1, 2. (a) Saida mak ulun-naʼin relijiaun sira halo kona-ba serbisu haklaken? Maibé saida mak apóstolu sira halo? (b) Tanbasá apóstolu sira la halo tuir ukun-fuan neʼebé bandu sira haklaken?

LAKLEUR depois Pentekostes 33 EC, situasaun susar ida mosu. Kongregasaun Kristaun iha Jeruzalein foin harii ba semana balu. Klaru katak Satanás haree neʼe mak tempu diʼak atu ataka kongregasaun. Nia hakarak harahun kongregasaun antes kongregasaun neʼe sai buras no metin liután. Satanás hamosu lalais situasaun balu hodi book ulun-naʼin relijiaun sira atu bandu serbisu haklaken. Maibé apóstolu sira ho aten-brani kontinua haklaken, no ema barak hahú “fiar ba Naʼi”.​—Apóstolu 4:18, 33; 5:14.

² Neʼe halo kontradór sira sai hirus makaʼas, no ataka tan apóstolu sira no hatama ba komarka. Maski nuneʼe iha kalan, Jeová nia anju loke komarka nia odamatan, no kuandu rai naroman ona apóstolu sira komesa haklaken fali. Dala ida tan ema kaer fali apóstolu sira no lori ba hasoru autoridade sira hodi tesi-lia katak apóstolu sira kontra ukun-fuan kona-ba haklaken. Maibé apóstolu sira ho aten-brani dehan: “Ami tenke halo tuir Maromak nuʼudar ukun-naʼin duké halo tuir ema.” Autoridade sira sai hirus tebes toʼo sira “hakarak atu oho apóstolu sira”. Maibé iha situasaun difisil neʼe, mestre Ukun-Fuan nian ida naran Gamaliel, neʼebé povu hotu respeitu, fó avizu ba autoridade sira hodi dehan: “Kuidadu bá . . . Keta hanetik ema sira-neʼe, maibé husik sira bá.” Autoridade sira rona ba ninia konsellu no husik apóstolu sira livre. Tuirmai saida mak apóstolu sira halo? Sira ho laran-metin no aten-brani “la para atu hanorin no haklaken liafuan diʼak kona-ba Kristu”.​—Apóstolu 5:17-21, 27-42; Provérbios 21:1, 30.

3, 4. (a) Dalan saida mak Satanás uza atu ataka Maromak nia povu? (b) Saida mak ita sei aprende husi kapítulu neʼe no kapítulu tuirmai?

³ Kazu tribunál iha tinan 33 EC mak kazu primeiru kona-ba autoridade sira kontra hasoru kongregasaun Kristaun, maibé ida-neʼe laʼós kazu neʼebé ikus. (Apóstolu 4:5-8; 16:20; 17:6, 7) Iha ita-nia tempu, Satanás nafatin book kontradór sira atu fó influénsia ba autoridade sira hodi bandu ita-nia serbisu haklaken. Kontradór sira duun Maromak nia povu katak sira la halo tuir lei iha dalan oioin. Porezemplu, sira duun katak ita halo problema iha komunidade, ka ita lohi ema. Sira duun katak ita tama-sai uma hodi faʼan sasán ka halo negósiu. Iha tempu neʼebé loos, ita-nia irmaun-irmán sira lori kazu ba tribunál atu prova katak buat neʼebé ema duun mak la loos. Rezultadu mak saida? Oinsá mak desizaun tribunál nian husi tinan barak liubá kona Ita ohin loron? Mai ita haree didiʼak kazu balu husi tribunál no oinsá mak kazu sira-neʼe ajuda ita atu “defende liafuan diʼak tuir lei”.​—Filipe 1:7.

⁴ Iha kapítulu neʼe ita sei haree oinsá mak ita defende ona ita-nia direitu atu iha liberdade kona-ba haklaken. No iha kapítulu rua tuirmai ita sei haree didiʼak ba kazu balu neʼebé ita hasoru hodi la sai parte ba mundu neʼe no moris tuir kritériu nuʼudar povu neʼebé simu Maromak nia Ukun.

5. Maizumenus iha tinan 1935, tanbasá mak autoridade sira iha Estadus Unidus kaer haklaken-naʼin sira? Irmaun sira neʼebé dirije organizasaun hanoin atu halo saida?

