LORON ida Jesus hatete ba mane ida katak nia tenke hadomi ninia maluk. Mane neʼe husu ba Jesus: ‘Haʼu-nia maluk mak sé?’ Jesus hatene hela mane neʼe nia hanoin. Mane neʼe hanoin katak ema neʼebé husi rai hanesan no relijiaun hanesan ho nia deʼit mak ninia maluk. Nuneʼe, mai ita haree saida mak Jesus hatete ba nia.

Dala ruma, Jesus hanorin ema hodi konta ai-knanoik ida. Agora, nia halo hanesan neʼe. Nia konta ai-knanoik ida kona-ba ema judeu ida no samaritanu ida. Ita aprende tiha ona katak ema judeu barak la gosta ema samaritanu. Entaun, Jesus nia ai-knanoik mak hanesan neʼe:

Loron ida, iha ema judeu ida neʼebé laʼo tun husi dalan ba Jerikó. Maibé naʼok-teen sira ataka nia. Sira hadau ninia osan no baku tasak nia toʼo besik atu mate.

Hafoin, amlulik judeu ida mai liu dalan neʼe. Nia haree ema neʼebé moras ho kanek boot. Tuir ó-nia hanoin, amlulik neʼe halo saida? Entaun, nia tesik ba dalan-sorin deʼit no laʼo nafatin. Tuirmai, ema relijiozu ida tan mós liu. Nia levita ida. Nia para ka lae? Lae, nia mós la para atu ajuda ema moras neʼe. Ó haree amlulik no levita laʼo tun daudauk iha dook neʼebá.

Maibé haree toʼok sé mak iha neʼe hamutuk ho ema moras neʼe. Nia samaritanu ida. Nia ajuda daudauk ema judeu ida-neʼe. Nia tau ai-moruk ba ema moras neʼe nia kanek. Depois neʼe, nia lori ema judeu neʼe ba fatin atu nia bele deskansa no sai diʼak fali.

Konta tiha ai-knanoik neʼe, Jesus hatete ba mane neʼebé husu pergunta: ‘Tuir ó-nia hanoin, ida-neʼebé mak iha hahalok nuʼudar maluk ba ema moras neʼe? Amlulik, levita, ka samaritanu?’

Mane neʼe hatán: ‘Ema samaritanu. Nia laran-diʼak ba ema moras neʼe.’

Jesus hatete: ‘Ó hatete loos. Tan neʼe, ó mós bá no hatudu hahalok hanesan nia.’

Ó gosta dalan neʼebé Jesus hanorin ema ka lae? Ita bele aprende buat barak tebes neʼebé importante se ita rona Jesus nia liafuan husi Bíblia, loos ka lae?