1, 2. (a) Paulo no sira neʼebé laʼo ho nia hasoru perigu saida iha Éfeso? (b) Iha kapítulu neʼe, ita sei koʼalia kona-ba saida?

 EMA iha Éfeso hakilar no halai iha dalan. Grupu boot neʼebé hirus komesa halo protesta! Ema kaer Paulo nia maluk naʼin-rua no rasta sira. Dalan boot neʼebé iha loja barak sai mamuk tanba ema hotu halai ba fatin teatru nian iha sidade neʼe, neʼebé bele halibur ema naʼin-25.000. Ema barak la hatene tanbasá problema neʼe mosu, maibé maizumenus sira hatene katak sira-nia templu no maromak Ártemis neʼebé sira hadomi iha perigu laran. Tan neʼe sira komesa hakilar: “Ema Éfeso nia maromak-feto Ártemis mak kmanek!”—Após 19:34.

² Dala ida tan, Satanás uza ema-lubun neʼebé hirus atu hapara serbisu haklaken kona-ba Maromak nia Ukun. Klaru katak Satanás laʼós deʼit uza dalan hanesan neʼe. Iha kapítulu neʼe, ita sei aprende kona-ba dalan balu neʼebé Satanás uza atu hapara serbisu haklaken no halakon unidade entre ema Kristaun iha apóstolu sira-nia tempu. Importante liu mak ita sei haree katak Satanás la susesu, tanba ‘Jeová nia liafuan kontinua habelar no ema barak tan sai fiar-naʼin’. (Após 19:20) Tanbasá ema Kristaun sira-neʼe bele kontinua haklaken? Klaru katak ita hotu bele kontinua haklaken no unidade tanba Jeová nia ajuda. Maibé hanesan ema Kristaun iha apóstolu sira-nia tempu, ita mós presiza halo ita-nia parte. Ho espíritu santu nia ajuda, ita bele haburas hahalok sira neʼebé sei ajuda ita atu kontinua haklaken ho susesu. Ulukliu, mai ita aprende kona-ba Apolo nia ezemplu.

3, 4. Áquila no Priscila nota saida husi Apolo, no saida mak sira halo?

³ Bainhira Paulo laʼo daudaun ba Éfeso iha ninia viajen nuʼudar misionáriu ba dala terseiru, mane Judeu ida naran Apolo toʼo uluk ona iha sidade Éfeso. Nia husi Alexandria, sidade ida neʼebé famozu iha Ejitu. Apolo iha abilidade diʼak balu. Nia “matenek atu koʼalia”, “hatene didiʼak kona-ba Eskritura”, no “laran-manas ho espíritu”. Apolo koʼalia ho aten-brani ba ema Judeu sira iha sinagoga.—Após 18:24, 25.

 ⁴ Áquila no Priscila rona bainhira Apolo koʼalia. Sira kontente bainhira rona Apolo “hanorin ho loloos kona-ba Jesus”. Buat neʼebé nia hanorin mak loos duni. Maibé lakleur, kaben-naʼin neʼe nota katak iha buat importante balu neʼebé Apolo seidauk hatene. Nia “hatene deʼit kona-ba João nia batizmu”. Kaben-naʼin simples neʼe, neʼebé serbisu atu halo tenda, la dada an atu koʼalia ho Apolo maski nia mak matenek atu koʼalia no iha edukasaun boot. “Sira lori nia mesamesak no esplika diʼak liután ba nia kona-ba Maromak nia dalan.” (Após 18:25, 26) Apolo nia reasaun mak oinsá? Nia hatudu hahalok neʼebé importante tebes ba ema Kristaun, neʼe mak haraik an.

5, 6. Tanbasá mak Apolo bele sai Jeová nia atan neʼebé diʼak liután, no saida mak ita bele aprende husi ninia ezemplu?

