Juís 7:1-25
7 Depois neʼe, Jerubaal, katak Gideão,+ no tropa hotu neʼebé hamutuk ho nia hadeer sedu no bá toʼo Bee-Matan Harod no harii sira-nia hela-fatin iha neʼebá, no tropa Midian hela iha sira-nia parte norte, iha foho-oan Moré iha rai-tetuk neʼe.
2 No Jeová dehan ba Gideão: “Haʼu labele entrega ema Midian ba ó-nia liman tanba iha ema barak demais hamutuk ho ó.+ Se lae, ema Izraél sei gaba an hasoru haʼu no dehan: ‘Ami-nia liman rasik mak salva ami.’+
3 Entaun favór ida, fó avizu iha tropa sira-nia oin, hodi dehan: ‘Sé mak taʼuk no nakdedar, diʼak atu nia fila fali ba uma.’”+ Nuneʼe, Gideão koko sira. Ho ida-neʼe, ema naʼin-22.000 fila fali ba uma, no hela deʼit ema naʼin-10.000.
4 Maibé Jeová hatete ba Gideão: “Agora sei iha ema barak demais. Entaun, haruka sira tun ba mota neʼe atu haʼu bele koko sira iha neʼebá. Bainhira haʼu hatete ba ó: ‘Ema neʼe sei bá hamutuk ho ó’, nia sei bá ho ó, maibé bainhira haʼu dehan ba ó: ‘Ema neʼe sei la bá hamutuk ho ó’, nia sei la bá ho ó.”
5 Entaun Gideão lori povu neʼe tun ba mota.
Tuirmai Jeová hatete ba Gideão: “Haketak ema hotu neʼebé horut bee ho sira-nia nanál hanesan asu sira halo, husi ema sira neʼebé hakneʼak hodi hemu.”
6 Mane naʼin-300 mak tau sira-nia liman ba sira-nia ibun hodi horut bee. Maibé mane sira seluk hakneʼak hodi horut bee.
7 Tuirmai Jeová hatete ba Gideão: “Haʼu sei salva ó liuhusi mane naʼin-300 neʼebé horut bee ho sira-nia liman, no haʼu sei entrega ema Midian ba ó-nia liman.+ Maibé husik ema sira seluk fila ba uma.”
8 Entaun bainhira tropa sira foti tiha ai-han no animál nia dikur husi tropa sira seluk, Gideão haruka tropa Izraél sira-neʼe fila fali ba uma, no hela deʼit mane naʼin-300 mak hamutuk ho nia. Iha tempu neʼebá tropa Midian hela iha ninia kraik, iha rai-tetuk iha foho hun.+
9 Durante kalan neʼe, Jeová hatete ba nia: “Hamriik bá, ataka tropa nia hela-fatin, tanba haʼu entrega ona sira ba ó-nia liman.+
10 Maibé se ó taʼuk atu ataka, entaun tun ba hela-fatin neʼe hamutuk ho ó-nia atan Pura.
11 Rona ba buat neʼebé sira hatete, no depois neʼe, ó sei sai aten-brani* atu ataka sira.” Ho ida-neʼe, Gideão no ninia atan Pura tun ba tropa nia hela-fatin nia ninin.
12 Iha tempu neʼe, ema Midian, ema Amalec no ema hotu husi área Leste+ taka rai-tetuk neʼe tomak hanesan gafañotu neʼebé barak, no sira iha kuda-kamelu barak tebes toʼo sura labele,+ hanesan rai-henek iha tasi-ibun.
13 Bainhira Gideão toʼo iha fatin neʼe, iha mane ida konta hela ninia mehi ba nia maluk, hodi dehan: “Neʼe mak mehi neʼebé haʼu hetan. Iha paun fuan ida husi sevada* duir tama ba tropa Midian nia hela-fatin. No paun neʼe duir toʼo tenda ida no xoke makaʼas tenda neʼe toʼo naksobu.+ Sin, ida-neʼe halo tenda baku fila ho ulun ba kraik, no tenda neʼe monu tetuk tiha.”
14 Ho ida-neʼe, ninia maluk hatete: “Klaru katak ida-neʼe mak Joas nia oan-mane Gideão, ema Izraél, nia surik.+ Maromak entrega ona ema Midian no tropa hotu ba ninia liman.”+
15 Bainhira Gideão rona nia konta mehi neʼe no ninia signifika,+ Gideão hakruʼuk kedas hodi adora Maromak. Depois neʼe, nia fila fali ba tropa Izraél nia hela-fatin no dehan: “Hamriik bá, tanba Jeová entrega ona tropa Midian ba imi-nia liman.”
16 Tuirmai nia fahe mane naʼin-300 ba grupu tolu no fó ba sira hotu dikur+ no buli boot neʼebé mamuk hamutuk ho ahi-oan iha buli sira-neʼe nia laran.
17 Depois neʼe, nia hatete ba sira: “Haree didiʼak ba haʼu no halo tuir buat neʼebé haʼu halo. Bainhira haʼu toʼo iha tropa nia hela-fatin nia ninin, imi tenke halo tuir didiʼak buat neʼebé haʼu halo.
18 Bainhira haʼu no ema hotu neʼebé hamutuk ho haʼu huu dikur, imi mós tenke huu dikur haleʼu tropa nia hela-fatin neʼe no hakilar dehan: ‘Ba Jeová no ba Gideão!’”
19 Gideão no mane naʼin-100 neʼebé hamutuk ho nia toʼo iha hela-fatin neʼe nia ninin iha tempu neʼebé foin troka guarda sira atu hein iha kalan-boot.* Tuirmai sira huu dikur+ no harahun buli bee nian neʼebé iha sira-nia liman.+
20 Nuneʼe grupu tolu huu dikur no harahun buli boot sira. No sira kaer ahi-oan iha liman-karuk no huu dikur ho liman-loos no sira hakilar dehan: “Jeová no Gideão nia surik!”
21 No mane ida-idak hamriik iha ninia fatin haleʼu tropa nia hela-fatin neʼe, no inimigu hotu halai, no sira hakilar nuʼudar sira halai.+
22 Mane naʼin-300 neʼe kontinua huu dikur, no Jeová halo tropa ida-idak komesa oho malu.+ Tropa sira-neʼe halai ba Bet-Sita, no toʼo Zerera, no kontinua halai toʼo Abel-Mehola+ nia baliza besik Tabat.
23 No Gideão bolu mane Izraél sira husi Naftali, Aser no Manasés tomak+ hodi halibur hamutuk, no sira duni tuir ema Midian.
24 Gideão haruka ema lori lia-menon ba Efraim nia área foho nian tomak, hodi dehan: “Tun bá atu ataka ema Midian, no bá ulukliu sira toʼo Bet-Bara no Mota Jordaun, no hanetik ema Midian atu labele hakur mota neʼe.” Nuneʼe mane Efraim hotu halibur hamutuk, no sira bá toʼo Bet-Bara no Mota Jordaun, no sira hein iha neʼebá.
25 Sira mós manán ema Midian nia ulun-naʼin naʼin-rua, Oreb no Zeeb. Sira oho Oreb iha fatuk Oreb nia leten,+ no sira oho Zeeb iha Zeeb nia fatin sama uvas nian. Sira kontinua duni tuir ema Midian,+ no lori Oreb no Zeeb nia ulun ba Gideão iha área Mota Jordaun nian.
Nota-rodapé
^ Orj., “ó-nia liman sei sai forte”.
^ Maizumenus husi tuku 10 kalan toʼo tuku 2 dadeer.
