1. Tuir 3 João 3, 4, saida mak halo ita kontente?

IMAJINA toʼok kontente neʼebé apóstolu João sente bainhira nia rona katak ema sira neʼebé nia ajuda atu hetan lia-loos kontinua serbí Jeová ho laran-metin. João haree ema Kristaun sira-neʼe hanesan oan. Sira hasoru problema barak, no João hakaʼas an ajuda hametin sira-nia fiar. Ita mós sente kontente bainhira ita-nia oan rasik ka ema neʼebé ita ajuda aprende lia-loos, dedika an ba Jeová no kontinua serbí Jeová.​—Lee 3 João 3, 4.

2. Saida mak objetivu ba João nia karta sira?

² Iha tinan 98 EC, karik João hela iha Éfeso ka hela besik Éfeso. Karik nia muda ba neʼebá bainhira nia sai livre husi dadur iha illa Patmos. Maizumenus iha tempu neʼebá, Jeová nia espíritu santu book João atu hakerek karta tolu. Karta sira-neʼe nia objetivu mak atu book ema Kristaun neʼebé laran-metin hodi nafatin fiar metin ba Jesus no kontinua laʼo iha lia-loos.

3. Iha lisaun neʼe, ita sei hatán ba pergunta saida deʼit?

³ Iha tempu neʼebá, João mak apóstolu ikus neʼebé moris hela, no nia hanoin barak kona-ba oinsá mestre falsu sira fó influénsia ba kongregasaun sira. * (1 João 2:18, 19, 26) Mestre falsu sira-neʼe dehan katak sira hatene Maromak, maibé sira la halo tuir Jeová nia mandamentu sira. Iha lisaun neʼe, ita sei estuda kona-ba João nia konsellu no hatán ba pergunta tolu: Laʼo iha lia-loos katak sá? Saida mak bele hanetik ita atu laʼo iha lia-loos? No oinsá mak ita bele ajuda malu atu kontinua laʼo iha lia-loos?

4. Tuir 1 João 2:3-6 no 2 João 4, 6, ita presiza halo saida atu bele laʼo iha lia-loos?

⁴ Atu bele laʼo iha lia-loos, ita presiza hatene lia-loos iha Maromak nia Liafuan, Bíblia. Ita mós tenke “halo tuir [Jeová] nia ukun-fuan sira”. (Lee 1 João 2:3-6; 2 João 4, 6.) Jesus hatudu ezemplu neʼebé perfeitu kona-ba halo tuir Jeová. Entaun dalan importante ida atu halo tuir Jeová mak hodi halo tuir ho didiʼak Jesus nia ezemplu.​—João 8:29; 1 Ped 2:21.

5. Ita tenke fiar saida?

⁵ Atu bele kontinua laʼo iha lia-loos, ita tenke fiar katak Jeová mak Maromak lia-loos nian, no buat hotu neʼebé nia fó sai iha ninia Liafuan Bíblia mak lia-loos. Ita mós tenke fiar katak Jesus mak Mesias neʼebé Bíblia fó-hatene nanis ona. Ohin loron ema barak la fiar katak Jesus sai ona Liurai iha Maromak nia Ukun. João fó avizu kona-ba “lohidór barak” neʼebé bele lohi ema sira neʼebé la fiar metin lia-loos kona-ba Jeová no Jesus. (2 João 7-11) João hakerek: “Sé mak bosok-teen? Ema bosok-teen mak ema neʼebé dehan katak Jesus laʼós Kristu, loos ka lae?” (1 João 2:22) Dalan ida deʼit atu la monu ba lia-bosok sira mak hodi estuda Maromak nia Liafuan. Se ita halo nuneʼe, ita sei hatene didiʼak Jeová no Jesus. (João 17:3) No tuirmai ita sei fiar katak ita hetan ona lia-loos.