⁵ Maizumenus iha tinan 1935, Estadus Unidus nia sidade no estadu balu haruka Testemuña ba Jeová tenke iha dokumentu lisensa nian atu bele haklaken. Maibé, ita-nia irmaun-irmán sira la trata dokumentu neʼe. Sira hanoin katak autoridade sira bele deʼit kansela lisensa, no governu la iha direitu atu hapara ema Kristaun atu haklaken kona-ba Maromak nia Ukun hodi halo tuir Jesus nia mandamentu. (Marcos 13:10) Rezultadu mak polísia sira kaptura haklaken-naʼin atus ba atus. Tan neʼe, irmaun sira neʼebé iha knaar atu dirije organizasaun komesa hanoin atu lori kazu neʼe ba tribunál. Sira hakarak hatudu katak nasaun neʼe nia lei mak hanetik Testemuña sira-nia direitu atu halaʼo sira-nia adorasaun ho livre. No buat neʼebé akontese iha tinan 1938, ikusmai sai kazu neʼebé importante. Saida mak akontese?

6, 7. Saida mak akontese ba família Cantwell?

⁶ Iha loron-tersa dadeer, 26 Abríl 1938, Newton Cantwell, neʼebé tinan 60; ninia feen Esther no sira-nia oan-mane sira naran Henry, Russell no Jesse, sira naʼin-lima neʼebé serbí nuʼudar pioneiru tempu-tomak, sai husi uma hodi bá haklaken loron tomak iha sidade New Haven, Connecticut. Loloos sira prepara an ona atu husik sira-nia uma ba tempu kleur liu. Tanbasá? Tanba polísia kaptura sira dala balu ona, no sira hatene katak neʼe bele akontese dala ida tan. Maibé neʼe la halakon família Cantwell nia laran-manas atu haklaken kona-ba Maromak nia Ukun. Sira toʼo iha New Haven ho karreta rua. Newton lori karreta neʼebé tula publikasaun sira no fonógrafu. Henry neʼebé tinan 22 lori karreta neʼebé tula koluna ho ekipamentu lian nian hodi bele loke gravasaun. Sin, hanesan sira hatene nanis ona, liu oras balu deʼit polísia mai hapara sira.

⁷ Primeiru polísia kaptura Russel, neʼebé tinan 18, tuirmai Newton no Esther. Husi dook Jesse, neʼebé tinan 16 haree polísia lori ninia inan-aman no ninia maun. Henry haklaken hela iha parte seluk, tan neʼe Jesse neʼebé sei joven mesak deʼit. Maski nuneʼe nia foti ninia fonógrafu no kontinua haklaken. Mane Katólika naʼin-rua husik Jesse loke gravasaun husi irmaun Rutherford nia diskursu ho títulu “Inimigu sira”. Maibé bainhira mane naʼin-rua neʼe rona diskursu neʼe, sira hirus tebes toʼo besik atu baku Jesse. Ho kalma Jesse laʼo sees husi fatin neʼe, maibé lakleur polísia ida hapara nia. Ikusmai Jesse mós hetan kaptura. Polísia la kastigu irmán Cantwell, maibé sira kastigu irmaun Cantwell no ninia oan-mane sira. Maibé, sira bele sai livre iha loron neʼe tanba selu multa.

8. Tanbasá tribunál deside katak Jesse Cantwell mak sala?

⁸ Fulan balu liutiha, iha Setembru 1938, família Cantwell bá tribunál iha New Haven. Tribunál foti desizaun ba Newton, Russell no Jesse katak sira sala tanba husu ezmola la ho lisensa. Maski família Cantwell lori kazu neʼe ba Tribunál Aas iha Connecticut, juís nafatin tesi-lia katak Jesse mak sala tanba halo problema no estraga dame. Tanbasá? Tanba mane Katólika naʼin-rua neʼebé rona gravasaun fó sasin iha tribunál katak diskursu neʼe hatún sira-nia relijiaun no halo sira la kontente. Irmaun sira neʼebé iha responsabilidade iha ita-nia organizasaun lori fali kazu neʼe ba Tribunál Aas Liu Hotu iha Estadus Unidus.

9, 10. (a) Desizaun saida mak Tribunál Aas Liu Hotu iha Estadus Unidus halo ba família Cantwell nia kazu? (b) Desizaun neʼe lori benefísiu saida mai ita?

