1, 2. Maromak fó prezente furak saida mai ita? Tanbasá mak importante duni atu hatene oinsá atu aplika Bíblia nia matadalan ohin loron?

ITA-NIA aman iha lalehan fó ita buat neʼebé folin-boot tebes. Neʼe mak moris nuʼudar ema matenek neʼebé bele haleno Maromak nia hahalok. (Gênesis 1:27) Tanba prezente furak ida-neʼe mak ita bele uza Bíblia nia matadalan atu ajuda ita. Hodi halo tuir matadalan neʼe ita bele sai hanesan ema neʼebé iha esperiénsia liu neʼebé hadomi Maromak Jeová. Ita mós hetan treinu ona hodi “komprende . . . atu hatene buat neʼebé diʼak husi buat neʼebé aat”.—Ebreu 5:14.

² Bíblia la fó lei neʼebé kona situasaun hotu neʼebé akontese iha mundu neʼe ohin loron. Tan neʼe, importante duni atu hatene oinsá atu aplika Bíblia nia matadalan iha situasaun saida deʼit neʼebé ita hasoru iha ita-nia moris. Ida-neʼe importante kuandu ita hili tratamentu no ai-moruk ruma neʼebé uza raan. Sira neʼebé hakarak halo tuir Maromak Jeová hanoin didiʼak kona-ba ida-neʼe. Maibé, se ita komprende Bíblia nia matadalan neʼebé bele ajuda halo desizaun kona-ba neʼe, ita bele halo desizaun matenek neʼebé halo ita sente laran-kmaan no ajuda ita atu hela nafatin iha Maromak nia domin. (Provérbios 2:6-11) Hanoin toʼok matadalan tuirmai neʼe.

3, 4. Horibainhira mak Eskritura hatudu katak raan mak sagradu? Matadalan saida mak hatudu kona-ba ida-neʼe?

³ Iha Maromak Jeová nia haree, moris no raan iha relasaun neʼebé importante duni. Nia hatudu ba dala primeiru katak raan mak sagradu hanesan moris mak sagradu kuandu Caim oho  tiha Abel. Maromak hatete ba Caim: “Rona! Ó-nia alin nia raan hakilar mai haʼu husi rai.” (Gênesis 4:10) Iha Maromak Jeová nia haree, Abel nia raan reprezenta nia moris neʼebé Caim oho. Entaun ba Maromak, Abel nia raan hakilar ba nia atu selu fali Abel nia moris.​—Ebreu 12:24.

⁴ Depois Rai-Nabeen iha tempu Noé, Maromak fó lisensa ba ema atu han naʼan, maibé laʼós animál nia raan. Maromak hatete: “Naʼan neʼebé mak iha moris, ka raan, imi labele han. No laʼós neʼe deʼit, haʼu sei husu fila fali imi-nia raan husi imi-nia moris.” (Gênesis 9:4, 5) Maromak fó ukun-fuan ida-neʼe ba Noé nia bei-oan sira toʼo ita ohin loron. Ida-neʼe hametin liután buat neʼebé Maromak hatete ba Caim, katak kriatura hotu nia raan reprezenta sira-nia moris. Ukun-fuan ida-neʼe mós hatudu katak Maromak Jeová, nuʼudar moris nia Hun, sei tesi lia ba ema hotu neʼebé la hatudu respeitu ba moris no raan.—Salmo 36:9.

5, 6. Oinsá mak Moisés nia Ukun-Fuan hatudu katak raan mak sagradu no folin-boot? (Haree mós kaixa “ Hatudu respeitu ba animál nia moris”.)

⁵ Moisés nia Ukun-Fuan hatudu lia-loos rua neʼe neʼebé importante.Levítico 17:10, 11 hatete: “Ema ida . . . neʼebé han raan naran deʼit, haʼu-nia oin rasik sei kontra hasoru duni ema neʼebé han raan, no haʼu sei halakon nia husi ninia ema sira-nia leet. Tanba raan mak reprezenta kriatura nia moris, no haʼu rasik tau ona raan iha altár leten atu imi bele halo dame no hetan perdua ba imi-nia moris, tanba raan mak halo dame.” *​—Haree kaixa “ Raan nia folin neʼebé bele halo dame,”.

