Ezequiel 32:1-32
32 Iha loron primeiru fulan-12 tinan 12,* Jeová koʼalia tan ba haʼu, hodi dehan:
2 “Oan-mane husi ema, kanta knananuk triste nian* kona-ba Faraó, liurai Ejitu, no dehan ba nia:‘Ó hanesan leaun-aman neʼebé forte iha nasaun sira-nia leet,Maibé ó sai nonook ona.
Ó hanesan animál boot tasi nian,+ neʼebé book an bá-mai iha ó-nia mota sira.Ó halo bee sai merak ho ó-nia ain no halo mota sira sai foʼer.’
3 Jeová, Naʼi Ukun-Naʼin Boot Liu, dehan nuneʼe:
‘Haʼu sei uza ema-lubun ida husi nasaun barak hodi soe haʼu-nia rede ba ó,No sira sei dada sai ó ho haʼu-nia rede.
4 Haʼu sei husik ó iha rai.Haʼu sei soe ó ba rai-luan.
Haʼu sei halo manu hotu husi lalehan hobur ó,No haʼu sei halo bosu animál fuik hotu iha mundu tomak ho ó-nia isin.+
5 Haʼu sei soe ó-nia isin iha foho letenNo halo nakonu foho-leet sira ho ó-nia isin rohan.+
6 Haʼu sei habokon rai ho ó-nia raan neʼebé suli makaʼas toʼo foho leten,No ó-nia raan sei halo nakonu mota sira.’
7 ‘Bainhira haʼu halakon ó, haʼu sei taka lalehan no halo fitun sira sai nakukun.
Haʼu sei taka loro-matan ho kalohan sira,No fulan mós sei la fó naroman.+
8 Tanba ó mak haʼu sei halo nakukun buat hotu iha lalehan neʼebé fó naroman,No haʼu sei taka ó-nia rai ho nakukun’, Jeová, Naʼi Ukun-Naʼin Boot Liu, mak dehan.
9 ‘Haʼu sei halo ema barak sai neon-susar bainhira haʼu lori ó-nia ema dadur sira ba nasaun oioin,Ba rai sira neʼebé ó la hatene.+
10 Haʼu sei halo ema barak sai hakfodak loos,No sira-nia liurai sei nakdedar ho taʼuk tanba ó bainhira haʼu taa haʼu-nia surik bá-mai iha sira-nia oin.
Iha loron neʼebé ó lakon,Sira ida-idak taʼuk lakon sira-nia moris no kontinua nakdedar.’
11 Tanba Jeová, Naʼi Ukun-Naʼin Boot Liu, dehan nuneʼe:
‘Liurai Babilónia nia surik sei mai ataka ó.+
12 Haʼu sei halo ó-nia ema-lubun mate ho funu-naʼin kbiit boot sira-nia surik.Funu-naʼin sira-neʼe hotu mak husi nasaun neʼebé laran-aat tebes.+
Sira sei halo rai-Ejitu la foti an tan, no ninia ema-lubun sei lakon mohu.+
13 Haʼu sei halakon ninia animál-hakiak hotu besik ninia fatin neʼebé iha bee barak,+No ema nia ain ka animál-hakiak nia ain sei la halo bee sai merak tan.’+
14 Jeová, Naʼi Ukun-Naʼin Boot Liu, dehan: ‘Iha tempu neʼebá haʼu sei hamoos bee iha rai neʼe,No haʼu sei halo ninia mota sira suli hanesan mina.
15 Bainhira haʼu halo rai-Ejitu sai fatin mamuk no fuik, rai neʼebé la iha tan buat ida iha laran,+No bainhira haʼu oho ninia ema hotu,Sira sei hatene duni katak haʼu mak Jeová.+
16 Neʼe mak knananuk triste nian neʼebé ema sei kanta duni.Oan-feto husi nasaun oioin sei kanta knananuk neʼe.
Sira sei kanta kona-ba rai-Ejitu no ninia ema-lubun boot’, Jeová, Naʼi Ukun-Naʼin Boot Liu, mak dehan.”
17 Tuirmai iha loron 15 husi fulan neʼe* iha tinan 12, Jeová koʼalia mai haʼu, hodi dehan:
18 “Oan-mane husi ema, tanis ba ema-lubun boot husi Ejitu no fó sai katak nia* no oan-feto sira husi nasaun forte oioin sei tun ba rai neʼebé iha okos liu, hamutuk ho sira neʼebé tun daudaun ba rate.*
19 “‘Oh Ejitu, ó hanoin ó mak furak liu ka? Tun ba rate, no latan ho ema sira neʼebé la hetan sirkunsizaun!’*
20 “‘Ema Ejitu* sei mate hamutuk ho ema sira neʼebé mate ho surik.+ Haʼu entrega ona nia* ba surik. Dada nia bá hamutuk ho ninia ema-lubun boot.
