Primeiru Samuel 20:1-42
-
Jonatan laran-metin ba David (1-42)
20 Tuirmai David halai husi Naiot iha Ramá. Maibé nia bá hasoru Jonatan no dehan: “Haʼu halo ona saida?+ Krime saida mak haʼu halo? Sala saida mak haʼu halo ba ó-nia aman hodi nia buka atu oho haʼu?”
2 Jonatan dehan: “Lae! Ó sei la mate.+ Haʼu-nia aman sei la halo buat ida se nia seidauk fó sai neʼe ba haʼu, maski neʼe buat kiʼik ka boot. Entaun, tanbasá mak haʼu-nia aman tenke subar planu neʼe husi haʼu? Neʼe sei la akontese.”
3 Maibé David jura no dehan: “Ó-nia aman hatene ho didiʼak katak ó mak haʼu-nia belun+ no karik nia hanoin: ‘Keta fó sai neʼe ba Jonatan, se lae nia sei sai triste.’ Maibé haʼu jura hodi Jeová, Maromak neʼebé moris, no hodi ó-nia moris, katak iha hakat ida deʼit entre haʼu no mate!”+
4 Jonatan hatete ba David: “Buat naran deʼit neʼebé ó dehan, haʼu sei halo ba ó.”
5 David dehan ba Jonatan: “Aban mak fulan-foun,+ no sira sei hein duni haʼu atu tuur hamutuk ho liurai hodi han. Maibé ó tenke fó lisensa mai haʼu atu sai, no haʼu sei subar iha liʼur toʼo bainrua kalan.
6 Se ó-nia aman buka haʼu karik, ó tenke dehan: ‘David husu lisensa husi haʼu atu bá lalais toʼo ninia sidade Belein,+ tanba iha neʼebá iha sakrifísiu tinan-tinan nian ba ninia família tomak.’+
7 Se nia hatán: ‘La iha buat ida’, neʼe katak ó-nia atan neʼe sei iha dame. Maibé se nia sai hirus, ó bele hatene katak nia planu ona atu halo aat ba haʼu.
8 Hatudu domin neʼebé laran-metin ba ó-nia atan neʼe,+ tanba ó halo ona aliansa ho ó-nia atan neʼe iha Jeová nia oin.+ Maibé se haʼu mak sala,+ ó rasik mak oho haʼu bá. Tanbasá mak ó tenke entrega haʼu ba ó-nia aman?”
9 Jonatan dehan: “Labele hanoin hanesan neʼe! Se haʼu hatene katak haʼu-nia aman planu ona atu halo aat ba ó, haʼu sei fó-hatene ba ó.”+
10 Entaun David hatete ba Jonatan: “Sé mak sei fó-hatene mai haʼu se ó-nia aman hatán ba ó ho hirus?”
11 Jonatan dehan ba David: “Mai, mai ita bá iha sidade nia liʼur.” Entaun sira naʼin-rua laʼo ba sidade nia liʼur.
12 No Jonatan hatete ba David: “Jeová, Izraél nia Maromak, mak sai sasin katak aban iha tempu neʼe ka bainrua haʼu sei koko haʼu-nia aman kona-ba neʼe. Se nia la hirus ó,* entaun haʼu sei haruka lia-menon no fó sai neʼe ba ó.
13 Maibé se haʼu-nia aman planu atu halo aat ba ó, haʼu harohan katak Jeová tenke fó kastigu ba haʼu* no aumenta liután kastigu neʼe se haʼu la fó sai planu neʼe ba ó no husik ó bá ho dame. Haʼu hein katak Jeová sei hamutuk ho ó,+ hanesan uluk nia hamutuk ho haʼu-nia aman.+
14 No haʼu hein katak ó hatudu Jeová nia domin neʼebé laran-metin ba haʼu durante haʼu moris no mós bainhira haʼu mate.+
15 Iha tempu neʼebé Jeová halakon ó-nia inimigu hotu iha rai, ó labele hakotu ó-nia domin neʼebé laran-metin husi haʼu-nia umakain.”+
16 Entaun Jonatan halo aliansa ida ho David nia umakain, hodi dehan: “Jeová sei husu David nia inimigu sira atu hatán ba sira-nia sala.”
17 Nuneʼe Jonatan haruka David halo juramentu fali tuir David nia domin ba nia, tanba Jonatan hadomi nia hanesan nia hadomi ninia an rasik.+
18 Tuirmai Jonatan hatete ba nia: “Aban mak fulan-foun,+ no haʼu-nia aman sei buka ó, tanba ó-nia fatin sei mamuk.
19 Bainrua, haʼu-nia aman sei buka ó namanas liután, entaun ó tenke laʼo ba fatin neʼebé ó subar ona hanesan tempu uluk* no hein besik fatuk neʼe.
20 Tuirmai haʼu sei hana rama-oan tolu ba fatuk neʼe nia sorin ida, hanesan haʼu finje hana buat ruma.
21 No haʼu sei haruka atan ida, hodi dehan: ‘Bá, buka rama-oan sira-neʼe.’ Se ó rona haʼu hatete ba atan neʼe: ‘Rama-oan iha ó-nia sorin neʼe, foti rama-oan sira-neʼe’, neʼe katak ó bele fila fali, tanba haʼu jura hodi Jeová, Maromak neʼebé moris, katak buat hotu diʼak ba ó no perigu ruma sei la kona ó.
