1-3. Pergunta saida deʼit mak ema husu kona-ba mate? Relijiaun balu fó resposta saida deʼit?

BÍBLIA promete katak iha futuru “mate sei la iha tan”. (Apokalipse 21:4) Iha Kapítulu 5, ita aprende katak Jesus nia sakrifísiu loke dalan ba ita atu hetan moris rohan-laek. Maibé ema mate nafatin. (Eclesiastes 9:5) Tan neʼe, ita hanoin: Saida mak akontese kuandu ita mate?

² Resposta ba pergunta neʼe importante liuliu bainhira ita-nia família ka belun neʼebé ita hadomi mate. Karik ita hanoin: ‘Nia bá neʼebé? Nia terus ka lae? Nia bele haree no ajuda haʼu ka lae? Loron ida haʼu bele hasoru fali nia ka lae?’

³ Relijiaun sira fó resposta oioin ba pergunta sira-neʼe. Relijiaun balu hanorin katak, ema diʼak sei bá lalehan no ema aat sei bá infernu. Balu tan dehan, bainhira ita mate, ita sei sai espíritu ida no hamutuk ho ita-nia família neʼebé mate ona. Relijiaun seluk hanorin katak depois ita mate, ita sei hetan tesi-lia, no tuirmai moris fali nuʼudar ema ka animál ida.

4. Relijiaun barak fó sai ideia saida kona-ba mate?

⁴ Maski relijiaun ida-idak hanorin la hanesan, maibé tuir loloos, sira fó sai ideia ida deʼit. Sira hanorin katak, kuandu ema ida mate, parte ruma husi ema neʼe sei moris hela. Neʼe loos ka lae?

5, 6. Saida mak akontese kuandu ita mate?

⁵ Jeová hatene saida mak akontese kuandu ita mate, no hanorin katak bainhira ema ida mate, ema neʼe la iha tan. Ema neʼebé mate ona la sente no la hanoin buat ida, nia la iha klamar neʼebé moris hela. * Bainhira ita mate, ita labele haree, rona no hanoin.

⁶ Bíblia hatete: “Ema neʼebé mate ona la hatene buat ida.” Sira labele hadomi ka odi ema, no “la iha serbisu ka planu ka koñesimentu ka matenek iha rate”. (Lee Eclesiastes 9:5, 6, 10.) Tuir Salmo 146:4, bainhira ema ida mate, “ninia hanoin sira” lakon hotu.

7. Jesus hatete saida kona-ba mate?

⁷ Bainhira Jesus nia belun Lázaro mate ona, Jesus hatete ba ninia dixípulu sira: “Ita-nia belun Lázaro toba ona.” Neʼe la dehan katak Lázaro deskansa hela, tanba Jesus hatutan tan: “Lázaro mate ona.” (João 11:11-14) Jesus kompara mate hanesan ho toba. Nia la hatete katak Lázaro bá lalehan, ka hamutuk ho ninia família neʼebé mate ona. Jesus mós la hatete katak Lázaro terus hela iha infernu, ka nia sei moris fali nuʼudar ema seluk ka animál ida. Lázaro nia kondisaun mak hanesan toba-dukur. Eskritura seluk mós kompara mate hanesan ho toba-dukur. Porezemplu, bainhira ema oho Estevão, Bíblia hatete katak nia “toba”. (Apóstolu 7:60, nota-rodapé) Apóstolu Paulo  mós hakerek kona-ba ema Kristaun balu neʼebé “toba” ona tanba mate.​—1 Korinto 15:6, nota-rodapé.

8. Oinsá mak ita bele hatene katak Maromak lakohi ema atu mate?

⁸ Maromak kria Adão no Eva atu moris ba tempu balu deʼit no ikusmai mate ka lae? Lae. Jeová kria ema ho saúde neʼebé perfeitu atu bele moris ba nafatin. Nia mós kria ema atu iha hakarak atu moris ba nafatin. (Eclesiastes 3:11) Inan-aman lakohi haree sira-nia oan mate, no Jeová mós sente hanesan neʼe. Maibé se Maromak kria ita atu moris ba nafatin, tanbasá mak ita mate?

