Ezequiel 16:1-63
16 Jeová koʼalia tan mai haʼu, hodi dehan:
2 “Oan-mane husi ema, fó sai ba Jeruzalein kona-ba ninia hahalok aat sira.+
3 Ó tenke dehan: ‘Jeová, Naʼi Ukun-Naʼin Boot Liu, dehan nuneʼe ba Jeruzalein: “Ó-nia beiʼala no ó moris iha ema Kanaan nia rai. Ó-nia aman mak ema Amoreu,+ no ó-nia inan mak ema Hetes.+
4 Iha loron neʼebé ó moris mai, ó-nia husar-talin seidauk koʼa, ema ida seidauk fó-hariis ó, ema seidauk kose masin ba ó no seidauk falun ó ho hena.
5 La iha ema ida mak hanoin ó hodi halo buat sira-neʼe. La iha ema ida mak hatudu laran-sadiʼa ba ó. Maibé, ema soe ó ba rai-luan tanba sira odi ó husi loron neʼebé ó moris mai.
6 “‘“Bainhira haʼu laʼo liu, haʼu haree ó tebe an hela iha raan laran, no kuandu ó latan iha raan laran, haʼu dehan: ‘Nafatin moris bá!’ Sin, haʼu dehan ba ó neʼebé latan iha raan laran: ‘Nafatin moris bá!’
7 Haʼu halo ó sai barak hanesan ai-horis neʼebé moris iha rai-luan. Ó sai boot no aas, no komesa hafurak an ho sasán murak sira neʼebé diʼak liu. Ó-nia susun moris ona, no ó-nia fuuk sai mahar. Maibé ó sei isin-tanan no molik nafatin.”’
8 “Jeová, Naʼi Ukun-Naʼin Boot Liu, dehan: ‘Bainhira haʼu laʼo liu, haʼu haree katak ó-nia idade toʼo ona atu hatudu domin. Entaun haʼu falun haʼu-nia hena* ba ó+ hodi taka ó-nia isin-tanan. Haʼu jura no halo aliansa ho ó. Nuneʼe ó sai haʼu-nian.
9 Liután neʼe, haʼu fó-hariis ó no hamoos ó-nia raan no kose mina ba ó.+
10 Tuirmai haʼu fó-hatais ó ho hena neʼebé borda ho didiʼak no fó sandálias diʼak husi animál kulit* no falun ó ho hena-liñu neʼebé diʼak, no haʼu taka ó ho hena sira neʼebé karun.
11 Haʼu hafurak ó ho sasán murak oioin no tau pulseira iha ó-nia liman no tara korrente iha ó-nia kakorok.
12 Haʼu mós tau brinkus iha ó-nia inus no tilun, no tau koroa furak iha ó-nia ulun.
13 Ó kontinua hafurak ó-nia an ho osan-mean no osan-mutin. Ó-nia roupa sira halo husi hena-liñu neʼebé diʼak, hena neʼebé karun, no hena neʼebé borda ho didiʼak. Ó-nia ai-han mak trigu diʼak, bani-been, no mina. Ó sai bonita tebes+ no haʼu haree katak ó merese ona atu sai liurai-feto.’”*
14 “Jeová, Naʼi Ukun-Naʼin Boot Liu, dehan: ‘Nasaun sira komesa hatene ó-nia naran-boot+ tanba ó-nia bonita neʼebé perfeitu, neʼe tanba haʼu tau haʼu-nia glória ba ó.’”+
15 “‘Maibé ó komesa tau fiar ba ó-nia bonita,+ no ó sai feto-aat* tanba ó-nia naran-boot.+ Ó faʼan an ba* mane hotu neʼebé laʼo liu,+ no ó entrega ó-nia bonita ba sira.
16 Ó foti ó-nia hena balu no enfeita ó-nia fatin aas sira neʼebé ó faʼan ó-nia an bá.+ Tuir loloos, hahalok sira hanesan neʼe labele akontese, no ó labele halo hahalok sira-neʼe.
