Isaias 5:1-30
5 Favór ida, husik haʼu kanta ba haʼu-nia dobenKnananuk kona-ba ida neʼebé haʼu hadomi no ninia toʼos-uvas.+
Haʼu-nia doben iha toʼos-uvas ida iha foho-oan neʼebé buras.
2 Nia keʼe no hasai fatuk sira husi toʼos neʼe.
Nia kuda uvas mean nia hun neʼebé diʼak liu,Nia harii uma aas* iha toʼos neʼe nia klaran,No keʼe fatin sama uvas nian iha laran.+
Tuirmai nia hein namanas atu toʼos-uvas neʼe fó fuan diʼak,Maibé uvas-fuan aat deʼit mak mosu.+
3 “Agora, imi ema Jeruzalein no ema Judá,Favór ida, tesi-lia entre haʼu ho haʼu-nia toʼos-uvas.+
4 Haʼu halo ona buat hotu ba haʼu-nia toʼos-uvas,Saida tan mak haʼu seidauk halo?+
Bainhira haʼu hein namanas ba uvas-fuan diʼak,Tanbasá mak mosu deʼit uvas-fuan aat?
5 Agora haʼu sei fó-hatene ba imiSaida mak haʼu sei halo ba haʼu-nia toʼos-uvas:
Haʼu sei hasai tiha ninia lutu,No sunu tiha toʼos neʼe.+
Haʼu sei sobu ninia moru fatuk,No ema sei sama toʼos neʼe.
6 Haʼu sei halo toʼos neʼe sai rai-fuik;+Haʼu sei la aparu tan no mós sei la fila rai.
Neʼe sei sai nakonu ho ai-tarak no duʼut aat,+No haʼu sei haruka kalohan sira atu labele hatún udan ba rai neʼe.+
7 Jeová neʼebé ukun tropa lalehan nian, ninia toʼos-uvas mak umakain Izraél;+Ema Judá mak uvas-hun neʼebé nia gosta.
Nia hein katak sira hatudu justisa,+Maibé justisa la iha;Nia hein ba hahalok loos,Maibé iha deʼit halerik ho triste.”+
8 Susar ba ema neʼebé hadau uma ida ba ida+No sira neʼebé hadau toʼos ida ba ida+Toʼo la iha tan fatin idaNo imi hela mesak deʼit iha rai neʼe!
9 Haʼu rona Jeová neʼebé ukun tropa lalehan nian, jura onaKatak maski iha uma barak neʼebé boot no furak,Maibé sira sei sai fatin neʼebé halo ema taʼuk,No la iha ema ida mak sei hela.+
10 Toʼos-uvas ektare haat* sei fó deʼit tua-uvas litru 22,*No fini trigu* nian omer isin ida* sei fó deʼit trigu efa isin ida.*+
11 Susar ba ema neʼebé hadeer sedu iha dadeer atu hemu tua,+Sira neʼebé kontinua hemu toʼo kalan toʼo tua-uvas halo sira lanu!
12 Sira iha arpa no instrumentu ho talin,Tamborín, flauta no tua-uvas iha sira-nia festa sira;Maibé sira la hanoin buat neʼebé Jeová halo,No sira la haree serbisu neʼebé nia halo ho ninia liman.
13 Tan neʼe, ema sei lori haʼu-nia povu nuʼudar dadur*Tanba sira la iha koñesimentu kona-ba haʼu;+Sira-nia ema-boot sira sei hamlaha,+No sira-nia povu hotu sei terus tanba hamrook.
14 Nuneʼe rate* haluan ninia anNo loke ninia ibun luan toʼo la iha rohan;+Sidade neʼe nia furak,* ninia ema-lubun neʼebé barullu no ninia ema neʼebé gosta halo festaSei tun duni ba rate laran.