6. Saida mak bele hanetik joven Kristaun sira atu laʼo iha lia-loos?

⁶ Ema Kristaun hotu tenke kuidadu atu ema nia filozofia la lohi sira. (1 João 2:26) Liuliu joven Kristaun sira mak tenke kuidadu ho lasu neʼe. Irmán Alexia * iha rai-Fransa neʼebé tinan 25 hatete: “Bainhira haʼu eskola, haʼu aprende kona-ba evolusaun no ema nia filozofia, no ideia sira-neʼe halo haʼu duvida kona-ba lia-loos. Dala ruma, haʼu gosta ideia sira-neʼe. Maibé haʼu sente katak sala atu la hanoin kona-ba Bíblia nia hanorin no fiar deʼit mestre sira.” Alexia estuda livru Kehidupan—Bagaimana Asal Mulanya?  Melalui Evolusi atau Penciptaan? Semana balu liutiha, nia la duvida tan. Alexia hatete: “Haʼu prova ba haʼu-nia an katak Bíblia iha lia-loos. No haʼu rekoñese katak moris tuir Bíblia nia matadalan sira bele halo haʼu kontente no sente dame.”

7. Ita tenke kuidadu atu la halo saida, no tanbasá?

⁷ Ema Kristaun hotu, joven ka idade, tenke kuidadu atu la halaʼo moris ho oin rua. João hatete katak ita labele laʼo iha lia-loos no iha tempu hanesan halaʼo moris neʼebé la iha morál. (1 João 1:6) Se ita hakarak Maromak simu ita agora no iha futuru, ita presiza hanoin-hetan katak Jeová haree buat hotu neʼebé ita halo, inklui ita-nia sala sira maski ema seluk la haree ida-neʼe.​—Ebr 4:13.

8. Ita labele simu saida?

⁸ Ita labele simu mundu nia hanoin kona-ba sala. Apóstolu João hakerek: “Se ita dehan: ‘Ita la iha sala’, ita bosok ita-nia an.” (1 João 1:8) Iha João nia tempu, ema neʼebé kontra lia-loos dehan katak ema ida bele halo buat neʼebé sala no kontinua iha relasaun diʼak ho Maromak. Ohin loron, ema mós iha hanoin neʼebé hanesan. Ema barak dehan katak sira fiar Maromak, maibé sira la simu Jeová nia hanoin kona-ba sala, liuliu Jeová nia hanoin kona-ba relasaun seksuál. Jeová haree hahalok seksuál balu nuʼudar sala, maski nuneʼe ema barak hatete katak neʼe mak ema ida-idak nia desizaun no la sala.

9. Joven sira hetan benefísiu saida hodi kaer metin ba sira-nia fiar neʼebé bazeia ba Bíblia?

⁹ Joven Kristaun sira hetan koko atu iha hanoin hanesan ho kolega eskola ka kolega serbisu kona-ba hahalok la morál. Neʼe akontese ba Aleksandar. Nia hatete: “Feto balu iha eskola koko atu tenta haʼu halo relasaun seksuál ho sira. Sira  hatete katak tanba haʼu la iha namorada, haʼu mak omoseksuál.” Se Ita hasoru koko neʼebé hanesan, hanoin-hetan katak bainhira Ita kaer metin Ita-nia fiar neʼebé bazeia ba Bíblia, Ita sei sente diʼak kona-ba Ita-nia an, proteje Ita-nia saúde, hasees an husi laran-kanek, no nafatin iha relasaun diʼak ho Jeová. Tempu ida-idak neʼebé Ita tahan hasoru tentasaun, neʼe halo fasil liu ba Ita atu halo buat neʼebé loos. Hanoin-hetan mós katak mundu nia hanoin neʼebé sala kona-ba relasaun seksuál mai husi Satanás. Tan neʼe, bainhira Ita kaer metin ba Ita-nia fiar, Ita ‘manán aat-naʼin’.​—1 João 2:14.

