Salmo 9:1-20
Ba dirijente: Ho melodia Mut-laben.* David nia knananuk.
א [Alef]
9 Oh Jeová, haʼu sei hahiʼi Ita ho haʼu-nia laran tomak;Haʼu sei konta kona-ba buat furak hotu neʼebé Ita halo.+
2 Haʼu sei haksolok no kontente tanba Ita;Haʼu sei kanta knananuk hahiʼi nian* ba Ita-nia naran, oh Maromak neʼebé Aas Liu Hotu.+
ב [Bet]
3 Bainhira haʼu-nia inimigu sira hakiduk,+Sira sei sidi no lakon mohu iha Ita-nia oin.
4 Tanba Ita defende haʼu-nia direitu no haʼu-nia kazu;Ita tuur iha Ita-nia kadunan no tesi-lia ho loloos.+
ג [Gimel]
5 Ita korrije ona nasaun sira+ no halakon ona ema aat,No halakon tiha sira-nia naran tinan ba tinan ba nafatin.
6 Inimigu lakon ona ba nafatin;Ita fokit sai ona sira-nia sidade sira,No ema sei la hanoin-hetan tan kona-ba sira.+
ה [Hei]
7 Maibé Jeová sei ukun ba nafatin;+Nia hametin ona ninia kadunan hodi halaʼo justisa.+
8 Nia sei tesi-lia ho loloos ba ema hotu iha rai;+Nia sei halo desizaun* neʼebé loos ba nasaun sira.+
ו [Vau]
9 Jeová sei sai hanesan fatin protesaun neʼebé seguru* ba sira neʼebé ema hanehan,+Fatin protesaun neʼebé seguru iha tempu susar.+
10 Sira neʼebé hatene Ita-nia naran sei tau fiar ba Ita;+Oh Jeová, Ita sei nunka husik hela sira neʼebé buka Ita.+
ז [Zain]
11 Kanta knananuk hahiʼi nian ba Jeová neʼebé hela iha Siaun;Fó sai ninia hahalok sira iha povu nia leet.+
12 Nia sei hanoin-hetan sira neʼebé hetan terus no selu fali ba ema neʼebé oho sira;*+Nia sei la haluha sira-nia lian halerik.+
ח [Hetes]
13 Oh Jeová, hatudu laran-sadiʼa mai haʼu; haree terus neʼebé haʼu hetan husi sira neʼebé odi haʼu,Ita mak dada sai haʼu husi portaun mate nian,+
14 Atu nuneʼe haʼu bele fó sai Ita-nia hahalok diʼak sira iha sidade Siaun* nia portaun sira,+No haksolok tanba Ita salva haʼu.+
ט [Tet]
15 Nasaun sira mout ona iha rai-kuak neʼebé sira keʼe;Sira-nia ain kaʼit metin ona iha rede neʼebé sira subar nuʼudar lasu.+
16 Ema hatene Jeová liuhusi tesi-lia neʼebé nia halaʼo ona.+
Ema aat nia hahalok aat rasik mak lasu sira.+
Higaion.* (Sela)
י [Iod]
17 Ema aat sei fila ba rate,*No nasaun hotu neʼebé haluha Maromak sei tama bá neʼebá.
18 Maibé Maromak sei la haluha ema kiak;+No ema laran-maus nia esperansa sei la sai saugati deʼit.+
כ [Kaf]
19 Oh Jeová, hamriik bá! Keta husik ema mak manán Ita.
Favór ida, tesi-lia ba nasaun sira.+
20 Oh Jeová, halo nasaun sira taʼuk,+Halo sira hatene katak sira mak ema deʼit. (Sela)
Nota-rodapé
^ Ka “halo múzika”.
^ Ka “halo desizaun legál”.
^ Ka “fatin aas”.
^ Ka “fakar sira-nia raan”.
^ Orj., “iha Siaun nia oan-feto”.
^ Haree “Siol” iha Glosáriu.
