HANOIN-HETAN mane-klosan naʼin-tolu iha neʼe ka lae? Loos, sira mak Daniel nia kolega neʼebé la simu hahán neʼebé ladiʼak ba sira. Ema Babilónia bolu sira Sadraque, Mesaque no Abednego. Maibé, haree ba sira. Tansá sira la hakruʼuk ba estátua boot neʼe hanesan ho ema seluseluk hotu? Mai ita haree hamutuk.

Hanoin-hetan ka lae kona-ba Ukun-Fuan Sanulu neʼebé Jeová rasik hakerek ona? Ukun-Fuan primeiru mak neʼe: ‘Ó labele adora maromak seluk, maibé adora haʼu deʼit.’ Mane-klosan sira-neʼe halo tuir ukun-fuan neʼe, maski laʼós fasil atu halo nuneʼe.

Nabucodonosor, liurai Babilónia, halibur ema-boot barak atu hanaʼi ba estátua neʼebé nia harii tiha ona. Nia foin hatete ba ema hotu: ‘Kuandu rona lian husi trombeta, arpa no instrumentu-múzika seluk, imi sei hakruʼuk no adora estátua osan-mean ida-neʼe. Ema ruma la hakruʼuk no adora karik, sei soe tiha kedas sira ba fornu boot ho ahi-lakan makaʼas.’

Bainhira Nabucodonosor rona katak Sadraque, Mesaque no Abednego la hakruʼuk, nia sai hirus tebes. Nia bolu sira atu hasoru nia. Nia fó oportunidade ida tan ba sira atu hakruʼuk. Maibé mane-klosan sira-neʼe konfia ba Jeová. Sira hatete ba Nabucodonosor: ‘Ami-nia Maromak neʼebé ami serbí bele salva ami, maibé maski nia la salva ami mós, ami sei la hakruʼuk ba Ita-Boot nia estátua osan-mean.’

Rona tiha neʼe, Nabucodonosor sai hirus liután. Iha fornu ida iha neʼebá no nia haruka: ‘Halo fornu neʼe sai manas dala hitu liután!’ Depois, nia haruka mane sira neʼebé forsa-makaʼas liu iha ninia tropa atu kesi metin Sadraque, Mesaque no Abednego no soe ba fornu neʼe nia laran. Fornu neʼe manas tebetebes toʼo mane sira neʼebé forsa-makaʼas mate kedas tanba ahi nia lakan. Maibé, saida mak akontese ba mane-klosan naʼin-tolu neʼebé sira soe tiha ba ahi?

Liurai hateke ba fornu nia laran, no sai taʼuk tebes. Nia husu: ‘Ita kesi ema naʼin-tolu no soe tiha ba fornu ho ahi-lakan, loos ka lae?’

Ninia atan sira hatán: ‘Loos, ita halo nuneʼe duni.’

Nia hatete: ‘Maibé haʼu haree ema naʼin-haat laʼo iha ahi laran, no buat ida la kesi sira, no ahi la han sira. No mós ema ida seluk haree hanesan maromak ida.’ Liurai hakbesik ba fornu neʼe no hakilar: ‘Sadraque! Mesaque! Abednego! Sai tiha mai liʼur, imi Maromak Aas Liu Hotu nia atan!’

Bainhira sira sai tiha, ema hotu haree katak sira la hetan kanek ida. Liurai hatete: ‘Hahiʼi bá Sadraque, Mesaque, no Abednego nia Maromak! Nia haruka ninia anju atu salva sira tanba sira lakohi hakruʼuk no adora maromak seluseluk, maibé adora sira-nian deʼit.’

Ida-neʼe ezemplu diʼak atu ita banati-tuir sira-nia laran-metin ba Jeová, loos ka lae?