Isaias 22:1-25
22 Tuirmai neʼe mak liafuan kastigu nian kona-ba Foho-Leet Vizaun:*+
Tanbasá mak imi hotu saʼe ba uma-kakuluk?
2 Ó-nia sidade sei sai runguranga,Rame, no nakonu ho foti an.
No ó-nia ema neʼebé mate, sei la mate ho surik,No sira sei la mate iha funu.+
3 Ó-nia ukun-naʼin aat hotu sei halai hamutuk.+
Ema la presiza uza rama atu lori sira nuʼudar dadur.
Maski sira halai dook loos,Maibé ema sei kaer sira no lori sira hotu nuʼudar dadur.+
4 Tan neʼe mak haʼu dehan: “Keta hateke ba haʼu,Haʼu sei tanis makaʼas.+
Keta fó kmaan ba haʼuTanba haʼu-nia povu nia oan-feto* lakon ona.+
5 Neʼe mak loron neʼebé Naʼi Ukun-Naʼin Boot Liu, Jeová neʼebé ukun tropa lalehan nian,Halo ema bilán, sente taʼuk no lakon+Iha Foho-Leet Vizaun.
Ninia moru rahun daudaun+No ema hakilar hodi husu ajuda. Sira-nia lian toʼo iha foho neʼe.
6 Elam+ foti ona rama-fatinNo hamriik iha karreta funu nian neʼebé kuda sira mak dada,No Kir+ prepara ninia eskudu.*
7 Ó-nia* rai-tetuk sira neʼebé diʼak liuSei sai nakonu ho kuda-karreta funu nian,No kuda sira* sei hamriik hodi sai prontu iha ó-nia portaun oin,
8 No ema sei hasai Judá nia moru neʼebé proteje nia.
“Iha loron neʼebá ó sei hateke ba armas-fatin iha Uma Ai-Laran nian,+
9 no imi sei haree kuak barak iha moru husi David nia Sidade.+ No imi sei halibur bee iha kolan kraik.+
10 Imi sei sura uma sira iha Jeruzalein, no imi sei harahun uma sira hodi bele halo metin moru.
11 No imi sei halo tanke entre moru rua atu rai bee husi kolan tuan nian, maibé imi sei la hanoin kona-ba imi-nia Kriadór Boot neʼebé hamosu susar neʼe, no imi sei la haree Ida neʼebé halo planu neʼe iha tempu ulukliu.
12 Iha loron neʼebá, Naʼi Ukun-Naʼin Boot Liu, Jeová neʼebé ukun tropa lalehan nian,Sei haruka povu atu tanis no lelir,+Atu koi fuuk no hatais hena karón.*
13 Maibé duké halo nuneʼe, ema halo festa no haksolok,Ema oho karau no bibi,Ema han naʼan no hemu tua-uvas.+
Imi sei dehan: ‘Mai ita han no hemu, tanba aban ita sei mate.’”+
14 Tuirmai, Jeová neʼebé ukun tropa lalehan nian mosu ba haʼu, hodi dehan: “‘Imi-nia sala neʼe sei la hetan perdua* toʼo imi mate’,+ Naʼi Ukun-Naʼin Boot Liu, Jeová neʼebé ukun tropa lalehan nian, mak dehan.”
15 Naʼi Ukun-Naʼin Boot Liu, Jeová neʼebé ukun tropa lalehan nian, dehan nuneʼe: “Bá hasoru Sebna,+ atan neʼebé tau matan ba liurai nia palásiu no dehan:
16 ‘Ó hakarak saida iha neʼe? Ó iha família ruma iha neʼe hodi ó keʼe rate ba ó-nia an rasik ka?’ Nia keʼe rate ba ninia an iha fatin aas ida; nia keʼe kuak atu halo rate ba nia an iha fatuk boot lolon.
17 ‘Haʼu, Jeová, sei soe tun ó ho makaʼas, no sei kaer ó ho forsa,
18 no mós falun metin ó no soe ó hanesan soe bola ba rai-luan. Ó sei mate iha neʼebá hamutuk ho ó-nia kuda-karreta neʼebé kmanek, no ó sei hamoe ó-nia naʼi nia umakain.
19 No haʼu sei hasai ó husi ó-nia pozisaun no duni sai ó husi ó-nia serbisu.
20 “‘Iha loron neʼebá, haʼu sei bolu haʼu-nia atan Eliaquim,+ Hilquias nia oan-mane,
21 haʼu sei fó-hatais nia ho ó-nia roupa no haʼu sei kesi metin ó-nia sintu iha ninia knotak,+ no haʼu sei entrega ó-nia kbiit* ba ninia liman. No nia sei sai aman ba ema neʼebé hela iha Jeruzalein no ba umakain Judá.
22 No haʼu sei tau xave husi David nia umakain+ iha ninia kabaas. Nia sei loke no la iha ema ida mak bele taka; nia sei taka no la iha ema ida mak bele loke.
23 Haʼu sei hametin nia hanesan ema baku metin pregu ba moru ida, no nia sei sai nuʼudar kadunan glória nian ba ninia aman nia umakain.
24 Glória* hotu husi ninia aman nia umakain sei tara ba nia. Ninia oan no bei-oan sira sei sadere ba nia hanesan sanan kiʼik, manko no buli boot hotu neʼebé tara iha pregu neʼe.
25 “Jeová neʼebé ukun tropa lalehan nian, dehan: ‘Iha loron neʼebá, haʼu sei losu tiha pregu neʼebé baku metin ona ba moru,+ no haʼu sei tesi tiha ida-neʼe no neʼe sei monu, no naha todan neʼebé nia tahan netik sei monu no rahun tiha tanba Jeová rasik mak fó sai ona ida-neʼe.’”
Nota-rodapé
^ Karik neʼe refere ba Jeruzalein.
^ Liafuan “oan-feto” uza iha poezia atu hatudu sentimentu kuitadu ba povu.
^ Orj., “hasai buat neʼebé taka eskudu”.
^ Neʼe refere ba “haʼu-nia povu nia oan-feto” neʼebé temi ona iha ver. 4.
^ Ka “tropa neʼebé saʼe kuda”.
^ Haree “Hena karón” iha Glosáriu.
^ Ka “sei labele hamoos”.
^ Ka “ukun”.
^ Orj., “Todan”.
