Apóstolu 18:1-28
18 Depois neʼe, Paulo sai husi Atenas hodi bá Korinto.
2 Nia hetan ema Judeu ida naran Áquila+ neʼebé moris iha Pontus. Áquila ho ninia feen Priscila foin mai husi Itália tanba Cláudio haruka ema Judeu hotu sai husi Roma. Entaun, Paulo vizita sira
3 no tanba sira halo serbisu neʼebé hanesan atu halo tenda, nia hela ho sira no sira halo serbisu hamutuk.+
4 Sábadu-Sábadu+ nia hatoʼo diskursu* iha sinagoga+ hodi halo ema Judeu no Gregu sira sai fiar-naʼin.
5 Bainhira Silas+ no Timóteo+ tun mai ona husi Masedónia, Paulo uza nia tempu tomak hodi haklaken Maromak nia liafuan no fó sasin ba ema Judeu sira atu hatudu katak Jesus mak Kristu.+
6 Maibé bainhira sira kontra nafatin nia no koʼalia aat hasoru nia, nia liki ninia roupa+ no dehan: “Husik imi-nia raan fila fali ba imi-nia ulun.+ Haʼu la iha sala.+ Husi ohin ba oin, haʼu sei bá ema husi nasaun seluk.”+
7 Entaun, nia muda husi neʼebá* no bá Tísio Justo nia uma. Ema neʼe adora Maromak no ninia uma iha sinagoga nia sorin.
8 Maibé sinagoga nia ulun-naʼin ida naran Crispo,+ hamutuk ho ninia umakain tomak tau fiar ba Naʼi. No mós ema Korinto barak neʼebé rona hahú sai fiar-naʼin no hetan batizmu.
9 Liután neʼe, Naʼi koʼalia ba Paulo liuhusi vizaun ida iha kalan, hodi dehan: “Keta taʼuk, maibé kontinua koʼalia no keta nonook deʼit,
10 tanba haʼu hamutuk ho ó+ no la iha ema ida mak sei ataka ó atu halo aat ba ó, tanba ema barak iha sidade neʼe mak haʼu-nian.”
11 Entaun, nia hela iha neʼebá ba tinan ida fulan neen hodi hanorin ema kona-ba Maromak nia liafuan.
12 Iha tempu neʼebé Gálio mak governadór* iha Akaia, ema Judeu sira kontra makaʼas Paulo no lori nia ba kadeira tesi-lia nia oin,
13 no sira dehan: “Mane neʼe hanorin ema atu adora Maromak iha dalan neʼebé kontra ukun-fuan.”
14 Maibé kuandu Paulo atu koʼalia, Gálio hatete ba ema Judeu sira: “Imi ema Judeu sira, se mane neʼe halo duni sala boot ka krime boot ruma, haʼu iha razaun atu rona ba imi ho pasiénsia.
15 Maibé se imi haksesuk malu kona-ba liafuan ruma, ema ruma, ka imi-nia ukun-fuan,+ imi rasik tenke rezolve bá. Haʼu lakohi tesi-lia ba imi kona-ba buat sira-neʼe.”
16 Ho ida-neʼe, nia haruka sira sai husi kadeira tesi-lia nia oin.
17 Entaun, sira kaer sinagoga nia ulun-naʼin ida naran Sóstenes,+ no hahú baku nia iha kadeira tesi-lia nia oin. Maibé Gálio lakohi mete ho buat sira-neʼe.
18 Maibé bainhira Paulo hela tiha ba loron balu tan, nia fó adeus ba maun-alin sira no saʼe ró hodi bá Síria, hamutuk ho Priscila no Áquila. Iha Senkreia+ Paulo tesi badak nia fuuk, tanba nia halo juramentu ida.
19 Entaun kuandu sira toʼo iha Éfeso, nia husik sira hela iha sidade, maibé nia rasik tama ba sinagoga no hanorin ema Judeu.+
20 Maski sira kontinua husu nia atu hela kleur liután, maibé nia lakohi.
21 Nia fó adeus no dehan ba sira: “Haʼu sei fila fali ba imi, se neʼe mak Jeová* nia hakarak.” Tuirmai, nia saʼe ró no sai husi Éfeso
22 no nia toʼo iha Sezareia. Tuirmai, nia bá* hodi kumprimenta kongregasaun, depois neʼe, nia tun ba Antiokia.+
23 Kuandu Paulo hela tiha ba tempu balu iha neʼebá, nia sai no laʼo husi sidade ida ba sidade seluk iha área Galásia no Fríjia+ hodi hametin dixípulu sira hotu.+
24 Ema Judeu ida naran Apolo,+ neʼebé moris iha sidade Alexandria, nia matenek atu koʼalia. Nia hatene didiʼak kona-ba Eskritura. No nia mai toʼo Éfeso.
25 Mane neʼe simu ona hanorin* kona-ba Jeová* nia dalan. Nia laran-manas ho espíritu* hodi hanorin ho loloos kona-ba Jesus, maibé nia hatene deʼit kona-ba João nia batizmu.
26 Nia hahú koʼalia ho laran-manas iha sinagoga. Kuandu Priscila no Áquila+ rona nia, sira lori nia mesamesak no esplika diʼak liután ba nia kona-ba Maromak nia dalan.
27 Liután neʼe, tanba nia hakarak atu bá Akaia, maun-alin sira hakerek karta ba dixípulu sira, hodi husu sira atu simu nia ho laran-diʼak. Entaun, kuandu nia toʼo iha neʼebá, nia fó ajuda ba sira neʼebé sai ona fiar-naʼin tanba Maromak nia laran-diʼak neʼebé boot.
28 Nia koʼalia iha ema hotu nia oin no ho laran-manas nia hatudu ho klaru katak ema Judeu nia hanorin mak sala, no nia hatudu husi Eskritura katak Jesus mak Kristu.+
Nota-rodapé
^ Ka “nia troka hanoin ho sira”.
^ Neʼe katak sinagoga.
^ Karik bá Jeruzalein.
^ Ka “rona hanorin”.
^ Karik neʼe refere ba Maromak nia espíritu. Haree “Pneuma” iha Glosáriu.
