LISAUN 38
Hafolin moris nuʼudar prezente
Ita bele haksolok ho buat barak tanba ita moris. Maski ita hasoru problema oioin, ita nafatin iha buat balu neʼebé halo ita kontente. Oinsá mak ita bele hatudu katak ita hafolin moris? Saida mak razaun importante liu atu hafolin moris?
1. Tanbasá mak ita presiza hafolin moris?
Ita presiza hafolin moris tanba moris mak prezente husi Jeová, ita-nia Aman domin nian. Nia mak “hun ba moris”, Kriadór ba buat hotu neʼebé moris. (Salmo 36:9) “Nia rasik mak fó iis, fó moris no buat hotu ba ema.” (Apóstolu 17:25, 28) Jeová fó ita buat neʼebé ita presiza atu moris. Laʼós neʼe deʼit, nia mós tau matan ita iha dalan neʼebé halo ita haksolok.—Lee Apóstolu 14:17.
2. Oinsá mak ita bele hatudu ba Jeová katak ita hafolin moris?
Maromak Jeová hanoin Ita husi tempu neʼebé Ita-nia inan komesa isin-rua. Bíblia temi kona-ba Maromak nia atan David nia orasaun, neʼebé dehan: “Ita-nia matan haree ona haʼu iha haʼu-nia inan nia knotak.” (Salmo 139:16) Jeová hafolin tebes Ita-nia moris. (Lee Mateus 10:29-31.) Jeová sente laran-kanek tebes se ema ruma ho neon halakon ema seluk nia moris, ka nia rasik nia moris. a (Éxodo 20:13) Jeová mós sente triste se ita tau ita-nia an arbiru iha perigu laran, ka se ita la kuidadu ema seluk nia moris. Kuandu ita tau matan ba ita-nia moris no respeitu ema seluk nia moris, ita hatudu katak ita hafolin moris nuʼudar prezente furak husi Maromak.
KEʼE KLEʼAN
Haree toʼok dalan balu oinsá Ita bele hatudu agradese ba moris nuʼudar prezente husi Maromak.
3. Tau matan ba Ita-nia saúde
Ema Kristaun neʼebé dedika an ona ba Jeová uza sira-nia moris tomak atu serbí Nia. Neʼe hanesan sira fó sira-nia isin-lolon nuʼudar sakrifísiu ba Maromak. Lee Roma 12:1, 2, depois koʼalia hamutuk kona-ba pergunta tuirmai:
-
Tanbasá Ita presiza tau matan ba Ita-nia saúde?
-
Iha dalan saida deʼit mak Ita bele halo nuneʼe?
4. Kuidadu atu la hetan kanek ka mate
Bíblia anima ita atu sees husi buat oioin neʼebé lori perigu mai ita. Loke VÍDEO atu aprende kona-ba buat balu neʼebé ita bele halo.
Lee Provérbios 22:3, depois koʼalia hamutuk kona-ba oinsá Ita no ema seluk bele kuidadu an . . .
-
kuandu iha uma.
-
kuandu halo serbisu.
-
kuandu halo desportu.
-
kuandu lori ka saʼe karreta ka motór.
5. Kuidadu atu la lori perigu ba bebé neʼebé sei iha inan nia knotak
Liuhusi poezia David hatete katak Jeová interese ba buat neʼebé akontese ba bebé neʼebé sei iha inan nia knotak. Lee Salmo 139:13-17, depois koʼalia hamutuk kona-ba pergunta tuirmai:
-
Tuir Jeová nia haree, ema ida nia moris hahú kuandu nia foin moris, ka kuandu nia inan foin isin-rua?
Jeová nia mandamentu ba ema Izraél iha tempu uluk proteje inan no bebé neʼebé sei iha inan nia knotak. Lee Éxodo 21:22, 23, depois koʼalia hamutuk kona-ba pergunta tuirmai:
-
Jeová hanoin oinsá kona-ba ema neʼebé la ho neon oho bebé neʼebé iha inan nia knotak?
-
Nia sei sente oinsá se ema ruma ho neon hakotu bebé nia moris? b
-
Ita sente oinsá kona-ba Maromak nia hanoin?
Maski feto ida rekoñese katak moris iha folin-boot, maibé karik nia sente katak nia tenke halo abortu, no la iha dalan seluk. Lee Isaias 41:10, depois koʼalia hamutuk kona-ba pergunta tuirmai:
-
Se feto ida sente katak nia tenke halo abortu, nia presiza buka ajuda husi sé? Tanbasá?
EMA BALU DEHAN: “Dala ruma iha situasaun balu neʼebé obriga feto ida atu halo abortu.”
-
Saida mak halo Ita fiar katak Jeová hafolin inan nia moris, no mós bebé neʼebé sei iha inan nia knotak?
PONTU IMPORTANTE
Bíblia hanorin ita atu hadomi, respeitu, no proteje moris nuʼudar prezente husi Jeová. Neʼe inklui Ita rasik nia moris, no mós ema seluk nia moris.
Rezumu
-
Tanbasá mak ema nia moris iha folin-boot ba Jeová?
-
Jeová sente oinsá kuandu ema ruma ho neon hakotu ema seluk nia moris ka ninia moris rasik?
-
Ita hafolin moris neʼebé Ita simu nuʼudar prezente husi Maromak ka lae? Tanbasá?
BUKA-HATENE LIUTÁN
Oinsá mak ita bele fó agradese ba Jeová kona-ba moris neʼebé nia fó mai ita?
Buka toʼok resposta ba pergunta, Maromak fó perdua ka lae ba feto neʼebé uluk halo abortu?
“Bíblia hanorin saida kona-ba halo abortu?” (Informasaun iha jw.org/tdt)
Oinsá mak hatene Maromak nia haree kona-ba moris ajuda ita atu la hili atividade halimar nian neʼebé lori perigu?
“‘Desportu neʼebé lori perigu’—Ita bele halo ida-neʼe ka lae?” (Matan-moris bá!, 8 Outubru 2000)
Oinsá se ema ida hanoin atu oho an? Haree toʼok oinsá Bíblia bele ajuda.
a Jeová hanoin tebes ema neʼebé laran-triste. (Salmo 34:18) Nia komprende ema nia sentimentu triste neʼebé book sira atu oho an, no nia hakarak ajuda sira. Kona-ba oinsá mak Maromak bele ajuda ema atu tahan sira-nia hanoin atu oho an, lee informasaun “Haʼu hakarak mate deʼit—Bíblia bele ajuda haʼu ka lae kuandu haʼu hanoin atu oho an?” iha parte “Buka-hatene liután” husi lisaun neʼe.
b Ema neʼebé halo abortu iha tempu uluk la presiza fó-sala demais ba sira-nia an, tanba Jeová bele fó perdua ba sira. Atu hetan informasaun liután, haree “Bíblia hanorin saida kona-ba halo abortu?” iha parte “Buka-hatene liután” husi lisaun neʼe.
Karik Ita sei gosta
PERGUNTA SIRA NEʼEBÉ BAIBAIN EMA HUSU
Kursu Bíblia hanesan saida mak Testemuña ba Jeová oferese?
Ita bele uza tradusaun Bíblia naran deʼit atu halaʼo kursu Bíblia interativu ho Testemuña ba Jeová ho gratuitu. Bele mós konvida Ita-nia kolega no família tomak atu estuda hamutuk.