⁶ Se raan husi animál neʼebé oho tiha ona la tau iha altár, raan neʼe tenke fakar ba rai. Ida-neʼe reprezenta katak ema fó fila fali moris ba Maromak tanba nia mak moris nia Hun. (Deuteronômio 12:16; Ezequiel 18:4) Se ema Izraél oho no hasai tiha animál nia raan, sira bele han naʼan neʼe. Maibé, haree katak ema Izraél la presiza hasai raan-turuk ida-idak husi animál neʼebé sira atu  han. Nuneʼe, kuandu hasai tiha raan sira hatudu respeitu ba Ida neʼebé Fó Moris no bele han naʼan ho laran-moos.

7. Oinsá mak David hatudu respeitu ba raan neʼebé sagradu?

⁷ David mak “ema ida neʼebé tuir loos [Maromak] nia laran” no nia komprende tanbasá Maromak fó ukun-fuan kona-ba raan. (Apostolu 13:22) Loron ida nia sente hamrook tebes. Entaun mane naʼin-tolu husi nia tropa hakaʼas an tama ba inimigu  nia kampu hodi kuru bee husi bee-matan no lori ba nia. David sente oinsá? Nia hatete: “Haʼu sei hemu raan husi ema neʼebé tau sira-nia moris iha perigu?” Iha David nia oin, hemu bee neʼe mak hanesan hemu mane naʼin-tolu neʼe nia raan tanba kuandu sira bá kuru bee neʼe, karik sira bele mate. Entaun maski nia hamrook, nia “fakar bee neʼe ba rai hodi fó fali ba Maromak Jeová”.​—2 Samuel 23:15-17.

8, 9. Iha kongregasaun kristaun iha apóstolu sira-nia tempu, Maromak troka nia hanoin kona-ba moris no raan ka lae? Esplika toʼok.

⁸ Maromak mós fó ukun-fuan kona-ba raan ba kongregasaun kristaun iha apóstolu sira-nia tempu. Ida-neʼe akontese maizumenus tinan 2.400 depois Maromak fó ukun-fuan ba Noé kona-ba raan, no maizumenus tinan 1.500 depois Lei aliansa entre Maromak no nasaun Izraél. Maromak Jeová haleno grupu administradór husi kongregasaun kristaun hodi hakerek: “Neʼe espíritu santu no ami-nia hakarak atu labele fó todan tan ba imi liu fali buat neʼebé presiza, katak labele han [“hadook an husi”, MF] naʼan husi balada neʼebé hasaʼe ona ba lulik, husi raan, husi naʼan neʼebé mai husi balada neʼebé ema buti mate, no husi sala-foʼer.”​—Apostolu 15:28, 29.

⁹ Klaru katak grupu administradór iha apóstolu sira-nia tempu komprende katak raan mak sagradu. Sira hatene katak iha Maromak nia oin uza sala raan mak sala boot hanesan adora lulik no sala-foʼer. Hanesan neʼe mós ho ema kristaun neʼebé loos ohin loron. Sira hatene katak Maromak la fó ukun-fuan kona-ba situasaun hotu neʼebé envolve raan. Maibé, sira halo kontente Maromak Jeová kuandu sira halo desizaun kona-ba raan hodi hanoin oinsá atu aplika Bíblia nia matadalan.

10, 11. (a) Oinsá mak Testemuña ba Jeová nia haree kona-ba transfuzaun raan no parte importante haat husi raan? (b) Ema kristaun ida-idak tenke halo desizaun kona-ba saida?

¹⁰ Testemuña ba Jeová hatene katak ‘hadook an husi raan’ katak la simu transfuzaun raan, no la fó sira-nia raan ka hasai no rai sira rasik nia raan atu halo transfuzaun. Tanba sira hatudu respeitu ba Maromak nia ukun-fuan, sira mós la simu parte  importante haat husi raan—neʼe mak glóbulu mean, glóbulu mutin, plaketa, no plazma.

