1. Jeová sente oinsá bainhira ninia atan ida fila fali ba nia?

HANESAN ita koʼalia ona iha lisaun antes neʼe, Jeová kompara ninia an ho bibi-atan diʼak neʼebé tau matan didiʼak ba ninia bibi ida-idak. Jeová buka bibi hotu neʼebé lakon dalan. Jeová fó-hatene ba ema Izraél neʼebé husik hela nia: “Fila fali mai haʼu, no haʼu sei fila fali ba imi.” Jeová sente hanesan neʼe nafatin tanba nia dehan: “Haʼu la troka.” (Mal 3:6, 7) Jesus hatete katak Jeová no anju sira kontente tebes bainhira Jeová nia atan ida fila fali ba Nia.—Lc 15:10, 32.

2. Iha lisaun neʼe, ita sei aprende kona-ba saida?

² Mai ita koʼalia kona-ba Jesus nia ai-knanoik tolu neʼebé hanorin ita lisaun importante kona-ba oinsá ita bele ajuda sira la ativu ona. Ita sei aprende kona-ba hahalok sira neʼebé ita presiza hatudu atu ajuda sira atu fila fali ba Jeová. Ita mós sei aprende kona-ba ksolok boot neʼebé ita sei hetan bainhira ita hakaʼas an atu ajuda ema neʼebé la ativu ona.

3-4. Tanbasá feto neʼebé temi iha Lucas 15:8-10 buka didiʼak ninia osan-besi drakma neʼebé lakon?

³ Ita presiza hakaʼas an atu buka-hetan ema neʼebé hakarak fila fali ba Jeová. Iha ai-knanoik neʼebé hakerek iha Evanjellu Lucas, Jesus esplika kona-ba feto ida neʼebé lakon osan-besi drakma ida neʼebé folin-boot. Parte importante husi istória neʼe mak kona-ba oinsá feto neʼe hakaʼas an atu buka osan-besi neʼe.—Lee Lucas 15:8-10.

⁴ Jesus esplika kona-ba feto neʼe nia sentimentu bainhira nia hetan fali osan-besi drakma ida neʼebé folin-boot. Iha Jesus nia tempu, bainhira feto Izraél ida kaben, dala ruma ninia inan fó nia osan-besi drakma sanulu. Karik osan-besi neʼebé lakon mak parte husi osan-besi sanulu neʼebé ninia inan fó ba nia no nia hafolin  tebes. Feto neʼe hanoin katak osan besi neʼe monu ba rai. Tan neʼe, nia sunu ahi-oan no buka didiʼak, maibé la hetan. Karik naroman husi ahi-oan neʼe la toʼo atu ajuda nia hetan osan-besi kiʼik neʼe. Ikusmai, nia dasa uma laran tomak. Nia hetan ninia osan-besi neʼe iha rai-rahun laran. Nia sente kontente tebes. Nia bolu ninia belun no viziñu atu fó-hatene katak nia hetan fali osan-besi neʼe.

5. Tanbasá susar atu buka-hetan sira neʼebé la ativu ona?

⁵ Jesus nia istória hatudu katak bainhira ita lakon buat ruma, ita presiza hakaʼas an atu hetan fali ida-neʼe. Nuneʼe mós ita presiza hakaʼas an atu buka-hetan ema sira neʼebé la ativu ona. Karik sira la ativu ba tinan barak ona. Karik sira muda ba fatin neʼebé irmaun-irmán sira la koñese sira. Maibé ita bele iha konfiansa katak ema balu neʼebé la ativu ona hakarak duni atu fila fali ba Jeová. Sira hakarak serbí fali Jeová hamutuk ho irmaun-irmán sira, maibé sira presiza ita-nia ajuda.

6. Oinsá ema hotu iha kongregasaun bele ajuda buka ema neʼebé la ativu ona?

⁶ Sé mak bele ajuda atu buka ema neʼebé la ativu ona? Ita hotu, inklui katuas kongregasaun, pioneiru, família no haklaken-naʼin sira. Ita iha belun ka família ruma neʼebé la ativu ka lae? Ita hasoru ona ema neʼebé la ativu bainhira haklaken uma ba uma ka iha fatin públiku ka lae? Esplika ba ema neʼe se nia hakarak ema ida vizita nia, Ita bele fó ninia númeru kontaktu ba Ita-nia katuas kongregasaun sira.

7. Ita bele aprende saida husi irmaun Thomas nia esperiénsia?

⁷ Katuas sira bele halo saida atu buka-hetan ema neʼebé hakarak atu fila fali ba Jeová? Hanoin toʼok esperiénsia husi katuas kongregasaun naran Thomas * iha rai-España. Nia ajuda ona Testemuña naʼin-40 liu atu fila fali ba Jeová. Thomas hatete: “Primeiru, haʼu husu irmaun-irmán sira se sira hatene ema neʼebé la ativu ona nia hela-fatin. Ka haʼu husu haklaken-naʼin sira se sira hanoin-hetan ema ruma neʼebé la tuir ona reuniaun. Irmaun-irmán barak kontente atu ajuda tanba sira sente katak sira hola parte atu buka ema. Tuirmai bainhira haʼu vizita ema neʼebé la ativu ona, haʼu husu kona-ba sira-nia oan no família sira seluk. Uluk ema balu neʼebé la ativu lori sira-nia oan ba reuniaun, no karik uluk sira-nia oan mós sai haklaken-naʼin. Ita mós bele ajuda sira atu fila fali ba Jeová.”