⁹ Husi loron 29 Marsu 1940, Juís Charles E. Hughes hamutuk ho juís naʼin-ualu tan rona ba argumentu neʼebé hatoʼo husi Testemuña ba Jeová nia advogadu irmaun Hayden Covington. * Kuandu advogadu husi estadu Connecticut hatoʼo ninia argumentu atu hatudu katak Testemuña sira mak ema neʼebá kria problema, juís ida husu: “Iha Jesus nia tempu, Jesus mós lori mensajen neʼebé ema la gosta, loos ka lae?”, Advogadu husi estadu Connecticut neʼe hatán: “Neʼe loos, se la sala, Bíblia mós hatete kona-ba rezultadu la diʼak neʼebé Jesus hasoru tanba haklaken mensajen neʼe.” La ho neon, advogadu neʼe fó sai katak Testemuña ba Jeová nia situasaun hanesan ho Jesus, no estadu Connecticut halo buat neʼebé hanesan ho ema sira neʼebé tesi-lia ba Jesus iha tempu uluk. Iha loron 20 Maiu 1940, Tribunál ho juís hotu neʼebé envolve iha julgamentu neʼe foti desizaun atu apoia Testemuña ba Jeová.

¹⁰ Desizaun husi Tribunál neʼe fó impaktu saida? Tanba desizaun neʼe, ikusmai governu federál, estadu, ka governu lokál labele hanetik ema nia liberdade kona-ba atividade relijiaun nian. Tribunál mós haree katak Jesse “la lori perigu no la sobu dame iha komunidade”. Entaun, desizaun neʼe hatudu ho klaru katak Testemuña ba Jeová laʼós ema neʼebé estraga dame iha komunidade. Neʼe mak vitória ida neʼebé importante tebetebes! Oinsá mak ida-neʼe lori benefísiu mai ita ohin loron? Advogadu ida neʼebé mós Testemuña hatete: “Tanba ita iha direitu atu halaʼo adorasaun ho livre hodi la taʼuk ba ema neʼebé koko hapara ita iha dalan neʼebé la justu, agora ita nuʼudar Testemuña bele fahe mensajen kona-ba esperansa ba ema seluk iha área neʼebé ita hela.”

11. Irmaun-irmán sira halaʼo kampaña saida iha Kanadá? Tanbasá?

¹¹ Durante tinan 1940 toʼo 1950, Testemuña ba Jeová iha Kanadá hasoru dezafiu boot. Tan neʼe, iha tinan 1946, irmaun-irmán sira halaʼo kampaña ba loron 16 hodi fahe panfletu ho títulu “Kebeke nia hirus hasoru Maromak no Kristu no liberdade mak hanesan moe ida ba Kanadá tomak” (Quebec’s Burning Hate for God and Christ and Freedom Is the Shame of All Canada) atu ema hotu bele hatene katak nasaun la fó liberdade ba ema atu halaʼo sira-nia adorasaun. Panfletu ho pájina haat neʼe esplika ho klaru kona-ba hahalok aat neʼebé akontese tanba ulun-naʼin relijiaun sira, polísia sira neʼebé hatudu hahalok brutál, no ema-lubun neʼebé ataka ita-nia irmaun-irmán sira iha provínsia Kebeke. Panfletu fó sai katak: “Sira kontinua kaer Testemuña ba Jeová la ho razaun neʼebé loos. Maizumenus iha akuzasaun 800 hasoru Testemuña ba Jeová iha Grande Montreal.”

12. (a) Kampaña neʼe halo kontradór sira sente oinsá? (b) Sira duun irmaun-irmán sira halo hahalok krime hanesan saida deʼit? (Haree mós nota-rodapé.)

