Primeiru Krónikas 22:1-19
22 Tuirmai David hatete: “Neʼe mak Maromak loos Jeová nia uma, no neʼe mak altár ba ema Izraél atu hasaʼe sakrifísiu sunu nian.”+
2 Depois neʼe, David haruka ema atu halibur ema estranjeiru sira+ neʼebé hela iha rai-Izraél, no nia fó knaar ba sira atu fera fatuk no halo kabeer fatuk sira hodi harii Maromak loos nia uma.+
3 David mós prepara besi barak tebes hodi halo pregu ba odamatan iha portaun sira no halo besi-habit sira, no David prepara riti barak tebes toʼo labele tetu,+
4 no mós prepara ai-sedru+ barak toʼo labele sura, tanba ema Sidon+ no ema Tiro+ lori ai-sedru barak tebes ba David.
5 David hatete: “Haʼu-nia oan-mane Salomão mak joven deʼit no la iha esperiénsia,+ no uma neʼebé nia atu harii ba Jeová mak kmanek liu hotu,+ atu nuneʼe ema iha mundu tomak sei hatene uma neʼe+ nia naran-boot no kmanek.+ Tan neʼe, haʼu sei prepara ba nia.” Entaun David prepara sasán barak tebes antes nia mate.
6 Liután neʼe, David bolu ninia oan-mane Salomão no haruka nia atu harii uma ida ba Jeová, Izraél nia Maromak.
7 David hatete ba ninia oan-mane Salomão: “Kona-ba haʼu, haʼu hakarak tebes atu harii uma ida ba haʼu-nia Maromak Jeová nia naran.+
8 Maibé Jeová dehan ba haʼu: ‘Ó oho ona ema barak tebes,* no ó halo ona funu boot barak. Entaun ó sei la harii uma ida ba haʼu-nia naran,+ tanba ó oho ona ema barak iha rai neʼe iha haʼu-nia oin.
9 Ó sei iha oan-mane ida+ neʼebé moris iha dame laran, no haʼu sei halo nia moris hakmatek husi ninia inimigu sira hotu neʼebé haleʼu nia,+ tanba ninia naran mak Salomão*+ no haʼu sei lori dame no hakmatek iha Izraél durante ninia moris.+
10 Nia mak sei harii uma ida ba haʼu-nia naran.+ Nia sei sai haʼu-nia oan-mane, no haʼu sei sai ninia aman.+ Haʼu sei hametin ninia kadunan nuʼudar liurai iha Izraél ba nafatin.’+
11 “Agora, oh haʼu-nia oan-mane, haʼu harohan katak Jeová hamutuk ho ó, no ó sei hetan susesu no harii uma ida ba Jeová, ó-nia Maromak, hanesan nia fó sai ona kona-ba ó.+
12 Haʼu hein katak Jeová mós fó matenek no kbiit atu komprende ba ó+ bainhira nia fó kbiit ba ó atu ukun Izraél, atu nuneʼe ó bele kumpre ukun-fuan husi Jeová, ó-nia Maromak.+
13 Depois neʼe, ó sei hetan susesu se ó halo tuir didiʼak Jeová nia mandamentu+ no desizaun sira neʼebé nia haruka Moisés atu fó ba ema Izraél.+ Sai aten-brani no sai forte bá. Labele sai taʼuk ka nakdedar.+
14 Haʼu hakaʼas an tebes atu prepara buat barak ba Jeová nia uma. Haʼu prepara ona osan-mean kilograma 3.420.000* no osan-mutin kilograma 34.200.000* no riti ho besi+ barak tebes toʼo labele tetu, no haʼu prepara ona ai-kabelak no fatuk sira,+ maibé ó sei aumenta tan sasán sira-neʼe.
15 No iha badaen barak tebes hamutuk ho ó, iha badaen neʼebé fera fatuk,+ badaen-ai no badaen matenek sira seluk.+
16 Iha osan-mean, osan-mutin, riti no besi neʼebé sura labele.+ Entaun sai prontu bá no komesa halo serbisu, no haʼu harohan katak Jeová sei hamutuk ho ó.”+
17 Tuirmai David haruka ulun-naʼin sira hotu iha Izraél atu ajuda ninia oan-mane Salomão, hodi dehan:
18 “Jeová, imi-nia Maromak, hamutuk ho imi, no halo ona imi moris hakmatek husi imi-nia inimigu iha imi-nia sorin-sorin, loos ka lae? Tanba nia halo haʼu manán ema neʼebé hela iha rai neʼe, no Jeová ho ninia povu kontrola ona rai sira-neʼe.
19 Agora imi tenke halo desizaun metin atu buka Jeová, imi-nia Maromak, ho laran tomak no moris tomak,+ no komesa harii Maromak loos Jeová nia fatin sagradu,+ atu nuneʼe bele lori Jeová nia Arka Aliansa nian no lori Maromak loos nia sasán santu sira+ hodi tau iha uma neʼebé harii ba Jeová nia naran.”+
Nota-rodapé
^ Orj., “Ó fakar ona raan barak”.
^ Husi liafuan Ebraiku neʼebé signifika “Dame”.
^ Orj., “talentu 1.000.000”.
