Jonas 1:1-17
1 Jeová fó sai liafuan ba Amitai nia oan-mane Jonas,*+ hodi dehan:
2 “Hamriik, bá sidade boot Nínive+ no fó sai ba sira katak sidade neʼe sei rahun tanba haʼu haree ona sira-nia hahalok aat.”
3 Maibé Jonas hamriik no halai husi Jeová hodi bá Tarsis. Nia tun ba Jope no hetan ró neʼebé atu bá Tarsis. Nuneʼe nia selu no saʼe ró neʼe atu bá Tarsis hamutuk ho sira, hodi halai husi Jeová.
4 Tuirmai Jeová halo anin boot mosu iha tasi no anin neʼe huu makaʼas tebes toʼo ró besik atu rahun.
5 Tanba serbisu-naʼin sira iha ró sai taʼuk tebes, sira komesa bolu sira ida-idak nia maromak atu husu ajuda. Sira hahú soe sasán sira iha ró neʼe ba tasi hodi halo ró neʼe sai kmaan.+ Maibé Jonas tama ona ba ró laran no nia toba-dukur loos.
6 Nuneʼe kapitaun ba ró neʼe hakbesik ba Jonas no hatete: “Tanbasá mak ó toba-dukur hela? Hadeer bá, bolu ó-nia maromak! Karik Maromak loos sei hanoin ita no ita sei la mate.”+
7 Tuirmai sira hatete ba malu: “Mai ita dada sorteiu*+ hodi hatene sé mak lori susar neʼe ba ita.” Entaun sira dada sorteiu no neʼe monu ba Jonas.+
8 Nuneʼe sira dehan ba nia: “Favór ida, fó-hatene mai ami, ó mak lori susar neʼe mai ami ka? Ó-nia serbisu saida? Ó mai husi neʼebé? Ó husi rai no suku ida-neʼebé?”
9 Nia hatán: “Haʼu mak ema Ebreu, no haʼu adora* Jeová, Maromak lalehan nian, neʼebé kria tasi no rai maran.”
10 Ho ida-neʼe, mane sira-neʼe sai taʼuk liután tanba Jonas fó-hatene sira katak nia halai husi Jeová. Sira husu ba nia: “Tanbasá mak ó halo nuneʼe?”
11 Tasi kontinua sai boot no siʼak liután, tan neʼe sira husu ba nia: “Saida mak ami tenke halo ba ó hodi tasi bele sai hakmatek fali?”
12 Nia hatán: “Foti haʼu no soe haʼu ba tasi, no tasi sei sai hakmatek fali. Haʼu hatene katak anin-fuik neʼe mosu ba imi tanba haʼu.”
13 Mane sira-neʼe hean makaʼas hodi koko lori ró neʼe ba rai maran, maibé sira labele, tanba tasi kontinua sai boot no siʼak liután.
14 Tuirmai sira bolu Jeová ho lian makaʼas, hodi dehan: “Oh Jeová, favór ida, keta husik ami mate tanba mane neʼe! Keta fó-sala ba ami tanba ami oho ema laran-moos neʼe, tanba ida-neʼe tuir Ita-Boot nia hakarak, oh Jeová.”
15 Depois neʼe, sira foti Jonas no soe nia ba tasi laran, no tasi sai hakmatek fali.
16 Ho ida-neʼe, mane sira-neʼe sai taʼuk tebes ba Jeová,+ no sira hasaʼe sakrifísiu ba Jeová no jura atu serbí nia.
17 Jeová haruka ikan boot ida tolan Jonas, nuneʼe Jonas hela iha ikan neʼe nia kabun laran ba loron tolu no kalan tolu.+