8. Iha ai-knanoik iha Lucas 15:17-24, aman ida halo saida bainhira ninia oan arrepende an?

⁸ Hahalok saida mak ita presiza hatudu atu bele ajuda ema sira neʼebé hakarak atu fila fali ba Jeová? Hanoin toʼok lisaun neʼebé ita bele aprende husi Jesus nia ai-knanoik kona-ba oan-mane neʼebé sai husi uma. (Lee Lucas 15:17-24.) Jesus esplika katak ikusmai oan neʼe rekoñese katak nia halo ona desizaun sala no deside atu fila fali ba uma. Ninia aman halai hasoru nia no hakoʼak metin nia, atu nuneʼe nia bele sente katak ninia aman hadomi nia. Oan neʼe nia konxiénsia fó-sala ba nia no nia sente katak nia la merese atu bolu nuʼudar oan. Oan neʼe fakar sai ona ninia sentimentu no ninia aman hanoin tebes nia. Tuirmai  ninia aman halo buat balu atu hatudu katak nia bele fila fali ba uma nuʼudar oan neʼebé ninia aman hadomi, laʼós nuʼudar atan. Porezemplu, ninia aman arranja festa ida no fó roupa furak ba ninia oan neʼebé arrepende an.

9. Ita presiza hatudu hahalok saida atu ajuda ema neʼebé la ativu ona atu fila fali ba Jeová? (Haree kaixa “ Oinsá atu ajuda sira neʼebé hakarak fila fali”.)

⁹ Jeová mak hanesan aman iha ai-knanoik neʼe. Nia hadomi irmaun-irmán sira neʼebé la ativu ona no hakarak sira atu fila fali ba nia. Hodi banati-tuir Jeová, ita bele ajuda sira atu fila fali ba Jeová. Atu halo nuneʼe, ita presiza hatudu pasiénsia, hanoin sira-nia sentimentu no hatudu domin. Tanbasá ita presiza hatudu hahalok sira-neʼe, no oinsá ita bele halo nuneʼe?

10. Tanbasá ita presiza hatudu pasiénsia bainhira ajuda ema atu fila fali ba Jeová?

¹⁰ Ita tenke pasiénsia tanba presiza tempu barak atu ajuda ema ida fila fali ba Jeová. Ema barak neʼebé uluk la ativu dehan katak katuas no ema seluk iha kongregasaun presiza vizita sira dala barak antes sira komesa serbí fali Jeová. Irmán Nancy husi Ázia hakerek: “Belun ida iha kongregasaun ajuda tebes haʼu. Nia hadomi haʼu hanesan biin. Nia koʼalia ba haʼu kona-ba tempu diʼak neʼebé uluk ami gasta hamutuk. Nia rona ho pasiénsia bainhira haʼu fakar sai haʼu-nia sentimentu, no nia la dada an atu fó konsellu mai haʼu. Nia sai nuʼudar belun diʼak neʼebé prontu atu ajuda iha tempu hotu.”

11. Tanbasá ita presiza hanoin ema neʼebé laran-kanek?

¹¹ Bainhira ita hanoin ema, neʼe hanesan  ai-moruk neʼebé bele kura ema nia laran-kanek. Ema balu neʼebé la ativu ona, sente laran-kanek durante tinan barak tanba maluk Kristaun ida nia hahalok. Tan neʼe sira lakohi atu fila fali ba Jeová. Karik ema balu hanoin katak sira hasoru situasaun neʼebé la justu. Karik sira presiza ema atu rona ba sira no komprende sira-nia sentimentu. (Tgo 1:19) María neʼebé uluk la ativu hatete: “Haʼu presiza ema atu rona, fó kmaan, fó konsellu no ajuda haʼu.”

12. Oinsá Jeová nia domin mak hanesan tali ida?

¹² Bíblia esplika katak Jeová nia domin ba ninia povu mak hanesan tali ida. Oinsá mak Maromak nia domin hanesan tali? Hanoin toʼok ai-knanoik tuirmai: Ita besik atu mout iha tasi neʼebé siʼak no ema ida soe palampu ba Ita. Klaru katak Ita hafolin ida-neʼe tanba neʼe ajuda Ita atu la mout. Maibé neʼe la toʼo atu salva Ita-nia moris. Tasi malirin, no Ita sei mate se ema la ajuda Ita tama ba ró. Ita presiza ema ida atu soe tali ba Ita no dada Ita ba ró. Jeová koʼalia kona-ba ema Izraél neʼebé hadook an husi nia, hodi dehan: “Haʼu uza . . . tali domin nian hodi dada sira ba haʼu.” (Os 11:4) Ohin loron, Maromak mós sente hanesan neʼe ba ema neʼebé la ativu ona no mout iha problema laran no sente laran-taridu. Nia hakarak sira atu hatene katak nia hadomi sira no hakarak sira atu fila fali ba nia. Jeová bele uza Ita atu ajuda ema sira-neʼe sente ninia domin ba sira.

