LISAUN ESTUDU 17
Jeová hadomi tebes ita
“Jeová kontente ho ninia povu.”—SAL 149:4.
KNANANUK 108 Maromak nia domin neʼebé laran-metin
IHA LISAUN NEʼE *
Ita-nia Aman iha lalehan kontente ho ita ida-idak (Haree parágrafu 1)
1. Jeová haree saida husi ninia povu?
MAROMAK JEOVÁ “kontente ho ninia povu”. (Sal 149:4) Neʼe halo ita kontente tebes. Jeová haree ita-nia hahalok diʼak sira. Nia hatene katak ita bele sai ema neʼebé diʼak liu. Nia ajuda ita atu sai ninia belun. Se ita laran-metin nafatin ba nia, nia sei nafatin besik ho ita.—João 6:44.
2. Tanbasá irmaun-irmán balu duvida katak Jeová hadomi sira?
2 Irmaun-irmán balu karik hatete: ‘Haʼu hatene katak Jeová hadomi ninia povu nuʼudar grupu, maibé haʼu duvida katak Jeová hadomi haʼu rasik.’ Tanbasá irmaun-irmán balu sente hanesan neʼe? Irmán Oksana * neʼebé hetan terus barak bainhira kiʼik hatete: “Haʼu kontente tebes bainhira haʼu hetan batizmu no komesa foti pioneiru. Maibé tinan 15 liutiha, haʼu komesa hanoin fali buat aat sira neʼebé akontese mai haʼu bainhira haʼu sei kiʼik. Haʼu hanoin katak Jeová la kontente ona ho haʼu no haʼu la merese simu ninia domin.” Irmán pioneiru ida naran Yua hetan esperiénsia neʼebé hanesan bainhira kiʼik, nia hatete: “Haʼu dedika haʼu-nia moris ba Jeová tanba haʼu hakarak halo nia kontente. Maibé haʼu fiar katak nia sei nunka bele hadomi haʼu.”
3. Saida mak ita sei aprende iha lisaun neʼe?
3 Hanesan irmán naʼin-rua neʼebé foin temi, Ita hadomi Jeová, maibé karik Ita duvida katak Jeová hadomi Ita. Tanbasá Ita presiza fiar katak Jeová hadomi duni Ita? Saida mak bele ajuda Ita bainhira Ita hanoin katak Jeová la hadomi Ita? Ita sei buka resposta ba pergunta sira-neʼe.
DÚVIDA MAK PERIGOZU
4. Tanbasá duvida kona-ba Jeová nia domin mak perigozu?
4 Bainhira ita fiar katak Jeová hadomi ita, neʼe sei book ita atu serbí nia ho laran tomak maski hasoru susar. Maibé se ita duvida, ita-nia “forsa sei menus”. (Prov 24:10) No bainhira ita sai laran-kraik no duvida ho Jeová nia domin, neʼe halo susar ba ita atu tahan bainhira Satanás ataka ita.—Éf 6:16.
5. Saida mak akontese ba irmaun-irmán balu neʼebé duvida kona-ba Jeová nia domin?
5 Irmaun-irmán balu nia fiar sai fraku tanba duvida kona-ba Jeová nia domin ba sira. Katuas kongregasaun ida naran James hatete: “Maski haʼu serbí iha Betel no gosta atu haklaken hamutuk ho haʼu-nia kongregasaun iha língua seluk, maibé haʼu duvida se Jeová kontente ho haʼu-nia serbisu. Haʼu mós komesa duvida se Jeová rona haʼu-nia orasaun.” Irmán Eva neʼebé serbí iha Betel hatete: “Duvida kona-ba Jeová nia domin mak perigu tanba neʼe bele afeta buat hotu neʼebé ita halo ba Jeová. Neʼe sei hanetik ita atu serbí Jeová no halakon ita-nia ksolok atu serbí Jeová.” Irmaun Michael neʼebé serbí nuʼudar pioneiru regulár no katuas kongregasaun hatete: “Se ita duvida katak Jeová hadomi ita, neʼe sei hadook ita husi nia.”
