Juís 16:1-31
16 Loron ida Sansão laʼo ba Gaza no haree feto-aat* ida iha neʼebá, no nia tama ba feto neʼe nia uma.
2 Ema fó-hatene ba ema Gaza sira, hodi dehan: “Sansão mai ona iha neʼe.” Entaun sira haleʼu ninia fatin no hein hodi hafuhu nia ba kalan tomak iha sidade nia portaun. Sira hein subasubar deʼit ba kalan tomak, no hanoin: “Bainhira rai-loron ona, ita sei oho nia.”
3 Maibé, Sansão kontinua toba iha neʼebá toʼo kalan-boot. Tuirmai nia hadeer iha kalan-boot no kaer sidade nia portaun no ninia ai-riin rua no fokit sai buat sira-neʼe hamutuk ho ai-lolon neʼebé xave portaun. Nia hulan buat hotu neʼe iha ninia kabaas no lori ba foho-tutun neʼebé hateke ba Hebron.
4 Depois neʼe, Sansão laran-monu ba feto ida besik Mota* Sorek, no ninia naran Dalila.+
5 Entaun, ema Filístia nia naʼi-ulun sira hakbesik ba feto neʼe no dehan: “Lohi nia bá+ no buka-hatene saida mak fó kbiit boot hanesan neʼe ba nia no oinsá mak ami bele sai forte liu nia hodi kesi nia no manán nia. Ami ida-idak sei fó osan-mutin 1.100 ba ó atu halo ida-neʼe.”
6 Liutiha tempu balu, Dalila hatete ba Sansão: “Favór ida, fó-hatene mai haʼu ó-nia kbiit boot neʼe mai husi neʼebé, no saida mak ema bele uza atu kesi ó no kontrola ó.”
7 Sansão hatete ba nia: “Se ema kesi haʼu ho rama nia tali* hitu neʼebé sei bokon no seidauk habai maran, haʼu sei sai fraku hanesan ema baibain.”
8 Entaun ema Filístia nia naʼi-ulun sira lori ba Dalila rama nia tali hitu neʼebé bokon no seidauk habai maran, no Dalila kesi Sansão ho tali sira-neʼe.
9 Sira haruka ema balu subar iha kuartu seluk nia laran atu ataka, no feto neʼe hakilar ba nia dehan: “Sansão, ema Filístia sira iha neʼe ona!” Ho ida-neʼe, nia hakotu rama nia tali neʼe lalais deʼit, hanesan kabas husi duʼut-liñu* kona ahi.+ Nuneʼe ema la hatene segredu ba ninia kbiit.
10 Depois neʼe, Dalila hatete ba Sansão: “Ó lohi ona haʼu* no koʼalia bosok ba haʼu! Agora, favór ida fó-hatene mai haʼu saida mak ema bele uza atu kesi ó.”
11 Sansão hatete ba Dalila: “Se ema kesi haʼu ho tali foun neʼebé seidauk uza hodi halo serbisu ruma, haʼu sei sai fraku hanesan ema baibain.”
12 Entaun bainhira ema subar hela iha kuartu laran hodi hein atu ataka, Dalila foti tali foun no kesi nia ho tali sira-neʼe no hakilar dehan: “Sansão, ema Filístia sira iha neʼe ona!” Ho ida-neʼe, nia hakotu tali sira-neʼe husi nia liman hanesan ema hakotu kabas.+
13 Depois neʼe, Dalila hatete ba Sansão: “Toʼo agora ó lohi haʼu no koʼalia bosok ba haʼu.+ Fó-hatene mai haʼu saida mak ema bele uza hodi kesi ó.” Sansão dehan ba feto neʼe: “Se ó kesi kabas neʼebé uza atu soru hena ba haʼu-nia fuuk-sasin hitu neʼe, haʼu sei sai fraku.”
14 Entaun Dalila hametin fuuk-sasin sira-neʼe ho daun ida no hakilar dehan: “Sansão, ema Filístia sira iha neʼe ona!” Ho ida-neʼe, nia hadeer no losu sai daun no hasai kabas sira-neʼe.
15 Agora Dalila hatete ba nia: “Oinsá mak ó bele dehan: ‘Haʼu hadomi ó’,+ se ó la fó ó-nia laran ba haʼu? Ba dala tolu ona ó lohi haʼu no seidauk fó sai mai haʼu oinsá mak ó hetan kbiit boot neʼe.”+
16 Maibé tanba loroloron feto neʼe kontinua husu no obriga nia, entaun nia* labele tahan ona.+
17 Tan neʼe, nia fakar sai ninia laran ba feto neʼe, hodi dehan: “Lámina ida seidauk kona haʼu-nia ulun, tanba haʼu mak ema Nazireu ida ba Maromak husi tempu neʼebé haʼu moris mai.*+ Se haʼu-nia fuuk tesi tiha, haʼu-nia kbiit mós sei lakon husi haʼu no haʼu sei sai fraku no sai hanesan ema baibain.”