9. Tanbasá mak la susar ba Adão no Eva atu halo tuir Jeová nia mandamentu?

⁹ Iha jardín Eden, Jeová hatete ba Adão: “Ai-fuan husi ai-hun hotu iha jardín neʼe ó bele han toʼo bosu. Maibé kona-ba ai-hun neʼebé hanaran nuʼudar ai-hun koñesimentu kona-ba buat diʼak no aat, ó labele han ninia fuan, tanba iha loron neʼebé ó han ai-fuan neʼe, ó sei mate duni.” (Génesis 2:9, 16, 17) Mandamentu neʼe klaru no la susar atu halo tuir. Jeová iha direitu atu fó-hatene Adão no Eva kona-ba buat neʼebé diʼak no buat neʼebé aat. Hodi halo tuir Jeová, sira bele hatudu respeitu ba nia nuʼudar sira-nia ukun-naʼin, no mós hatudu agradese ba nia kona-ba buat hotu neʼebé nia fó ba sira.

10, 11. (a) Oinsá mak Satanás book Adão no Eva atu la halo tuir Maromak? (b) Tanbasá mak Adão no Eva labele hetan perdua?

¹⁰ Maibé Adão no Eva hili atu la halo tuir Jeová. Satanás hatete ba Eva: “Maromak dehan duni katak imi labele han ai-fuan husi ai-hun hotu iha jardín neʼe ka?” Eva hatán: “Ami bele han ai-fuan husi ai-hun sira iha jardín neʼe. Maibé kona-ba ai-fuan husi ai-hun neʼebé iha jardín nia klaran, Maromak dehan ona: ‘Imi labele han ai-fuan husi ai-hun neʼe, imi labele kaer ai-hun neʼe. Se lae, imi sei mate.’”​—Génesis 3:1-3.

¹¹ Satanás hatete: “Tuir loloos, imi sei la mate. Tanba Maromak hatene katak iha loron neʼebé imi han ai-fuan neʼe, imi-nia matan sei nakloke no imi sei sai hanesan Maromak hodi hatene buat diʼak no aat.” (Génesis 3:4-6) Satanás hakarak Eva atu hanoin katak nia bele deside rasik buat neʼebé diʼak no aat. Satanás mós bosok katak Eva sei la mate maski la halo tuir  Maromak. Ikusmai, Eva han ai-fuan neʼe no fó mós ba ninia laʼen. Sira hatene katak Jeová bandu sira labele han ai-fuan neʼe. Tan neʼe, bainhira sira han, sira ho neon la halo tuir Jeová nia mandamentu neʼebé simples no klaru. Sira hatudu katak sira la respeitu sira-nia Aman iha lalehan. Sira-nia hahalok neʼe labele hetan perdua!

12. Tanbasá mak Adão no Eva nia hahalok halo Jeová triste tebes?

¹² Ita-nia inan-aman primeiru la respeitu sira-nia Kriadór no halo nia triste tebes! Hanoin toʼok, se Ita hakaʼas an haboot Ita-nia oan-mane no oan-feto, no depois sira kontra hasoru Ita no la halo tuir buat neʼebé Ita husu ba sira, Ita sente oinsá? Laran-kanek, loos ka lae?

13. Jeová nia liafuan “ó sei fila fali ba rai-rahun” katak sá?

¹³ Bainhira Adão no Eva la halo tuir Jeová, sira lakon oportunidade atu moris ba nafatin. Jeová hatete ba Adão: “Ó mak rai-rahun no ó sei fila fali ba rai-rahun.” (Lee Génesis 3:19.) Tanba Adão halo sala, nia sai fali rai-rahun, neʼe katak nia la iha tan.​—Génesis 2:7.

14. Tanbasá mak ita mate?

¹⁴ Se Adão no Eva halo tuir Maromak, sira sei moris ba nafatin toʼo ohin loron. Maibé  tanba sira halo sala hodi la halo tuir Maromak, sira mate. Sala mak hanesan moras aat ida neʼebé ita-nia inan-aman primeiru hatutan mai ita. Ita hotu moris mai nuʼudar sala-naʼin, tan neʼe ita hotu mate. (Roma 5:12) Maibé neʼe laʼós Maromak nia planu. Maromak lakohi ema atu mate. No Bíblia bolu mate nuʼudar “inimigu”.​—1 Korinto 15:26.

