Galásia 3:1-29
-
Halo tuir Ukun-Fuan, kompara ho hatudu fiar (1-14)
-
Ema laran-loos sei moris tanba fiar (11)
-
-
Promesa ba Abraão laʼós tanba Ukun-Fuan (15-18)
-
Abraão nia bei-oan mak Kristu (16)
-
-
Ukun-Fuan nia objetivu (19-25)
-
Sai Maromak nia oan sira liuhusi fiar (26-29)
-
Abraão nia bei-oan mak sira neʼebé Kristu nian (29)
-
3 Oh ema Galásia sira neʼebé beik! Sé mak lohi imi?+ Uluk imi simu hanorin neʼebé klaru kona-ba Jesus Kristu neʼebé mate iha ai-riin.+
2 Haʼu hakarak husu* imi buat ida deʼit: Imi simu espíritu tanba imi halo tuir ukun-fuan ka tanba imi tau fiar ba buat neʼebé imi rona?+
3 Imi la komprende duni ka? Uluk imi hahú laʼo tuir Maromak nia espíritu,* maibé ikusmai imi tuir fali buat isin nian* ka?+
4 Imi tahan terus barak ona, neʼe saugati deʼit ka? Haʼu fiar duni katak neʼe la saugati deʼit.
5 Tan neʼe, ida neʼebé fó imi espíritu no halo milagre+ iha imi-nia leet, nia halo ida-neʼe tanba imi halo tuir ukun-fuan ka tanba imi tau fiar ba buat neʼebé imi rona ona?
6 Neʼe hanesan ho Abraão. Nia “tau fiar ba Jeová,* no tan neʼe mak Maromak haree nia nuʼudar ema laran-loos”.+
7 Imi hatene ho didiʼak katak ema sira neʼebé iha fiar* mak Abraão nia oan sira.+
8 Eskritura hatudu katak Maromak sei haree ema husi nasaun seluk nuʼudar ema laran-loos tanba sira-nia fiar. Tan neʼe uluk nia fó sai liafuan diʼak neʼe ba Abraão, hodi dehan: “Nasaun hotu sei hetan bensaun liuhusi ó.”+
9 Entaun, sira hotu neʼebé iha fiar* simu bensaun hamutuk ho Abraão, neʼebé iha fiar.+
10 Ema hotu neʼebé sadere deʼit ba ukun-fuan simu malisan, tanba hakerek nanis ona: “Malisan ba ema hotu neʼebé la halo tuir nafatin buat hotu neʼebé hakerek iha livru Ukun-Fuan nian.”+
11 Liután neʼe, ita bele hatene ho loloos katak Maromak labele haree ema ida nuʼudar ema laran-loos liuhusi ukun-fuan+ tanba “ema laran-loos sei moris tanba fiar”.+
12 Fiar laʼós Ukun-Fuan nia hun, tanba hakerek nanis ona: “Ema neʼebé halo buat sira-neʼe sei hetan moris liuhusi buat sira-neʼe.”+
13 Kristu sosa ita,+ no halo ita livre+ husi malisan Ukun-Fuan nian tanba nia mak hetan malisan hodi troka ita, tanba hakerek nanis ona: “Ema hotu neʼebé tara iha ai-riin hetan malisan.”+
14 Ida-neʼe akontese atu Abraão nia bensaun bele toʼo ba nasaun sira seluk liuhusi Kristu Jesus,+ atu nuneʼe ita bele simu Maromak nia espíritu neʼebé promete ona+ liuhusi ita-nia fiar.
15 Maun-alin sira, haʼu koʼalia ba imi ho ai-knanoik neʼebé bazeia ba ema nia moris: Kuandu aliansa ida vale ona, maski neʼe liuhusi ema ida deʼit, la iha ema ida mak bele halo ida-neʼe sai la vale ka aumenta liafuan ruma ba aliansa neʼe.
16 Maromak hatoʼo promesa sira ba Abraão no ninia bei-oan.+ Eskritura la dehan “no ó-nia bei-oan sira”, katak bei-oan barak, maibé dehan “ó-nia bei-oan”, neʼe katak bei-oan ida deʼit, neʼe mak Kristu.+
17 Liután neʼe, haʼu dehan nuneʼe: Liutiha tinan 430 mak Ukun-Fuan mosu,+ no ida-neʼe la halakon aliansa neʼebé uluk Maromak halo ona, no la halakon promesa neʼe.
18 Se Maromak fó liman-rohan liuhusi ukun-fuan, neʼe katak liman-rohan neʼe laʼós tan liuhusi promesa. Maibé Maromak fó ona ida-neʼe ba Abraão ho laran-diʼak liuhusi promesa ida.+
19 Entaun, tanbasá mak Maromak fó Ukun-Fuan? Nia fó Ukun-Fuan atu hatudu sai sala neʼebé ema halo,+ toʼo bei-oan mosu mai,+ bei-oan neʼebé simu ona promesa neʼe. Maromak fó Ukun-Fuan liuhusi anju sira+ no sira hatoʼo ida-neʼe liuhusi mediadór ida.+
20 Kuandu ema ida deʼit mak halo promesa, entaun la presiza mediadór ida, no Maromak halo promesa neʼe mesak deʼit.
21 Entaun, Ukun-Fuan kontra Maromak nia promesa sira ka lae? Lae duni! Tanba se ema simu ukun-fuan ida neʼebé bele fó moris, entaun ita bele sai ema laran-loos liuhusi halo tuir ukun-fuan.
22 Maibé Eskritura entrega buat hotu ba sala nia ukun, atu nuneʼe ema neʼebé fiar bele hetan buat diʼak neʼebé promete ona ba sira neʼebé tau fiar ba Jesus Kristu.
23 Maibé, antes fiar neʼebé loloos toʼo mai, ukun-fuan mak proteje ita no ukun ita, no ita hein ba tempu neʼebé Maromak sei hatudu sai fiar neʼe.+
24 Entaun, Ukun-Fuan sai nuʼudar matadalan* ba ita hodi lori ita ba Kristu,+ atu nuneʼe Maromak bele haree ita nuʼudar ema laran-loos liuhusi fiar.+
25 Maibé agora fiar toʼo ona mai,+ entaun ita la presiza tan matadalan* hodi dirije ita.+
26 Tuir loloos, imi hotu mak Maromak nia oan sira+ liuhusi imi-nia fiar iha Kristu Jesus.+
27 Tanba imi hotu neʼebé hetan batizmu* iha Kristu, imi sai ona hanesan Kristu.*+
28 La iha tan ema Judeu ka Gregu,+ atan ka ema livre,+ mane ka feto,+ tanba imi hotu sai ida deʼit ho Kristu Jesus.+
29 Liután neʼe, se imi Kristu nian, imi mak Abraão nia bei-oan duni,+ imi sei simu liman-rohan+ tuir Maromak nia promesa.+
Nota-rodapé
^ Orj., “aprende husi”.
^ Orj., “hahú iha espíritu”. Haree “Pneuma” iha Glosáriu.
^ Orj., “imi sai kompletu iha isin”.
^ Ka “kaer metin ba fiar”.
^ Ka “kaer metin ba fiar”.
^ Iha lian Gregu, liafuan neʼe signifika ema neʼebé tau matan ka proteje labarik.
^ Iha lian Gregu, liafuan neʼe signifika ema neʼebé tau matan ka proteje labarik.
^ Ka “imi tau ona Kristu nuʼudar imi-nia roupa”.