¹² Primeiru Ministru Kebeke naran Maurice Duplessis, neʼebé serbisu hamutuk ho Kardinál Katólika Roma Villeneuve, sai hirus tanba panfletu neʼe no deklara katak nia sei halo “funu la ho laran-sadiʼa” hasoru Testemuña sira. Akuzasaun neʼebé uluk 800 aumenta tan ba 1.600. Irmán pioneiru ida dehan: “Tanba polísia sempre kaptura ami, neʼe halo ami la hanoin-hetan tan dala hira ona mak polísia kaptura ami.” Testemuña sira-neʼe hetan akuzasaun tanba fahe “publikasaun neʼebé book ema atu kontra”. *

13. Sé mak primeiru hetan julga tanba akuzasaun ho hahalok book ema atu kontra, no tribunál nia desizaun mak saida?

¹³ Iha tinan 1947, irmaun Aimé Boucher no ninia oan-feto Gisèle, neʼebé tinan 18, no Lucille, neʼebé tinan 11, sai ema primeiru neʼebé hetan tesi-lia tanba hetan akuzasaun katak sira fahe informasaun neʼebé book ema atu kontra. Sira fahe panfletu Kebeke nia hirus, besik sira-nia toʼos iha área foho iha sidade Kebeke nia parte súl. Susar ba ema atu imajina katak sira mak kria problema hodi kontra lei tanba irmaun Boucher mak ema neʼebé simples no laran-maus, nia serbisu iha ninia toʼos neʼebé kiʼik no dala ruma deʼit mak bá sidade ho kuda-karreta. Maibé, família Boucher hasoru ona hahalok aat sira hanesan temi iha panfletu neʼe. Juís iha tribunál, neʼebé odi Testemuña, la simu evidénsia katak família Boucher la sala. Nia simu fali prokuradór nia opiniaun katak panfletu neʼe halo ema la kontente no família Boucher mak sala duni. Juís deside katak: Atu koʼalia lia-loos mak krime! Tribunál julga katak Aimé no Gisèle sala tanba fahe informasaun neʼebé book ema atu kontra. Lucille neʼebé sei kiʼik mós tama iha sela ba loron rua. Irmaun sira lori kazu neʼe ba Tribunál Aas Liu Hotu iha rai-Kanadá, no sira aseita atu haree didiʼak ba kazu neʼe.

14. Oinsá mak irmaun-irmán sira iha Kebeke tahan hasoru susar?

¹⁴ Durante tempu neʼe, ita-nia irmaun-irmán sira neʼebé aten-brani iha Kebeke kontinua haklaken kona-ba Maromak nia Ukun no hetan rezultadu neʼebé diʼak, maski hetan kontra makaʼas no halo violénsia. Kampaña fahe panfletu hahú iha tinan 1946, no iha tinan haat nia laran, Testemuña iha Kebeke aumenta husi 300 sai fali 1.000! *

15, 16. (a) Desizaun saida mak Tribunál Aas Liu Hotu iha Kanadá foti kona-ba família Boucher nia kazu? (b) Tanba manán iha kazu neʼe, oinsá mak neʼe kona irmaun-irmán sira?

¹⁵ Iha Juñu 1950, juís naʼin-sia husi Tribunál Aas Liu Hotu iha Kanadá mak haree kona-ba Aimé Boucher nia kazu. Fulan neen liutiha, iha loron 18 Dezembru 1950, Tribunál neʼe foti desizaun atu apoia ita. Tanbasá? Irmaun Glen How, neʼebé sai nuʼudar advogadu ba Testemuña dehan juís sira konkorda katak liafuan “book ema atu kontra”, neʼe refere ba hahalok lohi ema atu halo violénsia no kontra hasoru governu. Maibé ita-nia panfletu sira “la iha informasaun hanesan neʼe, no fahe panfletu neʼe mak dalan legál atu fó sai ema ida-idak nia hanoin ho livre”. Irmaun Glen How dehan: “Haʼu haree duni katak Jeová mak halo ita manán iha kazu neʼe.” *

¹⁶ Tribunál Aas Liu Hotu nia desizaun neʼe hatudu katak Maromak nia Ukun mak manán duni. Tanba desizaun neʼe, kazu seluk hamutuk 122 neʼebé kontra hasoru Testemuña ba Jeová iha Kebeke kansela tiha. No mós sidadaun Kanadá no sidadaun seluk neʼebé iha ligasaun ho Bretaña agora iha liberdade atu fó sai sira-nia hanoin kona-ba governu nia dalan atu ukun povu. Liután neʼe, tanba Testemuña mak manán iha kazu neʼe, igreja sira no estadu Kebeke labele ona hanetik Testemuña ba Jeová sira-nia direitu. *

17. Oinsá mak governu balu koko makaʼas atu kontrola ita-nia atividade haklaken?

¹⁷ Hanesan ema Kristaun iha tempu uluk, Jeová nia atan sira ohin loron mós “la faʼan Maromak nia liafuan”. (Lee 2 Korinto 2:17.) Maibé, ema nia governu balu koko makaʼas atu kontrola ita-nia atividade haklaken liuhusi lei kona-ba atividade komérsiu nian. Mai ita haree kazu rua kona-ba Testemuña ba Jeová sira faʼan sasán ka halaʼo serbisu relijiozu.