22 Maibé se ó rona haʼu hatete ba atan neʼe: ‘Rama-oan sira-neʼe dook liu ó’, neʼe katak ó tenke bá, tanba Jeová haruka ona ó atu bá.
23 Kona-ba promesa neʼebé ita naʼin-rua halo ona,+ haʼu harohan katak Jeová sai sasin entre ita ba nafatin.”+
24 Entaun David bá subar iha sidade nia liʼur. Bainhira fulan-foun hahú ona, liurai tuur iha ninia fatin hodi han.+
25 Liurai tuur iha ninia fatin baibain neʼebé besik didin. Jonatan tuur iha nia oin, no Abner+ tuur iha Saul nia sorin, maibé David nia fatin mamuk hela.
26 Saul la koʼalia buat ida iha loron neʼe, tanba nia hanoin: ‘Karik buat ruma akontese no neʼe halo David sai la moos.+ Karik nia la moos ona.’
27 Iha loron tuirmai,* David nia fatin kontinua mamuk hela. Nuneʼe Saul dehan ba ninia oan-mane Jonatan: “Tanbasá mak horiseik no ohin Jessé nia oan-mane+ la mai atu han?”
28 Jonatan hatán ba Saul: “David husu lisensa husi haʼu atu bá Belein.+
29 David hatete: ‘Favór ida, husik haʼu bá, tanba ami-nia família hasaʼe sakrifísiu iha sidade neʼebá, no haʼu-nia maun rasik mak bolu haʼu. Entaun se ó bele fó lisensa ba haʼu, favór ida, husik haʼu bá nonook deʼit atu haree haʼu-nia maun sira.’ Tan neʼe mak nia la mai atu tuur iha liurai nia meza.”
30 Ho ida-neʼe, Saul sai hirus makaʼas ho Jonatan, no dehan ba nia: “Ó mak feto ulun-toos nia oan, ó hanoin haʼu la hatene katak ó hili atu apoia Jessé nia oan-mane ka? Ó-nia hahalok neʼe hamoe ó-nia an no hamoe ó-nia inan.*
31 Se Jessé nia oan-mane moris hela iha rai, ó no ó-nia knaar nuʼudar liurai sei la metin.+ Agora haruka ema atu lori nia mai haʼu, tanba nia tenke mate.”*+
32 Maibé Jonatan hatete ba ninia aman Saul: “Tanbasá tenke oho nia?+ Saida mak nia halo?”
33 Rona tiha neʼe, Saul tuda diman ba nia atu oho nia,+ nuneʼe Jonatan hatene katak ninia aman planu metin ona atu oho David.+
34 Jonatan hamriik kedas husi meza ho hirus makaʼas, no nia la han ai-han iha loron segundu depois fulan-foun, tanba nia triste hela kona-ba David+ no tanba ninia aman hamoe ona nia.
35 Iha dadeer Jonatan sai ba sidade nia liʼur toʼo fatin neʼebé nia no David deside ona, no lori ninia atan joven ida hamutuk ho nia.+
36 Jonatan hatete ba ninia atan: “Favór ida, halai bá hodi buka rama-oan sira neʼebé haʼu hana.” Entaun atan neʼe halai, no Jonatan hana rama-oan dook liu nia.
37 Bainhira atan neʼe toʼo iha fatin neʼebé Jonatan hana rama-oan bá, Jonatan hakilar ba nia atan dehan: “Rama-oan neʼe dook liu fali ó.”
38 Jonatan hakilar ba nia atan neʼe: “Halai! Bá lalais! Keta demora!” No Jonatan nia atan neʼe bá hili rama-oan no fila fali ba ninia naʼi.
39 Atan neʼe la hatene buat ida kona-ba neʼe, só Jonatan no David deʼit mak hatene ida-neʼe katak sá.
40 Tuirmai Jonatan fó ninia armas ba nia atan no dehan ba nia: “Bá, no lori buat sira-neʼe ba sidade.”
41 Bainhira atan neʼe bá ona, David hamriik husi ninia subar-fatin neʼebé besik, neʼebé iha parte súl. Tuirmai nia hakneʼak no hakruʼuk ho oin ba rai dala tolu, no nia reʼi Jonatan no sira tanis hamutuk, maibé David tanis barak liu.
42 Jonatan hatete ba David: “Laʼo bá ho dame, tanba ita naʼin-rua jura ona+ hodi Jeová nia naran, dehan: ‘Jeová sei sai sasin entre ó no haʼu no entre ó-nia bei-oan no haʼu-nia bei-oan ba nafatin.’”+
Tuirmai David hamriik no bá, maibé Jonatan fila fali ba sidade.
Nota-rodapé
^ Orj., “David”.
^ Orj., “Jonatan”.
^ Orj., “hanesan loron serbisu nian”.
^ Orj., “loron tuirmai depois fulan-foun”.
^ Orj., “hamoe ó-nia inan nia isin-tanan”.
^ Orj., “tanba nia mak mate nia oan-mane”.
