Primeiru Samuel 16:1-23
16 Liutiha tempu balu, Jeová dehan ba Samuel: “Toʼo bainhira mak ó sei triste kona-ba Saul?+ Haʼu la simu ona nia atu ukun nuʼudar liurai iha Izraél.+ Foti dikur no enxe mina iha laran+ no bá. Haʼu sei haruka ó bá hasoru Jessé,+ ema Belein, tanba haʼu hili ona liurai ida ba haʼu-nia an rasik husi ninia oan-mane sira.”+
2 Maibé Samuel dehan: “Oinsá mak haʼu bele bá? Bainhira Saul rona kona-ba neʼe, nia sei oho haʼu.”+ Jeová hatán: “Lori karau-oan ida hamutuk ho ó no dehan: ‘Haʼu mai atu hasaʼe sakrifísiu ba Jeová.’
3 Konvida Jessé ba fatin neʼebé ó hasaʼe sakrifísiu, tuirmai haʼu sei fó sai ba ó saida mak ó sei halo. Ó tenke fui mina* ba mane ida neʼebé haʼu hatudu ba ó.”+
4 Samuel halo tuir buat neʼebé Jeová dehan. Bainhira nia toʼo iha Belein,+ katuas sira iha sidade neʼe sai nakdedar hodi hasoru nia, no sira dehan: “Ita mai atu lori dame ka lae?”
5 Ho ida-neʼe, Samuel dehan: “Sin, dame. Haʼu mai atu hasaʼe sakrifísiu ba Jeová. Halo santu* imi-nia an bá, no mai tuir haʼu hodi bá fatin neʼebé haʼu hasaʼe sakrifísiu.” Tuirmai nia halo santu Jessé no ninia oan-mane sira, depois neʼe, nia konvida sira ba fatin neʼebé nia atu hasaʼe sakrifísiu.
6 Bainhira sira tama no Samuel haree Eliab,+ nia dehan: “Nia mak ema neʼebé Jeová hili* ona.”
7 Maibé Jeová hatete ba Samuel: “Keta haree deʼit ba ninia oin ka ain-aas,+ tanba haʼu la simu nia. Dalan neʼebé ema haree la hanesan ho dalan neʼebé Maromak haree, tanba ema haree deʼit buat neʼebé iha liʼur, maibé Jeová haree ema nia laran.”+
8 Tuirmai Jessé bolu Abinadab+ no haruka nia laʼo liu Samuel nia oin, maibé Samuel dehan: “Jeová mós la hili nia.”
9 Depois neʼe, Jessé lori Samá mai,+ maibé Samuel dehan: “Jeová mós la hili nia.”
10 Entaun Jessé haruka ninia oan-mane naʼin-hitu laʼo liu Samuel nia oin, maibé Samuel hatete ba Jessé: “Jeová la hili sira-neʼe ida.”
11 Ikusmai Samuel husu Jessé: “Ó-nia oan-mane sira mak neʼe deʼit ka?” Jessé hatán: “Ida ikun+ seidauk mai. Nia hein hela bibi.”+ Samuel hatete ba Jessé: “Haruka ema bolu nia mai, tanba ita sei la tuur atu han se nia seidauk toʼo iha neʼe.”
12 Entaun Jessé haruka ema bolu nia no lori nia mai. Nia mak mane joven neʼebé isin kapás,* matan furak no oin bonitu.+ Jeová hatete: “Hamriik bá, fui mina* ba nia. Nia mak ida neʼebé haʼu hili!”+
13 Entaun Samuel foti dikur neʼebé mina iha laran+ no fui mina* neʼe ba David nia ulun iha ninia maun sira-nia oin. No Jeová nia espíritu komesa fó kbiit ba David husi tempu neʼe ba oin.+ Depois neʼe, Samuel hamriik no fila ba Ramá.+
14 Iha tempu neʼebá Jeová hasai ona ninia espíritu husi Saul,+ no Jeová husik Saul nia hanoin rasik halo nia sai neon-susar.*+
15 Saul nia atan sira dehan ba nia: “Maromak husik ona Ita-nia hanoin rasik halo Ita neon-susar.
16 Favór ida naʼi, haruka Ita-nia atan neʼebé iha Ita-nia oin atu buka mane ida neʼebé matenek atu toka arpa.+ Bainhira Maromak husik Ita-nia hanoin rasik halo Ita sai neon-susar, nia sei toka arpa, no Ita sei sente diʼak.”
17 Entaun Saul hatete ba ninia atan: “Favór ida, buka mane ida neʼebé matenek atu toka, no lori nia mai haʼu.”
18 Ninia atan ida dehan: “Haʼu haree ona Jessé ema Belein, nia oan-mane ida neʼebé matenek atu toka arpa no nia mós funu-naʼin ida neʼebé kbiit boot no aten-brani.+ Nia bele koʼalia ho matenek, oin bonitu+ no Jeová hamutuk ho nia.”+
19 Rona tiha neʼe, Saul haruka ema lori lia-menon ba Jessé no dehan: “Haruka mai haʼu ó-nia oan-mane David neʼebé hein hela bibi sira.”+
20 Entaun Jessé tau paun, tua-fatin neʼebé halo husi animál nia kulit, no bibi-timur oan ida iha kuda-burru nia leten. Nia haruka ninia oan-mane David lori buat sira-neʼe ba Saul.
21 Ho ida-neʼe, David toʼo Saul nia uma no hahú serbí nia.+ Saul hadomi tebes David, no nia sai Saul nia atan neʼebé lori ninia armas.
22 Saul haruka ema lori lia-menon ba Jessé, hodi dehan: “Favór ida, husik David kontinua serbisu ba haʼu, tanba nia halo haʼu-nia laran kontente.”
23 Iha tempu neʼebé Maromak husik Saul nia hanoin rasik halo nia neon-susar, David foti arpa no toka ida-neʼe, no Saul sente kmaan no diʼak fali, no ninia hanoin neʼebé halo nia taʼuk lakon kedas husi nia.+
Nota-rodapé
^ Haree “Fui mina” iha Glosáriu.
^ Haree “Halo santu” iha Glosáriu.
^ Orj., “fui mina”. Haree “Fui mina” iha Glosáriu.
^ Orj., “mean”.
^ Haree “Fui mina” iha Glosáriu.
^ Haree “Fui mina” iha Glosáriu.
^ Orj., “no espíritu aat husi Jeová halo nia taʼuk”. Haree “Ruah” iha Glosáriu.
