LISAUN 43
Saida mak Bíblia hatete kona-ba hemu tua?
Ema iha opiniaun oioin kona-ba hemu tua. Ema balu gosta hemu tua bainhira hamutuk ho kolega sira. Ema seluk deside atu la hemu tua. Iha mós ema neʼebé hemu toʼo lanu. Saida mak Bíblia hatete kona-ba hemu tua?
1. Sala ka lae atu hemu tua?
Bíblia la bandu ema atu hemu tua. Kuandu Bíblia hatete kona-ba prezente diʼak neʼebé Maromak fó mai ita ema, Bíblia mós temi “tua-uvas neʼebé halo ema nia laran haksolok”. (Salmo 104:14, 15) Mane no feto fiar-naʼin balu neʼebé temi iha Bíblia mós hemu tua.—1 Timóteo 5:23.
2. Bíblia fó konsellu saida kona-ba hemu tua?
Jeová la simu hahalok hemu tua demais no hemu toʼo lanu. (Galásia 5:21) Ninia Liafuan hatete: “Keta sai hanesan ema neʼebé hemu tua demais.” (Provérbios 23:20) Tan neʼe, se ita deside atu hemu tua mesak ka hamutuk ho ema seluk, ita labele hemu demais toʼo labele hanoin ho momoos, labele kontrola ita-nia liafuan no hahalok, ka estraga ita-nia saúde. Se ita labele kontrola an kona-ba hemu tua, ita tenke prontu deside atu la hemu tan.
3. Oinsá mak ita bele respeitu ema seluk nia desizaun kona-ba hemu tua?
Ema ida-idak tenke deside rasik kona-ba hemu tua. Ita labele tesi-lia ka hatún ema neʼebé hemu tua uitoan, no ita mós labele obriga ema seluk atu hemu tua kuandu nia rasik lakohi. (Roma 14:10) Ita deside atu la hemu se ema seluk sente la diʼak kuandu sira haree ita hemu. (Lee Roma 14:21.) Ita ‘buka uluk ema seluk nia diʼak, laʼós buka diʼak deʼit ba ita-nia an’.—Lee 1 Korinto 10:23, 24.
KEʼE KLEʼAN
Haree toʼok Bíblia nia prinsípiu sira neʼebé sei ajuda Ita atu deside Ita sei hemu tua ka lae, ka hemu toʼo hira. No se Ita iha problema kona-ba hemu tua, buka-hatene buat neʼebé Ita bele halo.
4. Deside Ita sei hemu ka lae
Oinsá Jesus nia hanoin kona-ba hemu tua? Atu hetan resposta, hanoin toʼok kona-ba milagre primeiru neʼebé nia halo. Lee João 2:1-11, depois koʼalia hamutuk kona-ba pergunta tuirmai:
-
Saida mak ita bele aprende husi Jesus nia haree kona-ba tua no ema neʼebé hemu tua?
-
Tanba Jesus la bandu hemu tua, ema Kristaun presiza iha hanoin saida kona-ba ema neʼebé hemu tua?
Maski ema Kristaun iha liberdade atu hemu tua, neʼe la dehan katak sempre diʼak atu hemu. Lee Provérbios 22:3, depois hanoin toʼok oinsá mak situasaun sira tuirmai bele kona Ita-nia desizaun atu hemu ka la hemu tua:
-
Ita sei lori karreta, ka serbisu ho mákina ruma.
-
Ita mak isin-rua.
-
Doutór bandu Ita atu labele hemu tua.
-
Ita sente susar atu kontrola an kona-ba hemu tua.
-
Governu nia lei bandu Ita labele hemu tua.
-
Ita hamutuk ho ema ida neʼebé deside ona atu la hemu tua tanba iha tempu uluk nia iha problema kona-ba kontrola ninia an.
Kuandu halo festa kazamentu ka ransu hamutuk, Ita sei oferese tua ka lae? Atu hatene oinsá mak Ita bele halo desizaun, loke VÍDEO.
Lee Roma 13:13 no 1 Korinto 10:31, 32. Depois lee tiha eskritura ida-idak, koʼalia hamutuk kona-ba pergunta tuirmai:
-
Oinsá mak prinsípiu neʼe bele ajuda Ita atu foti desizaun neʼebé halo Jeová kontente?
