Primeiru Reis 15:1-34
15 Iha tinan 18 husi Nebat nia oan-mane Jeroboão nia ukun nuʼudar liurai,+ Abijam sai liurai hodi ukun Judá.+
2 Nia ukun ba tinan tolu iha Jeruzalein. Ninia inan nia naran mak Maaka,+ Absalão* nia bei-oan.
3 Nia kontinua halo tuir ninia aman nia hahalok sala hotu, no nia la serbí* Jeová, ninia Maromak, ho laran tomak hanesan ninia beiʼala David serbí ho laran tomak.
4 Maibé, tanba David nia Maromak Jeová hanoin David,+ Nia fó ahi-oan* ida ba Abijam iha Jeruzalein+ hodi hili ninia oan-mane ida sai nuʼudar liurai no husik Jeruzalein iha nafatin.
5 Nia halo nuneʼe tanba David halo buat neʼebé loos tuir Jeová nia haree, no nia la sees husi buat hotu neʼebé Maromak haruka nia atu halo durante ninia moris tomak, só deʼit sala neʼebé nia halo ba Urias, ema Hetes.+
6 Durante Roboão nia moris tomak sempre iha funu entre nia ho Jeroboão.+
7 Kona-ba Abijam nia istória sira seluk, no kona-ba buat hotu neʼebé nia halo, neʼe hakerek ona iha livru istória kona-ba Judá nia liurai sira.+ Iha tempu neʼebá, iha mós funu entre Abijam ho Jeroboão.+
8 Ikusmai Abijam mate,* no sira hakoi nia iha David nia Sidade; no ninia oan-mane Asa+ mak sai liurai hodi troka nia.+
9 Iha tinan 20 husi Liurai Jeroboão nia ukun iha Izraél, Asa komesa ukun rai-Judá.
10 Nia ukun ba tinan 41 iha Jeruzalein. Ninia avó-feto nia naran mak Maaka,+ Absalão* nia bei-oan.
11 Asa halo buat neʼebé loos tuir Jeová nia haree,+ hanesan ninia beiʼala David.
12 Nia duni sai mane sira neʼebé faʼan an* iha templu husi rai neʼe+ no hasai tiha estátua hotu neʼebé Maromak hakribi* neʼebé ninia beiʼala sira halo.+
13 Nia mós hasai ninia avó-feto Maaka+ nia pozisaun nuʼudar liurai-feto, tanba ninia avó-feto halo ona estátua ida neʼebé Maromak hakribi hodi uza atu adora ai-riin lulik.* Asa halo rahun ninia avó-feto nia estátua+ no sunu iha Foho-Leet Sedron.+
14 Maibé fatin aas sira iha nafatin.+ Maski nuneʼe, Asa serbí* Jeová ho laran tomak durante ninia moris.
15 Nia lori sasán sira neʼebé nia no ninia aman halo santu ona hodi tau iha Jeová nia uma. Neʼe mak osan-mutin, osan-mean no sasán oioin.+
16 Iha tempu neʼebá sempre iha funu entre Asa ho Liurai Baasa+ husi Izraél.
17 Entaun Liurai Baasa husi Izraél mai hodi halo funu hasoru Judá no komesa hametin* sidade Ramá+ atu bele hanetik ema neʼebé tama-sai Liurai Asa nia rai.+
18 Ho ida-neʼe, Asa foti osan-mutin no osan-mean hotu neʼebé sei iha hela iha osan-fatin iha Jeová nia uma no iha liurai nia palásiu, no entrega rikusoin sira-neʼe ba ninia atan sira. Liurai Asa haruka sira bá hasoru Tabrimon nia oan-mane Ben-Hadad, liurai husi rai-Síria,+ Hezion nia bei-oan, neʼebé hela iha Damasku, hodi dehan:
19 “Iha akordu* entre haʼu ho Ita, no entre haʼu-nia aman ho Ita-nia aman. Agora haʼu haruka prezente osan-mutin no osan-mean ba Ita. Favór ida, hakotu Ita-nia akordu* ho Liurai Baasa husi Izraél, atu nuneʼe nia bele sai husi haʼu-nia rai.”
20 Ben-Hadad rona ba Liurai Asa nia liafuan no haruka ninia xefe tropa nian sira bá ataka Izraél nia sidade sira, no sira manán sidade Ijon,+ Dan,+ Abel-Bet-Maaka, área Kineret hotu, no rai-Naftali hotu.