⁵ Tanba Apolo simu ajuda husi Áquila no Priscila, nia sai Jeová nia atan neʼebé diʼak liután. Nia halo viajen ba Akaia hodi “fó ajuda ba sira neʼebé sai ona fiar-naʼin”. Nia mós haklaken ho didiʼak ba ema Judeu sira neʼebé la simu Jesus nuʼudar Mesias neʼebé promete nanis ona. Lucas hatete: “Ho laran-manas nia hatudu ho klaru katak ema Judeu nia hanorin mak sala, no nia hatudu husi Eskritura katak Jesus mak Kristu.” (Após 18:27, 28) Apolo mak bensaun boot ba kongregasaun! Tanba Apolo, ema barak rona kona-ba ‘Jeová nia liafuan’. Saida mak ita bele aprende husi Apolo nia ezemplu?

⁶ Ema Kristaun presiza duni haburas hahalok haraik an. Ita hotu hetan prezente furak husi Jeová, porezemplu abilidade, esperiénsia, ka koñesimentu. Maibé, haraik an mak importante liu fali buat sira-neʼe. Se ita la kuidadu, ita-nia abilidade bele lori problema. Ita bele deʼit sai foti an tanba ita-nia abilidade. (1 Kor 4:7; Tgo 4:6) Se ita mak haraik an, ita sei hakaʼas an haree ema seluk boot liu ita. (Flp 2:3) Ita sei la hirus bainhira ema seluk korrije ita no ita sei husik ema seluk hanorin ita. Ita mós sei la ulun-toos hodi kaer metin ba ita-nia ideia kuandu nota katak ita-nia ideia la tuir matadalan husi espíritu santu. Se ita nafatin haraik an, Jeová no ninia Oan-Mane sei kontinua uza ita.—Lc 1:51, 52.

7. Oinsá mak Paulo no Apolo hatudu ezemplu kona-ba haraik an?

⁷ Se ita haraik an, ita mós sei la laran-moras. Imajina toʼok oinsá Satanás hakarak tebes atu halakon unidade entre ema Kristaun iha apóstolu sira-nia tempu. Nia sei kontente se Paulo no Apolo kompete malu, karik hodi hadau malu pozisaun iha kongregasaun! Fasil deʼit ba Paulo no Apolo atu hatudu hahalok hanesan neʼe. Iha Korinto, ema Kristaun balu komesa dehan: “Haʼu Paulo nian”, maibé ema seluk dehan: “Haʼu Apolo nian.” Paulo no Apolo hakarak irmaun-irmán sira hanoin hanesan neʼe ka lae? Lae! Paulo ho haraik an gaba Apolo tanba ninia serbisu haklaken. Paulo mós fó tan knaar seluk ba Apolo, no Apolo halo tuir Paulo nia matadalan. (1 Kor 1:10-12; 3:6, 9; Tito 3:12, 13) Neʼe  mak ezemplu diʼak mai ita ohin loron kona-ba serbisu hamutuk no haraik an!

8. Paulo fila fali ba Éfeso hodi liu dalan ida-neʼebé, no tanbasá?

⁸ Paulo promete ona atu fila fali ba Éfeso, no nia halo nuneʼe duni. a (Após 18:20, 21) Maibé, Paulo fila fali ba Éfeso hodi liu dalan ida-neʼebé? Nia komesa ninia viajen iha Antiokia iha Síria. Loloos, Paulo bele deʼit liu husi Seléusia neʼebé besik liu no saʼe ró atu toʼo iha Éfeso. Maibé nia laʼo fali husi “área foho nian”. Ema balu dehan, se sura Paulo nia viajen neʼebé hakerek iha Apóstolu 18:23 no 19:1, neʼe bele toʼo kilómetru 1.600! Tanbasá mak Paulo hili dalan neʼebé dook no susar? Tanba nia hakarak “hametin dixípulu sira hotu”. (Após 18:23) Iha Paulo nia viajen nuʼudar misionáriu ba dala terseiru, nia presiza halo sakrifísiu barak hanesan ho ninia viajen sira antes neʼe, maibé nia haree buat sira-neʼe hotu mak la saugati deʼit. Ohin loron, katuas área no sira-nia feen mós hatudu atitude neʼebé hanesan. Tan neʼe, ita hafolin tebes sira-nia domin no sakrifísiu.