Ema Kristaun ida-idak mak deside rasik kona-ba hemu tua. Ema balu deside atu la hemu tua iha situasaun ruma
5. Deside nanis Ita sei hemu tua toʼo hira
Se Ita hili atu hemu tua, hanoin-hetan: Maski Jeová la bandu ema atu hemu tua, maibé nia bandu atu hemu tua demais. Tanbasá? Lee Oseias 4:11, 18, depois koʼalia hamutuk kona-ba pergunta tuirmai:
-
Saida mak bele akontese ba ema neʼebé hemu tua demais?
Saida mak bele ajuda ita atu la hemu tua demais? Ita presiza haraik an, no rekoñese ita-nia limite. Lee Provérbios 11:2, depois koʼalia hamutuk kona-ba pergunta tuirmai:
-
Tanbasá diʼak atu deside nanis kona-ba Ita bele hemu toʼo hira?
6. Oinsá atu para hemu tua demais
Haree toʼok saida mak ajuda mane ida atu para hemu tua demais. Loke VÍDEO, depois koʼalia hamutuk kona-ba pergunta tuirmai.
-
Dmitry nia hahalok sai oinsá bainhira nia hemu tua demais?
-
Nia bele husik kedas ninia toman hemu tua ka lae?
-
Oinsá mak ikusmai nia konsege para hemu tua demais?
Lee 1 Korinto 6:10, 11, depois koʼalia hamutuk kona-ba pergunta tuirmai:
-
Saida mak Bíblia hatete kona-ba hemu toʼo lanu?
-
Oinsá mak ita hatene katak lanu-teen sira mós bele troka sira-nia toman?
Lee Mateus 5:30, depois koʼalia hamutuk kona-ba pergunta tuirmai:
-
Bainhira Jesus koʼalia kona-ba tesi tiha liman, nia atu dehan katak ita presiza halo sakrifísiu ruma atu bele halo Jeová kontente. Saida mak Ita bele halo se ita sente susar atu kontrola an kona-ba hemu tua? a
Lee 1 Korinto 15:33, depois koʼalia hamutuk kona-ba pergunta tuirmai:
-
Ita-nia kolega bele fó impaktu saida ba Ita kona-ba hemu tua?
KARIK EMA SEI HUSU: “Hemu tua, neʼe sala ka lae?”
-
Ita sei hatán oinsá?
PONTU IMPORTANTE
Tua mak prezente ida husi Jeová atu ita bele sente haksolok, maibé nia bandu atu hemu tua demais ka hemu toʼo lanu.
Rezumu
-
Saida mak Bíblia hatete kona-ba hemu tua?
-
Se hemu barak demais, neʼe lori perigu saida deʼit?
-
Oinsá mak ita bele respeitu ema seluk nia desizaun kona-ba hemu tua?
BUKA-HATENE LIUTÁN
Oinsá mak joven sira bele halo desizaun diʼak kona-ba hemu tua?
Buka-hatene hakat balu oinsá atu manán problema kona-ba hemu tua demais.
“Iha hanoin neʼebé loos kona-ba hemu tua” (Informasaun husi Livru Haklaken)
Ema Kristaun bele hasaʼe kalis no brinda antes atu hemu ka lae?
“Pergunta husi lee-naʼin” (Livru Haklaken, 15 Fevereiru 2007)
Lee istória “Haʼu mak bidón neʼebé kuak”, no haree toʼok oinsá mak mane ida para hemu tua barak demais.
“Bíblia troka ema nia moris” (Informasaun husi Livru Haklaken)
a Ema balu neʼebé susar atu husik sira-nia toman kona-ba hemu tua, karik presiza hetan ajuda profisionál atu bele husik toman neʼe. Doutór barak hatete se ema ruma uluk iha problema kona-ba tua, diʼak liu nia la hemu tan tua maski uitoan deʼit.
Karik Ita sei gosta
PERGUNTA SIRA NEʼEBÉ BAIBAIN EMA HUSU
Kursu Bíblia hanesan saida mak Testemuña ba Jeová oferese?
Ita bele uza tradusaun Bíblia naran deʼit atu halaʼo kursu Bíblia interativu ho Testemuña ba Jeová ho gratuitu. Bele mós konvida Ita-nia kolega no família tomak atu estuda hamutuk.