¹¹ Ohin loron ema uza mákina atu haketak parte kiʼik liu husi parte haat neʼe hodi uza iha tratamentu no atu halo ai-moruk. Kristaun ida bele simu parte kiʼik liu neʼe ka lae? Nia hanoin katak parte kiʼik liu neʼe hanesan “raan” ka lae? Ema kristaun ida-idak tenke halo desizaun kona-ba ida-neʼe. Sira mós presiza halo desizaun kona-ba tratamentu neʼebé uza mákina atu halo buat ruma ho sira-nia raan. Mákina balun hamoos ema nia raan (emodiálize). Mákina seluk hasai raan no aumenta been depois hatama fali raan ba ema neʼe nia isin (emodiluisaun). Mákina seluk tan bele xupa raan neʼebé fakar durante operasaun no bele hatama fali kedas ba ema neʼe nia isin (sistema rekuperasaun raan). Ema kristaun bele halo desizaun kona-ba uza mákina hirak-neʼe, naran katak mákina neʼe la rai raan ba tempu seluk.—Haree Apéndise, “Desizaun neʼebé ita presiza halo kona-ba raan”.

12. Oinsá mak ita tenke hanoin kona-ba desizaun ruma neʼebé Maromak husik ita atu halo? Bíblia hatete saida kona-ba ita-nia responsabilidade atu halo desizaun ruma?

 ¹² Se Maromak husik ema kristaun ida-idak halo desizaun kona-ba buat ruma, neʼe katak desizaun neʼe la importante ba Maromak Jeová ka lae? Lae, tanba nia iha interese duni kona-ba ita-nia hanoin no sentimentu. (Provérbios 17:3; 21:2; 24:12) Entaun diʼak atu buka-hatene informasaun kona-ba tratamentu no ai-moruk no halo orasaun kona-ba buat sira-neʼe. Depois ita tenke halo desizaun tuir ita-nia laran neʼebé treinu ona husi Bíblia. (Roma 14:2, 22, 23) Ema kristaun ida labele obriga maluk seluk atu tuir nia hanoin kona-ba buat sira-neʼe. Ita mós la husu ba kristaun seluk pergunta tuirmai neʼe: “Se Ita iha haʼu-nia situasaun, Ita sei halo saida?” Kona-ba desizaun atu halo tratamentu, kristaun ida-idak tenke “lori nia todan rasik”. *​—Galasia 6:5; Roma 14:12; haree kaixa “ Haʼu haree raan nuʼudar buat neʼebé sagradu ka lae?”.

13. Maromak Jeová nia ukun-fuan no matadalan hatudu saida kona-ba nia? Fó toʼok ezemplu.

¹³ Ukun-fuan no matadalan husi Bíblia hatudu katak Maromak Jeová mak Ida neʼebé Fó Ukun-Fuan ho matenek no nia mak Aman domin nian neʼebé hanoin ninia oan sira-nia diʼak. (Salmo 19:7-11) Maski Maromak la fó ukun-fuan atu ‘hadook an husi raan’ nuʼudar matadalan ba ita-nia saúde, maibé ukun-fuan neʼe mós proteje ita husi problema ka moras neʼebé dala ruma ema hetan liuhusi transfuzaun raan. (Apostolu 15:20) Tuir loloos ema halo progresu iha área médiku ohin loron no sira bele halo operasaun hodi la uza raan. Ema barak neʼebé fó tratamentu médiku hanoin katak ida-neʼe mak dalan neʼebé diʼak liu atu halo tratamentu. Buat sira-neʼe hotu hametin ema kristaun nia fiar katak Maromak Jeová mak matenek liu hotu no aman domin nian.​—Isaías 55:9; Joao 14:21, 23.

14, 15. (a) Maromak haleno nia domin ba ema Izraél hodi fó ukun-fuan saida deʼit? (b) Oinsá mak ita bele halo tuir matadalan neʼebé mai husi ukun-fuan sira-neʼe?

