Salmo 69:1-36
Ba dirijente: Tuir melodia Líriu. David nia knananuk.
69 Oh Maromak, salva haʼu, tanba bee besik atu halakon haʼu-nia moris.*+
2 Haʼu mout ona iha tahu laran neʼebé naruk, iha neʼebá la iha rai neʼebé toos.+
Haʼu tama ona ba bee kleʼan,No bee neʼebé suli makaʼas lori lakon ona haʼu.+
3 Haʼu sai kole ona tanba haʼu hakilar;+Haʼu-nia garganta sai moras.
Haʼu-nia matan sai kole tanba haʼu hein ba haʼu-nia Maromak.+
4 Sira neʼebé odi haʼu la ho razaun+Sai barak liu fali fuuk-lahan iha haʼu-nia ulun.
Sira neʼebé atu oho haʼu,Haʼu-nia inimigu neʼebé laran-makerek* sai barak liu.
Sira obriga haʼu atu entrega buat neʼebé haʼu la naʼok.
5 Oh Maromak, Ita hatene haʼu-nia hahalok beik sira,No haʼu-nia sala labele subar husi Ita.
6 Oh Jeová neʼebé ukun tropa lalehan nian, Naʼi Ukun-Naʼin Boot Liu,Haʼu hein katak sira neʼebé tau esperansa ba Ita la hetan moe tanba haʼu.
Oh Izraél nia Maromak,Haʼu hein katak sira neʼebé buka Ita la hetan moe tanba haʼu.
7 Ema hamoe haʼu tanba Ita;+Moe taka haʼu-nia oin.+
8 Haʼu-nia maun-alin sira haree haʼu hanesan ema oin-foun,Haʼu-nia inan nia oan-mane sira haree haʼu hanesan ema estranjeiru.+
9 Laran-manas ba Ita-nia uma han mohu ona haʼu,+No buat neʼebé ema halo atu hamoe Ita monu ona ba haʼu-nia leten.+
10 Bainhira haʼu haraik an hodi halo jejún,*Ema hamoe haʼu tanba ida-neʼe.
11 Bainhira haʼu hatais hena karón,*Sira goza no hatún haʼu.*
12 Sira neʼebé tuur iha sidade nia portaun koʼalia deʼit kona-ba haʼu,No lanu-teen sira kanta knananuk kona-ba haʼu.
13 Maibé oh Jeová, haʼu sei harohan ba ItaIha tempu neʼebé diʼak ba Ita.+
Oh Maromak, tanba Ita nakonu ho domin neʼebé laran-metin,Hatán mai haʼu no hatudu katak Ita mak salvadór neʼebé loos.+
14 Salva haʼu husi tahu laran;Keta husik haʼu mout.
Salva haʼu husi sira neʼebé odi haʼuNo husi bee neʼebé kleʼan.+
15 Keta husik bee neʼebé suli makaʼas lori lakon haʼu,+Keta husik bee kleʼan halo haʼu mout,Keta husik bee-posu* taka nia ibun iha haʼu-nia leten.+
16 Oh Jeová, favór ida, hatán haʼu, tanba Ita-nia domin neʼebé laran-metin mak diʼak.+
Hateke mai haʼu hodi hatudu Ita-nia laran-sadiʼa neʼebé boot,+
17 No keta subar Ita-nia oin husi Ita-nia atan.+
Hatán lalais haʼu, tanba haʼu iha terus laran.+
18 Mai besik haʼu no salva haʼu;Salva* haʼu husi haʼu-nia inimigu sira.
19 Ita hatene katak ema hatún haʼu, hakribi haʼu no hamoe haʼu.+
Ita haree haʼu-nia inimigu sira hotu.
20 Haʼu sai laran-kanek tanba ema hamoe haʼu, no kanek neʼe labele kura.*
Haʼu hein katak ema ruma sei hanoin haʼu, maibé la iha ema ida,+No haʼu buka ema atu fó kmaan mai haʼu, maibé haʼu la hetan.+
21 Maibé sira fó venenu* ba haʼu nuʼudar ai-han,+No sira fó tua-siin ba haʼu atu hemu bainhira haʼu hamrook.+
22 Favór ida, halo sira-nia meza rasik sai hanesan lasu ida ba sira,No sira-nia rikusoin sai hanesan rede ida.+
23 Halo sira-nia matan sai nakukun atu sira labele haree,No halo sira-nia ain* nakdedar beibeik.
24 Fakar sai Ita-nia laran-nakali ba sira,No halo Ita-nia hirus neʼebé lakan kaer toman sira.+
25 Halo sira-nia tropa nia hela-fatin sai mamuk;No keta husik ema ida atu hela iha sira-nia tenda laran.+
26 Tanba sira duni tuir ema neʼebé Ita baku,No sira kontinua konta kona-ba terus husi ema sira neʼebé Ita hakanek ona.
27 Favór ida, halo sira lori todan ba sira-nia sala,No keta haree sira nuʼudar ema laran-loos.
28 Hamoos tiha sira-nia naran husi livru moris nian,+No keta hakerek sira-nia naran iha livru neʼe hamutuk ho ema laran-loos sira.+
29 Maibé kona-ba haʼu, haʼu hetan terus no sente moras.+
Oh Maromak, salva no proteje haʼu.
30 Haʼu sei kanta knananuk hahiʼi nian ba Maromak nia naran,No haʼu sei fó glória ba nia hodi hatoʼo agradese.
31 Ida-neʼe sei halo kontente Jeová liu fali fó karau-aman,No liu fali fó karau-aman* neʼebé boot ona.+
32 Ema laran-maus sei haree ida-neʼe no haksolok.
Haʼu hein katak imi neʼebé buka Maromak, imi-nia laran sei hetan fali kbiit.
33 Tanba Jeová rona ba ema kiak,+No nia sei la hakribi ninia povu neʼebé sai ona dadur.+
34 Lalehan no rai, hahiʼi nia bá,+Tasi no buat hotu neʼebé book an iha tasi laran, hahiʼi nia bá.
35 Tanba Maromak sei salva Siaun+No harii fali Judá nia sidade sira,No ninia povu sei hela iha neʼebá no rai neʼe sei sai sira-nian.
36 Ninia atan sira-nia bei-oan sei simu rai neʼe nuʼudar liman-rohan,+No sira neʼebé hadomi ninia naran+ sei hela iha rai neʼe.
Nota-rodapé
^ Haree “Nefes” iha Glosáriu.
^ Ka “Sira neʼebé sai haʼu-nia inimigu maski la iha razaun”.
^ Ka karik “Bainhira haʼu tanis no halo jejún”.
^ Haree “Hena karón” iha Glosáriu.
^ Orj., “Haʼu sai lia-dadolin ba sira”.
^ Ka “rai-kuak”.
^ Orj., “Sosa fali”.
^ Ka “no haʼu sente la iha tan esperansa”.
^ Ka “ai-horis neʼebé iha venenu”.
^ Orj., “kidan”.
^ Ka “karau neʼebé iha dikur no ain-kukun sakat ba rua”.
