1. Ita sei koʼalia kona-ba problema rua saida neʼebé estraga daudauk família balu?

 ITA foin fase no halo nabilan Ita-nia karreta neʼebé tuan ona. Karik ema neʼebé liu iha dalan haree karreta neʼe hanesan foun. Maibé, iha okos, iha ferrujen neʼebé estraga daudauk karreta neʼe. Nuneʼe mós, ho família balu, maski husi oin buat hotu haree diʼak, maibé iha uma-laran ema sente taʼuk no laran-moras. Iha kapítulu neʼe ita sei koʼalia kona-ba problema rua neʼebé bele estraga família nia dame, neʼe mak hemu tua demais, no halo violénsia.

2. (a) Saida mak Bíblia nia haree kona-ba hemu tua? (b) Lanu-teen katak sá?

² Maski la sala atu hemu tua, maibé Bíblia bandu kona-ba hemu-lanu. (Provérbios 23:20, 21; 1 Korinto 6:9, 10; 1 Timoteo 5:23; Tito 2:2, 3) Kuandu hemu tua demais ema bele sai lanu-teen, ka tua-teen. Entaun saida mak lanu-teen? Lanu-teen la hanesan ho ema neʼebé dala ruma deʼit hemu toʼo lanu. Ema neʼebé lanu-teen susar atu para no la bele kontrola an kona-ba hemu tua. Dala barak ema boot mak iha problema hanesan neʼe. Maibé laʼós ema boot deʼit, buat neʼebé triste liu mak iha mós joven sira neʼebé monu ba toman aat neʼe.

3, 4. Oinsá mak ema neʼebé lanu-teen nia hahalok bele kona nia kaben no oan sira?

³ Horiuluk kedas, Bíblia hatudu katak hemu tua demais bele estraga dame iha família laran. (Deuteronômio  21:18-21) Porezemplu, ema neʼebé lanu-teen, nia hahalok kona família tomak. Nia feen karik sai kole tanba nia sempre hakaʼas an atu hapara nia laʼen hemu tua, ka tahan hasoru laʼen nia hahalok neʼebé sempre troka beibeik. a Karik feen koko atu subar ka soe tua, subar osan, no karik feen mós husu nia laʼen atu para hemu tua se nia hadomi nia família, nia moris, no mós Maromak, maibé dala ruma laʼen sei hemu nafatin. Kuandu feen la konsege hapara laʼen nia toman aat neʼe, nia bele sente estrese no laran-kraik. No nia mós bele sente taʼuk, hirus, sente sala, no sente nia an la iha folin.

⁴ Kuandu aman ka inan mak lanu-teen, ida-neʼe sei kona labarik sira. Sira balu hetan kanek tanba aman ka inan baku sira, no sira seluk fali sai vítima ba hahalok seksuál. Kuandu hasoru problema hanesan neʼe, karik labarik sira fó-sala ba sira-nia an tanba inan-aman mak lanu-teen. No dala ruma ida-neʼe mós halo labarik sira lakon fiar ba ema seluk tanba inan-aman nia hahalok neʼebé troka beibeik. Tanba sira la bele koʼalia nakloke kona-ba buat neʼebé akontese iha uma-laran, sira aprende atu subar deʼit sira-nia sentimentu, no dala ruma ida-neʼe bele estraga sira-nia saúde. (Provérbios 17:22) Labarik hanesan neʼe sai la fiar an ka sente nia an la iha folin, no karik kuandu nia sai ema boot sentimentu hanesan neʼe sei iha nafatin.

5. Oinsá mak ema neʼebé lanu-teen bele livre husi nia toman aat? Tanbasá mak susar atu halo ida-neʼe?

⁵ Matenek-naʼin barak hatete katak difisil ba ema neʼebé lanu-teen atu para hemu tua. Maski nuneʼe, sira barak mós dehan katak ema neʼebé lanu-teen bele livre husi toman aat neʼe se sira halo desizaun atu hadook an husi tua no la hemu tan. (Kompara ho Mateus 18:8.) Maibé, susar ba ema neʼebé lanu-teen atu simu ajuda, tanba  baibain sira nega katak sira la iha problema neʼe. Maski nuneʼe, karik ema iha família laran bele buka dalan atu hadiʼa situasaun aat neʼebé mosu tan ema lanu-teen neʼe nia hahalok. Hodi nuneʼe, karik halo ema neʼebé lanu-teen hatene katak nia loloos iha problema neʼebé nia tenke hadiʼa. Doutór ida neʼebé iha esperiénsia barak atu ajuda ema lanu-teen no sira-nia família hatete: “Haʼu hanoin katak buat neʼebé importante liu mak atu família halaʼo sira-nia moris loron-loron nian iha dalan neʼebé diʼak. Hodi halo nuneʼe, ema lanu-teen sei haree ho klaru liután katak ninia moris la hanesan ho sira seluk iha ninia família.”

