Juís 6:1-40
6 Maibé ema Izraél halo tan buat neʼebé aat tuir Jeová nia haree,+ entaun Jeová entrega sira ba ema Midian nia liman ba tinan hitu.+
2 Ema Midian hanehan ema Izraél.+ Tan neʼe, ema Izraél halo subar-fatin* ba sira-nia an iha foho sira, iha fatuk-kuak, no iha fatin neʼebé susar atu tama.+
3 Se ema Izraél kuda fini, ema Midian, ema Amalec+ no ema husi área Leste+ mai hodi ataka ema Izraél.
4 Sira halo funu hasoru Izraél no estraga ai-han iha Izraél nia rai toʼo Gaza, no sira la husik buat ida ba ema Izraél atu han no la husik bibi-malae, karau ka kuda-burru ida.+
5 Tanba sira mai hamutuk ho sira-nia animál no sira harii tenda barak hanesan gafañotu,+ sira no mós sira-nia kuda-kamelu barak tebes toʼo sura labele,+ no sira mai hodi halakon rai neʼe.
6 Nuneʼe ema Izraél sai kiak tebes tanba ema Midian, no ema Izraél husu ajuda ba Jeová.+
7 Bainhira ema Izraél husu ajuda ba Jeová tanba ema Midian,+
8 Jeová haruka profeta ida ba ema Izraél, no nia dehan: “Neʼe mak buat neʼebé Jeová, Izraél nia Maromak, hatete: ‘Haʼu mak lori imi sai husi rai-Ejitu, no halo imi sai husi uma atan nian.+
9 Nuneʼe haʼu salva imi husi ema Ejitu nia liman no husi ema hotu neʼebé hanehan imi, no haʼu mós duni sai imi-nia inimigu hotu husi imi-nia oin hodi fó sira-nia rai ba imi.+
10 No haʼu hatete ona ba imi: “Haʼu mak Jeová,+ imi-nia Maromak. Imi keta taʼuk ba ema Amoreu nia maromak sira iha sira-nia rai neʼebé imi hela bá.”+ Maibé imi la halo tuir haʼu.’”*+
11 Liutiha tempu balu, Jeová nia anju mai+ no tuur iha ai-hun boot nia okos iha Ofra, no ai-hun neʼe mak Joas ema Abi-Ezer nian.+ Iha tempu neʼebá, ninia oan-mane Gideão+ baku hela trigu iha fatin sama uvas nian hodi bele subar ida-neʼe husi ema Midian.
12 Jeová nia anju mosu ba nia, no dehan: “Ó funu-naʼin neʼebé kbiit boot, Jeová hamutuk ho ó.”+
13 Ho ida-neʼe, Gideão hatete ba nia: “Deskulpa, haʼu-nia naʼi, se Jeová hamutuk ho ami, entaun tanbasá mak buat hotu neʼe akontese ba ami?+ Ninia hahalok kmanek sira neʼebé ami-nia aman sira konta ba ami iha neʼebé?+ Sira dehan: ‘Jeová mak lori ita sai husi Ejitu.’+ Agora Jeová husik ona ami+ no entrega ami ba ema Midian nia liman.”
14 Jeová hateke ba nia no dehan: “Laʼo bá ho kbiit neʼebé ó iha, no ó sei salva Izraél husi ema Midian nia liman.+ Haʼu mak ida neʼebé haruka ó, loos ka lae?”
15 Gideão hatán: “Deskulpa, Jeová. Oinsá mak haʼu bele salva Izraél? Haʼu-nia umakain* mak kiʼik liu iha Manasés, no haʼu mak ema neʼebé la importante liu iha haʼu-nia aman nia umakain.”
16 Maibé Jeová hatete ba nia: “Tanba haʼu sei hamutuk ho ó,+ ó sei oho ema Midian hanesan sira mak ema ida deʼit.”
17 Tuirmai Gideão dehan: “Se haʼu monu loos ba Ita-Boot nia laran, hatudu sinál ida katak Ita mak ida neʼebé koʼalia ho haʼu.
18 Favór ida, keta husik fatin neʼe toʼo haʼu fila fali mai ho haʼu-nia prezente no tau neʼe iha Ita-nia oin.”+ Entaun nia dehan: “Haʼu sei hein iha neʼe toʼo ó fila fali mai.”
19 No Gideão tama ba uma laran no prepara bibi-timur oan ida no halo paun neʼebé la iha fermentu husi trigu uut efa isin ida.*+ Nia tau naʼan iha raga laran no sopa iha sanan-rai; tuirmai Gideão lori buat sira-neʼe ba nia no tau neʼe iha ninia oin iha ai-hun boot nia okos.
20 Depois neʼe, Maromak loos nia anju hatete ba nia: “Foti naʼan neʼe no paun neʼebé la iha fermentu no tau neʼe iha fatuk boot nia leten iha neʼebá, no fakar sai sopa neʼe.” No Gideão halo nuneʼe duni.
21 Tuirmai Jeová nia anju lolo ninia ai-tonka tutun neʼebé iha nia liman no kona naʼan neʼe no paun neʼebé la iha fermentu,+ no ahi lakan sai husi fatuk neʼe no han naʼan no paun neʼe. Depois neʼe, Jeová nia anju lakon kedas husi Gideão nia oin.
