‘Hadook husi imi-nia moris domin ba osan . . . basá Maromak rasik dehan: “Haʼu sei la husik ka hadook an husi imi.”’—Ebreu 13:5.

OINSÁ MAK MAROMAK HATUDU INTERESE?

Kuandu Maromak Jeová nia atan sira iha susar laran, Maromak hatudu katak nia interese sira hodi ajuda sira iha dalan oioin. Porezemplu maluk fiar-naʼin bele fó ajuda. * Hanesan Tiago 1:27 hatete: “Relijiaun momoos no loloos iha Maromak no Aman nia oin mak neʼe: Tau matan ba oan-kiak no feto-faluk sira iha sira-nia susar.”

Ema kristaun iha tempu uluk, sira ajuda malu. Porezemplu, kuandu hamlaha boot kona rai-Judeia, ema kristaun iha sidade Antiokia iha Síria “haruka tulun ba maun-alin sira neʼebé hela iha Judeia”. (Apostolu 11:28-30) Tanba sira halo nuneʼe, sira-nia maluk kristaun sira simu ajuda neʼebé sira presiza. Sira fó ajuda neʼe husi sira-nia laran no ida-neʼe mak hatudu katak sira hadomi malu.—1 Joao 3:18.

“Haʼu, Jeová, mak ó-nia Maromak, Ida neʼebé hanorin ó atu hetan buat neʼebé diʼak.”—Isaías (Yesaya) 48:17, 18.

 MAROMAK AJUDA SIRA LIUHUSI BÍBLIA

Matenek neʼebé bele hetan iha Bíblia mak diʼak liu hotu tanba ajuda ona ema rihun ba rihun. Provérbios (Amsal) 2:6, 7 hatete: “Jeová rasik mak fó matenek; no husi nia ibun matenek no koñesimentu sai. No ba ema sira neʼebé loos, nia sei rai matenek neʼebé hanesan rikusoin.” Kuandu ema buka no uza matenek neʼe, sira bele hetan buat diʼak.

Porezemplu, sira bele sees husi toman aat neʼebé perigu no toman sira neʼebé bele lakon osan barak, hanesan uza droga ka hemu tua demais. (2 Korinto 7:1) Sira sei sai ema neʼebé laran-moos no badinas no hatene kaer responsabilidade. Ida-neʼe bele ajuda sira atu hetan serbisu ka ajuda sira atu sai serbisu-naʼin neʼebé diʼak. Iha Efeso 4:28 hatete: “Ema neʼebé uluk naʼok, lalika naʼok tan, maibé buka serbisu ho liman atu bele hetan buat ruma atu fó ba ema neʼebé iha susar laran.”

“Matenek hatudu an loloos hodi ninia hahalok sira.”—Mateus 11:19.

ESPERIÉNSIA SIRA

Mane ida naran Wilson neʼebé hela iha rai-Gana, nia besik atu ramata ona ninia kontratu serbisu nian. Iha Wilson nia loron ikus, nia fase hela diretór nia karreta, no nia hetan osan iha karreta laran. Ninia patraun dehan foti deʼit osan neʼe. Maibé tanba Wilson mak Testemuña ba Jeová ida, nia lakohi atu naʼok. Nia fó fali osan neʼe ba diretór. Tanba ida-neʼe, Wilson hetan serbisu neʼebé permanente no hetan pozisaun neʼebé diʼak.

Iha rai-Europa, Géraldine lakon ninia serbisu tanba patraun la gosta Testemuña ba Jeová. Patraun neʼe nia inan hatete ba ninia oan-feto katak nia halo ona sala boot, no dehan: “Se ó hakarak serbisu-naʼin neʼebé ó bele fiar, ó sei la hetan ida seluk neʼebé hanesan ho Testemuña ba Jeová.” Patraun neʼe buka atu hatene tuir kona-ba Testemuña sira no ikusmai Géraldine hetan fali ninia serbisu.

Sarah mak feto ida iha Áfrika Súl, neʼebé haboot mesak deʼit ninia oan sira. Kuandu nia hasoru susar, nia haree rasik oinsá Bíblia ajuda ema atu hatudu domin ba malu. Irmaun-irmán sira iha kongregasaun fó buat neʼebé nia família presiza, hanesan ai-han no ajuda tula sira. Tanba ida-neʼe, ninia oan sira hatete: “Ami iha inan-aman barak iha kongregasaun.”

Iha mós esperiénsia barak neʼebé hanesan neʼe. Esperiénsia sira-neʼe hatudu katak Provérbios 1:33 mak loos, neʼe hatete: “Kona-ba ida neʼebé rona ba haʼu [Jeová], nia sei hela ho seguru.”