6. Iha neʼebé mak família sira bele hetan konsellu neʼebé diʼak liu atu tahan hasoru problema kona-ba lanu-teen?

⁶ Liután neʼe, maski ema ida iha Ita-nia família mak lanu-teen, Bíblia nia konsellu bele ajuda Ita atu halaʼo moris iha dalan neʼebé diʼak. (Isaías 48:17; 2 Timoteo 3:16, 17) Hanoin toʼok matadalan balu neʼebé ajuda tiha ona família barak atu tahan hasoru problema hanesan neʼe.

7. Tanbasá mak ema neʼebé lanu-teen labele fó-sala ba ema seluk kona-ba ninia toman aat neʼe?

⁷ Keta fó-sala ba Ita-nia an. Bíblia hatete: “Ida-ida sei lori nia todan rasik”, no mós “ita ida-ida sei hatán kona-ba nia an ba Maromak.” (Galasia 6:5; Roma 14:12) Karik ema neʼebé lanu-teen koko atu fó-sala ba nia família. Porezemplu, karik nia hatete: “Se imi hatudu respeitu ba haʼu, haʼu sei la hemu.” Se ema seluk apoia ninia hanoin, ida-neʼe hanesan haruka nia atu hemu nafatin. Dala ruma ita bele hasoru situasaun ruma neʼebé la diʼak, ka sai vítima ba ema seluk nia hahalok. Maski nuneʼe, ita ida-idak, no inklui mós ema neʼebé lanu-teen, iha responsabilidade ba ita rasik nia hahalok.—Kompara ho Filipe 2:12.

8. Oinsá mak ita bele ajuda ema neʼebé lanu-teen atu haree rezultadu aat neʼebé mosu tanba hemu?

⁸ Keta hanoin katak Ita tenke proteje ema lanu-teen neʼe husi rezultadu aat neʼebé mosu tanba hemu. Bíblia hatete kona-ba ema neʼebé hirus-teen: “Se ó salva nia, ó mós sei  nafatin halo ida-neʼe fila-fila.” (Provérbios 19:19) Matadalan neʼe mós bele kona ema neʼebé lanu-teen. Husik ema lanu-teen atu sente rezultadu aat neʼebé mosu tanba nia hemu. Porezemplu, se nia halo uma laran foʼer ka runguranga, husik nia rasik mak hamoos ka hadiʼa. Se nia la bele bá serbisu tanba lanu, husik nia mak telefone nia patraun atu fó-hatene.

9, 10. Se Ita-nia família ida mak lanu-teen, tanbasá mak Ita presiza ajuda? Liuliu ba sé mak Ita tenke buka ajuda?

⁹ Simu ajuda husi ema seluk. Provérbios 17:17 hatete: “Belun neʼebé loos sempre hatudu domin, no nia mak maun neʼebé mosu mai iha tempu susar nia laran.” Kuandu ema ida iha Ita-nia família mak lanu-teen, problema barak bele kona Ita. Tan neʼe, Ita presiza duni ajuda. Keta moe atu buka ajuda husi “belun neʼebé loos”. (Provérbios 18:24) Hodi koʼalia ho ema seluk neʼebé komprende Ita-nia problema, ka koʼalia ho ema neʼebé mós hasoru ona situasaun hanesan neʼe, Ita bele hatene kona-ba buat neʼebé diʼak ka la diʼak atu halo. Maibé, Ita tenke uza matenek atu koʼalia deʼit ho ema neʼebé Ita bele fiar, neʼebé sei la dehan sai Ita-nia problema ba ema seluk.—Provérbios 11:13.

¹⁰ Aprende atu fiar katuas kristaun sira. Katuas sira iha kongregasaun kristaun bele ajuda Ita iha dalan neʼebé diʼak tebes. Katuas sira-neʼe hetan ona treinu husi Maromak nia Liafuan no iha esperiénsia kona-ba halo tuir Bíblia nia matadalan. Sira bele sai “hanesan abrigu husi anin no subar-fatin husi udan boot, hanesan bee neʼebé suli iha rai-maran fuik, hanesan fatuk boot nia mahon iha rai neʼebé maran”. (Isaías 32:2) Katuas kristaun laʼós deʼit proteje kongregasaun husi buat ruma neʼebé aat, maibé mós fó ksolok, no tau matan ba ema ida-idak neʼebé iha problema. Tan neʼe diʼak ba Ita atu sempre buka ba sira-nia ajuda.