21 Bainhira Baasa rona kona-ba neʼe, nia para kedas hodi la hametin* sidade Ramá no nia kontinua hela iha Tirza.+
22 Liurai Asa bolu ema Judá hotu, la husik hela ema ida, no sira lori fatuk ho ai sira husi Ramá neʼebé uluk Baasa uza atu hametin* Ramá, no Liurai Asa uza buat sira-neʼe atu hametin* sidade Geba+ no Mizpa+ iha rai-Benjamim.
23 Kona-ba Asa nia istória sira seluk, no kona-ba ninia kbiit, buat hotu neʼebé nia halo, no sidade sira neʼebé nia harii,* neʼe hakerek ona iha livru istória kona-ba Judá nia liurai sira. Maibé bainhira nia katuas ona, nia hetan moras ida iha ninia ain rua.+
24 Ikusmai Asa mate* no sira hakoi nia hamutuk ho ninia beiʼala sira iha ninia beiʼala David nia Sidade, no ninia oan-mane Jeosafát+ mak sai liurai hodi troka nia.
25 Iha tinan segundu husi Liurai Asa nia ukun iha rai-Judá, Jeroboão nia oan-mane Nadab+ sai liurai iha Izraél, no nia ukun Izraél ba tinan rua.
26 Nia kontinua halo buat neʼebé aat tuir Jeová nia haree no laʼo tuir ninia aman nia dalan+ no tuir ninia aman nia sala neʼebé dada ema Izraél monu ba sala.+
27 Ahias nia oan-mane Baasa husi Issacar nia umakain halo planu aat ba Nadab, no Baasa oho Nadab iha sidade Gibeton,+ neʼebé ema Filístia mak ukun, iha tempu neʼebá Nadab no ema Izraél hotu halo serku ba Gibeton.
28 Nuneʼe Baasa oho Nadab iha tinan terseiru husi Liurai Asa nia ukun iha rai-Judá no Baasa mak sai liurai hodi troka nia.
29 Bainhira Baasa sai liurai, nia oho kedas ema hotu husi Jeroboão nia umakain. Nia la husik Jeroboão nia ema ida moris. Nia oho sira hotu hanesan Jeová nia liafuan neʼebé fó sai ona liuhusi ninia atan Ahias ema Silo.+
30 Neʼe akontese tanba sala neʼebé Jeroboão halo, no tanba Jeroboão dada ema Izraél atu halo sala no mós tanba nia hakanek tebes Jeová, Izraél nia Maromak, nia laran.
31 Kona-ba Nadab nia istória sira seluk, no kona-ba buat hotu neʼebé nia halo, neʼe hakerek ona iha livru istória kona-ba Izraél nia liurai sira.
32 Iha tempu neʼebá sempre iha funu entre Asa ho Liurai Baasa husi Izraél.+
33 Iha tinan terseiru husi Liurai Asa nia ukun iha rai-Judá, Ahias nia oan-mane Baasa sai liurai iha Tirza hodi ukun Izraél tomak no nia ukun ba tinan 24.+
34 Maibé nia kontinua halo buat neʼebé aat tuir Jeová nia haree+ no laʼo tuir Jeroboão nia dalan no halo tuir Jeroboão nia sala neʼebé dada ema Izraél atu halo sala.+
Nota-rodapé
^ Orj., “Abisalão”.
^ Ka “hadomi”.
^ Neʼe katak jerasaun.
^ Orj., “latan hamutuk ho ninia beiʼala sira”.
^ Orj., “Abisalão”.
^ Ka “sai prostitutu sira”. Neʼe katak mane neʼebé halo prostituisaun neʼebé liga ho adorasaun falsu.
^ Ka “ídolu hotu neʼebé foʼer tebes”. Liafuan Ebraiku neʼe karik mai husi liafuan “teen”. Liafuan neʼe uza atu hatudu hakribi.
^ Haree “Ai-riin lulik” iha Glosáriu.
^ Ka “hadomi”.
^ Ka “harii fali”.
^ Ka “aliansa”.
^ Ka “aliansa”.
^ Ka “harii fali”.
^ Ka “harii fali”.
^ Ka “harii fali”.
^ Ka “hametin; harii fali”.
^ Orj., “latan hamutuk ho ninia beiʼala sira”.
