Ebreu 4:1-16
4 Neʼe duni, tanba promesa atu tama iha ninia fatin deskansa nian sei iha nafatin, mai ita matan-moris bá* atu ita labele lakon promesa neʼe.+
2 Tanba ita mós simu ona liafuan diʼak hanesan sira,+ maibé liafuan neʼebé sira rona la lori buat diʼak ba sira, tanba sira la sai ida deʼit iha fiar hamutuk ho sira neʼebé rona.
3 Tanba ita hatudu ona fiar, ita tama iha ninia fatin deskansa nian, maibé kona-ba sira neʼebé la halo tuir, nia dehan: “Tan neʼe, ho hirus haʼu jura hodi dehan: ‘Sira sei la tama iha haʼu-nia fatin deskansa nian’”,+ maski ninia serbisu remata ona husi tempu neʼebé mundu hahú.*+
4 Tanba iha eskritura ida nia koʼalia kona-ba loron hitu, hodi dehan: “Iha loron hitu, Maromak deskansa husi ninia serbisu hotu”,+
5 no dala ida tan nia dehan: “Sira sei la tama iha haʼu-nia fatin deskansa nian.”+
6 Tan neʼe, sira neʼebé rona uluk liafuan diʼak la tama ba fatin deskansa neʼe tanba sira la halo tuir. Maibé ema balu sei bele tama iha fatin neʼe.+
7 Tanba razaun neʼe, liutiha tempu naruk nia koʼalia dala ida tan iha David nia salmo, no marka tiha loron ida, hodi dehan “ohin loron”; hanesan temi tiha ona iha leten: “Se ohin loron imi rona ba ninia lian, keta sai ulun-toos.”*+
8 Tanba se Josué+ lori sira tama ona ba Maromak nia fatin deskansa nian, neʼe katak liutiha neʼe Maromak la presiza koʼalia tan kona-ba loron seluk.
9 Neʼe duni, sei iha hela loron deskansa nian ba Maromak nia povu, neʼebé hanesan ho loron Sábadu.+
10 Tanba ema neʼebé tama ona iha Maromak nia fatin deskansa nian, nia mós deskansa ona husi ninia serbisu rasik, hanesan ho Maromak neʼebé deskansa ona husi ninia serbisu.+
11 Tan neʼe, mai ita hakaʼas an atu tama ba fatin deskansa neʼe, atu nuneʼe ita labele tuir ezemplu aat husi sira neʼebé la halo tuir.+
12 Tanba Maromak nia liafuan moris no iha kbiit boot+ no kroʼat liu fali surik ida ho kroʼat iha sorin-sorin,+ no bele sona tama toʼo haketak ema nia moris* husi ema nia laran,* no haketak ruin-fukun husi ruin-dolen,* no bele hatene ema nia hanoin no hakarak iha laran.
13 La iha kriasaun ida neʼebé bele subar husi ninia matan,+ maibé nia bele haree buat hotu ho momoos no buat hotu nakloke iha ninia matan. Ba nia mak ita tenke hatán.+
14 Neʼe duni, tanba ita iha amlulik boot neʼebé aas liu, katak Maromak nia Oan-Mane Jesus,+ no nia tama ona iha lalehan, mai ita fó sai nafatin ita-nia fiar kona-ba nia iha ema nia oin.+
15 Ita iha amlulik boot neʼebé hanoin no komprende ita-nia fraku sira,+ tanba nia hetan ona koko iha buat hotu hanesan ita, maibé nia la iha sala.+
16 Tan neʼe, mai ita hakbesik ba Maromak nia kadunan, Maromak neʼebé hatudu laran-diʼak neʼebé boot no mai ita halo orasaun hodi koʼalia nakloke,+ atu nuneʼe ita bele simu laran-sadiʼa no hetan ajuda iha tempu neʼebé loloos liuhusi Maromak nia laran-diʼak neʼebé boot.
Nota-rodapé
^ Orj., “mai ita taʼuk bá”.
^ Neʼe refere ba tempu neʼebé Adão no Eva nia oan sira moris.
^ Orj., “laran-toos”.
^ Haree “Psiké” iha Glosáriu.
^ Orj., “espíritu”. Haree “Pneuma” iha Glosáriu.
^ Neʼe mak been kantál neʼebé iha ruin laran.