22 Nuneʼe Gideão foin hatene katak neʼe mak Jeová nia anju ida.+
Entaun Gideão dehan kedas: “Susar ba haʼu, oh Jeová, Naʼi Ukun-Naʼin Boot Liu, tanba haʼu haree ona Jeová nia anju oin ba oin!”+
23 Maibé Jeová hatete ba nia: “Dame hela ho ó. Keta taʼuk;+ ó sei la mate.”
24 Entaun Gideão harii altár ida ba Jeová iha neʼebá, no toʼo ohin loron ema bolu altár neʼe nuʼudar Jeová-Salom.*+ No altár neʼe sei iha hela Ofra, ema Abi-Ezer nia rai.
25 Iha kalan neʼe, Jeová hatete ba nia: “Foti ó-nia aman nia karau-aman,* karau-aman* segundu neʼebé tinan hitu, no sobu rahun ó-nia aman nia altár Baal nian, no tesi tiha ai-riin lulik* neʼebé iha altár neʼe nia sorin.+
26 Bainhira ó harii ona altár ida ba Jeová, ó-nia Maromak, iha fatin aas neʼe hodi tau fatuk tuituir malu, ó tenke foti karau-aman* segundu neʼe no hasaʼe nuʼudar sakrifísiu sunu nian iha ai leten hodi uza ai-riin lulik* neʼebé ó tesi ona ba pedasuk.”
27 Nuneʼe Gideão lori ninia atan naʼin-sanulu no halo tuir duni buat neʼebé Jeová hatete ba nia. Maski nuneʼe, tanba nia taʼuk ninia aman nia umakain no mane sira iha sidade neʼe, nia la halo ida-neʼe iha loron, maibé iha kalan.
28 Bainhira mane sira iha sidade neʼe hadeer sedu iha dadeer, sira haree katak altár Baal nian rahun tiha ona no ai-riin lulik* neʼebé iha sorin tesi tiha ona no karau-aman* segundu hasaʼe ona iha altár neʼebé foin harii nia leten.
29 Sira husu ba malu: “Sé mak halo ida-neʼe?” Bainhira sira buka-hatene tiha, sira hatete: “Joas nia oan-mane Gideão mak halo ida-neʼe.”
30 Entaun mane sira iha sidade neʼe hatete ba Joas: “Lori ó-nia oan-mane sai mai no nia tenke mate, tanba nia harahun ona altár Baal nian no tesi ona ai-riin lulik* neʼebé iha sorin.”
31 Tuirmai Joas+ hatete ba ema hotu neʼebé husu nia: “Imi mak tenke defende Baal ka? Imi mak tenke salva nia ka? Ema hotu neʼebé defende nia tenke mate ohin dadeer.+ Se Baal mak maromak ida, husik nia defende ninia an+ tanba ema ida harahun ona ninia altár.”
32 Iha loron neʼe, nia hanaran Gideão nuʼudar Jerubaal,* hodi dehan: “Husik Baal defende ninia an tanba ema ida harahun ona ninia altár.”
33 Ema Midian tomak,+ ema Amalec+ no ema husi área Leste halibur hamutuk atu halo funu.+ Sira hakur mota hodi bá Rai-Tetuk Jezreel no halo tropa nia hela-fatin iha neʼebá.
34 Tuirmai Jeová nia espíritu tun ba Gideão+ no nia huu dikur,+ no ema Abi-Ezer+ mai hodi apoia nia.
35 Nia haruka ema lori lia-menon ba Manasés tomak, no sira mós mai hodi apoia nia. Nia mós haruka ema lori lia-menon ba Aser, Zebulão no Naftali, no sira sai mai hodi hasoru nia.
36 Tuirmai Gideão hatete ba Maromak neʼebé loos: “Se Ita-Boot atu salva ema Izraél liuhusi haʼu, hanesan Ita promete ona,+
37 haʼu sei nahe bibi-malae nia fulun iha fatin sama trigu nian. Se mahobeen tun deʼit ba bibi-fulun neʼe, maibé rai tomak neʼebé haleʼu mak maran, entaun haʼu sei hatene katak Ita-Boot sei salva Izraél liuhusi haʼu, hanesan Ita promete ona.”
38 No neʼe mak buat neʼebé akontese duni. Loron tuirmai bainhira nia hadeer iha dadeer-saan, nia dulas bibi-fulun neʼe no mahobeen barak sai husi bibi-fulun toʼo bele halo nakonu manko festa nian ho bee.
39 Maibé, Gideão hatete ba Maromak neʼebé loos: “Keta hirus haʼu, maibé husik haʼu husu dala ida tan. Favór ida, husik haʼu uza bibi-fulun neʼe hodi koko dala ida tan atu haree saida mak sei akontese. Favór ida, husik bibi-fulun neʼe deʼit mak maran no halo mahobeen tun ba rai tomak neʼebé haleʼu ida-neʼe.”
40 No Maromak halo nuneʼe duni iha kalan neʼe. Bibi-fulun neʼe deʼit mak maran, no mahobeen tun ba rai tomak neʼebé haleʼu ida-neʼe.
Nota-rodapé
^ Ka karik “armazén iha rai okos”.
^ Orj., “la rona haʼu-nia lian”.
^ Orj., “Haʼu-nia ema naʼin-1.000”.
^ Naran neʼe katak “Jeová mak dame”.
^ Ka “karau-oan neʼebé aman”.
^ Ka “karau-oan neʼebé aman”.
^ Haree “Ai-riin lulik” iha Glosáriu.
^ Haree “Ai-riin lulik” iha Glosáriu.
^ Ka “karau-oan neʼebé aman”.
^ Haree “Ai-riin lulik” iha Glosáriu.
^ Ka “karau-oan neʼebé aman”.
^ Haree “Ai-riin lulik” iha Glosáriu.
^ Naran neʼe katak “Husik Baal defende ninia kazu rasik”.
