HATENE sé mak monu ba rai iha neʼe? Saulo. Hanoin-hetan ka lae, nia mak uluk hein ema nia hatais bainhira sira tuda fatuk ba Estevão. Haree ba naroman neʼebé nabilan loos! Saida mak akontese?

Depois ema oho tiha Estevão, Saulo mak nuʼudar ulun, atu duni ema neʼebé tuir Jesus no fó-terus ba sira. Nia tama uma sai uma atu dada sai dixípulu sira no hatama iha kadeia laran. Dixípulu barak halai ba sidade seluk no hahú haklaken ‘lia-foun diʼak’ iha neʼebá. Maibé, Saulo mós duni tuir Jesus nia dixípulu sira. Agora, nia iha dalan atu bá Damasku. Maibé iha dalan, akontese buat ida neʼebé halo sira hakfodak.

Derrepente, naroman ida leno husi lalehan haleʼu Saulo. Nia monu ba rai, hanesan ita haree iha neʼe. Hafoin, lian ida hatete: ‘Saulo, Saulo! Tansá mak ó halo aat mai haʼu?’ Ema sira neʼebé hamutuk ho Saulo haree naroman no rona lian, maibé sira la bele komprende saida mak lian neʼe hatete.

Saulo husu: ‘Ita sé loos, Naʼi?’

Lian neʼe hatete: ‘Haʼu mak Jesus, ida neʼebé ó fó-terus daudauk.’ Jesus hatete hanesan neʼe tanba kuandu Saulo fó-terus ba Jesus nia dixípulu sira, Jesus sente hanesan nia rasik mak simu terus.

Agora Saulo husu: ‘Naʼi, saida mak haʼu sei halo?’

Jesus hatete: ‘Hamriik bá no tama iha Damasku, no iha neʼebá ó sei hatene saida mak ó tenke halo.’ Bainhira Saulo hamriik no loke ninia matan, nia la bele haree buat ida. Nia sai matan-delek! Tan neʼe, ema neʼebé hamutuk ho nia mak kaer ninia liman no lori ba Damasku.

Agora, Jesus koʼalia ba dixípulu ida iha Damasku, hodi hatete: ‘Hamriik, Ananias. Laʼo ba dalan naran Loos. Iha Judas nia uma, buka mane ida naran Saulo. Haʼu hili tiha ona nia atu sai haʼu-nia atan ida neʼebé espesiál.’

Ananias halo tuir. Bainhira nia hasoru Saulo, nia tau liman ba Saulo no hatete: ‘Naʼi haruka haʼu atu ó bele haree fali no nakonu ho espíritu santu.’ Derrepente deʼit, buat ida hanesan ikan nia kikit sai husi Saulo nia matan, no nia bele haree filafali.

Saulo hetan knaar importante tebes atu haklaken ba ema husi nasaun barak. Ikusmai, ema koñese nia nuʼudar apóstolu naran Paulo, no ita sei aprende buat barak kona-ba nia. Maibé, ulukliu, mai ita haree Maromak haruka Pedro atu halo saida.