 ¹⁴ Iha Izraél antigu Maromak hatudu katak nia hanoin kona-ba ema Izraél sira-nia diʼak hodi fó nia ukun-fuan ba sira. Porezemplu, tanba ema Izraél halo atividade barak iha uma leten, nia haruka sira atu halo moru badak neʼebé haleʼu sira-nia uma-kakuluk hodi asidente la mosu. (Deuteronômio 22:8; 1 Samuel 9:25, 26; Neemias 8:16; Apostolu 10:9) Maromak mós haruka ema Izraél atu tau matan ba karau-aman neʼebé siʼak hodi la hakanek ema. (Êxodo 21:28, 29) Se sira lakohi halo tuir ukun-fuan sira-neʼe, ida-neʼe sei hatudu katak sira la respeitu duni ba ema seluk nia moris no sei simu sala kona-ba ema nia raan.

¹⁵ Oinsá mak ita bele aplika matadalan neʼebé mai husi ukun-fuan sira-neʼe? Hanoin toʼok, buat neʼebé Ita iha ka halo bele lori perigu ba Ita-nia an no ema seluk ka lae? Porezemplu, oinsá ho Ita-nia karreta ka motór? Oinsá ho dalan neʼebé Ita kaer karreta ka motór? Oinsá ho Ita-nia animál, uma no serbisu-fatin? Iha rai balun, joven barak mate husi asidente neʼebé akontese tanba sira halimar ho buat neʼebé perigu. Maibé, joven sira neʼebé hakarak hela nafatin iha Maromak nia domin hafolin moris no la buka kontente hodi halo atividade neʼebé perigu. Sira la beik hodi hanoin katak tanba sira joven sira bele halo buat naran deʼit no hanoin katak perigu la kona sira. Tan neʼe, sira goza sira-nia tempu joven nian no sees husi problema neʼebé bele mosu iha sira-nia moris.​—Eclesiastes 11:9, 10.

16. Matadalan saida mak Bíblia fó kona-ba halo abortu? (Haree mós nota-rodapé.)

¹⁶ Iha Maromak nia oin, bebé neʼebé sei iha inan nia kabun mós folin-boot. Iha Izraél antigu, se ema ida hakanek feto neʼebé isin-rua no se oan ka inan neʼe mate, Maromak haree ema neʼe hanesan ohodór-ema no nia tenke fó “moris troka moris”. *  (Êxodo 21:22, 23) Entaun, hanoin toʼok oinsá Maromak Jeová sente kona-ba bebé rihun ba rihun neʼebé ema halo abortu tinan-tinan. Ema halo abortu tan deʼit lakohi simu responsabilidade, hanoin deʼit kona-ba sira-nia an no hakarak livre atu halo sala-foʼer.

17. Oinsá mak Ita ajuda ema neʼebé halo abortu antes nia aprende kona-ba Maromak nia matadalan bele sente kmaan?

 ¹⁷ Maibé, oinsá ho feto ida neʼebé halo abortu antes nia hatene lia-loos husi Bíblia? Ida-neʼe katak Maromak bele hatudu laran-sadiʼa ba nia ka lae? Sin! Tuir loloos, se ema ida hakribi loos nia sala, nia bele fiar katak liuhusi Jesus nia raan neʼebé fakar tiha ona, Maromak Jeová sei fó perdua. (Salmo 103:8-14; Efeso 1:7) Loos duni, Kristu rasik hatete: “Haʼu la mai atu bolu ema diʼak sira, maibé ema maksalak sira atu hakribi sala.”​—Lucas 5:32.

18. Tuir Bíblia, tanbasá mak ema barak oho malu?

¹⁸ Maromak Jeová lakohi ita halo perigu ba ema seluk no nia mós lakohi ita atu rai odi iha ita-nia laran. Iha mundu neʼe ema barak oho malu tan odi. Apóstolu João hakerek: “Ema neʼebé hirus nia maluk, ema neʼe oho ema.” (1 Joao 3:15) Ema hanesan neʼe laʼós deʼit la gosta nia maluk, maibé nia hakarak katak nia maluk mate. Nia hatudu katak nia odi nia maluk hodi koʼalia bosok, ka duun nia maluk ho hahalok sala neʼebé kontra Maromak nia ukun-fuan. (Levítico 19:16; Deuteronômio 19:18-21; Mateus 5:22) Entaun se ita rai odi naran deʼit, importante tebes atu hasai tiha ida-neʼe husi ita-nia laran!​—Tiago 1:14, 15; 4:1-3.