11, 12. Sé mak bele fó ajuda neʼebé diʼak liu ba família neʼebé iha ema lanu-teen? Oinsá mak família bele simu ajuda neʼe?

¹¹ Liu buat hotu, buka ba Maromak Jeová atu hetan forsa. Bíblia fó-hanoin mai ita katak “Jeová sei besik ba ema neʼebé sente susar iha laran, no salva ema neʼebé  laran-kraik”. (Salmo 34:18) Se Ita sente susar iha laran, ka lakon ona esperansa tanba moris hamutuk ho ema ida neʼebé mak lanu-teen, keta haluha katak “Jeová sei besik” ba Ita. Nia komprende susar hotu neʼebé Ita hasoru iha família laran.—1 Pedro 5:6, 7.

¹² Hodi fiar buat neʼebé Maromak Jeová hatete iha ninia Liafuan, bele ajuda Ita atu la hanoin demais kona-ba susar ruma. (Salmo 130:3, 4; Mateus 6:25-34; 1 Joao 3:19, 20) Hodi estuda Maromak nia Liafuan no moris tuir ninia matadalan sei loke dalan ba Ita atu simu Maromak nia espíritu santu, neʼebé fó “kbiit makaʼas” atubele tahan hasoru susar loron-loron nian.—2 Korinto 4:7. b

13. Problema saida tan mak bele estraga família nia dame?

¹³ Kuandu hemu tua demais, ida-neʼe bele lori problema  ida tan neʼebé estraga família nia dame. Neʼe mak violénsia iha família laran.

14. Violénsia primeiru iha família laran akontese entre sé? Oinsá ho ohin loron?

¹⁴ Bíblia esplika kona-ba violénsia primeiru neʼebé akontese iha ema nia istória, neʼe mak entre maun-alin naʼin-rua, Caim no Abel. (1 Joao 3:12) Husi tempu neʼebá toʼo agora, violénsia iha família laran aumenta ba beibeik. Laʼen baku feen, feen baku laʼen, inan-aman baku oan neʼebé sei kiʼik, no oan neʼebé boot ona mós halo violénsia ba sira-nia inan-aman neʼebé ferik-katuas ona.

15. Violénsia iha família laran halo ema sente oinsá?

¹⁵ Violénsia iha família laran laʼós halo kanek isin deʼit, maibé buat neʼebé aat liu mak halo kanek ema nia laran. Feen ida, neʼebé hetan violénsia husi nia laʼen, hatete: “Haʼu tenke tahan hasoru sente sala no moe. Dala barak, iha dadeer, haʼu lakohi hadeer husi toba-fatin, tanba haʼu hanoin katak haʼu-nia moris hanesan mehi aat deʼit.” Se labarik haree ka hetan violénsia iha família laran, sira mós bele sai ema neʼebé halo violénsia kuandu sai boot no iha família rasik.

16, 17. Saida deʼit mak ezemplu kona-ba halo violénsia hodi uza liafuan? Violénsia hanesan neʼe halo ema sente oinsá?

¹⁶ Violénsia iha família laran mós inklui liafuan neʼebé hakanek ema nia laran. Provérbios 12:18 hatete: “Iha duni ema neʼebé la hanoin uluk no koʼalia hanesan sona ho surik.” Ema bele halo violénsia hodi koʼalia arbiru deʼit neʼebé hanesan “sona ho surik”. Porezemplu sira tolok, hakilar, kritika beibeik, hatún no hamoe, no mós ameasa. Buat sira-neʼe hakanek vítima nia laran, no baibain ema seluk la hatene oinsá vítima sira sente.

¹⁷ Buat neʼebé triste tebes mak kuandu aman ka inan uza liafuan sira neʼebé hakanek labarik nia laran. Porezemplu, hodi kritika beibeik no hatún labarik, ka hatete  katak nia beik-teen no folin la iha. Buat sira-neʼe bele estraga labarik nia fiar an. Loos duni, maski labarik hotu presiza dixiplina, maibé Bíblia haruka aman sira atu “keta halo imi-nia oan sira laran-todan, keta sira lakon esperansa”.—Koloso 3:21.

