Segundu Korinto 10:1-18
10 Haʼu, Paulo, haʼu husu imi ho Kristu nia laran-maus no laran-diʼak+ atu imi simu buat neʼebé haʼu dehan ba imi, maski imi haree haʼu nuʼudar ema fraku iha imi-nia leet kuandu hasoru imi oin ba oin,+ maibé nuʼudar ema aten-brani kuandu dook husi imi.+
2 Haʼu hein katak kuandu haʼu hamutuk ho imi, haʼu la presiza fó konsellu makaʼas ba sira neʼebé hanoin katak ami halaʼo ami-nia moris tuir mundu* nia hanoin.
3 Tanba maski ami moris iha mundu neʼe, maibé ami la halo funu hodi tuir mundu nia hanoin.
4 Tanba ami-nia armas funu nian laʼós husi mundu neʼe,+ maibé Maromak fó armas neʼebé iha kbiit boot+ hodi bele sobu rahun buat neʼebé metin hanesan moru.
5 Tanba ami sobu rahun hanoin neʼebé sala no ideia hotu neʼebé foti an kontra koñesimentu kona-ba Maromak.+ Neʼe hanesan ami kaer no lori hanoin hotu hodi halo tuir Kristu,
6 no kuandu imi hatudu ona katak imi halo tuir ho loloos, ami sei prontu atu fó kastigu ba sira hotu neʼebé lakohi halo tuir.+
7 Imi tesi-lia tuir deʼit buat neʼebé imi haree husi liʼur. Se ema ida fiar an katak nia mak Kristu nian, nia tenke hanoin fali kona-ba liafuan tuirmai neʼe: Hanesan nia mak Kristu nian, nuneʼe mós ho ami.
8 Tanba Naʼi fó kbiit ba ami laʼós atu hakanek imi maibé atu hametin imi,+ no se karik haʼu gaba an demais kona-ba kbiit neʼe, haʼu sei la sente moe.
9 Tanba haʼu lakohi imi hanoin katak haʼu koko atu halo imi taʼuk liuhusi haʼu-nia karta sira.
10 Tanba sira dehan: “Ninia karta sira mak makaʼas no iha kbiit, maibé kuandu nia rasik iha neʼe hamutuk ho ita, nia fraku no ninia liafuan la iha folin.”
11 Ema neʼe tenke hanoin fali katak buat neʼebé ami dehan liuhusi ami-nia karta kuandu ami dook husi imi, ami sei halo nuneʼe kuandu ami hamutuk ho imi.+
12 Tanba ami la brani atu kompara ami-nia an ho sira neʼebé foti an, no ami la tesi-lia ba ami-nia an tuir buat neʼebé sira halo.+ Maibé kuandu sira kompara sira-nia an tuir deʼit sira-nia hanoin rasik no tesi-lia ba sira-nia an rasik, sira hatudu katak sira la iha kbiit atu komprende.+
13 Maski nuneʼe, ami sei la koʼalia ho orgullu kona-ba buat seluk neʼebé laʼós ami-nia knaar, maibé kona-ba knaar neʼebé ami simu* husi Maromak, no ami-nia knaar neʼe inklui mós imi.+
14 Tuir loloos, uluk kuandu ami vizita imi, ami la halo buat neʼebé Maromak bandu, maibé ami mak ema primeiru neʼebé fó sai liafuan diʼak kona-ba Kristu ba imi.+
15 Ami sente orgullu kona-ba buat neʼebé ami halo, laʼós kona-ba buat neʼebé ema seluk halo. Ami hein katak imi-nia fiar sei aumenta ba beibeik, atu nuneʼe serbisu neʼebé ami halo ona bele aumenta liután iha imi-nia leet. Tuirmai, ami sei aumenta liután ami-nia serbisu,
16 atu nuneʼe ami bele fó sai liafuan diʼak iha rai sira seluk, hodi nuneʼe ami sei la koʼalia ho orgullu kona-ba serbisu neʼebé ema seluk halo ona tuir knaar neʼebé sira simu.
17 “Maibé ema neʼebé gaba an, bele gaba an kona-ba Jeová.”*+
18 Tanba Jeová* la simu ema neʼebé foti aas ninia an rasik,+ maibé nia simu ema neʼebé nia rasik mak foti aas.+