17 Ó mós foti sasán murak neʼebé uluk haʼu fó ba ó, neʼebé halo husi osan-mean no osan-mutin, no ó uza buat sira-neʼe hodi halo estátua sira hanesan mane no ó faʼan an ba sira.+
18 Ó foti hena neʼebé borda ho didiʼak hodi tau ba estátua sira-neʼe,* no ó uza haʼu-nia mina no insensu hodi hasaʼe sakrifísiu ba sira.+
19 Paun neʼebé haʼu fó ona ba ó atu han, neʼebé halo husi trigu diʼak, mina no bani-been, ó mós hasaʼe neʼe nuʼudar sakrifísiu morin hodi halo sira-nia laran kontente.*+ Neʼe mak buat neʼebé ó halo ona’, Jeová, Naʼi Ukun-Naʼin Boot Liu, mak dehan.”
20 “‘Ó mós foti ó-nia oan-mane no oan-feto sira neʼebé moris ba haʼu,+ no ó hasaʼe sira nuʼudar sakrifísiu ba estátua sira-neʼe.+ Ó-nia hahalok nuʼudar feto-aat seidauk toʼo ka?
21 Ó oho haʼu-nia oan-mane sira, no ó hasaʼe sira nuʼudar sakrifísiu ba estátua sira-neʼe hodi sunu iha ahi.+
22 Bainhira ó halo daudaun ó-nia hahalok aat hotu no hahalok nuʼudar feto-aat, ó la hanoin-hetan tempu neʼebé ó sei kiʼik bainhira ó isin-tanan no molik, no tebe an hela iha raan laran.
23 Susar! Susar sei kona ó tanba ó halo ona sala hotu neʼe’,+ Jeová, Naʼi Ukun-Naʼin Boot Liu, mak dehan.
24 ‘Ó halo foho-oan ida no harii fatin aas atu adora maromak falsu sira iha fatin públiku hotu.
25 Ó halo ó-nia fatin aas sira iha fatin importante iha dalan hotu, no ó halo ona ó-nia bonita sai buat neʼebé haʼu hakribi tanba ó entrega ó-nia an* ba mane hotu neʼebé laʼo liu,+ no ó aumenta liután ó-nia hahalok nuʼudar feto-aat.+
26 Ó faʼan an ba ema Ejitu nia oan-mane sira,+ sira mak ó-nia viziñu neʼebé kaan loos ó,* no ó hakanek haʼu-nia laran ho ó-nia hahalok nuʼudar feto-aat neʼebé barak loos.
27 Haʼu sei lolo liman kontra ó no hamenus ó-nia ai-han.+ Haʼu sei entrega ó ba feto sira neʼebé odi ó, atu nuneʼe sira halo ba ó tuir sira-nia hakarak.+ Feto sira-neʼe mak ema Filístia nia oan-feto sira, neʼebé hakfodak tanba ó-nia hahalok aat.+
28 “‘Tanba ó nunka baruk, entaun ó faʼan an ba ema Asíria nia oan-mane sira,+ maibé bainhira ó faʼan an tiha ba sira, ó la sai baruk.
29 Nuneʼe ó kontinua aumenta tan ó-nia hahalok nuʼudar feto-aat ba ema Kaldeia sira no mós ba negósiu-naʼin sira-nia rai,*+ maibé bainhira ó halo tiha ida-neʼe, ó seidauk sente kontente.’
30 Jeová, Naʼi Ukun-Naʼin Boot Liu, dehan: ‘Ó-nia laran mak aat* tebes.* Bainhira ó halo buat hotu neʼe, ó hatudu an hanesan feto-aat neʼebé la iha moe!+
31 Maibé bainhira ó harii fatin aas atu adora maromak falsu iha fatin importante iha dalan hotu no iha fatin públiku hotu, ó la hanesan feto-aat seluk, tanba ó lakohi simu kolen.
32 Ó mak hanesan feen neʼebé halo sala seksuál* ho mane seluk duké ho ninia laʼen rasik!+
33 Baibain ema fó prezente ba feto-aat hotu,+ maibé ó deʼit mak feto neʼebé fó fali prezente ba mane hotu neʼebé kaan loos ó,+ no ó selu sira atu mai husi fatin oioin hodi halo relasaun ho ó.+
34 Ó la hanesan ho feto sira seluk neʼebé sai feto-aat. La iha feto-aat neʼebé hatudu hahalok hanesan ó! Ó mak selu ema, no sira la selu ó. Ó-nia hahalok la hanesan feto-aat sira seluk.’
35 “Tan neʼe, oh feto-aat,+ rona ba Jeová nia liafuan.