18, 19. Oinsá mak autoridade sira iha Dinamarka koko atu hanetik ita-nia serbisu haklaken?

¹⁸ Dinamarka. Iha loron 1 Outubru 1932, governu hahú aplika lei neʼebé bandu ema faʼan livru se la iha lisensa. Maibé, ita-nia irmaun sira la trata dokumentu atu hetan lisensa neʼe. Iha loron tuirmai, Testemuña naʼin-lima haklaken ba loron tomak iha sidade Roskilde, neʼebé dook maizumenus kilómetru 30 husi sidade kapitál Kopenhagen. Iha lokraik, haklaken-naʼin ida naran August Lehmann la fila fali atu hasoru irmaun sira seluk. Neʼe tanba polísia kaer tiha nia ho razaun nia halaʼo atividade negósiu la ho lisensa.

¹⁹ Iha loron 19 Dezembru 1932, August Lehmann ba iha tribunál. Nia dehan katak nia vizita ema atu oferese livru sira kona-ba Bíblia nian, maibé nia la simu katak buat neʼebé nia halo mak negósiu. Tribunál mós apoia nia hodi dehan: “August Lehmann iha ona dalan atu sustenta ninia moris. Nia la simu lukru husi ninia atividade, no nia mós la iha intensaun atu hetan benefísiu finanseiru. Tuir loloos nia halaʼo ninia atividade ho ninia osan rasik.” Tribunál apoia Testemuña sira no dehan katak buat neʼebé Lehmann halo laʼós nuʼudar “parte ba negósiu”. Maski nuneʼe, sira neʼebé kontra Maromak nia povu nafatin hakaʼas an atu hapara serbisu haklaken iha rai-Dinamarka. (Salmo 94:20) Sira neʼebé kontra Testemuña lori fali kazu neʼe ba iha Tribunál Aas Liu Hotu iha Dinamarka. Saida mak ita-nia irmaun sira halo?

20. Tribunál Aas Liu Hotu iha Dinamarka foti desizaun saida? Saida mak ita-nia irmaun sira halo?

²⁰ Semana ida antes Tribunál Aas Liu Hotu bolu Testemuña ba Jeová sira, Irmaun-irmán sira iha Dinamarka halaʼo serbisu haklaken ho laran-manas liután. Iha loron-tersa 3 Outubru 1933, Tribunál Aas Liu Hotu fó sai sira-nia desizaun. Sira konkorda ho tribunál lokál nia desizaun katak August Lehmann la kontra lei. Irmaun-irmán sira sente agradese tebes ba Jeová tanba manán iha kazu neʼe, tan neʼe sira aumenta liután sira-nia serbisu haklaken. Husi tempu neʼebé Tribunál Aas Liu Hotu fó sai desizaun neʼe toʼo ohin loron, irmaun-irmán sira iha Dinamarka bele halaʼo sira-nia serbisu haklaken ho livre.

21, 22. Desizaun saida mak Tribunál Aas Liu Hotu iha Estadus Unidus foti kona-ba irmaun Murdock nia kazu?

²¹ Estadus Unidus. Iha loron-domingu 25 Fevereiru 1940, polísia kaer irmaun pioneiru ida naran Robert Murdock, Jr., ho Testemuña sira seluk naʼin-hitu kuandu sira haklaken hela iha sidade Jeannette, besik Pittsburgh, iha estadu Pennsylvania. Tribunál lokál tesi-lia katak Testemuña sira seidauk halo karta lisensa nian atu fahe publikasaun sira. Irmaun sira lori kazu neʼe ba Tribunál Aas Liu Hotu iha Estadus Unidus, no Tribunál neʼe konkorda atu haree fali kazu neʼe.