6. Saida mak ita presiza halo bainhira ita komesa duvida katak Maromak hadomi ita?
6 Irmaun-irmán sira-neʼe nia esperiénsia hatudu katak se ita duvida kona-ba Jeová nia domin, neʼe bele estraga ita-nia fiar. Maibé saida mak ita presiza halo bainhira ita komesa duvida katak Maromak hadomi ita? Ita presiza para kedas atu hanoin kona-ba neʼe. Husu Jeová ajuda ita atu troka ita-nia “neon-susar” ho ‘ninia dame neʼebé sei proteje ita-nia laran no ita-nia kbiit atu hanoin’. (Sal 139:23; Flp 4:6, 7) Hanoin-hetan katak laʼós ita deʼit mak hanoin hanesan neʼe. Irmaun-irmán seluk neʼebé laran-metin no Jeová nia atan sira iha tempu uluk mós sente hanesan neʼe. Hanoin toʼok buat neʼebé ita bele aprende husi apóstolu Paulo.
ITA BELE APRENDE SAIDA HUSI PAULO?
7. Paulo hasoru problema saida deʼit?
7 Dala ruma Ita sente katak Ita iha responsabilidade barak liu no Ita labele halo buat sira-neʼe hotu ka lae? Se nuneʼe, Ita sei komprende Paulo nia sentimentu. Nia sente laran-taridu laʼós ba kongregasaun ida deʼit maibé ba “kongregasaun hotu”. (2 Kor 11:23-28) Ita iha problema saúde neʼebé halakon Ita-nia ksolok ka lae? Paulo iha ‘ai-tarak iha ninia isin’, karik neʼe mak problema saúde, no nia hakarak tebes ida-neʼe atu lakon. (2 Kor 12:7-10) Ita sai laran-kraik tanba Ita-nia fraku sira ka lae? Dala ruma Paulo mós sente nuneʼe. Nia bolu ninia an nuʼudar “ema neʼebé kuitadu loos” tanba nia nafatin luta hasoru ninia fraku sira.—Rom 7:21-24.
8. Saida mak ajuda Paulo tahan ninia problema?
8 Maski Paulo hasoru situasaun neʼebé koko ninia fiar no halo nia laran-kraik, maibé nia nafatin serbí Jeová. Oinsá mak nia hetan kbiit atu tahan? Paulo hatene katak nia iha fraku oioin, maski nuneʼe nia fiar metin ba Jesus nia sakrifísiu. Nia hatene Jesus promete katak “ema hotu neʼebé hatudu fiar ba [Jesus] sei . . . hetan moris rohan-laek”. (João 3:16; Rom 6:23) Paulo hatudu fiar ba Jesus nia sakrifísiu. Nia fiar katak Jeová prontu atu fó perdua ba ema sira neʼebé halo sala sériu se sira arrepende an.—Sal 86:5.
9. Saida mak ita aprende husi Paulo nia liafuan iha Galásia 2:20?
9 Paulo fiar katak Maromak hadomi tebes nia tanba Maromak haruka Jesus atu mate ba nia. (Lee Galásia 2:20.) Haree Paulo nia liafuan iha versíkulu 20 nia rohan. Paulo hatete: “Maromak nia Oan-Mane . . . hadomi haʼu no fó nia moris ba haʼu-nia diʼak.” Paulo la sente katak nia mak ema aat no Maromak la hadomi nia. Nia la hanoin: ‘Haʼu hatene tanbasá Jeová bele hadomi haʼu-nia irmaun-irmán sira, maibé nia la hadomi haʼu.’ Paulo fó-hanoin ema Kristaun iha Roma: “Kristu mate ba ita bainhira ita sei sala-naʼin hela.” (Rom 5:8) La iha buat ida mak bele hanetik Jeová nia domin ba ita.
10. Ita bele aprende saida husi Roma 8:38, 39?
10 Lee Roma 8:38, 39. Paulo fiar katak Maromak nia domin mak boot tebes. Paulo hakerek katak la iha buat ida mak bele “haketak ita husi Maromak nia domin”. Paulo hatene katak Jeová hatudu pasiénsia ba ema Izraél. Nia mós hatene oinsá Jeová hatudu ona laran-sadiʼa ba nia. Neʼe hanesan Paulo hatete: ‘Tanba Jeová haruka ninia Oan-Mane atu mate mai haʼu, neʼe katak haʼu la presiza duvida kona-ba Jeová nia domin mai haʼu.’—Rom 8:32.