15 Ema sei hakruʼuk,Ema sei mout iha rai,No ema neʼebé loko an sei hateke tun ho moe.
16 Jeová neʼebé ukun tropa lalehan nian sei hetan glória liuhusi ninia tesi-lia;*Maromak neʼebé loos, Maromak neʼebé Santu,+ sei halo ninia an santu* liuhusi ninia hahalok loos.+
17 Bibi-malae oan sira sei han ho livre hanesan sira han iha rai neʼebé iha duʼut barak;Ema estranjeiru sei han iha rai-fuik, fatin neʼebé uluk animál sira han toʼo bosu.
18 Susar ba ema neʼebé bosok! Ho sira-nia bosok, sira dada sira-nia salaHanesan animál dada karrosa ho tali;
19 Sira neʼebé dehan: “Husik Nia halo lalais ninia serbisu;Husik ida-neʼe mai lalais atu ami bele haree.
Husik Izraél nia Maromak neʼebé Santu halaʼo lalais ninia hakarak*Atu ami bele hatene ida-neʼe!”+
20 Susar ba ema neʼebé dehan katak buat diʼak mak aat no buat aat mak diʼak,+Sira neʼebé troka nakukun ho naroman no naroman ho nakukun,Sira neʼebé troka moruk ho midar no midar ho moruk!
21 Susar ba ema neʼebé matenek tuir sira-nia hanoin rasikNo matenek tuir sira-nia haree rasik!+
22 Susar ba ema neʼebé hemu tua-uvas barak liuNo ba ema neʼebé matenek atu kahur tua oioin,+
23 Susar ba ema neʼebé husik livre ema aat tanba simu prezente+No sira neʼebé la hatudu justisa ba ema laran-loos!+
24 Tan neʼe, sira sei lakon hanesan ahi han duʼut-kainNo hanesan ahi han mohu duʼut-maran,Sira-nia abut sei sai dodok,No sira-nia funan sei namkari tiha hanesan rai-uut,Tanba sira la simu ukun-fuan* husi Jeová neʼebé ukun tropa lalehan nianNo la hatudu respeitu ba liafuan husi Izraél nia Maromak neʼebé Santu.+
25 Tan neʼe mak Jeová nia hirus lakan makaʼas hasoru ninia povu,No nia sei lolo liman hasoru sira no fó kastigu ba sira.+
Foho sira sei nakdoko,No sira-nia mate-isin sei sai hanesan foʼer iha dalan.+
Tan razaun neʼe, nia la hatún ninia hirus,Maibé ninia liman sei lolo nafatin atu ataka.
26 Nia tau sinál* ba nasaun ida iha fatin dook;+Nia hakfuʼik ona atu bolu sira mai husi rai neʼebé dook tebes;+No haree bá! Sira mai lalais loos.+
27 La iha ema neʼebé kole ka sidi iha sira-nia leet.
No la iha ema ida mak matan todan ka dukur.
Sira la kore sintu iha sira-nia knotak,Sira-nia sandálias talin mós la kotu.
28 Sira-nia rama-oan hotu kroʼat,No sira dada ona rama.*
Sira-nia kuda nia ain-kukun toos hanesan fatuk-ahi,No sira-nia roda hanesan anin-fuik.+
29 Sira hasai lian hanesan leaun;Sira hasai lian hanesan leaun-aman.+
Sira sei hasai lian siʼak no kaer animál neʼebé sira atu hanNo sira sei lori animál neʼe no la iha ema ida mak salva.
30 Iha loron neʼebá, sira sei hasai lian ba sira-nia vítimaHanesan tarutu husi tasi nia laloran.+
Ema hotu neʼebé hateke ba rai neʼe sei haree nakukun neʼebé halo neon-susar;No naroman mós sei sai nakukun tanba kalohan sira.+
Nota-rodapé
^ Ka “torre”.
^ Orj., “sukat 10”.
^ Ka “sevada”.
^ Haree “Ezíliu” iha Glosáriu.
^ Ka “nia ema-boot sira”.
^ Haree “Siol” iha Glosáriu.
^ Ka “justisa”.
^ Haree “Halo santu” iha Glosáriu.
^ Ka “desizaun; konsellu”.
^ Ka “hanorin”.
^ Ka “harii ai-riin sinál nian”.
^ Ka “prontu atu hana”.