10. Oinsá mak 1 João 1:9 ajuda ita atu serbí Jeová ho konxiénsia neʼebé moos?

¹⁰ Ita rekoñese katak Jeová iha direitu atu deside hahalok saida mak sala. Ita hakaʼas an atu la halo sala. Maibé bainhira ita halo sala, ita presiza fó sai ida-neʼe ba Jeová liuhusi orasaun. (Lee 1 João 1:9.) Se ita halo sala neʼebé sériu, ita presiza buka ajuda husi katuas sira neʼebé Jeová hili atu tau matan ba ita. (Tgo 5:14-16) Maibé, ita labele kontinua hanoin kona-ba sala neʼebé uluk ita halo. Tanbasá? Tanba ita-nia Aman domin nian fó ona ninia Oan-Mane nuʼudar sakrifísiu atu ita bele hetan perdua ba ita-nia sala. Bainhira Jeová hatete katak nia sei fó perdua ba ema neʼebé arrepende an, nia sei halo nuneʼe duni. Tan neʼe, la iha buat ida neʼebé bele hanetik ita atu serbí Jeová ho konxiénsia neʼebé moos.​—1 João 2:1, 2, 12; 3:19, 20.

11. Oinsá ita bele proteje ita-nia hanoin husi ideia neʼebé bele estraga ita-nia fiar?

¹¹ Ita labele simu ideia sira husi ema neʼebé kontra lia-loos. Husi tempu neʼebé kongregasaun Kristaun hahú, Diabu uza lohidór barak atu hamosu dúvida  iha Maromak nia atan sira-nia hanoin. Tan neʼe, ita presiza komprende oinsá atu buka-hatene diferensa entre faktu no lia-bosok. * Ita-nia inimigu uza internét ka média sosiál atu halo fraku ita-nia fiar ba Jeová no hamenus ita-nia domin ba irmaun-irmán sira. Hanoin-hetan lia-bosok sira-neʼe mai husi sé, no ita labele simu ida-neʼe.​—1 João 4:1, 6; Apok 12:9.

12. Tanbasá ita presiza hametin fiar ba lia-loos?

¹² Atu la monu bainhira Satanás koko atu halo fraku ita-nia fiar, ita presiza hametin fiar ba Jesus no ba dalan neʼebé Jeová uza Jesus atu kumpre Ninia hakarak. Ita mós presiza fiar ba ema neʼebé Jeová uza atu dirije ninia organizasaun iha mundu. (Mt 24:45-47) Ita hametin ita-nia fiar liuhusi estuda beibeik Bíblia. Hodi halo nuneʼe, ita-nia fiar sei sai hanesan ai-hun ho abut sira neʼebé tama kleʼan ba rai. Paulo fó sai pontu neʼebé hanesan bainhira nia hakerek ba kongregasaun Koloso. Nia hatete: “Hanesan imi simu ona Naʼi Kristu Jesus, kontinua laʼo hamutuk ho nia bá. . . . Imi-nia fiar iha Kristu tenke metin hanesan ai-abut neʼebé tama kleʼan ba rai, no harii iha nia, no sai metin.” (Kol 2:6, 7) Se ita hakaʼas an atu hametin ita-nia fiar, Satanás ka sira neʼebé hetan influénsia husi nia, labele hapara ita atu laʼo iha lia-loos.​—2 João 8, 9.

13. Ita la hakfodak kona-ba saida, no tanbasá?

¹³ Ita la hakfodak bainhira mundu odi ita. (1 João 3:13) João fó-hanoin ita katak “aat-naʼin mak domina mundu tomak”. (1 João 5:19) Mundu nia rohan besik ba daudaun, tan neʼe Satanás sai hirus liután. (Apok 12:12) Nia ataka ita subasubar liuhusi lasu sira hanesan sala seksuál ka ideia falsu husi ema neʼebé kontra lia-loos. Nia mós ataka ita hodi book ema atu fó-terus ba ita. Satanás hatene katak ninia tempu hela uitoan deʼit atu bele hapara ita-nia serbisu haklaken ka estraga ita-nia fiar. Tan neʼe, ita la hakfodak katak governu bandu ita-nia atividade balu ka atividade hotu iha nasaun balu. Maski nuneʼe, irmaun-irmán sira iha nasaun sira-neʼe kontinua tahan. Sira hatudu katak ita bele laran-metin nafatin maski Satanás halo buat oioin atu ataka ita.