36 Jeová, Naʼi Ukun-Naʼin Boot Liu, dehan nuneʼe: ‘Tanba ó kaan loos ó-nia doben sira, no hatudu ó-nia isin-tanan ba sira durante tempu neʼebé ó faʼan an ba sira no mós ba estátua hotu neʼebé aat no haʼu hakribi,*+ no ó mós hasaʼe tan ó-nia oan-mane sira-nia raan nuʼudar sakrifísiu ba estátua sira-neʼe,+
37 entaun haʼu sei halibur ó-nia doben hotu neʼebé ó fó ksolok, no halibur ema hotu neʼebé ó hadomi no mós ema neʼebé ó odi. Haʼu sei halibur sira hamutuk husi fatin hotu atu ataka ó no hatudu sai ó-nia isin-tanan hodi sira haree ó-nia isin-molik.+
38 “‘Haʼu sei fó kastigu ba ó hanesan kastigu neʼebé merese ba feen neʼebé halo sala seksuál ho mane seluk*+ no feto neʼebé oho ema,+ no haʼu sei oho ó ho hirus no laran-moras.+
39 Haʼu sei entrega ó ba sira-nia liman, no sira sei estraga foho-oan neʼebé ó halo no estraga ó-nia fatin aas atu adora maromak falsu, no harahun ó-nia fatin aas sira;+ sira sei kolu ó-nia roupa+ no hasai tiha ó-nia sasán murak sira+ no husik ó isin-tanan no molik.
40 Sira sei lori ema-lubun atu kontra ó,+ sira sei tuda ó,+ no sira sei oho ó ho sira-nia surik.+
41 Sira sei sunu ó-nia uma sira,+ no kumpre haʼu-nia desizaun ba ó iha feto barak nia oin. Haʼu sei hapara ó-nia hahalok nuʼudar feto-aat,+ no ó sei la selu tan ema.
42 Depois neʼe, haʼu sei la hirus tan,+ no haʼu sei la laran-nakali tan ba ó.+ Haʼu sei sai kalma no la sente laran-moras tan.’
43 “Jeová, Naʼi Ukun-Naʼin Boot Liu, dehan: ‘Tanba ó la hanoin-hetan tempu neʼebé ó sei joven+ no ó halo haʼu sai hirus ho ó-nia hahalok sira-neʼe hotu, entaun haʼu sei halo ó lori todan ba ó-nia sala rasik, no ó sei la halo tan ó-nia hahalok aat no hahalok neʼebé haʼu hakribi.
44 “‘Ema hotu neʼebé uza lia-dadolin, sira sei temi lia-dadolin kona-ba ó, hodi dehan: “Inan no oan-feto hanesan deʼit!”+
45 Ó hanesan deʼit ho ó-nia inan neʼebé hakribi ninia laʼen no ninia oan sira. Ó hanesan deʼit ho ó-nia biin no alin neʼebé hakribi sira-nia laʼen no sira-nia oan. Ó-nia inan mak ema Hetes, no ó-nia aman mak ema Amoreu.’”+
46 “‘Ó-nia biin mak Samaria,+ neʼebé hela ho ninia oan-feto* sira iha ó-nia sorin parte norte,*+ no ó-nia alin mak Sodoma,+ neʼebé hela ho ninia oan-feto sira iha ó-nia sorin parte súl.*+
47 Ó laʼo tuir sira-nia dalan no halo tuir sira-nia hahalok aat sira, liután neʼe, iha tempu badak deʼit ó halo aat liu fali buat neʼebé sira halo.’+
48 Jeová, Naʼi Ukun-Naʼin Boot Liu, dehan: ‘Haʼu jura hodi haʼu-nia moris rasik katak ó-nia alin Sodoma no ninia oan-feto sira la halo hahalok neʼebé ó no ó-nia oan-feto sira halo.
49 Ó-nia alin Sodoma nia sala mak tuirmai neʼe: Nia no ninia oan-feto sira+ halo an,+ sira iha ai-han barak+ no moris hakmatek hodi la hanoin barak,+ maibé sira la ajuda ema neʼebé hetan terus no kiak.+
50 Sira kontinua loko an+ no halo hahalok aat sira iha haʼu-nia oin,+ tan neʼe mak ikusmai haʼu halakon tiha sira.+
51 “‘Nuneʼe mós ho Samaria,+ ninia sala la barak hanesan ó-nian. Ó kontinua aumenta tan ó-nia hahalok aat liu fali sira, toʼo ó-nia biin no alin haree hanesan ema loos liu fali tanba ó-nia hahalok aat hotu.+
52 Agora ó tenke hetan moe tanba ó apoia ó-nia biin no alin nia hahalok.* Tanba ó-nia sala mak aat liu fali sira-nian, entaun sira mak ema loos liu fali ó. Tan neʼe agora, sai moe bá no tahan ó-nia moe tanba ó halo sira sai ema loos liu fali ó.’
