Primeiru Samuel 6:1-21
-
Ema Filístia fó fali Arka ba Izraél (1-21)
6 Jeová nia Arka+ iha ema Filístia nia rai ba fulan hitu.
2 Ema Filístia bolu amlulik no siʼikdór sira+ no husu: “Ami tenke halo saida ho Jeová nia Arka? Fó-hatene ba ami oinsá mak ami tenke haruka Arka neʼe bá fali ninia fatin.”
3 Sira hatán: “Se imi fó fali Izraél nia Maromak Jeová nia Arka Aliansa nian, imi tenke haruka bá hamutuk ho sakrifísiu ruma. Imi tenke fó fali ba nia ho sakrifísiu taka sala nian.+ Depois neʼe mak imi bele hetan kura, no imi sei hatene tanbasá mak nia fó kastigu hela ba imi.”
4 Ema Filístia husu: “Sakrifísiu saida mak ami tenke fó ba nia hodi taka ami-nia sala?” Sira hatán: “Tuir númeru husi ema Filístia nia naʼi-ulun sira,+ imi tenke haruka emorroidas* husi osan-mean lima no laho osan-mean lima, tanba imi hotu no mós imi-nia naʼi-ulun sira hetan moras neʼebé hanesan.
5 Imi tenke halo estátua hanesan imi-nia emorroidas no estátua hanesan laho+ neʼebé estraga hela imi-nia rai, no imi tenke hatudu respeitu ba Izraél nia Maromak. Karik nia sei hamenus kastigu neʼebé nia fó ba imi, ba imi-nia maromak no ba imi-nia rai.+
6 Tanbasá mak imi tenke ulun-toos hanesan ema Ejitu no Faraó?+ Bainhira Nia fó kastigu makaʼas ba sira+ mak sira foin haruka ema Izraél sai husi neʼebá.+
7 Agora imi tenke halo karrosa foun ida no mós foti karau-inan rua neʼebé iha ona oan no seidauk lori naha todan. Tuirmai kesi karau-inan sira-neʼe ba karrosa, maibé lori fali sira-nia oan ba uma, hodi dook husi sira.
8 Foti Jeová nia Arka no tau iha karrosa leten, no mós foti sasán osan-mean neʼebé imi atu haruka fali ba nia nuʼudar sakrifísiu taka sala nian hodi tau iha kaixa laran iha Arka neʼe nia sorin.+ Tuirmai haruka neʼe bá
9 no haree tuir: Se Arka neʼe saʼe ba dalan Bet-Semes nian+ hodi fila fali ba ninia rai rasik, imi sei hatene katak Izraél nia Maromak mak lori susar boot neʼe ba ita. Se lae, ita sei hatene katak laʼós nia mak fó kastigu ba ita, maibé neʼe mak buat neʼebé mosu mesak deʼit.”
10 Ema sira-neʼe halo nuneʼe duni. Sira foti karau-inan rua neʼebé iha ona oan no kesi karrosa neʼe ba karau sira-neʼe, no sira sulan karau-oan iha luhan.
11 Tuirmai sira tau Jeová nia Arka iha karrosa leten, hamutuk ho kaixa neʼebé iha laho osan-mean no estátua hanesan sira-nia emorroidas.
12 No karau sira-neʼe laʼo loos deʼit ba oin iha dalan ba Bet-Semes.+ Sira laʼo nafatin iha dalan boot neʼe, no halo lian nuʼudar sira laʼo. Sira la fila ba liman-loos ka liman-karuk. Iha tempu neʼe, ema Filístia nia naʼi-ulun sira mós laʼo iha karau sira-neʼe nia kotuk toʼo baliza Bet-Semes nian.
13 Ema iha Bet-Semes koʼa hela trigu iha rai-tetuk neʼe. Bainhira sira foti matan no haree Arka, sira haksolok tebes.
14 Karrosa neʼe toʼo iha Josué nia rai, ema Bet-Semes, no para iha neʼebá besik fatuk boot ida. Entaun sira fera ai husi karrosa neʼe, no sira hasaʼe karau sira-neʼe+ nuʼudar sakrifísiu sunu nian ba Jeová.
15 Ema Levi+ hatún Jeová nia Arka neʼe no mós kaixa neʼebé hamutuk ho Arka, neʼebé iha sasán osan-mean sira, no sira tau buat sira-neʼe iha fatuk boot nia leten. Iha loron neʼe, ema Bet-Semes sira+ hasaʼe sakrifísiu sunu nian no fó prezente sira ba Jeová.
16 Bainhira ema Filístia nia naʼi-ulun lima haree tiha ida-neʼe, sira fila fali ba Ekron.
17 Estátua hanesan emorroidas husi osan-mean neʼebé ema Filístia haruka nuʼudar sakrifísiu taka sala nian ba Jeová+ mak tuirmai neʼe: emorroidas osan-mean ida ba Asdod,+ ida ba Gaza, ida ba Askelon, ida ba Gat+ no ida ba Ekron.+
18 Sira mós fó laho osan-mean hodi tuir númeru ba sidade sira neʼebé ema Filístia nia naʼi-ulun lima mak ukun, neʼe inklui sidade sira neʼebé iha moru aas no mós knua sira iha rai-luan.
Fatuk boot neʼebé sira tau Jeová nia Arka iha leten sai nuʼudar sasin toʼo ohin loron iha Josué, ema Bet-Semes, nia rai.
19 Maibé Maromak oho ema Bet-Semes, tanba sira haree ba Jeová nia Arka. Maromak oho ema naʼin-50.070* iha povu nia leet, no povu neʼe komesa tanis tanba Jeová oho sira barak loos.+
20 Entaun ema Bet-Semes husu: “Sé mak bele hamriik iha Jeová, Maromak santu, nia oin?+ Ita sei haruka fali Maromak nia Arka neʼe bá neʼebé?”*+
21 Entaun sira haruka lia-menon ba ema iha Kiriat-Jearim,+ hodi dehan: “Ema Filístia fó fali ona Jeová nia Arka. Tun mai no lori Arka neʼe bá hamutuk ho imi.”+
Nota-rodapé
^ Neʼe mak moras iha kidun-matan tanba ninia uat sira bubu.
^ Orj., “mane naʼin-70, mane naʼin-50.000”.
^ Orj., “Nia sei laʼo ba sé hodi husik ita?”