14. Saida mak dalan ida atu ajuda irmaun-irmán sira kontinua laʼo iha lia-loos?

¹⁴ Atu bele ajuda irmaun-irmán sira kontinua laʼo iha lia-loos, ita presiza hatudu laran-sadiʼa. (1 João 3:10, 11, 16-18) Ita presiza hadomi malu iha tempu neʼebé diʼak no mós bainhira problema mosu. Porezemplu, Ita koñese maluk Kristaun ida neʼebé ninia família foin mate no presiza hetan kmaan no ajuda ka lae? Ita rona ona maluk Kristaun neʼebé lakon sasán tanba dezastre naturais no presiza ajuda atu harii fali sira-nia uma no Reuniaun-Fatin ka lae? Ita hatudu domin no laran-sadiʼa ba irmaun-irmán sira liuhusi ita-nia liafuan no mós hahalok.

15. Tuir 1 João 4:7, 8, ita presiza halo saida?

¹⁵ Ita banati-tuir ita-nia Aman domin nian iha lalehan bainhira ita hadomi malu. (Lee 1 João 4:7, 8.) Dalan importante ida atu hatudu domin mak perdua malu. Porezemplu, ema ida karik hakanek ita-nia laran no tuirmai nia husu deskulpa. Ita hatudu domin hodi fó perdua  ba nia no haluha ninia hahalok sala. (Kol 3:13) Irmaun ida naran Aldo laran-kanek bainhira irmaun neʼebé nia respeitu koʼalia aat kona-ba ninia kultura. Aldo hatete: “Haʼu halo orasaun beibeik ba Jeová atu ajuda haʼu la hanoin negativu kona-ba irmaun neʼe.” Aldo mós halo buat seluk tan. Nia husu irmaun neʼe atu bá haklaken hamutuk ho nia. Bainhira sira haklaken hamutuk, Aldo esplika katak nia laran-kanek tanba irmaun neʼe nia liafuan. Aldo hatete: “Bainhira irmaun neʼe rona katak haʼu sente laran-kanek, nia husu deskulpa. Liuhusi dalan neʼebé nia koʼalia, haʼu bele haree katak nia arrepende an duni. Depois neʼe, ami sai belun diʼak no haluha deʼit ami-nia problema.”

16-17. Ita presiza hakaʼas an atu halo saida?

¹⁶ Apóstolu João hadomi tebes irmaun-irmán sira no hakarak sira atu iha fiar neʼebé metin. Nia hatudu ida-neʼe liuhusi konsellu neʼebé nia fó ba sira iha ninia karta tolu. Ita kontente tebes atu hatene katak mane no feto neʼebé iha hahalok hanesan João sei ukun hamutuk ho Jesus iha lalehan.​—1 João 2:27.

¹⁷ Mai ita halo tuir konsellu sira iha lisaun neʼe. Mai ita hakaʼas an atu laʼo iha lia-loos hodi halo tuir Jeová iha ita-nia moris tomak. Estuda ninia Liafuan, no tau fiar ba ida-neʼe. Hametin ita-nia fiar ba Jesus. Labele simu ema nia filozofia no ideia husi ema neʼebé kontra lia-loos. Hakaʼas an atu la moris ho oin rua no la monu ba sala. Moris tuir Jeová nia matadalan kona-ba morál. No hakaʼas an atu ajuda ita-nia irmaun-irmán sira atu kontinua laʼo iha lia-loos liuhusi perdua malu no ajuda malu. Hodi halo nuneʼe, ita sei kontinua laʼo iha lia-loos maski hasoru susar.