²² Iha loron 3 Maiu 1943, Tribunál Aas Liu Hotu fó sai sira-nia desizaun neʼebé apoia Testemuña sira. Tribunál neʼe la konkorda katak Testemuña sira tenke iha lisensa, tanba neʼe obriga ema atu “selu hodi bele hetan direitu ba buat neʼebé konstituisaun Federál fó ona”. Tribunál Aas Liu Hotu hatete katak lei neʼebé fó sai iha sidade neʼe mak “hanetik liberdade atu fó sai informasaun, no fó ameasa ba ema nia direitu atu halaʼo sira-nia atividade relijiaun nian ho livre”. Bainhira Juís William O. Douglas fó sai juís maioria nia opiniaun, nia hatete katak atividade neʼebé Testemuña ba Jeová halo mak “laʼós atu haklaken deʼit, no laʼós atu fahe deʼit publikasaun relijiozu nian. Atividade neʼe envolve buat rua neʼe hotu.” Nia mós hatutan tan katak atividade haklaken hanesan neʼe mak “atividade relijiaun nian neʼebé importante tebes, hanesan deʼit ho tuir misa no hatoʼo diskursu iha palku”.

23. Tanbasá kazu neʼebé ita manán iha tinan 1943 importante tebes ba ita ohin loron?

²³ Tribunál Aas Liu Hotu nia desizaun neʼe mak vitória ida neʼebé importante ba Maromak nia povu. Neʼe fó sai ho klaru katak ita haklaken tanba ita mak ema Kristaun, laʼós nuʼudar ema neʼebé halo negósiu. Iha loron importante neʼe, iha tinan 1943, Testemuña ba Jeová manán kazu hamutuk 12 husi kazu 13 neʼebé halaʼo iha Tribunál Aas Liu Hotu, inklui kazu Murdock. Desizaun sira-neʼe sai nuʼudar referénsia importante ba kazu sira seluk neʼebé ema uza hodi kontra ita no hakarak hanetik ita-nia direitu atu haklaken Maromak nia Ukun iha fatin públiku no husi uma ba uma.

24. Saida mak ita sei halo se governu bandu ita-nia serbisu haklaken?

²⁴ Nuʼudar Jeová nia atan, ita agradese tebes kuandu governu fó ita direitu legál atu haklaken kona-ba Maromak nia Ukun ho livre. Maibé, se governu bandu serbisu haklaken, ita sei halo mudansa no halaʼo ita-nia serbisu haklaken iha dalan oioin. Hanesan apóstolu sira, ‘ita tenke halo tuir Maromak nuʼudar ukun-naʼin duké halo tuir ema’. (Apóstolu 5:29; Mateus 28:19, 20) Ita mós husu ba tribunál atu husik ita haklaken ho livre tuir dalan neʼebé legál. Haree toʼok ezemplu rua tuirmai.

25, 26. Tanbasá mak irmaun sira lori kazu ba Tribunál Aas Liu Hotu iha Nikarágua, no ninia rezultadu mak saida?

²⁵ Nikarágua. Iha loron 19 Novembru 1952, irmaun Donovan Munsterman neʼebé serbí nuʼudar misionáriu no mós tau matan ba sukursál, bá departamentu imigrasaun iha sidade kapitál Managua atu hasoru Kapitaun Arnold García, xefe ba departamentu neʼe. Kapitaun neʼe hatete ba irmaun Donovan katak Testemuña ba Jeová “labele haklaken tan kona-ba sira-nia fiar no labele halaʼo tan sira-nia atividade relijiaun nian”. Bainhira irmaun neʼe husu razaun tanbasá, kapitaun neʼe esplika katak Testemuña ba Jeová la iha lisensa husi governu atu haklaken no ema dehan Testemuña ba Jeová mak komunista. Sé mak duun ita hanesan neʼe? Neʼe mak ulun-naʼin igreja Katólika Roma.

