Ezequiel 1:1-28
1 Iha loron lima fulan-haat tinan 30,* bainhira haʼu iha ema dadur* sira-nia leet+ besik Mota Kebar,+ lalehan nakloke no haʼu komesa haree vizaun sira husi Maromak.
2 Iha loron lima husi fulan neʼe, katak iha tinan lima neʼebé Liurai Joaquim+ sai dadur,
3 Jeová fó sai ninia liafuan ba Ezequiel* besik Mota Kebar iha ema Kaldeia nia rai.+ Iha neʼebá mak Jeová fó ninia forsa*+ ba amlulik Buzi nia oan-mane Ezequiel.
4 Bainhira haʼu hateke daudaun, haʼu haree anin-fuik huu+ husi parte norte, no iha kalohan boot ida no iha mós rai-lakan*+ neʼebé naroman mak haleʼu. Iha ahi neʼe nia klaran, haʼu haree buat ida neʼebé nabilan hanesan besi.*+
5 Iha ahi neʼe nia laran haʼu haree kriatura moris naʼin-haat,+ no sira-nia isin haree hanesan ema nian.
6 Sira ida-idak iha oin haat no liras haat.+
7 Sira-nia ain loos deʼit, no sira-nia ain okos mak hanesan karau-oan nia ain, no sira-nia ain nabilan loos hanesan riti neʼebé halo nabilan ona.+
8 Haʼu haree liman hanesan ema nian iha sira-nia liras haat ida-idak nia okos, no kriatura naʼin-haat neʼe iha oin no liras sira.
9 Sira-nia liras kona malu. Bainhira sira bá, sira la presiza fila ba sorin. Sira ida-idak bá loos deʼit oin.+
10 Sira naʼin-haat nia oin+ mak hanesan tuirmai neʼe: Sira ida-idak iha oin hanesan ema nian, no iha sorin loos iha oin hanesan leaun nian,+ iha sorin karuk iha oin hanesan karau nian,+ no sira ida-idak mós iha oin hanesan manu-makikit nian.+
11 Neʼe mak sira-nia oin. Sira ida-idak nia liras rua loke saʼe ba leten, no liras rua neʼe kona malu. Sira mós iha liras rua seluk neʼebé falun sira-nia isin.+
12 Sira ida-idak bá loos deʼit oin, ba fatin naran deʼit neʼebé espíritu hakarak sira atu bá.+ Bainhira sira bá, sira la presiza fila ba sorin.
13 Kriatura moris sira-neʼe nia isin mak hanesan ahi-klaak lakan, no buat ruma neʼebé haree hanesan ahi-oan sira neʼebé nabilan mak semo bá-mai entre kriatura sira-neʼe, no rai-lakan sai husi ahi-oan sira-neʼe.+
14 Kriatura moris sira-neʼe haree hanesan rai-lakan bainhira sira bá no fila fali.
15 Bainhira haʼu hateke daudaun ba kriatura moris sira-neʼe neʼebé iha oin haat, haʼu haree roda ida iha rai besik kriatura moris ida-idak.+
16 Roda sira-neʼe nabilan hanesan fatuk-krizólitu, no roda haat neʼe haree hanesan deʼit. Roda sira-neʼe nia modelu hanesan roda ida iha roda seluk nia laran.*
17 Bainhira sira muda, sira bele muda ba diresaun naran deʼit husi diresaun haat, maibé la presiza dulas fila ba sorin.
18 Roda sira-neʼe aas tebetebes toʼo halo haʼu hakfodak, no roda haat neʼe nia ninin hotu haleʼu ho matan sira.+
19 Bainhira kriatura moris sira-neʼe muda, roda sira-neʼe mós muda hamutuk ho sira, no bainhira kriatura moris sira hiʼit saʼe tiha husi rai, roda sira-neʼe mós hiʼit saʼe tuir sira.+
20 Sira bá fatin naran deʼit neʼebé espíritu hakarak sira atu bá, sin, fatin naran deʼit neʼebé espíritu bá. Roda sira hiʼit saʼe tiha hamutuk ho kriatura moris sira, tanba espíritu neʼebé book kriatura moris sira-neʼe,* mós iha roda sira-neʼe.
21 Bainhira kriatura sira-neʼe muda, roda sira mós muda; bainhira sira hamriik metin, roda sira mós hamriik metin; no bainhira sira hiʼit saʼe tiha husi rai, roda sira-neʼe mós hiʼit saʼe tiha hamutuk ho sira, tanba espíritu neʼebé book kriatura moris sira-neʼe, mós iha roda sira-neʼe.
22 Iha kriatura moris sira-neʼe nia ulun leten haʼu haree buat ida hanesan palku neʼebé nabilan hanesan jelu.+
23 Iha palku okos, sira-nia liras sira loke loos ba leten,* no kona malu. Sira ida-idak iha liras rua atu falun sira-nia isin sorin ida, no liras rua seluk atu falun sira-nia isin sorin seluk.
24 Bainhira haʼu rona lian husi sira-nia liras, neʼe rona hanesan lian husi bee barak neʼebé suli makaʼas, hanesan Maromak neʼebé Kbiit Boot Liu Hotu nia lian.+ Bainhira sira muda, haʼu rona hanesan tropa sira-nia lian. Bainhira sira hamriik metin, sira hatún sira-nia liras.
25 Sin, bainhira sira hamriik metin, sira hatún sira-nia liras. No haʼu rona lian husi ida neʼebé iha palku leten, katak palku neʼebé iha sira-nia leten.
26 Iha palku leten neʼebé iha sira-nia ulun leten, haʼu haree buat ida neʼebé hanesan fatuk-safira,+ no neʼe hanesan kadunan ida.+ Ida neʼebé tuur iha kadunan neʼe, neʼebé iha leten, haree hanesan ema ida.+
27 Husi ninia knotak ba leten, haʼu haree buat ida hanesan besi neʼebé nabilan+ no hanesan ahi nia naroman; no husi ninia knotak ba kraik, haʼu haree buat ida hanesan ahi.+ Nabilan mak haleʼu nia
28 hanesan arkiris+ neʼebé mosu iha kalohan bainhira udan. Neʼe mak naroman nabilan neʼebé haleʼu nia. Neʼe haree hanesan Jeová nia glória.+ Bainhira haʼu haree ida-neʼe, haʼu hakneʼak hodi hakruʼuk ho oin ba rai no komesa rona lian husi ida neʼebé koʼalia daudaun.
Nota-rodapé
^ Haree “Ezíliu” iha Glosáriu.
^ Karik neʼe refere ba Ezequiel nia tinan.
^ Naran neʼe katak “Maromak hametin”.
^ Orj., “Jeová tau liman”.
^ Neʼe mak osan-mean no osan-mutin neʼebé kahur hamutuk no nabilan.
^ Ka “ahi-lakan”.
^ Karik roda rua neʼe nia medida hanesan no roda ida junta ho ida seluk hodi sai kabuar.
^ Orj., “kriatura moris nia espíritu”. Haree “Ruah” iha Glosáriu.
^ Ka karik “sira-nia liras loke loos ba sorin”.