53 “‘Haʼu sei halibur fali Sodoma no ninia oan-feto sira neʼebé sai dadur, no Samaria no ninia oan-feto sira neʼebé sai dadur. No hamutuk ho sira, haʼu mós sei halibur fali ó-nia ema dadur sira,+
54 atu nuneʼe ó bele tahan ó-nia moe. Ó sei sente moe tanba buat neʼebé ó halo ona atu fó kmaan ba sira.
55 Ó-nia alin Sodoma ho ninia oan-feto sira sei fila fali ba sira-nia moris uluk nian, no ó-nia biin Samaria ho ninia oan-feto sira sei fila fali ba sira-nia moris uluk nian, no ó ho ó-nia oan-feto sira sei fila fali ba ó-nia moris uluk nian.+
56 Ó la temi kona-ba ó-nia alin Sodoma iha loron neʼebé ó sai foti an.
57 Iha tempu neʼebá, haʼu seidauk hatudu sai ó-nia hahalok aat rasik.+ Agora Síria nia oan-feto no ninia viziñu sira hamoe ó, no Filístia+ nia oan-feto sira, katak sira hotu neʼebé haleʼu ó, fakar sai liafuan goza ba ó.
58 Ó sei lori todan ba ó-nia hahalok aat no hahalok neʼebé haʼu hakribi’, Jeová mak dehan.”
59 “Jeová, Naʼi Ukun-Naʼin Boot Liu, dehan nuneʼe: ‘Haʼu sei halo ba ó tuir buat neʼebé ó halo ona,+ tanba ó hakribi ó-nia juramentu hodi kontra haʼu-nia aliansa.+
60 Maibé haʼu rasik sei hanoin-hetan aliansa neʼebé haʼu halo ho ó iha tempu neʼebé ó sei joven, no haʼu sei halo aliansa neʼebé metin ho ó.+
61 Ó sei hanoin-hetan ó-nia hahalok no sente moe+ bainhira ó simu ó-nia biin no alin, sira neʼebé boot liu ó no sira neʼebé kiʼik liu ó, no haʼu sei entrega sira ba ó nuʼudar ó-nia oan-feto, maibé neʼe laʼós tanba aliansa ho ó.’
62 “‘Haʼu rasik sei halo aliansa ho ó, no ó sei hatene duni katak haʼu mak Jeová.
63 Tuirmai bainhira haʼu hamoos tiha ó-nia sala hotu neʼebé ó halo ona,+ ó sei hanoin-hetan neʼe no sente moe loos toʼo labele loke ibun tanba ó-nia moe neʼe’,+ Jeová, Naʼi Ukun-Naʼin Boot Liu, mak dehan.”
Nota-rodapé
^ Ka “saia”.
^ Ka “asu-tasi nia kulit”.
^ Ka “merese ona atu serbisu iha liurai nia palásiu”.
^ Ka “prostituta”.
^ Ka “Ó halo prostituisaun ho”.
^ Neʼe katak estátua sira neʼebé modelu hanesan mane.
^ Ka “sente kmaan”.
^ Orj., “ó lees kelen”.
^ Orj., “viziñu neʼebé oin-lulik boot”.
^ Orj., “rai-Kanaan”.
^ Ka “moras; fraku”.
^ Ka karik “Haʼu laran-nakali tebes hasoru ó”.
^ Ka “halo adultériu”. Haree “Adultériu” iha Glosáriu.
^ Ka “ba ídolu hotu neʼebé aat no foʼer tebes”. Liafuan Ebraiku neʼe karik mai husi liafuan “teen”. Liafuan neʼe uza atu hatudu hakribi.
^ Ka “halo adultériu”. Haree “Adultériu” iha Glosáriu.
^ Orj., “iha ó-nia sorin karuk”.
^ Orj., “iha ó-nia sorin loos”.
^ Karik neʼe refere ba sidade kiʼik besik Samaria.
^ Ka “ó dehan katak ó-nia biin no alin nia hahalok mak diʼak”.