²⁶ Irmaun Munsterman lori kedas kazu neʼe ba ministériu neʼebé tau matan ba relijiaun sira no mós ba Prezidente Anastasio Somoza García, maibé la hetan rezultadu neʼebé diʼak. Tan neʼe irmaun sira halo mudansa kona-ba oinsá atu halaʼo sira-nia atividade. Irmaun sira la uza tan Reuniaun-Fatin, maibé halibur malu nuʼudar grupu kiʼik. Sira mós la halo tan haklaken iha fatin públiku, maibé kontinua haklaken kona-ba Maromak nia Ukun. Sira mós hatoʼo petisaun ba Tribunál Aas Liu Hotu iha Nikarágua atu nuneʼe sira bele livre fali atu haklaken no halaʼo reuniaun. Jornál oioin fó sai informasaun kona-ba petisaun neʼe, no Tribunál Aas Liu Hotu konkorda atu haree fali kazu neʼe. Rezultadu mak saida? Iha loron 19 Juñu 1953, Tribunál Aas Liu Hotu hasai desizaun ida neʼebé lori vitória ba Testemuña ba Jeová. Tribunál neʼe dehan katak, bandu Testemuña ba Jeová sira mak hanesan kontra fali konstituisaun neʼebé fó liberdade ba ema ida-idak atu fó sai sira-nia opiniaun, konxiénsia, no fiar. Tribunál Aas Liu Hotu mós fó orden ba governu Nikarágua atu hadiʼa sira-nia relasaun ho Testemuña ba Jeová.

27. Tanbasá mak ema barak iha Nikarágua hakfodak ho tribunál nia desizaun? Irmaun-irmán sira fiar saida kona-ba kazu neʼe?

²⁷ Ema barak iha Nikarágua hakfodak tanba Tribunál Aas Liu Hotu apoia Testemuña ba Jeová. Antes neʼe, ulun-naʼin relijiaun sira iha influénsia neʼebé makaʼas tebes, tan neʼe Tribunál sempre hasees an husi konflitu ho sira. No mós, ukun-naʼin governu sira iha podér boot no halo Tribunál Aas Liu Hotu labele foti desizaun kontra hasoru sira. Ita-nia irmaun-irmán sira fiar katak sira bele manán iha kazu neʼe tanba sira haklaken beibeik no hetan apoiu no protesaun husi sira-nia Liurai Jesus.​—Apóstolu 1:8.

28, 29. Maizumenus iha tinan 1985, saida deʼit mak akontese iha Zair?

²⁸ Zair. Maizumenus iha tinan 1985, iha Testemuña naʼin-35.000 iha Zair, neʼebé agora nuʼudar Repúblika Demokrátika Kongu. Atu bele aumenta ita-nia serbisu haklaken, sukursál harii tan edifísiu foun. Iha Dezembru 1985, Testemuña sira halaʼo reuniaun boot internasionál iha sidade kapitál Kinxasa, no delegasaun naʼin-32.000 husi rai oioin mak tuir. Maibé tuirmai, ita-nia irmaun-irmán sira-nia situasaun troka. Saida mak akontese?

²⁹ Irmaun Marcel Filteau, husi Kebeke, neʼebé uluk hasoru susar husi Duplessis nia ukun iha Kanadá, nia serbí nuʼudar misionáriu iha Zair iha tempu neʼebá. Nia konta saida mak akontese: “Iha loron 12 Marsu 1986, irmaun sira simu karta neʼebé dehan katak Testemuña ba Jeová iha Zair mak ilegál.” No prezidente naran Mobutu Sese Seko mak asina rasik dokumentu neʼebé bandu Testemuña ba Jeová.

30. Komisaun ba Sukursál presiza halo desizaun importante saida, no sira deside atu tau atensaun uluk atu halo saida?

³⁰ Iha loron tuirmai, rádiu nasionál fó sai katak: “Ita sei la rona tan kona-ba Testemuña ba Jeová iha [Zair].” Tuirmai ema komesa fó terus ba irmaun-irmán sira. Ema estraga ita-nia Reuniaun-Fatin sira, hadau irmaun-irmán sira-nia sasán, no polísia kaer irmaun-irmán sira, hatama ba komarka no baku. Testemuña nia oan sira mós hatama hotu ba komarka. Iha loron 12 Outubru 1988, governu hadau ita-nia organizasaun nia propriedade sira, no mós edifísiu ba sukursál. Irmaun sira hatoʼo kazu neʼe ba Prezidente Mobutu, maibé la hetan resposta. Iha tempu neʼebá, Komisaun ba Sukursál tenke foti desizaun neʼebé la fasil, “lori kazu neʼe ba Tribunál Aas Liu Hotu, ka hein?” Irmaun Timothy Holmes, misionáriu no mós koordenadór Komisaun ba Sukursál iha Zair iha tempu neʼebá hatete: “Ami harohan ba Jeová atu dirije no fó matenek mai ami.” Depois hanoin didiʼak tiha kona-ba situasaun neʼe, komisaun sente katak seidauk toʼo tempu atu lori kazu neʼe ba tribunál. Maibé sira tau atensaun uluk atu tau matan ba irmaun-irmán sira no buka dalan oinsá atu bele kontinua haklaken.