Buat neʼebé ita halo agora no iha futuru mak importante ba Maromak, laʼós sala neʼebé ita halo iha pasadu (Haree parágrafu 11) *
11. Maski Paulo halo sala oioin hanesan temi iha 1 Timóteo 1:12-15, maibé tanbasá nia bele fiar katak Maromak hadomi nia?
11 Lee 1 Timóteo 1:12-15. Dala ruma Paulo sente triste bainhira nia hanoin fali kona-ba buat neʼebé nia halo ona iha pasadu. Ita la hakfodak kuandu nia bolu ninia an nuʼudar “sala-naʼin neʼebé aat liu”. Antes Paulo simu lia-loos, nia fó-terus ba ema Kristaun iha sidade oioin, hatama sira balu ba komarka no apoia desizaun atu fó kastigu-mate ba sira balu. (Após 26:10, 11) Saida mak Paulo sente bainhira nia hasoru joven Kristaun ida neʼebé ninia inan-aman mate tanba Paulo? Paulo arrepende ninia sala, maibé nia hatene katak nia labele troka ninia pasadu. Nia fiar katak Kristu mate ba nia, no ho konfiansa nia hakerek: “Haʼu bele sai hanesan agora tanba Maromak nia laran-diʼak neʼebé boot.” (1 Kor 15:3, 10) Saida mak ita aprende? Ita presiza fiar katak Kristu mate ba Ita no loke dalan ba Ita atu iha relasaun diʼak ho Jeová. (Após 3:19) Buat neʼebé Ita halo agora no iha futuru mak importante ba Maromak, laʼós sala neʼebé Ita halo iha pasadu maski Ita mak Testemuña iha tempu neʼebá ka lae.—Isa 1:18.
12. Oinsá liafuan iha 1 João 3:19, 20 bele ajuda ita se ita sente la iha folin?
12 Bainhira Ita hanoin kona-ba Jesus nia mate neʼebé kasu Ita-nia sala, karik Ita hanoin: ‘Haʼu la merese atu simu ida-neʼe.’ Tanbasá ita sente hanesan neʼe? Karik ita-nia laran lohi ita no halo ita sente la iha folin no la merese atu hetan domin. (Lee 1 João 3:19, 20.) Bainhira ita sente hanesan neʼe, ita presiza hanoin-hetan katak “Maromak mak boot liu fali ita-nia laran”. Ita rasik presiza fiar katak Jeová hadomi tebes ita no hakarak fó perdua ba ita. Atu bele hatene Jeová nia hanoin kona-ba ita, ita presiza estuda Bíblia loroloron, halo orasaun beibeik, no ransu ho ninia povu beibeik. Tanbasá importante atu halo buat sira-neʼe?
ESTUDA BÍBLIA, ORASAUN NO BELUN SIRA BELE AJUDA ITA
13. Oinsá estuda Bíblia bele ajuda ita? (Haree mós kaixa “ Oinsá Bíblia ajuda sira?”)
13 Estuda Bíblia loroloron, no Ita sei komprende liután Jeová nia hahalok furak oioin. Ita sei komprende katak nia hadomi tebes Ita. Bainhira Ita medita kona-ba buat neʼebé Ita lee iha Bíblia loroloron, neʼe bele ajuda Ita atu iha hanoin neʼebé loos tanba neʼe sei hadiʼa Ita-nia hanoin no hahalok neʼebé sala. (2 Tim 3:16) Katuas kongregasaun naran Kevin neʼebé sente folin-laek hatete: “Lee no medita kona-ba Salmo 103 ajuda haʼu atu hadiʼa haʼu-nia hanoin no komprende Jeová nia hanoin kona-ba haʼu.” Irmán Eva neʼebé temi ohin hatete: “Kalan-kalan haʼu hanoin kleʼan kona-ba saida mak Jeová sente. Neʼe ajuda haʼu atu sente dame iha laran no hametin haʼu-nia fiar.”