13. Oinsá mak Pablo nia esperiénsia hatudu katak domin bele ajuda ema atu fila fali ba Jeová?

¹³ Importante atu fó sai beibeik ba ema neʼebé la ativu katak Jeová hadomi sira no ita mós hadomi sira. Pablo neʼebé  temi iha lisaun antes neʼe, la ativu ba tinan 30 liu. Nia hatete: “Loron ida, bainhira haʼu atu sai husi uma, irmán ferik ida neʼebé laran-diʼak hasoru haʼu no koʼalia ba haʼu ho domin. Haʼu komesa tanis hanesan labarik ida. Haʼu hatete ba nia katak Jeová mak haruka nia atu mai koʼalia ho haʼu. Iha momentu neʼe kedas, haʼu deside atu fila fali ba Jeová.”

14. Tuir ai-knanoik iha Lucas 15:4, 5, bibi-atan halo saida bainhira nia hetan bibi neʼebé lakon?

¹⁴ Bainhira ita hetan ema neʼebé la ativu ona, ita presiza kontinua ajuda no anima sira. Iha Jesus nia ai-knanoik kona-ba oan neʼebé lakon, oan neʼe sente laran-kanek. Karik ema neʼebé la ativu ona mós sente nuneʼe. No karik sira-nia relasaun ho Maromak la besik hanesan uluk tanba hasoru susar oioin iha Satanás nia mundu. Ita presiza ajuda sira atu hametin fali sira-nia fiar ba Jeová. Iha ai-knanoik kona-ba bibi neʼebé lakon, Jesus esplika oinsá bibi-atan tau bibi iha ninia kabaas no lori bibi neʼe fila fali ba bibi-lubun. Bibi-atan neʼe uza ona tempu no forsa barak atu buka bibi neʼebé lakon. Maibé nia mós rekoñese katak nia presiza lori bibi neʼe fila fali ba bibi-lubun tanba bibi neʼe la iha kbiit atu fila mesak.—Lee Lucas 15:4, 5.

15. Oinsá ita bele apoia ema neʼebé la ativu ona atu fila fali ba Jeová? (Haree kaixa “ Broxura neʼebé folin-boot”.)

¹⁵ Karik ita presiza gasta tempu no forsa atu ajuda ema neʼebé la ativu ona atu manán hasoru sira-nia fraku. Maibé ho Jeová nia espíritu santu, Bíblia, no ita-nia publikasaun sira, ita bele ajuda sira atu hametin fali sira-nia relasaun ho Jeová. (Rom 15:1) Oinsá? Katuas ida neʼebé  iha esperiénsia barak hatete: “Ema barak neʼebé la ativu ona presiza estuda Bíblia bainhira sira deside atu fila fali ba Jeová.” * Tan neʼe, se katuas sira husu Ita atu estuda ho ema neʼebé la ativu, Ita presiza simu knaar neʼe ho kontente. Katuas neʼe mós dehan: “Haklaken-naʼin neʼebé estuda ho ema neʼebé la ativu, presiza sai belun diʼak ho nia, atu nuneʼe nia bele tau fiar no koʼalia sai ninia sentimentu.”

16. Oinsá ita hatene katak anju sira sei ajuda ita?

¹⁶ Esperiénsia barak hatudu katak anju sira ajuda ita atu hetan ema neʼebé la ativu no hakarak tebes atu fila fali ba Jeová. (Apok 14:6) Porezemplu, Silvio husi rai-Ekuadór halo orasaun ho laran hodi husu ajuda atu fila fali ba kongregasaun. Bainhira nia halo daudaun orasaun, ema dere ninia odamatan. Iha katuas naʼin-rua hamriik hela iha odamatan oin. Husi tempu neʼebá, sira fó ajuda ba nia.

17. Ita sei sente oinsá se ita ajuda ema neʼebé la ativu ona?

¹⁷ Ita sei kontente tebes bainhira ajuda ema neʼebé la ativu atu fila fali ba Jeová. Pioneiru ida naran Salvador hakaʼas an atu ajuda ema neʼebé la ativu, nia dehan: “Bainhira haʼu hanoin kona-ba ema neʼebé fila fali ona ba Jeová, dala ruma haʼu-nia matan-been nakonu tanba haʼu kontente tebes. Haʼu kontente tanba serbisu hamutuk ho Jeová hodi ajuda ninia atan ida atu sai husi Satanás nia mundu no fila fali ba kongregasaun.”—Após 20:35.

18. Maski Ita la ativu ona, Ita bele fiar saida?

¹⁸ Maski Ita la ativu ona, Ita bele fiar katak Jeová nafatin hadomi Ita. Nia hakarak Ita atu fila fali ba nia. Ita rasik presiza hakaʼas an atu fila fali ba nia. Maibé hanesan aman iha Jesus nia ai-knanoik, Jeová hein Ita atu fila fali ba nia, no nia kontente atu simu fali Ita.