EMA rihun ba rihun laʼo dook husi Babilónia toʼo Jeruzalein. Maibé, kuandu sira toʼo tiha, sira haree Jeruzalein naksobu hotu. La iha ema ida neʼebé hela iha neʼebá. Ema Izraél tenke harii fali buat hotu-hotu.

Buat ida neʼebé sira harii ulukliu mak altár ida. Altár mak fatin ida neʼebé sira bele hasaʼe animál nuʼudar sakrifísiu ou prezente ba Jeová. Liutiha fulan balu, ema Izraél hahú harii templu. Maibé inimigu sira neʼebé hela besik lakohi ema Izraél sira harii templu neʼe. Tan neʼe sira koko atu halo ema Izraél taʼuk atu para sira-nia serbisu. Ikusmai, inimigu sira konsege halo Pérsia nia liurai foun atu halo lei ida hodi hapara sira atu harii templu.

Agora, tinan 17 liu tiha husi tempu neʼebé ema Izraél fila fali husi Babilónia. Jeová haruka ninia profeta Ageu no Zacarias hatete ba povu atu hahú serbisu fali. Povu konfia ba Maromak nia ajuda, no halo tuir profeta sira. Sira hahú harii fali, maski lei hatete labele halo nuneʼe.

Entaun, Pérsia nia ema-boot ida naran Tatenai mai no hasoru ema Izraél atu husu ho direitu saida mak sira iha atu harii templu. Ema Izraél hatete ba nia katak uluk sira iha Babilónia, Liurai Ciro mak haruka sira hodi dehan: ‘Agora, bá toʼo Jeruzalein no harii imi-nia Maromak Jeová nia templu.’

Tatenai haruka surat ida ba Babilónia hodi husu se Ciro, neʼebé mate tiha ona, hatete nuneʼe duni ka lae. Lakleur, surat ida mai fali husi liurai foun iha Pérsia. Surat neʼe hakerek katak Ciro hatete hanesan neʼe duni. No liurai neʼe hakerek: ‘Husik ema Izraél harii sira-nia Maromak nia templu. No mós haʼu haruka ó atu ajuda sira.’ Iha maizumenus tinan haat nia laran, sira ramata harii templu neʼe, no ema Izraél kontente tebes.

Tinan ba tinan mak liu tiha ona. Agora, atu besik tinan 48 husi tempu neʼebé sira ramata harii templu. Ema iha Jeruzalein kiak hela, no mós sidade no Maromak nia templu ladún kapás. Iha Babilónia, ema Izraél ida naran Esdras rona katak sira presiza hadiʼa Maromak nia templu. Entaun, hatene saida mak nia halo?

Esdras bá atu hasoru liurai Pérsia, naran Artaxerxes, no liurai diʼak neʼe fó prezente barak ba Esdras atu lori fali ba Jeruzalein. Esdras husu ba ema Izraél iha Babilónia atu ajuda nia lori prezente hirak-neʼe ba Jeruzalein. Maizumenus ema naʼin-6.000 hatete katak sira hakarak bá. Sira iha osan-mean no osan-mutin barak no mós sasán barak neʼebé folin karun atu lori.

Esdras laran-susar, tanba tuir dalan iha ema aat. Ema sira-neʼe bele hadau ema Izraél nia osan-mean no osan-mutin, no mós bele oho sira. Nuneʼe Esdras halibur ema hamutuk, hanesan ó haree iha dezeñu neʼe. Depois, sira halo orasaun ba Jeová atu proteje sira kuandu sira laʼo dook atu fila fali ba Jeruzalein.

Jeová proteje duni sira. Sira laʼo durante fulan haat, no toʼo Jeruzalein ho diʼak. Ida-neʼe hatudu katak Jeová bele proteje sira neʼebé konfia ba ninia ajuda, loos ka lae?