9. Tanbasá mak dixípulu maizumenus naʼin-12 presiza hetan fali batizmu, no lisaun saida mak ita bele aprende husi sira?

⁹ Bainhira toʼo iha Éfeso, Paulo hasoru João Batista nia dixípulu maizumenus naʼin-12. Sira hetan batizmu husi João Batista, maibé neʼe la vale ona. Sira mós ladún iha koñesimentu kona-ba espíritu santu. Tan neʼe, Paulo esplika ba sira katak importante atu hetan batizmu iha Jesus nia naran, no hanesan Apolo, sira mós haraik an no hakarak tebes atu aprende liután. Depois hetan tiha batizmu hodi Jesus nia naran, sira simu espíritu santu no kbiit atu halo buat kmanek oioin. Klaru katak Jeová haraik bensaun ba ema neʼebé prontu halo tuir matadalan foun husi ninia organizasaun.—Após 19:1-7.

10. Tanbasá mak Paulo muda ba sala eskola nian, no oinsá mak neʼe sai nuʼudar ezemplu mai ita?

¹⁰ Tuirmai, Paulo haklaken ho aten-brani iha sinagoga durante fulan tolu. Nia “fó diskursu iha dalan neʼebé book ema atu fiar kona-ba Maromak nia Ukun”, maibé ema balu lakohi rona no kontra makaʼas. Duké soe tempu ba ema neʼebé “koʼalia aat kona-ba Naʼi nia Dalan”, Paulo deside atu haklaken iha sala eskola nian. (Após 19:8, 9) Sira neʼebé hakarak aprende liután kona-ba Maromak nia Ukun presiza bá iha neʼebá duké kontinua bá sinagoga. Hanesan Paulo, ita mós bele deside atu la kontinua koʼalia ho ema neʼebé lakohi rona ka hakarak diskute malu deʼit. Sei iha ema laran-moos barak neʼebé presiza rona ba liafuan diʼak!

11, 12. (a) Oinsá mak Paulo hatudu ezemplu kona-ba haklaken ho badinas no adapta tuir situasaun? (b) Oinsá mak Testemuña ba Jeová haklaken ho badinas no adapta tuir situasaun?

 ¹¹ Karik loroloron Paulo hanorin iha sala eskola neʼe maizumenus husi tuku 11 dadeer toʼo tuku 4 lokraik. (Haree nota estudu iha Após 19:9, nwtsty-IN) Karik neʼe mak tempu neʼebé ladún rame, manas loos no ema barak para serbisu atu han no deskansa. Imajina toʼok, se Paulo halo tuir oráriu neʼe durante tinan rua, neʼe katak nia uza oras 3.000 liu (fulan ida oras 125) atu hanorin. b Neʼe mak razaun ida tan tanbasá Jeová nia liafuan kontinua habelar. Paulo haklaken ho badinas no prontu atu adapta tuir situasaun. Nia halo mudansa ba ninia oráriu no fatin atu bele ajuda ema barak liután. Rezultadu mak saida? “Ema Judeu no ema Gregu hotu neʼebé hela iha provínsia Ázia rona Naʼi nia liafuan.” (Após 19:10) Sin, Paulo fó sasin ho didiʼak!

¹² Testemuña ba Jeová ohin loron mós haklaken ho badinas no prontu atu adapta tuir situasaun. Ita koko atu haklaken iha fatin no tempu naran deʼit neʼebé ita bele hasoru ema. Ita haklaken iha dalan, merkadu, no iha fatin para karreta ka motór. Ita mós haklaken liuhusi telefone ka hakerek karta. No ita mós hakaʼas an atu haklaken husi uma ba uma iha tempu neʼebé ema iha uma.

13, 14. (a) Jeová fó kbiit saida ba Paulo? (b) Seva nia oan-mane sira halo sala saida, no oinsá mak ema barak ohin loron neʼebé temi sira-nia an nuʼudar Kristaun halo buat neʼebé hanesan?

¹³ Tuirmai, livru Apóstolu fó sai katak Jeová ajuda Paulo atu halo “hahalok  kmanek oioin ho kbiit”. Kuandu ema lori Paulo nia hena ka lensu ba ema neʼebé moras, ema moras hetan kura kedas, no anju aat sira mós sai husi ema. c (Após 19:11, 12) Milagre sira-neʼe dada ema barak nia atensaun, maibé laʼós ema hotu mak iha hanoin pozitivu.