18 Bainhira Dalila haree katak Sansão fakar sai ona ninia laran ba nia, Dalila bolu kedas ema Filístia nia naʼi-ulun sira,+ hodi dehan: “Agora mai ona, tanba nia fakar sai ona ninia laran ba haʼu.” Entaun ema Filístia nia naʼi-ulun sira bá hasoru nia, no sira lori mós osan.
19 Feto neʼe halo Sansão toba-dukur iha ninia hitin. Tuirmai feto neʼe bolu mane sira hodi tesi badak Sansão nia fuuk-sasin hitu. Depois neʼe, feto neʼe komesa domina nia tanba ninia kbiit sai ona husi nia.
20 Agora feto neʼe hakilar dehan: “Sansão, ema Filístia sira iha neʼe ona!” Entaun nia hadeer no hatete: “Haʼu sei laʼo sai hanesan uluk+ no halo haʼu-nia an livre.” Maibé nia la hatene katak Jeová husik ona nia.
21 Entaun ema Filístia kaer nia no hasai ninia matan rua. Tuirmai sira lori nia tun ba Gaza no kesi nia ho korrente rua husi riti, no nia halo serbisu atu dulas trigu iha komarka laran.
22 Maibé ninia fuuk neʼebé ema tesi tiha moris fali ona.+
23 Ema Filístia nia naʼi-ulun sira halibur hamutuk atu halo selebrasaun no hasaʼe sakrifísiu barak ba sira-nia maromak Dagon,+ tanba sira dehan: “Ita-nia maromak entrega ona Sansão ba ita-nia liman!”
24 Bainhira povu neʼe haree Sansão, sira fó hahiʼi ba sira-nia maromak no dehan: “Ita-nia maromak entrega ona inimigu ba ita-nia liman, inimigu neʼebé estraga ita-nia rai+ no oho ita-nia ema barak.”+
25 Tanba sira-nia laran kontente tebes, sira hatete: “Bolu Sansão mai hodi ita bele goza nia.” Entaun sira lori Sansão sai husi komarka atu bele goza nia. Sira lori nia hodi hamriik entre uma nia riin sira.
26 Tuirmai Sansão hatete ba labarik-mane neʼebé kaer nia liman: “Ajuda haʼu atu kaer riin sira neʼebé tahan uma neʼe, atu nuneʼe haʼu bele sadere ba uma riin sira-neʼe.”
27 No uma neʼe nakonu ho mane no feto barak. Ema Filístia nia naʼi-ulun hotu iha neʼebá, no iha uma neʼe nia leten iha mane no feto maizumenus naʼin-3.000 neʼebé haree daudaun Sansão no goza nia.
28 Entaun Sansão+ bolu Jeová ho lian makaʼas, hodi dehan: “Jeová, Naʼi Ukun-Naʼin Boot Liu, favór ida hanoin-hetan haʼu, no favór ida fó forsa mai haʼu+ dala ida-neʼe deʼit, oh Maromak, no husik haʼu selu fali ema Filístia ba haʼu-nia matan sira-neʼe ida.”+
29 Depois neʼe, Sansão kaer metin uma riin rua iha klaran neʼebé tahan uma neʼe; ho ninia liman-loos nia dudu uma riin ida no ho liman-karuk nia dudu uma riin seluk.
30 Sansão hakilar dehan: “Husik haʼu* mate ho ema Filístia sira-neʼe!” Tuirmai nia dudu ho ninia forsa tomak, no uma neʼe monu ba naʼi-ulun sira no povu hotu nia leten.+ Nia oho ema barak liu iha tempu neʼebé nia mate duké tempu neʼebé nia moris.+
31 Depois neʼe, Sansão nia maun-alin sira no ninia aman nia família hotu tun mai no lori fila ninia mate-isin. Sira lori nia bá no hakoi nia entre Zora+ no Estaol iha ninia aman Manoá nia rate.+ Nia sai juís iha Izraél ba tinan 20.+
Nota-rodapé
^ Ka “prostituta”.
^ Ka “animál nia uat”.
^ Neʼe mak ai-horis neʼebé kuda iha tempu uluk kedas. Ema uza kabas husi duʼut neʼe atu halo hena-liñu.
^ Ka “Ó halimar deʼit ho haʼu”.
^ Haree “Nefes” iha Glosáriu.
^ Orj., “husi haʼu-nia inan nia knotak”.
^ Haree “Nefes” iha Glosáriu.