18. Hakarak atu halo violénsia hahú husi neʼebé? Oinsá mak ema neʼebé halo violénsia bele troka ninia hahalok aat neʼe?

¹⁸ Hakarak atu halo violénsia hahú husi fuan no neon, neʼe katak buat neʼebé ita halo mai husi ita-nia hanoin. (Tiago 1:14, 15) Atu hapara violénsia, ema neʼebé halo violénsia neʼe tenke hadiʼa dalan neʼebé nia hanoin. (Roma 12:2) Nia bele halo ida-neʼe ka lae? Sin, bele. Maromak nia Liafuan iha forsa atu troka ema nia moris. No bele mós “sobu rahun” hanoin aat hotu neʼebé toos hanesan “uma fatuk nian”. (2 Korinto 10:4; Ebreu 4:12) Koñesimentu neʼebé loos husi Bíblia bele ajuda ema atu troka sira-nia hahalok aat hotu, toʼo sira bele husik moris tuan nian no tau fali ema foun.—Efeso 4:22-24; Koloso 3:8-10.

19. Bíblia fó konsellu saida ba laʼen no feen? Oinsá mak sira bele halo tuir konsellu neʼe?

¹⁹ Hanoin neʼebé loos kona-ba Ita-nia kaben. Maromak nia Liafuan hatete: “Mane sira sei hadomi sira-nia kaben hanesan sira hadomi sira rasik nia isin-lolon. Mane neʼebé hadomi nia kaben hadomi nia an rasik.” (Efeso 5:28) Bíblia mós haruka laʼen sira atu “hamtaʼuk feto sira nuʼudar ema kbiit-laek”. (1 Pedro 3:7) Feen tenke “hadomi” no “hamtaʼuk nia laʼen”. (Tito 2:4; Efeso 5:33) Laʼen neʼebé halo violénsia hodi baku, ka uza liafuan neʼebé hakanek ninia feen nia laran, laʼen neʼe bele dehan katak nia fiar Maromak no hamtaʼuk, ka respeitu, nia feen ka lae? No feen neʼebé sempre hakilar, hatún, ka siʼak nia laʼen, feen neʼe bele dehan katak nia hadomi no respeitu nia laʼen ka lae?

20. Sé mak fó ba inan-aman responsabilidade atu tau matan ba oan sira? Tanbasá mak inan-aman labele husu oan sira atu halo buat neʼebé sira la bele halo?

 ²⁰ Hanoin neʼebé loos kona-ba Ita-nia oan. Labarik sira merese no presiza atu simu domin no atensaun husi sira-nia inan-aman. Maromak nia Liafuan dehan katak labarik sira mak hanesan “liman-rohan husi Maromak Jeová” no “prezente ida”. (Salmo 127:3) Inan-aman mak iha responsabilidade iha Maromak Jeová nia oin atu tau matan ba prezente neʼe. Bíblia hatete kona-ba hahalok “labarik nian” no “hahalok beik” neʼebé labarik sira hatudu. (1 Korinto 13:11; Provérbios 22:15) Tan neʼe, inan-aman lalika hakfodak kuandu oan sira hatudu hahalok ruma neʼebé ladún matenek. Labarik sira la hanesan ema boot. Entaun, inan-aman tenke hanoin kona-ba oan sira-nia tinan no matenek, no labele obriga oan atu halo buat neʼebé sira la bele halo.—Haree Gênesis 33:12-14.

21. Ema neʼebé moris tuir Maromak nia hakarak, sei hanoin oinsá kona-ba inan-aman neʼebé ferik-katuas ona?

²¹ Hanoin neʼebé loos kona-ba inan-aman neʼebé ferik-katuas ona. Levítico 19:32 hatete: “Iha ema fuuk mutin nia oin, ó tenke hamriik, no ó tenke hanoin ema neʼebé katuas ona.” Loos, Maromak nia Ukun-Fuan haruka ita atu respeitu no hafolin ema ferik-katuas. Dala ruma susar atu halo nuneʼe kuandu Ita-nia inan-aman neʼebé ferik-katuas ona haruka Ita atu halo buat barak, ka kuandu sira moras, ka la bele book an ka neineik liu atu hanoin. Maibé, Bíblia haruka oan sira atu “selu tusan ba sira-nia aman inan”. (1 Timoteo 5:4) Ida-neʼe katak Ita tenke hatudu nafatin respeitu, no dala ruma Ita mós presiza fó osan atu ajuda sira. Se Ita halo aat ka koʼalia aat Ita-nia inan-aman neʼebé ferik-katuas ona, tuir loloos Ita kontra Bíblia nia hanorin.

22. Atu hapara violénsia iha família laran, hahalok saida mak importante liu? Saida deʼit mak Ita bele halo atu kontrola an?

