Provérbios 16:1-33
16 Ema prepara ninia hanoin iha laran,Maibé resposta neʼebé nia fó* mak husi Jeová.+
2 Ema hanoin katak ninia dalan hotu mak loos,*+Maibé Jeová buka-hatene didiʼak ema neʼe nia laran.*+
3 Entrega* buat hotu neʼebé ó halo ba Jeová nia liman,+No ó-nia planu sira sei laʼo ho diʼak.
4 Jeová halo ona buat hotu hodi kumpre ninia hakarak,No nia sei halakon duni ema aat sira iha sira-nia loron susar nian.+
5 Jeová hakribi ema hotu neʼebé foti an iha laran.+
Fiar metin bá katak nia sei fó kastigu duni ba sira.
6 Ema nia sala sei hamoos tiha liuhusi domin boot* no laran-metin,+No ema sei hasees an husi hahalok aat tanba hamtaʼuk Jeová.+
7 Bainhira Jeová kontente ho ema ida nia dalan,Nia sei halo ema neʼe nia inimigu sira mós iha dame ho nia.+
8 Diʼak liu iha rikusoin uitoan deʼit hamutuk ho hahalok loos+Duké manán rikusoin barak hamutuk ho laran-makerek.+
9 Ema ida karik planu ho didiʼak kona-ba buat neʼebé nia sei halo,Maibé Jeová mak dirije ema neʼe nia hakat sira.+
10 Liurai nia ibun tenke fó sai Maromak nia desizaun;+Liurai labele fila kotuk ba justisa.+
11 Dasin neʼebé loos mak husi Jeová;No nia mak halo dasin-fuan hotu neʼebé iha bornál laran.+
12 Liurai sira hakribi tebes hahalok aat,+Tanba liuhusi hahalok loos mak liurai nia kadunan sei hamriik metin.+
13 Liurai sira kontente ho ema neʼebé koʼalia buat neʼebé loos.
Sira hadomi ema neʼebé koʼalia ho laran-moos.+
14 Liurai nia hirus mak hanesan ema neʼebé lori mensajen mate nian,+Maibé ema matenek halo kalma* liurai nia hirus.+
15 Se liurai hatudu oin kontente ba ema ida, ema neʼe sei moris;No liurai nia laran-diʼak neʼe mak hanesan kalohan neʼebé lori udan iha tempu neʼebé loos.*+
16 Hetan matenek mak diʼak liu fali hetan osan-mean!+
Hetan kbiit atu komprende mak diʼak liu fali hetan osan-mutin.+
17 Ema laran-loos hasees an husi hahalok neʼebé aat.
Ema neʼebé kuidadu kona-ba ninia dalan sira sei salva ninia moris.+
18 Foti an sei halo ema monu,No hanoin neʼebé loko an sei halo ema sidi.+
19 Diʼak liu hatudu haraik an iha ema laran-maus nia leet+Duké fahe rikusoin* ba malu hamutuk ho ema neʼebé loko an.
20 Ema neʼebé komprende didiʼak situasaun ruma sei hetan susesu,*No ksolok ba ema neʼebé tau fiar ba Jeová.
21 Ema matenek sei sai naran-boot tanba nia iha kbiit atu komprende,+No ema neʼebé koʼalia ho laran-diʼak* sei halo ema fiar.+
22 Matenek* mak moris nia hun* ba sira neʼebé hetan ida-neʼe,Maibé ema beik hetan korrije liuhusi ninia hahalok beik rasik.
23 Ema matenek nia laran book nia atu koʼalia liafuan neʼebé matenek*+No ninia liafuan sira halo ema fiar.
24 Liafuan neʼebé diʼak mak hanesan bani-been,Midar no fó forsa ba isin.*+
25 Ema ida hanoin katak ninia dalan mak loos,Maibé dalan neʼe nia rohan mak mate.+
26 Tanba hakarak han mak serbisu-naʼin halo serbisu makaʼasNo tanba hamlaha mak obriga nia atu kontinua serbisu.+
27 Ema neʼebé folin-laek keʼe sai buat neʼebé aat;+Ninia liafuan sira mak hanesan ahi neʼebé lakan makaʼas.+
28 Ema neʼebé bukaliadór* hamosu istori malu,+No sira neʼebé koʼalia aat hodi hafoʼer ema seluk nia naran mak haketak belun diʼak sira.+
29 Ema neʼebé gosta violénsia sei dada ninia maluk siraNo lori sira atu laʼo iha dalan neʼebé sala.
30 Nia piska matan bainhira nia halo planu aat.
Nia dulas ibun bainhira nia halaʼo ninia hakarak aat.
31 Fuuk mutin mak hanesan koroa furak*+Ba ema neʼebé nafatin laʼo iha dalan neʼebé loos.+
32 Ema neʼebé la hirus lalais+ mak diʼak liu fali mane ida neʼebé iha forsa boot,No ema neʼebé kontrola nia hirus mak diʼak liu fali ema neʼebé manán sidade ida.+
33 Ema soe fatuk kiʼik balu iha ninia hitin atu dada sorteiu,*+Maibé desizaun hotu neʼebé nia foti hodi dada sorteiu mak mai husi Jeová.+
Nota-rodapé
^ Ka “resposta neʼebé loos”.
^ Orj., “moos”.
^ Haree “Ruah” iha Glosáriu.
^ Orj., “Duir”.
^ Ka “hasees an husi”.
^ Neʼe refere ba udan neʼebé tun maizumenus fulan-Abríl atu halo trigu no sevada iha fulin. Haree Ap. B15.
^ Ka “rikusoin neʼebé hadau ona”.
^ Orj., “diʼak”.
^ Orj., “ibun-midar”.
^ Ka “Kbiit atu komprende didiʼak”.
^ Ka “mak bee-matan moris nian”.
^ Ka “koʼalia ho kbiit atu komprende didiʼak”.
^ Orj., “no kura ruin sira”.
^ Ka “Ema neʼebé halo planu aat”.
^ Ka “glória”.
^ Haree “Dada sorteiu” iha Glosáriu.
