katak nia “laran-maus no haraik an”. (Mt 11:29) Bíblia temi hahalok rua neʼe hamutuk tanba laran-maus liga ho haraik an. (Éf 4:1-3) Oinsá?

Haraik an ajuda ita atu la sente an ka la sai laran-kanek lalais. Saida mak Jesus halo bainhira ema duun katak nia mak “kaan-teen no lanu-teen”? Liuhusi ninia hahalok, nia fó prova katak sira-nia liafuan neʼe la loos. Tanba nia haraik an, ho laran-maus nia dehan katak “ema hatudu sai ninia matenek liuhusi ninia hahalok loos”.—Mt 11:19.

Se ema ruma koʼalia aat Ita-nia rasa, seksu, ka situasaun moris, hakaʼas an atu hatudu laran-maus nafatin. Katuas kongregasaun ida iha Áfrika Súl naran Peter hatete: “Bainhira ema nia liafuan halo haʼu hirus, haʼu husu ba haʼu-nia an: ‘Jesus sei halo saida?’” Nia hatutan: “Haʼu aprende atu la sente an lalais.”

Jesus komprende ema nia fraku. Jesus nia dixípulu sira hakarak halo buat neʼebé loos, maibé tanba sira la perfeitu, dala ruma sira la halo nuneʼe. Porezemplu, kalan antes Jesus mate, Pedro, Tiago, no João la halo tuir Jesus nia liafuan atu hadeer nafatin. Jesus komprende katak “laran hakarak, maibé isin fraku”. (Mt 26:40, 41) Tan neʼe, Jesus la sai hirus ba ninia apóstolu sira.

Uluk irmán Mandy sempre kritika ema, maibé agora nia hakaʼas an atu banati-tuir Jesus. Nia hatete: “Haʼu koko atu hanoin-hetan katak ema hotu mak la perfeitu no haʼu tau fokus ba ema nia hahalok diʼak, hanesan Jeová halo.” Jesus nia ezemplu bele ajuda ita atu hatudu laran-maus ba ema seluk.

Jesus tau fiar ba Maromak. Bainhira Jesus iha rai, ema trata aat nia. Ema hanoin sala, hakribi no fó-terus ba nia. Maski nuneʼe, nia laran-maus nafatin tanba nia tau fiar “ba Ida neʼebé tesi-lia tuir justisa”. (1 Ped 2:23) Jesus hatene katak ninia Aman iha lalehan sei ajuda nia tahan no iha tempu neʼebé loos sei fó kastigu ba ema neʼebé trata aat nia.

Se ema trata aat ita no ita sai hirus, ita bele halo situasaun sai aat liután. Tan neʼe eskritura sira fó-hanoin ita: “Ema nia hirus la kumpre buat neʼebé loos iha Maromak nia oin.” (Tgo 1:20) Maski ita iha razaun atu sai hirus, maibé tanba ita la perfeitu karik ita halo desizaun sala.

Uluk, irmán ida iha Alemaña naran Cathy hanoin: ‘Se ita la defende ita-nia an, la iha ema ida mak sei defende ita.’ Maibé nia troka ninia hanoin bainhira nia aprende atu tau fiar ba Jeová. Nia hatete: “Haʼu la presiza defende haʼu-nia an. Haʼu bele hatudu laran-maus tanba haʼu hatene katak Jeová sei hadiʼa buat neʼebé la justu iha mundu.” Se ema trata aat Ita, halo tuir Jesus nia ezemplu atu tau fiar ba Maromak, no neʼe sei ajuda Ita atu hatudu laran-maus nafatin.

Jesus fó sai katak se ita hakarak sai kontente, ita presiza hatudu laran-maus. Nia hatete: “Ksolok ba sira neʼebé laran-maus.” (Mt 5:5) Mai ita haree oinsá laran-maus ajuda ita iha situasaun sira tuirmai.

Laran-maus hamenus problema iha moris kaben nian. Irmaun Robert husi Austrália hatete: “Haʼu koʼalia liafuan kroʼat barak ba haʼu-nia feen maski loloos haʼu hadomi nia. Maibé ita labele dada fali liafuan kroʼat neʼebé ita fó sai kuandu hirus. Haʼu sente triste tebes tanba haʼu halo nia sente laran-kanek.”

“Ita hotu halo sala dala barak” ho ita-nia liafuan. Bainhira ita koʼalia hodi la hanoin uluk, neʼe bele hamosu problema iha moris kaben nian. (Tgo 3:2) Iha situasaun hanesan neʼe, laran-maus sei ajuda ita atu kalma nafatin no kontrola ita-nia liafuan.—Prov 17:27.

Robert hakaʼas an atu haburas hahalok kalma no kontrola an. Neʼe lori rezultadu saida? Nia hatete: “Agora, bainhira problema mosu, haʼu hakaʼas an atu rona didiʼak, koʼalia ho laran-maus, no la sai hirus. Haʼu-nia relasaun ho haʼu-nia feen sai diʼak liu.”

Laran-maus ajuda ita atu iha relasaun diʼak ho ema seluk. Ema neʼebé sente an lalais ladún iha kolega. Maibé, hahalok laran-maus ajuda ita “kaer metin nafatin unidade . . . hodi moris iha dame laran”. (Éf 4:2, 3) Cathy neʼebé temi ohin hatete: “Bainhira haʼu hatudu laran-maus, haʼu bele iha relasaun diʼak ho ema seluk, maski susar atu tahan hasoru ema balu nia hahalok.”

Laran-maus halo ita sente dame iha laran. Bíblia hatete katak “matenek husi lalehan” lori mai laran-maus no dame. (Tgo 3:13, 17) Ema laran-maus iha “laran neʼebé kalma”. (Prov 14:30) Martin neʼebé hakaʼas an atu haburas hahalok laran-maus, hatete: “Agora haʼu la obriga ema atu halo tuir deʼit haʼu-nia hakarak, tan neʼe haʼu bele sente dame iha laran no kontente.”

Karik ita presiza hakaʼas an atu haburas hahalok laran-maus. Irmaun ida hatete: “Tuir loloos, dala ruma haʼu sente hirus tebes iha laran.” Maibé Jeová anima ita atu haburas laran-maus no nia sei ajuda ita. (Isa 41:10; 1 Tim 6:11) Nia sei ‘halo kompletu ita-nia treinu’, no nia bele ‘halo ita forte’. (1 Ped 5:10) Hanesan Paulo, ita bele banati-tuir “Kristu nia laran-maus no laran-diʼak”.—2 Kor 10:1.