Durante fulan-Setembru, ita sei hakaʼas an atu oferese estudu Bíblia ba ema hotu hodi uza broxura Moris Haksolok ba Nafatin. Haklaken-naʼin bele foti pioneiru estra ba oras 30. Oinsá mak ita bele hola parte iha kampaña espesiál neʼe?

• Hasoru dala primeiru: Hatudu pájina 16 husi broxura neʼe hodi book ema atu hakarak hatene liután, no hatudu oinsá atu estuda. Keta haluha ema neʼebé uluk hatudu interese, inklui mós vizita fali. Maski uluk sira lakohi estuda, karik sira sei gosta broxura neʼe no dalan foun atu estuda. Ita labele husik hela broxura iha uma neʼebé uma-naʼin la iha, no labele mós haruka broxura neʼe hamutuk ho karta ba ema neʼebé seidauk hatudu interese. Kongregasaun nia Komisaun Administrasaun bele arranja tan reuniaun grupu haklaken durante fulan neʼe.

• Oportunidade seluk: Se Ita-nia kongregasaun uza karrosa atu haklaken, tau mós broxura Moris Haksolok ba Nafatin. Fó-hatene ba ema neʼebé interese katak ema neʼebé simu broxura neʼe bele mós hetan kursu Bíblia ho gratuitu. Hatudu kedas oinsá atu halaʼo estuda, ka halo arranju atu halo ida-neʼe iha tempu seluk. Koordenadór ba serbisu haklaken sei hili haklaken-naʼin neʼebé iha ona esperiénsia no halo arranju hodi vizita loja no kompañia sira atu oferese estudu Bíblia. Ita mós bele oferese estudu Bíblia ba maluk serbisu no ema neʼebé ita hasoru kuandu haklaken la formál.

Jesus haruka ita atu ‘hanorin ema sai ninia dixípulu’. (Mt 28:19, 20) Hein katak kampaña espesiál ho broxura Moris Haksolok ba Nafatin sei ajuda ita kumpre objetivu neʼe.