21 “‘Funu-naʼin sira neʼebé kbiit boot liu sei koʼalia ba Faraó no ninia ajuda-naʼin husi rate* okos. Sira sei mate ho surik no tun duni ba rate no sei latan hanesan ema neʼebé la hetan sirkunsizaun.
22 Asíria iha ona neʼebá hamutuk ho ninia ema-lubun hotu. Sira-nia rate mak haleʼu liurai, sira hotu mate ho surik.+
23 Asíria nia rate sira mak iha rai-kuak* kleʼan, no ninia ema-lubun hotu mak haleʼu ninia rate, sira hotu mate ho surik, tanba uluk sira hamosu taʼuk iha ema moris nia leet.
24 “‘Elam+ iha ona neʼebá hamutuk ho ninia ema-lubun boot neʼebé haleʼu ninia rate. Sira hotu mate ho surik. Sira neʼebé la hetan sirkunsizaun tun ba rai neʼebé iha okos liu, uluk sira hamosu taʼuk iha ema moris nia leet. Agora sira lori sira-nia moe rasik hamutuk ho ema neʼebé tun daudaun ba rate.*
25 Sira halo ona kama ba nia* iha ema mate nia leet, no ba ninia ema-lubun boot neʼebé haleʼu ninia rate sira. Sira hotu la hetan sirkunsizaun, no mate ho surik, tanba uluk sira hamosu taʼuk iha ema moris nia leet. Sira lori sira-nia moe rasik hamutuk ho ema sira neʼebé tun daudaun ba rate.* Sira tau nia hamutuk ho ema mate sira.
26 “‘Povu Mesek no Tubal+ mós iha neʼebá hamutuk ho sira-nia* ema-lubun boot. Sira-nia* rate haleʼu liurai. Sira hotu la hetan sirkunsizaun, no mate ho surik, tanba uluk sira hamosu taʼuk iha ema moris nia leet.
27 Sira sei latan hamutuk ho funu-naʼin kbiit boot sira neʼebé la hetan sirkunsizaun, neʼebé tun ona ba rate* hamutuk ho sira-nia armas funu nian. Ema sei tau surik iha sira-nia ulun okos* no tau sira-nia sala iha sira-nia ruin, tanba uluk funu-naʼin sira-neʼe hamosu taʼuk iha ema moris nia leet.
28 Maibé ó* sei lakon iha ema neʼebé la hetan sirkunsizaun nia leet, no ó sei latan hamutuk ho ema neʼebé mate ho surik.
29 “‘Edom+ mós iha neʼebá hamutuk ho ninia liurai no xefe hotu. Maski sira iha kbiit boot, maibé sira latan hamutuk ho ema neʼebé mate ho surik. Sira mós sei latan hamutuk ho ema neʼebé la hetan sirkunsizaun+ no ho sira neʼebé tun daudaun ba rate.*
30 “‘Ulun-naʼin hotu husi parte norte no ema Sidon hotu+ mós iha neʼebá, sira tun ona ba rate ho moe hamutuk ho ema neʼebé mate ho surik, maski uluk sira hamosu taʼuk tanba sira-nia kbiit boot. Sira la hetan sirkunsizaun no sei latan hamutuk ho ema neʼebé mate ho surik no sei lori sira-nia moe rasik hamutuk ho ema neʼebé tun daudaun ba rate.*
31 “Jeová, Naʼi Ukun-Naʼin Boot Liu, dehan: ‘Faraó sei haree buat hotu neʼe, no nia sei sente kmaan ho buat hotu neʼebé akontese ba ninia ema-lubun boot;+ Faraó no ninia tropa hotu sei mate ho surik.’
32 “Jeová, Naʼi Ukun-Naʼin Boot Liu, dehan: ‘Tanba Faraó hamosu taʼuk iha ema moris nia leet, entaun nia no ninia ema-lubun boot sei latan ho ema neʼebé la hetan sirkunsizaun, ho sira neʼebé mate ho surik.’”
Nota-rodapé
^ Neʼe refere ba Liurai Joaquim, Ezequiel no ema Judeu sira seluk sai dadur ba tinan 12. Haree Eze 1:2.
^ Ka “knananuk lelir nian”.
^ Karik neʼe refere ba fulan-12. Haree ver. 1.
^ Neʼe katak nasaun Ejitu.
^ Ka “rai-kuak”.
^ Neʼe katak nasaun Ejitu.
^ Orj., “Sira”.
^ Haree “Siol” iha Glosáriu.
^ Ka “rate”.
^ Ka “rai-kuak”.
^ Neʼe katak nasaun Elam.
^ Ka “rai-kuak”.
^ Orj., “Ninia”.
^ Orj., “ninia”.
^ Haree “Siol” iha Glosáriu.
^ Karik neʼe refere ba hakoi asuwaʼin sira-neʼe hamutuk ho sira-nia surik hodi hatudu respeitu.
^ Karik neʼe refere ba Faraó ka rai-Ejitu.
^ Ka “rai-kuak”.
^ Ka “rai-kuak”.
