Segundu Korinto 4:1-18
4 Neʼe duni, tanba ami simu serbisu neʼe tuir Maromak nia laran-sadiʼa neʼebé nia hatudu ona ba ami, ami la rende an.
2 Maibé ami hakribi ona hahalok subasubar neʼebé halo moe, ami la laran-makerek, no ami la troka* Maromak nia liafuan;+ maibé ami fó sai lia-loos hodi hatudu ezemplu diʼak ba ema hotu nia konxiénsia iha Maromak nia oin.+
3 Tuir loloos, se liafuan diʼak neʼebé ami fó sai mak taka hela,* entaun neʼe taka deʼit ba sira neʼebé atu lakon,
4 sira mak ema fiar-laek neʼebé maromak mundu* neʼe nian+ taka netik sira-nia neon,+ atu nuneʼe sira labele haree nabilan glória nian husi liafuan diʼak kona-ba Kristu,+ neʼebé mak Maromak nia ilas.+
5 Tanba ami la haklaken kona-ba ami-nia an rasik, maibé kona-ba Jesus Kristu nuʼudar Naʼi, no ami nuʼudar imi-nia atan tanba Jesus.
6 Tanba Maromak mak dehan: “Halo naroman mosu husi nakukun laran”,+ no nia leno ona ita-nia laran hodi halo nabilan+ ho koñesimentu furak husi Maromak liuhusi Kristu nia oin.
7 Maibé, ami hanesan sanan-rai* no rikusoin+ neʼe iha ami-nia laran.+ Neʼe hatudu ho momoos katak kbiit neʼebé la hanesan baibain neʼebé ami iha, mai husi Maromak laʼós ami-nian.+
8 Ami hetan terus makaʼas oioin husi sorin-sorin, maibé ami bele book an. Ami la hatene atu halo saida, maibé neʼe laʼós katak la iha dalan atu sai.*+
9 Ema fó-terus ami, maibé ami la mesamesak.+ Ema soe ami ba rai, maibé ami la rahun.+
10 Ami-nia isin sempre tahan hasoru perigu mate hanesan Jesus,+ atu nuneʼe ami-nia moris sai hanesan ho Jesus nian.*
11 Maski ami moris, maibé ami sempre moris iha perigu laran+ tanba tuir Jesus, atu nuneʼe ami-nia moris sai hanesan ho Jesus nian.*
12 Nuneʼe, ami tenke hasoru perigu mate, maibé neʼe lori moris ba imi.
13 Ami iha fiar tuir buat neʼebé hakerek nanis ona: “Haʼu hatudu fiar, tan neʼe mak haʼu koʼalia.”+ Ami mós iha fiar hanesan neʼe, tan neʼe mak ami koʼalia.
14 Ami hatene katak Ida neʼebé fó moris-hiʼas ba Jesus sei fó moris-hiʼas mós ba ita atu hamutuk ho Jesus, no nia sei lori ita ba Jesus nia oin.+
15 Buat hotu neʼe ba imi-nia diʼak, atu nuneʼe Maromak nia laran-diʼak neʼebé boot bele aumenta tanba ema barak liután fó agradese hodi fó glória ba Maromak.+
16 Tan neʼe mak ita la rende an. Maski ita-nia isin sai fraku daudaun iha liʼur, maibé iha laran ita simu kbiit foun loron ba loron.
17 Terus* sira neʼebé ita hasoru daudaun mak ba tempu uitoan deʼit no kmaan, maibé ida-neʼe lori glória ba ita, no glória neʼe mak boot* liu no ba nafatin.+
18 Ita la hateke ba buat neʼebé matan bele haree, maibé ba buat neʼebé matan labele haree.+ Tanba buat neʼebé matan bele haree mak ba tempu uitoan deʼit, maibé buat neʼebé matan labele haree mak ba nafatin.
Nota-rodapé
^ Ka “la hafoʼer”.
^ Ka “taka netik hela ho veu”.
^ Ka “vazu rai-mean”.
^ Ka karik “ami la lakon esperansa”.
^ Orj., “atu nuneʼe Jesus nia moris mós bele hatudu an iha ami-nia isin-lolon”.
^ Orj., “atu nuneʼe Jesus nia moris mós bele hatudu an iha ami-nia isin-lolon”.
^ Ka “susar”.
^ Orj., “todan”.
