Rute 4:1-22
4 Boaz bá sidade nia portaun+ no tuur iha neʼebá. Ikusmai mane neʼebé Boaz dehan iha direitu atu sosa fali,+ laʼo liu daudaun. Ho ida-neʼe, Boaz hatete: “Haʼu-nia maluk,* mai lai, tuur lai iha neʼe.” Entaun nia bá no tuur.
2 Tuirmai Boaz bolu katuas naʼin-sanulu husi sidade neʼe+ no dehan: “Tuur lai iha neʼe.” Entaun sira tuur.
3 Boaz dehan ba ema neʼebé iha direitu atu sosa fali:+ “Noemi fila fali ona husi área Moab+ no ninia situasaun obriga nia atu faʼan ita-nia família Elimelec nia rai.+
4 Entaun haʼu hanoin katak haʼu tenke fó sai neʼe bá ó: ‘Sosa rai neʼe iha povu neʼe nia oin no iha katuas sira-nia oin.+ Se ó hakarak sosa rai neʼe, sosa bá. Maibé se ó lakohi, fó-hatene haʼu, tanba ó mak iha direitu liu atu sosa fali rai neʼe, no tuir ó mak haʼu.’” Ema neʼe hatán: “Haʼu hakarak sosa fali rai neʼe.”+
5 Tuirmai Boaz dehan: “Iha loron neʼebé ó sosa rai neʼe husi Noemi, ó mós tenke sosa neʼe husi Rute, ema Moab, neʼebé faluk ona, atu nuneʼe, ninia laʼen neʼebé mate ona nia naran labele lakon hamutuk ho ninia liman-rohan.”+
6 Ho ida-neʼe, mane neʼebé iha direitu atu sosa fali, dehan: “Haʼu labele sosa fali rai neʼe, tanba neʼe bele halakon haʼu-nia liman-rohan. Ó mak sosa fali bá ho haʼu-nia direitu, tanba haʼu labele sosa fali rai neʼe.”
7 Tuirmai neʼe mak toman iha tempu uluk iha Izraél kona-ba direitu atu sosa fali no troka direitu hodi halo vale negósiu ida: Mane ida tenke hasai ninia sandálias sorin+ no entrega ba ema seluk, hodi halo nuneʼe mak sira hametin akordu ruma iha Izraél.
8 Tan neʼe, bainhira ema neʼebé iha direitu atu sosa fali dehan ba Boaz: “Ó mak sosa bá”, nia hasai ninia sandálias sorin.
9 Tuirmai Boaz dehan ba katuas sira no povu hotu: “Agora imi sai sasin+ katak haʼu mak sosa buat hotu neʼebé Elimelec nian no mós Malon ho Kilion nian. Haʼu sosa buat hotu neʼe husi Noemi nia liman.
10 Haʼu mós sosa Rute, ema Moab, neʼebé uluk nuʼudar Malon nia feen. Agora nia sai haʼu-nia feen atu nuneʼe mane neʼebé mate ona nia liman-rohan labele lakon,+ no ninia naran labele lakon iha ninia maun-alin sira-nia leet no iha ninia sidade nia portaun. Ohin imi mak sai sasin.”+
11 Rona tiha neʼe, povu hotu iha sidade nia portaun no katuas hotu dehan: “Ami mak sai sasin! Ami hein katak Jeová sei haraik bensaun ba feen neʼebé atu tama ba ó-nia uma, atu halo nia sai hanesan Raquel no Lea, neʼebé harii ona umakain Izraél.+ Ami hein katak ó sei moris diʼak iha Efrata+ no hetan naran diʼak* iha Belein.+
12 Ami hein katak Jeová sei fó bensaun ba ó liuhusi oan neʼebé feto joven neʼe sei koʼus ba ó,+ no halo ó-nia umakain sai boot hanesan Peres nia umakain,+ Tamar nia oan-mane neʼebé nia koʼus ba Judá.”
13 Nuneʼe, Boaz hola Rute nuʼudar ninia feen. Nia halo relasaun seksuál ho Rute, no Jeová fó bensaun ba Rute. Nuneʼe Rute sai isin-rua no tuur-ahi oan-mane ida.
14 Tuirmai feto sira hatete ba Noemi: “Fó hahiʼi ba Jeová, neʼebé la husik hela ó tanba nia fó ona ema ida neʼebé sosa fali ó. Ami harohan katak ema sei fó sai labarik neʼe nia naran iha Izraél!
15 Nia* fó kbiit ba ó-nia moris* no sei tau matan ba ó bainhira ó ferik, tanba nia mak oan husi ó-nia feto-foun neʼebé hadomi ó,+ no feto neʼe diʼak liu fali oan-mane naʼin-hitu.”
16 Noemi koʼus oan neʼe iha ninia hirus-matan, no nia tau matan ba oan neʼe.
17 Tuirmai viziñu feto sira fó naran ba oan neʼe. Sira dehan: “Oan-mane ida moris ona ba Noemi”, no sira hanaran nia Obed.+ Obed nia oan mak Jessé,+ David nia aman.
18 Tuirmai neʼe mak Peres nia jerasaun:*+ Peres nia oan-mane mak Hezron,+
19 Hezron nia oan-mane mak Ram, Ram nia oan-mane mak Aminadab,+
20 Aminadab+ nia oan-mane mak Nasson, Nasson nia oan-mane mak Salmon,
21 Salmon nia oan-mane mak Boaz, Boaz nia oan-mane mak Obed,
22 Obed nia oan-mane mak Jessé,+ no Jessé nia oan-mane mak David.+
Nota-rodapé
^ Mane neʼe nia naran la temi iha neʼe ho neon.
^ Orj., “fó sai naran ida”.
^ Neʼe katak Noemi nia bei-oan.
^ Ka “Nia hafoun ó-nia moris”.
^ Ka “nia liña família nian”.
