Filipe 1:1-30
1 Paulo no Timóteo, Kristu Jesus nia atan, hakerek ba ema santu* hotu iha Filipe+ neʼebé ida deʼit ho Kristu Jesus, no mós ba katuas* no atan ba kongregasaun* sira:+
2 Haʼu harohan katak ita-nia Aman Maromak no Naʼi Jesus Kristu sei hatudu laran-diʼak neʼebé boot ba imi no haraik dame ba imi.
3 Bainhira haʼu hanoin-hetan imi, haʼu sempre hatoʼo agradese ba haʼu-nia Maromak
4 iha haʼu-nia orasaun kona-ba imi hotu. Haʼu sempre harohan ho haksolok,+
5 tanba buat neʼebé imi halo* atu habelar liafuan diʼak hahú husi loron primeiru toʼo agora.
6 Tanba haʼu fiar metin katak ida neʼebé hahú halo serbisu diʼak iha imi-nia leet, nia mós sei kontinua halo ida-neʼe toʼo kompletu+ iha Kristu Jesus nia loron.+
7 La sala ba haʼu atu hanoin hanesan neʼe kona-ba imi hotu, tanba imi iha haʼu-nia laran. Imi hola parte ho haʼu iha Maromak nia laran-diʼak neʼebé boot hodi apoia haʼu iha dadur laran+ no mós apoia haʼu defende liafuan diʼak tuir lei.+
8 Maromak sai nuʼudar haʼu-nia sasin katak haʼu hanoin tebes imi hotu, haʼu hadomi imi hanesan domin neʼebé Kristu Jesus hatudu.
9 Haʼu husu nafatin iha haʼu-nia orasaun katak imi-nia domin bele sai boot liután+ hamutuk ho koñesimentu neʼebé loos+ no komprende Maromak nia hakarak ho didiʼak,+
10 haʼu mós harohan katak imi bele buka-hatene loloos buat sira neʼebé importante liu,+ atu nuneʼe imi bele laran-moos no la halo ema seluk sidi+ toʼo Kristu nia loron.
11 No haʼu harohan katak liuhusi Jesus Kristu imi bele sai nakonu ho hahalok loos+ hodi fó glória no hahiʼi ba Maromak.
12 Maun-alin sira, haʼu hakarak imi hatene katak tuir loloos haʼu-nia situasaun neʼe loke dalan atu habelar liután liafuan diʼak,
13 tanba Liurai Roma nia guarda* hotu no mós ema seluk hotu+ rona ona katak haʼu sai dadur+ tanba Kristu.
14 Maun-alin barak iha Naʼi mós hetan aten-brani tanba haʼu-nia situasaun nuʼudar dadur, no sira sai aten-brani liután atu koʼalia Maromak nia liafuan la ho taʼuk.
15 Tuir loloos, iha ema balu neʼebé haklaken kona-ba Kristu ho laran-moras no haksesuk malu, maibé ema seluk haklaken ho hanoin neʼebé diʼak.
16 Sira neʼebé haklaken kona-ba Kristu ho hanoin neʼebé diʼak, sira halo neʼe ho domin, tanba sira hatene katak Maromak hili ona haʼu atu defende liafuan diʼak.+
17 Maibé sira neʼebé haklaken ho laran-moras, sira halo neʼe hodi buka atu manán malu, no sira-nia laran la moos, tanba sira hakarak atu hamosu problema ba haʼu iha haʼu-nia situasaun nuʼudar dadur.
18 Neʼe lori rezultadu saida? Maski sira haklaken ho laran-makerek ka laran-moos, maibé ema rona mensajen kona-ba Kristu no haʼu haksolok kona-ba neʼe. Tuir loloos, haʼu sei kontinua haksolok
19 tanba haʼu hatene katak ida-neʼe sei lori salvasaun ba haʼu liuhusi imi-nia harohan+ no liuhusi Maromak nia espíritu neʼebé Jesus Kristu fó hodi apoia haʼu.+
20 Haʼu fiar metin no iha esperansa katak haʼu sei la sai moe kona-ba buat ida. Maibé hodi koʼalia ho aten-brani,* haʼu fó hahiʼi ba Kristu agora, hanesan haʼu sempre halo iha tempu uluk. Haʼu* sei fó hahiʼi ba nia maski haʼu moris ka mate.+
21 Kona-ba haʼu, se haʼu moris, neʼe ba Kristu,+ no se haʼu mate, neʼe lori diʼak ba haʼu.+
22 Se haʼu kontinua moris iha isin neʼe, haʼu-nia serbisu sei lori rezultadu barak tan. Maibé, kona-ba mate ka moris, haʼu la fó sai ida-neʼebé mak haʼu hili.
23 Husi buat rua neʼe haʼu la hatene atu hili ida-neʼebé. Haʼu hakarak atu sai livre no atu hamutuk ho Kristu,+ klaru katak ida-neʼe mak diʼak liu hotu.+
24 Maibé buat neʼebé diʼak liu ba imi mak haʼu kontinua moris iha isin.
25 Tanba haʼu fiar duni ida-neʼe, haʼu hatene katak haʼu sei moris no sei hela ho imi hotu atu imi bele laʼo ba oin no atu imi bele haksolok iha fiar,
26 atu nuneʼe imi-nia ksolok iha Kristu Jesus bele sai barak liután bainhira haʼu hamutuk fali ho imi.
27 Imi tenke hatudu hahalok* tuir liafuan diʼak kona-ba Kristu,+ atu nuneʼe, maski haʼu bá vizita imi hodi haree imi ka haʼu dook husi imi, haʼu bele rona kona-ba imi no hatene katak imi hamriik metin ho neon* ida deʼit, nuʼudar ema* ida deʼit,+ no hatene katak imi hakaʼas an atu apoia malu kona-ba fiar liuhusi liafuan diʼak,
28 no katak imi la taʼuk ba ema neʼebé kontra imi. Tanba buat sira-neʼe mak prova neʼebé hatudu katak sira sei lakon+ no imi sei hetan salvasaun;+ no prova neʼe mak husi Maromak.
29 Tanba imi hetan ona buat espesiál* laʼós deʼit atu tau imi-nia fiar ba Kristu, maibé mós atu terus ba nia.+
30 Tanba susar neʼebé imi hasoru hanesan ho susar neʼebé imi haree haʼu hasoru ona,+ no agora imi rona katak haʼu hasoru daudaun susar neʼe.
Nota-rodapé
^ Ka “katuas neʼebé tau matan no proteje kongregasaun”. Haree “Katuas” iha Glosáriu.
^ Haree “Ema santu” iha Glosáriu.
^ Ka “tanba imi partisipa”.
^ Ka “Guarda Pretoriana”.
^ Ka “koʼalia nakloke”.
^ Orj., “Haʼu-nia isin”.
^ Ka “hatudu hahalok diʼak nuʼudar sidadaun”.
^ Ka “espíritu”. Haree “Pneuma” iha Glosáriu.
^ Haree “Psiké” iha Glosáriu.
^ Ka “hetan ona priviléjiu”.