19. Oinsá mak eskritura iha Salmo 11:5 no Filipe 4:8, 9 sai matadalan ba ema neʼebé tuir Bíblia nia hanorin?

¹⁹ Sira neʼebé hafolin moris hanesan Maromak Jeová hafolin moris no hakarak hela nafatin iha nia domin mós sees husi violénsia oioin. Salmo 11:5 hatete: “Ema neʼebé hadomi violénsia [Jeová] odi tebes.” Eskritura neʼe hatudu Maromak nia sentimentu kona-ba violénsia no mós sai nuʼudar matadalan ba ita-nia moris. Ida-neʼe book sira neʼebé hadomi Maromak atu sees husi atividade naran deʼit neʼebé bele book sira-nia laran atu hakarak halo violénsia. Liután neʼe, iha mós eskritura seluk neʼebé hatete katak Jeová mak “Maromak dame nian”. Entaun ida-neʼe book nia atan sira atu halo nakonu sira-nia neon no laran ho hahalok sira-neʼebé bele haburas dame, hanesan hatudu domin no laran-diʼak.​—Filipe 4:8, 9.

20-22. Ema kristaun la hola parte iha saida deʼit husi mundu neʼe? Tanbasá?

²⁰ Iha Maromak nia haree Satanás nia mundu simu tiha sala tan ema nia raan. Bíblia uza animál fuik atu reprezenta sistema polítiku mundu neʼe neʼebé oho tiha ona ema rihun ba rihun, inklui mós Maromak Jeová nia atan sira. (Daniel 8:3, 4, 20-22; Apokalipse 13:1, 2, 7, 8) Ukun-naʼin sira, neʼebé Bíblia bolu nuʼudar animál fuik, serbisu hamutuk ho sientista no kontratu-naʼin, halo kilat no bomba oioin neʼebé aat tebes, no iha tempu hanesan sira manán osan barak. Loos duni, “mundu tomak sei iha aat-naʼin nia ukun”!​—1 Joao 5:19.

²¹ Ema neʼebé halo tuir Kristu “laʼós mundu neʼe nian” no sira neutrál. Tanba sira la hola parte iha buat polítiku nian ka funu, iha Maromak nia oin sira nuʼudar ema ida-idak no mós nuʼudar komunidade ida la simu sala tan ema nia raan. * (Joao 15:19; 17:16) Hodi banati-tuir Kristu, sira la halo violénsia maski ema  fó-terus ba sira. Maibé sira hatudu domin ba sira-nia inimigu no mós halo orasaun kona-ba sira.​—Mateus 5:44; Roma 12:17-21.

²² ‘Babilónia Boot’, neʼebé reprezenta organizasaun relijiaun falsu iha mundu neʼe mak simu sala neʼebé boot liu tan ema nia raan. Tan neʼe, importante tebes ba ema kristaun neʼebé loos atu la hola parte iha relijiaun falsu nia atividade. Maromak nia Liafuan hatete: “Iha nia, ema hetan profeta no santu sira-nia raan, no ema hotu nian neʼebé nia raan fakar tiha iha raiklaran.” Entaun Maromak fó avizu mai ita: “Mai, haʼu-nia povu, hadook husi nia.”​—Apokalipse 17:6; 18:2, 4, 24.

23. Sees husi Babilónia Boot katak sá?

²³ Atu sees husi Babilónia Boot la toʼo atu hasai deʼit ema ida nia naran husi lista relijiaun nian. Maibé nia mós tenke odi hahalok aat neʼebé relijiaun falsu neʼe husik deʼit nia membru sira halo. Hanesan halo sala-foʼer, mete iha polítika, no buka deʼit rikusoin. (Salmo 97:10; Apokalipse 18:7, 9, 11-17) Tuir loloos, dala barak hahalok hanesan neʼe mak halo ema oho malu!

24, 25. (a) Hodi uza saida mak Maromak hatudu laran-sadiʼa ba ema neʼebé hakribi sira-nia sala kona-ba ema nia raan? (b) Ida-neʼe fó-hanoin ita kona-ba arranju saida iha Bíblia nia tempu?

