Pergunta husi lee-naʼin
Sé mak “feto” neʼebé temi iha Isaias 60:1, no oinsá mak nia “hamriik” no “fó naroman”?
Isaias 60:1 hatete: “Oh feto, hamriik bá, fó naroman bá, tanba ó-nia naroman mosu ona. Jeová nia glória mak fó naroman ba ó.” Kontestu husi versíkulu neʼe hatudu katak “feto” neʼe mak Siaun, ka Jeruzalein, sidade kapitál ba Judá iha tempu neʼebá. a (Isa 60:14; 62:1, 2) Sidade neʼe reprezenta nasaun tomak. Isaias nia liafuan hamosu pergunta rua: Primeiru, horibainhira no iha dalan oinsá mak Jeruzalein “hamriik” no fó naroman espirituál? Segundu, Isaias nia liafuan sai loos iha dalan neʼebé boot liu ka lae?
Horibainhira no iha dalan oinsá mak Jeruzalein “hamriik” no fó naroman espirituál? Durante ema Judeu sai dadur iha Babilónia ba tinan 70, Jeruzalein no templu sei rahun hela. Maibé depois ema Média no Pérsia manán tiha Babilónia, ema Izraél neʼebé hela iha área neʼebé Babilónia mak ukun, agora livre ona atu fila fali ba rai-Izraél no harii fali adorasaun neʼebé loos. (Ezras 1:1-4) Komesa iha tinan 537 AEC, ema Izraél balu husi suku 12 fila fali ba Jeruzalein. (Isa 60:4) Sira komesa hasaʼe sakrifísiu ba Jeová, selebra festa sira, no harii fali templu. (Ezras 3:1-4, 7-11; 6:16-22) Dala ida tan, Jeová nia glória komesa fó naroman ba Jeruzalein, katak ninia povu. Tuirmai, ninia povu sai fali naroman ba nasaun sira seluk neʼebé iha nakukun laran iha dalan espirituál.
Isaias nia profesia neʼe sai loos duni iha tempu neʼebá, maibé laʼós iha dalan neʼebé kompletu. Ema Izraél barak la kontinua halo tuir Maromak. (Neem 13:27; Mal 1:6-8; 2:13, 14; Mt 15:7-9) Tuirmai, sira mós lakohi simu Jesus Kristu nuʼudar Mesias. (Mt 27:1, 2) Iha tinan 70 EC, Jeruzalein no ninia templu rahun ba dala segundu.
Jeová fó sai nanis katak ida-neʼe sei akontese. (Dan 9:24-27) Klaru katak neʼe laʼós Jeová nia hakarak ba Jeruzalein iha rai atu kumpre parte hotu husi profesia neʼebé hakerek iha Isaias kapítulu 60.
Isaias nia liafuan sai loos iha dalan neʼebé boot liu ka lae? Sin, maibé neʼe akontese ba feto simbóliku seluk, katak “Jeruzalein lalehan nian”. Kona-ba feto neʼe, apóstolu Paulo hatete: “Nia mak ita-nia inan.” (Gal 4:26) Jeruzalein lalehan nian mak Maromak nia organizasaun parte lalehan nian ho anju sira neʼebé laran-metin. Feto neʼe nia “oan” mak Jesus no ninia alin naʼin-144.000 neʼebé Maromak hili ona no iha esperansa atu moris iha lalehan. Jesus nia alin sira mak “nasaun santu ida”, katak “Izraél Maromak nian”.—1 Ped 2:9; Gal 6:16.
Iha dalan oinsá mak Jeruzalein lalehan nian “hamriik” no “fó naroman”? Neʼe akontese liuhusi Jesus nia alin sira neʼebé sei iha rai. Ita bele haree katak buat neʼebé akontese ba sira mak atu hanesan ho profesia neʼebé hakerek iha Isaias kapítulu 60.
Jesus nia alin sira presiza “hamriik” tanba sira tama ona iha nakukun espirituál kuandu apóstata sira komesa sai barak depois apóstolu sira hotu mate. (Mt 13:37-43) Iha tempu neʼebá mak sira sai dadur iha Babilónia Boot, katak relijiaun falsu hotu. Ema Kristaun sira-neʼe sai dadur toʼo “mundu neʼe nia rohan” neʼebé hahú iha tinan 1914. (Mt 13:39, 40) Lakleur depois neʼe, iha tinan 1919, sira sai livre no hahú kedas atu fó naroman espirituál hodi halo serbisu haklaken. b Husi tempu neʼebá toʼo ohin loron, ema husi nasaun hotu hakbesik ona ba naroman neʼe, inklui restu husi Izraél Maromak nian. Sira mak “liurai sira” neʼebé temi iha Isaias 60:3.—Apok 5:9, 10.
Iha futuru, Jesus nia alin sira sei fó naroman iha dalan neʼebé boot liu. Oinsá? Bainhira sira hotu bá tiha lalehan, sira sei sai parte ba “Jeruzalein Foun”, ka Kristu nia noiva neʼebé hamutuk naʼin-144.000. Sira sei serbí nuʼudar liurai no amlulik.—Apok 14:1; 21:1, 2, 24; 22:3-5.
Jeruzalein Foun sei iha knaar importante atu kumpre profesia iha Isaias 60:1. (Kompara Isaias 60:1, 3, 5, 11, 19, 20 ho Apokalipse 21:2, 9-11, 22-26.) Iha Izraél antigu, Jeruzalein mak fatin sentru ba nasaun neʼe nia governu. Nuneʼe mós, Jeruzalein Foun no Kristu sei sai nuʼudar governu ba sistema foun. Maibé iha dalan oinsá mak Jeruzalein Foun ‘tun mai husi lalehan husi Maromak’? Neʼe mak hodi halo buat ruma neʼebé sei afeta mundu tomak. Ema husi nasaun hotu neʼebé hamtaʼuk Maromak “sei laʼo iha ninia naroman”. Sira sei sai livre husi sala no mate. (Apok 21:3, 4, 24) Rezultadu mak governu neʼe sei “halo foun buat hotu” iha dalan neʼebé kompletu hanesan Isaias no profeta sira seluk fó sai nanis ona. (Após 3:21) Tempu atu halo foun buat hotu komesa ona kuandu Kristu sai Liurai no neʼe sei remata iha Tinan Rihun Ida nia rohan.
a Iha Isaias 60:1, Bíblia Tradusaun Mundu Foun uza liafuan “feto” duké uza liafuan “Siaun,” ka “Jeruzalein”. Neʼe tanba iha lian Ebraiku, verbu kona-ba fraze “hamriik” no “fó naroman” mak liafuan femininu, nuneʼe mós ho liafuan “ó”. Liafuan “feto” ajuda lee-naʼin atu komprende katak neʼe mak feto simbóliku.
b Adorasaun loos neʼebé komesa fali iha tinan 1919 mós fó sai ona iha Ezequiel 37:1-14 no Apokalipse 11:7-12. Ezequiel fó sai nanis kona-ba tempu neʼebé Jesus nia alin hotu sai dadur ba tempu kleur no oinsá tuirmai sira sei halaʼo fali adorasaun loos. Profesia iha Apokalipse refere ba tempu neʼebé grupu kiʼik husi Jesus nia alin balu moris fali iha dalan simbóliku. Neʼe akontese depois sira tama tiha komarka ba tempu balu no labele halaʼo sira-nia atividade. Iha tinan 1919, sira simu knaar nuʼudar “atan laran-metin no matenek”.—Mt 24:45; haree livru Ibadah yang Murni kepada Yehuwa—Akhirnya Dipulihkan!, p. 118.