¹⁴ “Ema Judeu balu neʼebé laʼo haleʼu atu duni sai anju aat sira” koko atu halo tuir Paulo nia milagre sira. Sira koko atu duni sai anju aat hodi temi Jesus no Paulo nia naran. Lucas temi ezemplu kona-ba ulun-naʼin amlulik Seva nia oan-mane naʼin-hitu neʼebé koko atu halo ida-neʼe. Anju aat hatete ba sira: “Haʼu hatene Jesus no mós hatene Paulo; maibé imi neʼe sé?” Tuirmai, mane neʼebé anju aat domina ataka sira naʼin-hitu hodi haksoit ba sira-nia leten hanesan animál neʼebé siʼak, no sira halai ho isin-molik no kanek. (Após 19:13-16) Liuhusi akontesimentu neʼe ‘Jeová nia liafuan’ hetan vitória, tanba ema bele haree ho momoos katak Jeová fó kbiit ba Paulo, laʼós ba ema neʼebé halaʼo adorasaun falsu. Ohin loron, ema millaun ba millaun hanoin sala katak hodi temi deʼit Jesus nia naran ka temi sira-nia an nuʼudar “Kristaun” mós toʼo ona. Maibé hanesan buat neʼebé Jesus hatete, só ema neʼebé halo tuir duni ninia Aman nia hakarak mak sei iha esperansa neʼebé loos kona-ba futuru.—Mt 7:21-23.

15. Kona-ba espiritizmu no sasán neʼebé liga ho espiritizmu, oinsá mak ita bele banati-tuir ema iha Éfeso nia ezemplu?

¹⁵ Bainhira ema hatene kona-ba buat neʼebé akontese ba Seva nia oan-mane sira, ema barak sai Kristaun no husik tiha hahalok espiritizmu. Ema Éfeso nia kultura mak liga metin ho espiritizmu. Sira uza biru, no halo masonik oioin neʼebé hetan husi livru sira. Maibé agora, ema Éfeso barak halibur sira-nia livru masonik no sunu iha fatin públiku, maski livru sira-neʼe mak karun tebes. d Lucas hatete: “Tanba Jeová  nia kbiit mak ninia liafuan kontinua habelar no ema barak tan sai fiar-naʼin.” (Após 19:17-20) Lia-loos husi Jeová nia liafuan manán hasoru adorasaun falsu no anju aat sira! Ema laran-metin sira-neʼe hatudu ezemplu diʼak mai ita ohin loron. Ita mós moris iha mundu neʼebé nakonu ho espiritizmu. Se ita iha sasán ruma neʼebé liga ho espiritizmu, ita mós presiza banati-tuir ema Éfeso hodi halakon kedas sasán sira-neʼe! Mai ita hasees an husi buat hotu neʼebé liga ho espiritizmu, maski neʼe la fasil.

16, 17. (a) Oinsá mak Demétrio konsege halo ema kontra Paulo iha Éfeso? (b) Oinsá mak ema Éfeso hatudu katak sira mak fanátiku?

¹⁶ Tuirmai, Satanás uza ema-lubun atu halo violénsia makaʼas hodi hanetik serbisu haklaken. Lucas hakerek: “Susar boot mosu ba Naʼi nia Dalan.” Neʼe mak situasaun neʼebé perigu tebes. e (Após 19:23) Ema neʼebé hahú problema neʼe mak badaen osan-mutin ida naran Demétrio. Nia fó-hanoin ba ninia maluk badaen osan-mutin sira katak sira presiza faʼan estátua atu bele hetan osan barak. Nia mós hatete katak mensajen neʼebé Paulo haklaken sei halo sira lakon sira-nia osan tanba ema Kristaun la adora estátua. No tanba nia hatene katak ema neʼebé rona ba nia mak orgullu tebes ho sira-nia sidade no nasaun, tan neʼe nia hatete ba sira katak se povu rona ba Paulo, sira-nia maromak-feto Ártemis no sira-nia templu neʼebé famozu sei “la iha folin”.—Após 19:24-27.

