Jeová hili ona juís sira atu dirije nasaun Izraél, maibé ema Izraél hakarak iha liurai rasik. Sira dehan ba Samuel: ‘Nasaun seluk hotu iha liurai. Ami mós hakarak iha liurai ida.’ Samuel sente katak neʼe la diʼak, tan neʼe nia halo orasaun ba Jeová. Jeová dehan ba nia: ‘Laʼós ó mak sira la simu, maibé haʼu mak sira la simu. Fó-hatene ba sira katak sira bele iha liurai, maibé liurai neʼe sei husu buat barak husi sira.’ Maski nuneʼe, sira dehan: ‘La buat ida. Ami hakarak iha liurai!’

Jeová dehan ba Samuel katak mane ida naran Saul mak sei sai liurai primeiru. Bainhira Saul bá vizita Samuel iha Ramá, Samuel fui mina ba Saul nia ulun hodi hatudu katak nia mak sei sai liurai.

Lakleur Samuel halibur povu Izraél atu fó koñese sira-nia liurai. Maibé sira labele hetan Saul. Nia iha neʼebé? Nia subar hela iha sasán sira-nia leet. Bainhira sira hetan Saul, sira lori nia atu hamriik iha povu nia leet. Saul ain-aas liu fali ema seluk, no nia bonitu tebes. Samuel dehan: ‘Haree bá, nia mak liurai neʼebé Jeová hili ona.’ Povu komesa haklalak: ‘Viva liurai!’

Foufoun, Saul rona ba Samuel no halo tuir Jeová. Maibé ikusmai Saul nia hahalok troka. Porezemplu, Saul la iha direitu atu hasaʼe sakrifísiu. Loron ida, Samuel haruka Saul atu hein nia. Maibé tanba Samuel seidauk mai, Saul deside atu nia rasik mak hasaʼe sakrifísiu. Tan neʼe, Samuel dehan ba nia: ‘Ó labele kontra Jeová nia mandamentu.’ Saul aprende husi ninia sala ka lae?

Bainhira Saul bá funu hasoru ema Amalec, Samuel dehan ba nia atu la husik buat ida mak moris hela. Maibé Saul deside atu la oho Liurai Agag. Jeová dehan ba Samuel: ‘Saul fila kotuk ona hodi la halo tuir haʼu.’ Samuel sai triste tebes, no nia dehan  ba Saul: ‘Tanba ó la halo tuir ona Jeová, nia sei hili ema seluk atu sai liurai.’ Kuandu Samuel atu fila, Saul kaer metin Samuel nia roupa ninin, no roupa neʼe naklees. Tuirmai Samuel hatete: ‘Jeová lees tiha ona knaar nuʼudar liurai husi ó.’ Jeová sei fó knaar neʼe ba ema seluk neʼebé hadomi no halo tuir nia.