15. Oinsá mak lia-loos kona-ba mate bele halo ita sai livre?

¹⁵ Lia-loos kona-ba mate halo ita sai livre husi ideia oioin neʼebé la loos. Bíblia hanorin katak ema neʼebé mate ona la sente moras ka triste. Ita labele koʼalia ba sira, no sira mós labele koʼalia mai ita. Ita labele ajuda sira, no sira mós labele ajuda ita. Sira labele halo aat ba ita, tan neʼe ita la presiza taʼuk. Maibé relijiaun barak hatete katak ema neʼebé mate ona sei moris hela iha fatin ruma no se ita fó osan ba padre ka ulun-naʼin relijiaun, ita bele ajuda ema neʼebé mate ona. Maibé tanba ita hatene ona lia-loos kona-ba mate, ita sei la monu ba lia-bosok sira-neʼe.

16. Relijiaun barak hanorin lia-bosok saida kona-ba mate?

¹⁶ Satanás uza relijiaun falsu atu halo ita fiar katak ema neʼebé mate ona sei moris hela. Porezemplu, relijiaun balu hanorin katak bainhira ita mate, parte ruma husi ita sei moris hela. Ita-nia relijiaun hanorin hanesan neʼe? Ka hanorin tuir Bíblia kona-ba ema neʼebé mate ona? Satanás uza lia-bosok atu hadook ema husi Maromak Jeová.

17. Tanbasá mak hanorin kona-ba infernu hafoʼer Jeová nia naran?

¹⁷ Relijiaun barak hanorin buat neʼebé aat tebes. Porezemplu, sira balu hanorin katak ema aat sei terus  ba nafatin iha infernu. Lia-bosok neʼe hafoʼer Jeová nia naran. Nia nunka husik ema hetan terus hanesan neʼe! (Lee 1 João 4:8.) Se ema ida kastigu ninia oan hodi hatama oan nia liman ba ahi, Ita sente oinsá kona-ba ema neʼe? Ita la gosta ema laran-aat hanesan neʼe, no Ita lakohi sai ninia belun. Satanás hakarak ita sente hanesan neʼe ba Jeová.

18. Tanbasá mak ita la presiza taʼuk ba matebian?

¹⁸ Relijiaun balu hatete katak ema neʼebé mate ona sei moris hela nuʼudar espíritu, ka mate-klamar. Relijiaun sira-neʼe hanorin katak ita tenke hamtaʼuk matebian sira tanba sira bele ajuda ka halo aat ba ita. Ema barak fiar lia-bosok neʼe. Sira taʼuk mate-klamar, no koko atu halo kontente ka adora mate-klamar duké adora Jeová. Hanoin-hetan, ema neʼebé mate ona la hatene no la sente buat ida, tan neʼe ita la presiza taʼuk. Jeová mak ita-nia Kriadór. Nia mak Maromak neʼebé loos, no ita tenke adora nia deʼit.​—Apokalipse 4:11.

19. Kuandu hatene lia-loos kona-ba mate, oinsá mak ida-neʼe ajuda ita?

¹⁹ Kuandu ita hatene lia-loos kona-ba mate, neʼe halo ita sai livre husi hanorin bosok husi relijiaun falsu. Neʼe mós ajuda ita atu komprende no fiar metin ba Jeová nia promesa kapás kona-ba ita-nia moris iha futuru.

20. Ita sei aprende kona-ba saida iha kapítulu tuirmai?

²⁰ Iha tempu antigu, Maromak nia atan ida naran Job husu: “Se ema ida mate, nia bele moris fali ka lae?” (Job 14:14) Resposta husi Maromak nia Liafuan Bíblia sei halo ita haksolok tebes. Mai ita aprende kona-ba neʼe iha kapítulu tuirmai.