31, 32. Tribunál Aas Liu Hotu iha Zair halo desizaun importante saida? Oinsá mak neʼe kona irmaun-irmán sira?

³¹ Tinan balu liu tiha. Ema ladún fó terus tan Testemuña ba Jeová, no ema komesa respeitu liután kona-ba direitus umanus iha Zair. Komisaun ba Sukursál hanoin katak neʼe mak tempu diʼak atu hatoʼo kazu neʼe ba Tribunál Aas Liu Hotu. Tribunál Aas Liu Hotu mós hatán atu haree kona-ba kazu neʼe. Iha loron 8 Janeiru 1993, besik tinan hitu liutiha husi tempu neʼebé prezidente bandu Testemuña ba Jeová, ikusmai Tribunál Aas Liu Hotu fó sai desizaun katak governu nia desizaun atu bandu Testemuña ba Jeová mak kontra lei, no Testemuña ba Jeová hetan fali liberdade. Hanoin toʼok, juís sira tau sira-nia moris iha perigu laran atu foti desizaun katak prezidente nia desizaun mak la loos! Irmaun Holmes dehan: “Durante prosesu julgamentu, ami bele haree oinsá mak Jeová troka buat hotu.” (Daniel 2:21) Tanba manán iha kazu neʼe, neʼe hametin irmaun-irmán sira-nia fiar. Sira sente duni katak Liurai Jesus mak dirije ninia povu atu hatene bainhira no oinsá mak sira sei halo desizaun.

³² Tanba governu la bandu tan Testemuña ba Jeová, sukursál hetan lisensa atu simu misionáriu sira, harii edifísiu foun, no importa publikasaun sira husi rai liʼur. * Jeová nia povu iha mundu tomak kontente tebetebes haree oinsá Jeová proteje ninia povu iha dalan espirituál!​—Isaias 52:10.

33. Saida mak ita aprende husi istória kona-ba kazu sira-neʼe?

³³ Istória sira hanesan neʼe halo ita fiar metin katak Jesus kumpre ninia promesa neʼebé dehan: “Haʼu sei fó imi liafuan no matenek neʼebé halo imi-nia inimigu sira hotu labele koʼalia buat ida atu hatán.” (Lee Lucas 21:12-15.) Dala ruma, Jeová uza ema balu neʼebé hatudu hahalok hanesan Gamaliel atu proteje ninia povu ka book juís no advogadu sira atu hatudu justisa ho aten-brani. Jeová harahun kontradór sira-nia armas. (Lee Isaias 54:17.) Susar naran deʼit labele hapara Maromak nia serbisu.

34. Tanbasá mak kazu sira neʼebé ita manán iha tribunál halo ita admira? Neʼe hatudu saida mai ita? (Haree mós kaixa “ Kazu neʼebé ita manán iha tribunál ajuda serbisu haklaken sai buras liután”.)

³⁴ Oinsá mak vitória sira neʼebé Testemuña ba Jeová hetan mak la hanesan baibain no halo ita admira? Hanoin toʼok kona-ba neʼe: Testemuña ba Jeová laʼós ema neʼebé naran-boot ka iha podér. Ita la tuir votasaun, la apoia kampaña polítiku, no la koko atu fó influénsia ba ulun-naʼin polítiku ruma nia desizaun. Irmaun barak neʼebé hamriik iha tribunál mak ema baibain, no ema haree sira hanesan “ema la eskola”. (Apóstolu 4:13) Entaun, tuir ema nia haree, tribunál sei la hanoin atu apoia ita maibé apoia sira neʼebé kontra ita tanba sira iha podér no pozisaun aas. Maibé dala barak tribunál apoia ita. Kazu sira neʼebé ita manán iha tribunál hatudu katak ita laʼo “hamutuk ho Kristu iha Maromak nia oin”. (2 Korinto 2:17) Tan neʼe, hanesan apóstolu Paulo, ita bele dehan: “Jeová mak haʼu-nia ajuda-naʼin; haʼu sei nunka taʼuk.”​—​Ebreu 13:6.