14. Oinsá orasaun bele ajuda ita?
14 Halo orasaun beibeik. (1 Tes 5:17) Bainhira ita hakarak habelun ho ema ruma, ita presiza koʼalia ho nia beibeik no mós fó sai ita-nia sentimentu ba nia. Ita mós presiza halo nuneʼe atu iha relasaun diʼak ho Jeová. Bainhira ita fó sai ita-nia hanoin, sentimentu, no ita-nia laran-taridu ba Jeová liuhusi orasaun, ita hatudu katak ita tau fiar tomak ba nia no ita hatene katak nia hadomi ita. (Sal 94:17-19; 1 João 5:14, 15) Irmán Yua neʼebé temi ohin hatete: “Bainhira haʼu halo orasaun, haʼu laʼós hatete deʼit buat neʼebé akontese ba haʼu iha loron neʼe. Maibé haʼu fó sai haʼu-nia hanoin no sentimentu. Neineik-neineik, haʼu bele haree katak Jeová la hanesan ho xefe ida iha kompañia, maibé nia hanesan Aman neʼebé hadomi tebes ninia oan sira.”—Haree kaixa “ Ita lee ona ka lae?”
15. Oinsá Jeová hatudu domin mai ita?
15 Ransu ho belun sira. Sira mak prezente husi Maromak. (Tgo 1:17) Ita-nia Aman iha lalehan hatudu ninia domin ba ita liuhusi irmaun-irmán sira neʼebé “hatudu domin iha tempu hotu”. (Prov 17:17) Iha ninia karta ba ema Kristaun iha Koloso, Paulo temi ema Kristaun balu neʼebé apoia ona nia no dehan katak sira “sai ona ajuda-naʼin neʼebé fó kmaan boot”. (Kol 4:10, 11) Kristu rasik mós presiza hetan apoia no hafolin ninia belun sira neʼebé apoia nia, neʼe inklui anju sira no ema.—Lc 22:28, 43.
16. Oinsá belun sira ajuda ita hakbesik ba Jeová?
16 Ita buka no simu ajuda husi belun sira iha kongregasaun ka lae? Bainhira ita fó sai ita-nia problema ka laran-taridu ba belun ida neʼebé maduru, neʼe la dehan katak ita fraku. Maibé neʼe bele proteje ita. Irmaun James neʼebé temi ohin hatete: “Sai belun ho ema Kristaun neʼebé maduru ajuda tebes haʼu. Bainhira haʼu sai laran-taridu demais, sira rona didiʼak haʼu no fó-hanoin ba haʼu katak sira hadomi haʼu. Liuhusi sira, haʼu bele komprende katak Jeová hadomi no hanoin haʼu.” Importante tebes atu haburas no mantein ita-nia relasaun diʼak ho irmaun-irmán sira.
HELA NAFATIN IHA JEOVÁ NIA DOMIN
17-18. Ita presiza rona ba sé no tanbasá?
17 Satanás hakarak ita rende an atu halo buat neʼebé diʼak. Nia hakarak ita atu fiar katak Jeová la hadomi ita no ita la merese atu hetan salvasaun. Maibé hanesan ita aprende ona, neʼe la loos.
18 Jeová hadomi Ita. Ba Jeová, Ita mak folin-boot. Se Ita halo tuir nia, Ita sei “hela nafatin iha ninia domin”, hanesan ho Jesus. (João 15:10) Keta rona ba Satanás no mós Ita-nia sentimentu rasik neʼebé hatete katak Jeová la hadomi Ita. Duké halo nuneʼe, rona ba Jeová, nia haree buat diʼak husi Ita ida-idak. Fiar metin bá katak Jeová “kontente ho ninia povu”, inklui Ita.
KNANANUK 141 Moris mak milagre
^ par. 5 Irmaun-irmán balu sente susar atu fiar katak Jeová hadomi sira. Ita sei koʼalia kona-ba tanbasá ita bele fiar katak Jeová hadomi ita ida-idak. Ita mós sei aprende kona-ba saida mak ita bele halo bainhira ita sente duvida katak Jeová hadomi ita.
^ par. 2 Naran balu laʼós naran neʼebé loos.
^ par. 67 ESPLIKASAUN BA DEZEÑU: Antes Paulo aprende lia-loos, nia fó-terus ba ema Kristaun sira no hatama sira barak ba komarka. Bainhira nia tau fiar ba Jesus nia sakrifísiu, nia halo mudansa no anima maluk Kristaun sira, karik Paulo fó-terus ba sira-nia família balu.