²⁴ Antes ita ida-idak komesa adora Maromak iha dalan neʼebé loos, ita apoia Satanás nia mundu neʼe iha dalan oioin. Tan neʼe, ita mós simu sala tan ema nia raan. Maibé tanba ita troka ita-nia hahalok, hodi haburas fiar ba Kristu nia sakrifísiu, no dedika ita-nia moris ba Maromak, ita simu Maromak nia laran-sadiʼa no protesaun espirituál nian. (Apostolu 3:19) Protesaun neʼe fó-hanoin ita kona-ba sidade protesaun nian iha Bíblia nia tempu.​—Números 35:11-15; Deuteronômio 21:1-9.

²⁵ Oinsá mak ema ida bele simu protesaun iha sidade protesaun nian iha tempu uluk? Se ema Izraél ida halo ema ida mate maibé la ho neon, nia tenke halai ba sidade protesaun nian ida. Depois tesi-lia naʼin sira sei halo desizaun kona-ba ida-neʼe. Se nia loloos halo ida-neʼe la ho neon, nia tenke hela iha sidade protesaun nian toʼo amlulik boot mate. Depois neʼe nia livre atu hela iha fatin seluk. Ida-neʼe mak ezemplu neʼebé kapás kona-ba Maromak nia laran-sadiʼa no hatudu katak nia hafolin tebes ema nia moris! Hanesan ho sidade protesaun nian iha Izraél antigu, ohin loron Maromak proteje ita husi kastigu-mate liuhusi Kristu  nia sakrifísiu. Nuneʼe, maski ita la ho neon kontra Maromak nia ukun-fuan kona-ba moris no raan neʼebé sagradu, Maromak la fó kastigu-mate ita. Ita hafolin dalan neʼebé Maromak proteje ita ka lae? Oinsá mak ita bele hatudu ida-neʼe? Dalan ida mak konvida ema seluk atu simu Maromak nia arranju neʼebé proteje ita, importante tebes atu halo ida-neʼe tanba ‘terus boot’ besik ona atu mai.​—Mateus 24:21; 2 Korinto 6:1, 2.

26-28. Iha dalan saida mak ita-nia situasaun ohin loron hanesan ho profeta Ezequiel nian? Oinsá mak ita bele hela nafatin iha Maromak nia domin?

²⁶ Maromak nia povu nia situasaun ohin loron fó-hanoin mai ita kona-ba situasaun iha tempu profeta Ezequiel nian. Maromak Jeová fó knaar espesiál ba nia. Maromak hatete: “Ó tenke rona [haʼu-nia] liafuan no fó avizu ba sira [umakain Izraél].” Se Ezequiel la halaʼo nia knaar, kuandu Jeruzalein hetan kastigu husi Maromak no ema barak mate, Ezequiel sei simu sala tan ema nia raan neʼebé mate iha tempu neʼebá. (Ezequiel 33:7-9) Maibé se Ezequiel halo tuir, nia sei la simu sala kona-ba sira-nia raan.

²⁷ Ohin loron ita sei haree Satanás nia mundu neʼe nia rohan. Tan neʼe, Testemuña ba Jeová haree katak sira iha responsabilidade atu fó avizu ba ema seluk kona-ba Maromak nia “loron iha neʼebé nia sei tesi lia” nuʼudar sira haklaken lia-foun Reinu nian. (Isaías 61:2; Mateus 24:14) Ita hakaʼas an atu hola parte iha serbisu importante ida-neʼe ka lae? Apóstolu Paulo hanoin katak nia knaar atu haklaken mak serbisu neʼebé importante. Tan neʼe nia bele hatete: “Haʼu dehan loloos ba imi ohin neʼe katak haʼu fase liman kona-ba imi-nia raan, basá haʼu la taʼuk atu haklaken ba imi Maromak nia hakarak tomak.” (Apostolu 20:26, 27) Neʼe mak ezemplu neʼebé diʼak tebes atu ita banati-tuir!

²⁸ Sin, atu hela nafatin iha Aman Jeová nia domin no sente kmaan, ita tenke haree moris no raan tuir Maromak Jeová nia haree. Maibé laʼós neʼe deʼit Ita mós presiza moos nafatin, ka santu, iha Maromak nia oin. Ita sei aprende kona-ba ida-neʼe iha kapítulu tuirmai.