¹⁷ Demétrio konsege book ema atu kontra Paulo. Badaen osan-mutin sira komesa hakilar: “Ema Éfeso nia maromak-feto Ártemis mak boot!” Tuirmai, ema iha sidade komesa sai runguranga no hahú protesta, hanesan temi iha parágrafu primeiru. f Paulo mak ema neʼebé prontu halo sakrifísiu, tan neʼe nia hakarak tama ba fatin teatru atu koʼalia, maibé dixípulu sira hapara nia atu tama ba fatin perigu neʼe. Mane ida naran Alexandre hamriik iha ema-lubun nia oin no koko atu koʼalia. Nia mak ema Judeu, tan neʼe karik nia hakarak atu esplika diferensa entre ema Judeu no ema Kristaun sira-neʼe. Maibé ema-lubun lakohi  rona. Bainhira sira rekoñese katak nia mak ema Judeu, sira hapara nia atu koʼalia hodi hakilar maizumenus ba oras rua: “Ema Éfeso nia maromak-feto Ártemis mak kmanek!” Ohin loron, iha mós ema neʼebé fanátiku kona-ba sira-nia relijiaun no neʼe halo sira sai ulun-toos.—Após 19:28-34.

18, 19. (a) Oinsá mak administradór iha Éfeso halo ema-lubun sai kalma? (b) Oinsá mak Jeová nia povu dala ruma hetan protesaun husi autoridade sira, no saida mak ita bele halo atu hetan protesaun hanesan neʼe?

¹⁸ Ikusmai administradór sidade nian halo ema-lubun sai kalma. Administradór neʼe iha hanoin neʼebé loos. Nia koʼalia ba ema-lubun katak ema Kristaun sei la estraga sira-nia maromak no templu. Nia mós fó sai katak Paulo no ninia maluk sira la halo krime ida, no se ema ida la gosta buat neʼebé sira halo, ema neʼe presiza fó sai ba autoridade sira hodi rezolve tuir lei. Ikusliu, nia hatete katak se ema ruma halibur hamutuk hodi hamosu problema, neʼe mak kontra governu Roma nia lei. Tuirmai, nia haruka ema-lubun sira-neʼe fahe malu. Hanesan tempu neʼebé sira sai hirus derrepente, sira mós sai kalma derrepente deʼit bainhira rona ba administradór nia liafuan neʼebé lójiku.—Após 19:35-41.

¹⁹ Neʼe laʼós dala primeiru neʼebé ema iha autoridade halo buat ruma atu proteje Jesus nia dixípulu sira, no neʼe mós laʼós ba dala ikus. Apóstolu João haree vizaun ida katak durante loron ikus sira, “rai” ka parte estavel husi mundu neʼe sei tolan “mota” ka susar no terus neʼebé Satanás halo ba Jesus nia dixípulu sira. (Apok 12:15, 16) Neʼe sai loos duni. Iha situasaun barak, juís sira neʼebé la todan ba sorin, proteje ona Testemuña ba Jeová atu halaʼo reuniaun sira no haklaken. Klaru katak ita-nia hahalok mós bele book juís sira atu halo ita manán kazu sira hanesan neʼe. Paulo nia hahalok halo ema-boot balu iha Éfeso hakarak atu proteje nia. (Após 19:31) Hein katak ita-nia hahalok laran-moos no hatudu respeitu bele fó sasin diʼak ba ema neʼebé ita hasoru. Ita la hatene neʼe sei lori rezultadu saida.

20. (a) Ita sente oinsá bainhira haree Jeová nia liafuan iha kbiit boot iha apóstolu sira-nia tempu no ohin loron? (b) Ita deside metin atu halo saida?

²⁰ Ita sente orgullu bainhira hanoin kona-ba oinsá mak ‘Jeová nia liafuan kontinua habelar no ema barak tan sai fiar-naʼin’ iha apóstolu sira-nia tempu. Ita mós orgullu bainhira haree Jeová nia liafuan kontinua habelar ohin loron. Ita hakarak ka lae atu hola parte ba ida-neʼe? Se nuneʼe, aprende husi ezemplu sira neʼebé ita foin estuda. Kontinua haraik an, halo tuir mudansa sira neʼebé mai husi Jeová nia organizasaun, serbisu ho badinas, hasees an husi espiritizmu, no halo buat neʼebé ita bele atu fó sasin liuhusi ita-nia hahalok laran-moos no respeitu.