²² Importante atu kontrola an. Provérbios 29:11 hatete: “Ema beik hasai ninia laran-hirus hotu, maibé ema neʼebé matenek halo nia an kalma toʼo rohan.” Oinsá mak Ita  bele kontrola Ita-nia laran-hirus? Diʼak atu rezolve lalais problema neʼebé mosu, duké sai estrese no hirus nafatin. (Efeso 4:26, 27) Se Ita sente katak Ita la bele ona atu kontrola an, diʼak atu hadook an husi situasaun neʼebé halo Ita sai hirus. Halo orasaun hodi husu Maromak nia espíritu santu atu ajuda Ita kontrola an. (Galasia 5:22, 23) Laʼo halimar ka halo atividade seluk bele ajuda Ita atu kontrola Ita-nia sentimentu. (Provérbios 17:14, 27) Hakaʼas an atu sai ema neʼebé “neineik atu hirus”.—Tiago 1:19.

23. Se ema kristaun ida dala barak sai hirus toʼo la kontrola an, no karik hakanek nia família, no lakohi arrepende an, saida mak bele akontese ba nia?

²³ Tuir Bíblia, Maromak odi hahalok hanesan “hirus malu no istori malu; . . . laran aat malu”. No Bíblia mós hatete katak “sira neʼebé moris hanesan neʼe sei la simu Maromak nia reinu nuʼudar liman-rohan”. (Galasia 5:19-21) Tan neʼe, se ema kristaun ida dala barak sai hirus toʼo la kontrola an, no karik hakanek nia kaben ka oan, no lakohi arrepende an, kongregasaun bele hasai ema neʼe. (Kompara ho 2 Joao 9, 10.) Hodi nuneʼe, kongregasaun sai moos nafatin husi ema neʼebé halo violénsia.—1 Korinto 5:6, 7; Galasia 5:9.

24. (a) Ema kristaun neʼebé hetan violénsia beibeik husi nia kaben bele halo saida? (b) Oinsá mak kolega no katuas iha kongregasaun bele ajuda? Maibé sira labele halo saida?

²⁴ Oinsá kona-ba feen kristaun ida neʼebé hetan violénsia husi nia laʼen, no laʼen halo ida-neʼe beibeik no lakohi troka nia hahalok aat? Feen balu hili atu hela hamutuk nafatin ho sira-nia laʼen. Feen seluk hili atu haketak malu, tanba hanoin katak sira terus demais, ka sira-nia moris, ka sira-nia relasaun ho Maromak iha perigu laran. Iha situasaun hanesan neʼe, feen neʼebé hetan violénsia sei foti desizaun rasik, hodi hanoin nafatin katak desizaun neʼebé nia halo bele kona nia  relasaun ho Maromak Jeová. (1 Korinto 7:10, 11) Maski diʼak se kolega, família ka katuas iha kongregasaun hakarak fó ajuda no fó konsellu, maibé sira labele obriga feen neʼe atu tuir sira-nia hanoin. Tuir loloos, feen neʼe rasik mak tenke halo desizaun.—Roma 14:4; Galasia 6:5.

25. Saida mak Maromak Jeová nia hakarak ba família?

²⁵ Kuandu Maromak Jeová tau Adão no Eva hamutuk nuʼudar kaben-naʼin, nia lakohi atu problema ruma, hanesan lanu-teen, ka violénsia atu estraga família nia  dame. (Efeso 3:14, 15) Maromak nia hakarak mak atu família iha domin no dame, nuneʼe ema ida-idak bele sente seguru no kontente, no bele haburas sira-nia relasaun ho Maromak. Maibé tanba sala tama iha mundu, família hotu hasoru problema oioin.—Kompara ho Eclesiastes 8:9.

26. Ema neʼebé hakaʼas an atu moris tuir Maromak Jeová nia hakarak sei hetan saida iha futuru?

²⁶ Maski nuneʼe, Ita sente kontente tebes tanba Maromak Jeová la troka ninia hakarak ba família sira. Nia promete atu halo mundu foun neʼebé nakonu ho dame, iha neʼebé “ema sei la tanis tan eh laran-susar”. (Apokalipse 21:4) Iha tempu neʼebá, problema kona-ba lanu-teen, violénsia iha uma-laran no problema hotu neʼebé ohin loron estraga família sei la iha tan. Ema sei oin-midar, no sira sei la subar taʼuk no terus. Sira sei “haksolok tanba rai sei nakonu ho dame”.—Salmo 37:11.