IHA livru Apokalipse, Maromak hatoʼo mensajen mai ita liuhusi vizaun barak. Porezemplu, livru neʼe temi kona-ba feto-aat ida, no iha nia reen-toos hakerek naran “Babilónia Boot”. Feto ida-neʼe tuur hela iha “ema-lubun” no “nasaun” sira-nia leten. (Apokalipse 17:1, 5, 15) Tanba la iha ema ida neʼebé bele tuur hanesan neʼe, ita hatene katak Babilónia Boot neʼe laʼós feto tebes ida, maibé nia reprezenta deʼit buat ruma. Entaun, feto-aat neʼe reprezenta saida?

Tuir Apokalipse 17:18, feto neʼe mós “reprezenta sidade boot neʼebé ukun liurai sira hotu iha rai”. Liafuan “sidade” katak organizasaun ruma neʼebé iha ema barak neʼebé tuir. Tanba “sidade boot” neʼe ukun “liurai sira hotu iha rai”, ita hatene katak feto neʼe ho naran “Babilónia Boot” mak organizasaun neʼebé iha forsa boot toʼo mundu tomak. Organizasaun saida mak neʼe? Organizasaun relijiaun nian. Mai ita haree eskritura balu iha Apokalipse atu hatene ho klaru kona-ba ida-neʼe.

Organizasaun ida bele harii husi polítiku, kontratu, ka relijiaun nian. Feto ho naran Babilónia Boot laʼós  organizasaun polítiku nian, tanba Maromak nia Liafuan hatete katak feto neʼe “halo sala-foʼer ho liurai sira iha rai”, ka grupu polítiku sira iha mundu neʼe. Nia halo sala-foʼer hodi halo ligasaun ho ukun-naʼin sira iha mundu, no tan neʼe Bíblia bolu nia “feto-aat boot”.—Apokalipse 17:1, 2; Tiago 4:4.

No mós, Babilónia Boot laʼós organizasaun kontratu nian, tanba kuandu nia hetan susar no mate, “kontratu-naʼin sira iha rai”, ka organizasaun kontratu nian, sei tanis no laran-susar ba nia. Tuir loloos, liurai sira no kontratu-naʼin sira hotu haree Babilónia Boot husi “dook”. (Apokalipse 18:3, 9-11, 15-17) Tan neʼe, ita hatene katak Babilónia Boot laʼós organizasaun polítiku ka kontratu nian, maibé relijiaun nian.

Babilónia Boot mak organizasaun relijiaun falsu nian. Tanbasá? Tanba Bíblia bolu Babilónia Boot nuʼudar “hela-fatin ba anju aat sira no ba espíritu foʼer sira”. Ninia fiar no hahalok mai husi anju aat sira. (Apokalipse 18:2; Deuteronômio [Ulangan] 18:10-12) Bíblia hatete katak nia “lohi nasaun hotu liuhusi [ninia] hahalok neʼebé envolve an ho anju aat sira”. (Apokalipse 18:23) Bíblia mós hatete katak organizasaun ida-neʼe nafatin kontra hasoru relijiaun loos, hodi fó-terus ba “profeta sira” no “santu sira”. (Apokalipse 18:24) Tuir loloos, Babilónia Boot hakribi duni relijiaun loos toʼo “sai lanu ho santu sira-nia raan no ho raan husi Jesus nia sasin sira”, katak oho ema neʼebé fó sasin kona-ba Jesus. (Apokalipse 17:6) Tan neʼe, ita hatene ho klaru katak feto-aat neʼe ho naran Babilónia Boot reprezenta organizasaun relijiaun falsu nian iha mundu neʼe, katak relijiaun hotu neʼebé kontra hasoru Maromak Jeová.